Mɨngwiha 12 - Kálara Zyɛ̌m Edwán é mpʉ̌n

Mʉma bé e bwaʼbwaʼ myɔɔ

¹ Pie tɨ, bwaʼbwaʼ dweʼle nkul mo Zyɛm, yé a si nyin é jobo kʉ. Me a bee ó, mʉma lé ebwar dobo mpʉ kan! Alomo ó b'a be cyela mokʉ ye! Nye a be ó e baatwitwɛn ewʉm e l'oba lé ebʉmra lʉ we é nka, bɛɛ lé enwɨɨla e l'epʉʼlʉ.

² Mʉma waa a be ó e l'ebum é ntuumo, lé ekʉ jaʼra e min, lé ejɨ bya. No ó nye a ka time-time e.

³ Yʉʉ dweʼle nkul mo Zyɛm, yé ntɔʼ nyin nteme é jobo kʉ: bwaʼbwaʼ myɔɔ akaa-e-kaa. Wé a be ó e mɨlʉ tambɛl, ndwe e mopʉʼlʉ mo gol é mɨlʉ mye, ndwe e bɨntoo ewʉm.

⁴ Wé a si syɛm kʉn we, pile baatwitwɛn e tɨ, jala e nkɔb ngwar é monkɔb molɛl. Wé ze syɛŋ be, guho be kaʼ é si nwa. Wé a cyɛb-cyɛb ó, é mih mo mʉma a be lé ejɨ bya ɛ. Wé a be e jwɨʼ ó, ǃɨ mʉma óbe si bya mwan waa nɛʼɛ, wé mina nye é nkwɔʼ.

⁵ Mʉma waa ntɔʼ ze bya mwan, ma mʉrʉm. Jɨh tɨʼ nye a kʉ bya nye, mwan waa ntɔʼ toŋɔ e nye é mih mo Zyɛm, gumo nye ndɨ é dia taʼa ye e. Mwan waa óbe ó njwɨɨ nɨnɨ ópala bʉr o bɨkul bɨ si nwaʼ bibyɛh e jwɨɨ é lele lele mpʉ fumo nkoho e.

⁶ No ó, mʉma nyɛɛ a si kpɛɛ, to é feha si, to di fum Zyɛm a bɛa komlo é l'efu le e. Zyɛm ó b'a baʼle nye gʉ. Nye a di gʉʼ ó, tɔɔ molu tɔɔyin e mɨnter mɨmba e mowʉm tobo (1.260).

⁷ No ó dɔm, lé a ze bʉl é jobo kʉ. Mikaɛl bé e beengles be, bé a si lwimla e bwaʼbwaʼ myɔɔ waa. No ó myɔɔ waa nteme, wé a ze gohlo beengles be, ze lʉo dɔm e l'esama e dɔm mo Mikaɛl.

^8-9 Mikaɛl bé e l'esama e beengles be, bé ze fo bwaʼbwaʼ myɔɔ waa. Bé e beengles be bɨbɛh ntɔʼ duho kʉ, nkaŋa si é sɨŋ, ebe, yé a baaka be e bɨdia é jobo kʉ é l'efu lɔɔ. Myɔɔ waa, wé a bɛa be ó kʉʼrʉ nyʉa, duho mya. Wé ó waa lé egomlo odil o si nwaʼ bɨbɛh é bebebebe zi ɨ. Bé ejebe nye die ó, Njwɨɨ moleme, nkʉ Satan.

¹⁰ Pie tɨ, me a si joʼo bwaʼbwaʼ twii é jobo kʉ. Twii waa a lɛɛ kʉ kʉ ó: «Banana Zyɛm, nyi lɛʼle ó, tiʼ njʉmdia, le nkul, le jwɨɨ, byé ó bɨsa bye. Lœma mulo mo Zyɛm, nyi lɛʼle ó, nye ó ndɨ e nkul mojwɨ̀ʼa, ebe, bɨ fo waa a nwahle obuʼla jɔʼ yiyɛh é mih mo Zyɛm moho e pum ɨ. Bɨ guho nye si!

¹¹ Obɨɔ ga bɨna nteme, bɨ ntaa nye é dɔm, bula e l'esaa é koo, ebe motié mo Ma Ntœme, ndwe e mboʼla bé a boʼlo, tiibe e Yesʉs ɨ. Bim bé a kpɛl bɨtiʼ byɔɔ ɛ, bé a baaliʼa lé ebir bye, ntɔʼ jʉŋɔ, ebe mboʼla waa.

¹² Ebe no, bɨn, bʉr o ndɨ é jobo kʉ ɨ, soha ga. A vwaʼ e bʉr o ndɨ é si ndwe e maŋ ɨ! Bé óbul tíile bɨn, ebe, Njwɨɨ moleme, nyi ze gʉʼ bɨn ye, nyɛɛ e l'empime é leme, ebe, nyi ka gʉa ó, jɔʼ ye, yi liʼ njɨ ba titia.»

¹³ No ó, é jɔʼ kʉʼrʉ myɔɔ, wé a guhɔ kaʼ si ɨ, wé ntɔʼ taare lé etíile mʉma a bya ma mʉrʉm waa ɛ.

¹⁴ Bé ntɔʼ dwe mʉma waa mompaba moba, mpʉ maa mo bwaʼbwaʼ mpele-nɔn. Nye a dweŋɔ me ó, nye piili e mompaba maa, to é feha si, to di fum Zyɛm óbaʼle nye e. Nye a si to di gʉʼ tɔɔ mɨmbu mɨlɛl e peh, lé efwab bwaʼbwaʼ kʉʼrʉ myɔɔ.

¹⁵ Kʉʼrʉ myɔɔ ze pyɛl buobuo modibe é nʉm we, yé mu mpʉ mpaŋ sʉm dibe. Nye a sa no ó, mpɨɨ waa duʼo mʉma waa nko nye a dɨ piili ɨ. ǃƗ mpɨɨ si kœb nye nɛʼɛ, nye ójʉ nye.

¹⁶ Sa gwar, si a si kɛm mʉma. Nye a si bɛɛ nʉm, ntɔʼ mine mpɨɨ a duho é nʉm myɔɔ ɛ, nyiwɛh.

^17-18 Jɔʼ myɔɔ, wé a bee no e, wé ntɔʼ kpaa empime e mʉma waa é buobuo. No ó, wé ntɔʼ bula, to lʉo dɔm e bwan mo mʉma waa. Bwan be baa ó ndɨ edu motie mo Zyɛm, le eboʼlo é lɔb mo Yesʉs.