Mɨngwiha 1 - Kálara Zyɛ̌m Edwán é mpʉ̌n

Ekan le efoʼ

¹ Yesʉs, Lœma mulo mo Zyɛm, a si gwih mɨfela mɨlɔb Zyɛm a gwih nye ó, nye lɛʼla osyɛl o mosa be e, ó bé gʉŋa sa ndɨ kunokuno e. Nye a gwih mye ó, lé elomlo me engles we, mɛm syɛl mosa we Yʉanes.

² Me ó mboʼla é nko paʼ bɨsa bibyɛh me a bee e. Me eboʼlo ó, tiibe e mɨlɔb mo Zyɛm ndwe e sa Yesʉs-Krɨst lé eboʼlo é kalara nwaʼ ɛ.

³ Mocyɛʼ mo mpom, mé swɨŋɨ é waa lé eláa mɨlɔb ndɨ mɨngwiha é kalara nwaʼ ɛ. Mocyɛʼ mo mpom, mé swɨŋɨ nteme é baa lé ejoʼo le ebaʼle mɨngwiha mɨlɔb ndɨ tɨʼ ɨ. Gʉŋa ga ó, jɔʼ bɨsa byaa, byé ósyɛɛlɨ ɨ, yé mu ó kunokuno le epyal.

⁴ Mɛm Yʉanes ó lé etile bɨn, bʉr o mɨmbɛr mɨ Zyɛm tambɛl ndɨ é lal Azia ɛ. Mocyɛʼ mo mpom le motala mo Zyɛm, mé swɨŋɨ é bɨn. Nye ó waa a bɛa be, waa ndɨ, ndwe e waa lé eze e. Mé diʼe e bɨn nteme, duho é Mbɨambɨa Sisim ndɨ ti, waa ndɨ é l'empom e dia taʼa ye e.

⁵ Mocyɛʼ mo mpom le motala mo Yesʉs-Krɨst, mé swɨŋɨ é bɨn. Nye ó ndɨ mpaŋ mboʼla, le mʉr ebuʼlɔ. Nye ó mwan modweʼe mo Zyɛm a pàh é foo e. Nye ó ndɨ ejwɨʼ mɨnjwɨɨbʉr mɨ si nwa. Nye a si kpɛl bɨna ga, nye ze sʉ motié me si, lé edwih bɨna ga é mpila mɨsyem ga mina é pololo.

⁶ Nye ó b'a niŋle bɨna ga é jwɨ̀ʼa ye, le esa ó, bɨna diʼe ga opara lé esea e Sɔŋ we Zyɛm ɨ. Kum e nkul, byé diʼe e nye njʉmdia e njʉmdia. Amɛn!

⁷ Mbe ga: nye ó ma ze é nkur tʉŋlʉ nɨ! Bʉr bɨbɛh, to kumo kuma e baa b'a kar nye ekʉa é bɨmpah ɛ, bé óbee nye. Bʉr o moveh mo si nwaʼ bɨbɛh, bé ósa efie le. Eee, yé óbe ó no! Amɛn!

⁸ Da Zyɛm, nye elɛɛ ó: «Me ó ndɨ waa efoʼ ndwe e waa epihe. Me ó waa a bɛa be, waa dina, waa ófuʼla ɛ. Me ó ndɨ Zyɛm Nkul nyiwɛh.»

Yʉanes lé ebee bɨsa bɨ jehe é jobo kʉ

⁹ Yé ó mɛm mɨɔ win Yʉanes. Bɨna ga bé ó é zyɛŋa-mɨleme obuʼla tʉŋlʉ. Bɨna ga bé ó bʉr o ndɨ ebɔma e tíila gwar ɨ. Bɨna ga bɨbɛh, bé ó é jwɨ̀ʼa mo Yesʉs. Bɨna ga bɨbɛh, bé edihbe mɨtuu mɨmpwar ebe nye. Bé a si mɛr me, pɨrɔ me é dine Patmos. Bé a sa me no ó, ebe lɔɔ Zyɛm me a be lé elɛɛ ɛ, ndwe e mboʼla me lé eboʼlo, tiibe e Yesʉs ɨ.

