Mɨngwiha 11 - Kálara Zyɛ̌m Edwán é mpʉ̌n

Oboʼla oba

¹ Me ze dweŋɔ ma lɨ bé lé ejwɨʼ-jwɨʼ bɨsɔʼɔ e tɨʼ ɨ. Bé ze lɛɛ e me ó: «Mʉŋa si. Toʼ, to jwɨʼ Odia mo Zyɛm. Go à jwɨʼ nteme taa mɨndwɛa ndɨ é l'efu e motwina ɛ. Go òláa nteme bim bʉr lé edwiibɨ Zyɛm tɨʼ ɨ.

² Ajwɨʼ jahla bii mo Zyɛm, ebe, Zyɛm a pɛʼ ye ó, dwe bʉr o ndɨ abe oYʉden ɨ. Mokʉ mɔɔ, mé ótíile nkana ndɨ e l'ekɛn ó, tɔɔ ongɔn mowʉm monâ e l'oba.

³ No ó, me ódwe bʉʉ oboʼla bam oba nkul ó, bé ntaʼ, ze lwib é die lam. Bé ókʉba mɨnkura le eto le egwih lɔɔ wam tɔɔ molu tɔɔyin e mɨnter mɨmba e mowʉm tobo (1.260).»

⁴ Oboʼla oba baa, bé ecyɛb é mih mo Njwɨɨ si nwaʼ nyiwɛh ó, mpʉ bɨlɨ bɨ olivye bɨba, ndwe nteme mpʉ bɨcye molama bɨba.

⁵ ǃƗ bʉr o dɔm bɔɔ si gwɨm ó, bé sa ó be sa ebebe nɛʼɛ, oboʼla bam, bé ójʉ be e siʼe, siʼe yaa lé eduho be é mɨnʉm. ǃƗ mʉr si gwɨm ó, bé sa ó be sa ebebe nɛʼɛ, yé ekʉ jala e bɨha bʉr ó, bé jʉŋɔ!

⁶ Jɔʼ bé ódɨ gwih mɨlɔb mo Zyɛm ɨ, bé óbe e nkul emɛr ompie ó, bé l'ayi ka nwɨɨ. Ndwe nteme, bé óbe ó e nkul esa ó, modibe, mé lihba motié. Bé óbe ó e nkul entɨh odil o si nwaʼ bɨbɛh bɨbɨbla bɨsɔʼɔ mɨmbi mɨmbi, dɨ ntɨh é jɔʼ yiyɛh bé kpɛl ɨ.

⁷ No ó, é jɔʼ bé ósil sa mboʼla wɔɔ ɛ, tir monyan óduho é Bɨ-siʼe. Tir waa ólʉo dɔm e be, ntaa be é nkul, le ejʉ be.

⁸ No ó, mɨmuu myɔɔ, myé ójyɛʼɔ ó, é mpaʼa é nkɛŋlɛm é bwaʼbwaʼ nkana yaa. É nkana yaa ó Tî ga wina boo nɔɔ a bomlɔ e mosen, bɨnɔ é klos kʉ ɨ. Die e nkana yaa, bé ejebe-jebe le é lwib odim ó, Sodɔm, nkʉ Egipten.

⁹ Buobuo bʉr, bé óze bee mɨmuu myɔɔ ó, tɔɔ molu molɛl e peh. Bé óbe ó bʉr o mɨlal mimyɛh, bʉr o moveh mɨmɛh, bʉr o bɨlwib bibyɛh, ndwe e bʉr o bɨkul bibyɛh. Bé aŋa mɛʼle ó, bé deba é mofoo.

¹⁰ Odil o si nwaʼ bɨbɛh, bé óbul soho, ebe, bʉr oba baa, bé a si ka dwè. Bé ócyel zɔɔ bɨsʉhʉ, ebe, ogwiha o mɨlɔb oba baa, bé a si bul bʉ be mɨlʉ. Bʉr, bé ódweela bɨsɔʼɔ é mpwaʼ bɨsʉhʉ byɔɔ.