¹⁰ É lʉʉ dobo mo Da Yesʉs, Mbɨambɨa Sisim a be ó si mɛr me e nkul, me ze joʼo twii lé elwib, mʉr tɨʼ lé ecyɛb me é koo pihe. Twii we, nye a jwɨ̂ʼ ó mpʉ sa cɨŋɔ ó, yé ó sebe lé elwɨɨ ɨ.

¹¹ Nye e me ó: «Sa go lé ebee e, tila ye é kalara. Go à pile nye, cen mɨmbɛr mɨ Zyɛm tambɛl ndɨ ɨ Efɛɛz, ɨ Smirna, ɨ Pɛrgamos, ɨ Tiatir, ɨ Sardɛs, ɨ Filadɛlfi, ndwe ɨ Laodisea ɛ.»

¹² É jɔʼ me a dwibra ó, me dwɛʼ ó mʉr a be lé elwib e me e, no ó me a ze bee bɨcye molama bɨ gol tambɛl.

¹³ Teme bɨcye molama byaa, me ze bee yʉʉ sɔʼɔ lé enwɨɨla e mamʉr. Nye a bwar ó, dur é jaa jaa, to pyal é mokʉ si. Nye a be nteme ó e kana gol tiila é kubo.

¹⁴ Mpuo lʉ we a be ó é pumo-pumo mpʉ egul nkʉ epɛm. Mih me, mé a be ó mpʉ njʉl siʼe.

¹⁵ Mokʉ me, mé a be ó, nyʉl é zʉʉŋ, mpʉ nkoho lé ebul pan é jɔʼ yi gbaŋɔ é duro e molul ɨ. Twii we a jwɨ̂ʼ-jwɨ̂ʼ mpʉ sa cɨŋɔ ó, yé ó mosʉʼ montibe é buobuo.

¹⁶ É l'ekœh le ejʉm le, nye a be ó e baatwitwɛn tambɛl. Nye a be nteme ó e fòŋ, njèba mii mɨpaʼ mɨmba. Fòŋ we, wé a duho nye ó, é nʉm! Mpom we a dɨ pan ó, é tuuu, mpʉ mbah dobo lé epan teme moho e.

¹⁷ É jɔʼ me a bee nye e, me ze bɨʼ mpom wam si é mih me, me mu mpʉ muu, mpur é sehe. Nye ntɔʼ kɛl mbo ejʉm we é nyʉl wam. Nye e me ó: «Ajoʼo bʉa. Me ó ndɨ mʉr efoʼ ndwe e mʉr epihe.

¹⁸ Me ó waa ndɨ kublakubla ɛ. Me a si dwè. Mbe ga: me mu ó é tiʼ molu mo mpoʼ mɨmɛh! Me ó ndɨ e bɨdiba bɨ zi mɨndim, ndwe e byaa bɨ kwar odwè.

¹⁹ Ebe no, tila bɨsa go bee e. Tila é lɔb bɨsyɛɛla mu lé esyɛɛlɨ ɨ ndwe e byaa byé ófuʼla syɛɛ pie tɨʼ ɨ. Baatwitwɛn tambɛl go lé ebee é l'ekœh le ejʉm lam ɨ, le bɨcye molama bɨ gol tambɛl bi,

²⁰ sa lé elɛɔ tɨʼ é lwib odim ó yi: baatwitwɛn tambɛl, bé ó beengles tambɛl lé edwiile mɨmbɛr mɨ Zyɛm tambɛl ɨ. Bɨcye molama byaa byɛɛ, byé edweʼle ó mɨmbɛr mɨ Zyɛm tambɛl myaa.»