¹¹ No ó, é jɔʼ molu molɛl e peh maa, mé a be, mé mu si laa ɛ, Zyɛm a si gumlo ngul tiʼ we é bʉr oba baa. Ngul we ze ni be é monyʉl, bé ntɔʼ pàh, cyɛb cɨcyel. Bʉr bɨbɛh, bé a bee be e, bé ntɔʼ bul laŋle bil ekɛn.

¹² Jɔʼ bé a cyɛb ocɨcyel ɨ, bé ze joʼo bwaʼbwaʼ twii lé eduho é jobo kʉ, lé elɛɛ e be ó: «Bera ga. Ntaʼ ga kaʼ kʉ.» No ó bé a ze bere, to kʉ é mɨnkur tʉŋlʉ, bʉr o dɔm bɔɔ lé ebee.

¹³ Si a si bul ncyeŋa é jɔʼ gwar yaa. No ó, mɨmbɛr mɨ nkana yaa, myé a si bul duma si, to pyal é nkɔb ngwar é monkɔb ewʉm. Jɔʼ si a ncyeŋa ɛ, bʉr, bé a si dwè, tɔɔ otɔɔyin tambɛl. Baa b'a ka liʼ mɨkubla ɛ, bé a si bul joʼo bʉa. Bé ntɔʼ gumlo Zyɛm ndɨ é jobo kʉ ɨ.

¹⁴ Tuu mba, wi laa. Waa lɛl ó ma ze nɨ.

Sebe tambɛl

¹⁵ Pie tɨ, engles tambɛl a si lʉo sebe we. Me ntɔʼ joʼo bɨbwaʼbwaʼ motwii, duho é jobo kʉ. Mé a lɛɛ ó: «Da Zyɛm Sɔŋ ga wina, nye ejwɨʼ mɨlal mɨ si nwaʼ mimyɛh. jwɨ̀ʼa ye, yé mu nteme ó, yaa mo Lœma mulo mo Zyɛm. Nyɛɛ ó ndɨ e jwɨ̀ʼa njʉmdia.»

¹⁶ Otamabʉr mowʉm moba e l'onâ bé a be ondindil é bɨdia bɨ taʼa é mih mo Zyɛm ɨ, ntɔʼ bɨʼɔ mompom mɔɔ si é mih mo Zyɛm, lé edwiibɨ nye.

¹⁷ Bé ó: «Da Zyɛm Nkul nyiwɛh! Go ó b'a bɛa be. Go nteme ó dina. Bɨh bé edwe go ekiba é lɔb mpwaʼ nkul go. Gɨ cyɛb njwɨɨ.

¹⁸ Bʉr o ndɨ ejeʼe go e, bé a si bul kpaa empime e go. No ó, banana, yé mu ó jɔʼ gwɔɔ lé ejala le ekpaa empime e be e. Yé nteme mu ó jɔʼ eka tiʼe odwè mɨlɔb. Go ódwe osyɛl o mosa bo bɨbɛh myɛna, taare é l'ogwiha o mɨlɔb bo, le mɨsaŋ mɨ bʉr myo, to pyal é bʉr bɨbɛh lé edwaabe die lo e, taare é baanteʼenteʼe, to pyal é l'osabene. Sa gwar, ojʉl o bʉr bɨbɛh bɛɛ, go ósil lé ejʉ be é pe.»

¹⁹ Jɔʼ bé a sil lwib no e, Odia mo Zyɛm ndɨ é jobo kʉ ɨ, wé a si bɔa. No ó, Wolo sàa yé a be tɨʼ ɨ, yé a si nyin bʉr é mih é nkɛŋlɛm. Me ze bee mɨndweh é keb-keb, joʼo mɨndum mɨ mpie lé edumo é nkʉʉʉ, joʼo mpâm nkɛl-jobo lé esala é kaaa. Si kʉ ze ncyeŋa. Motana nteme ze taare lé ekur é buobuo.