Mɨlʉmlʉ 9 - Kálara Zyɛ̌m Edwán é mpʉ̌n

Sol, nyi bɔma e Da Yesʉs

¹ É til molu yaa, Sol a baapa gwaʼ lé eguno ó, nye jʉ ó ompʉn mo Da Yesʉs. Nye ze to bee njwɨɨ opara,

² lé eto dî nye okalara lé edwe nkul é paʼ mompah mɨnjwɨʼla mɨ oYʉden ndɨ ɨ Damas ɨ. ǃBé si láa wa, bé òbir nye, ó nye mɛrɨ bʉr o lé edu Zi Tiʼ ɨ. Nye òbula e be mobo mɨkɛʼa Yerʉsalɛm, taare é bʉba, to pyal é bʉrʉm.

³ No ó nye a nkɛɛ lé eto Damas. Nye mu kunokuno e nkana yaa nɛʼɛ, nye ka twɨra ó, bwaʼbwaʼ myɛn lé epan, duho é jobo kʉ. Wé a kʉ ka kʉn ó njɨ é gumo nye a be e.

⁴ Nye ntɔʼ duma si, ze joʼo twii lé elɛɛ e nye ó: «Sol, Sol! Ebe yé go lé epa kʉ tíile me e bim tíila nɨ ɨ?»

⁵ Nye ntɔʼ dî ó: «Da, gwɔɔ, go zé?» Twii ntɔʼ bɨha ó: «Mɛm, me ó Yesʉs, mʉr go lé etíile e.

⁶ No ó, mʉŋa si. Niʼe nkana. Bé ólɛɛ go sa go lé ejala le esa ɛ.»

⁷ Bʉr o bé e boo nɔɔ, bé a kœʼ œ, bé ntɔʼ twe é leb. Bé a si kʉ joʼo ecel. Sa gwar, abeɔ mʉr a lwib ɨ.

⁸ Sol ze mʉa si. Nye ngbaa ka bɛɛ mih nɛʼɛ, mih l'aka bee! Bʉr o nduo ye ze mɛrɔ nye é mobo, toŋɔ e nye Damas.

⁹ Nye a si lɛŋ molu molɛl abee. Nye a be nteme ó, ade mode nkʉ nyʉl modibe.

¹⁰ Nuu mpʉn a be ó ɨ Damas, die le Ananias. Da ze lwib e nye é lima. Nye e nye ó: «Ananias!» Nye ntɔʼ bɨha ó: «Da, me be.»

¹¹ Da Yesʉs ntɔʼ lɛɛ e nye ó: «Mʉŋa. Kpahba to é mpaʼa ndɨ e die ó, Cɨcyel ɨ, é mbɛr mo Yʉdas. Go à dî mʉr Tarsʉs ndɨ tɨʼ ɨ, die le Sol. Nye mu ó lé esa mɨnjwɨʼla.

¹² Nyi bee sa jehe é lima: nuu mʉr, die le Ananias, nyi ni mbɛr we, le ekɛl nye mobo é nyʉl é l'efu ó, nye bâʼla bee.»

¹³ Ananias ntɔʼ bɨha ó: «Da, buobuo bʉr, bé a si lɛɛ me lɔb we. Bé be-be ó lé elɛɛ ebebe lɨlɛh nye a sa mɨsaŋ mɨ bʉr myo ndɨ ɨ Yerʉsalɛm ɨ.

¹⁴ Ojwɨɨ be opara, bɨ dwe nye nkul mojwɨ̀ʼa ó, nye pyala wâʼ lé esaa bʉr o ndɨ ejwɨʼla e Zyɛm Sɔŋ, pere e die lo e, nye kaʼa be monkara!»

¹⁵ No ó Da Yesʉs a lɛɛ e nye ó: «Toʼ, ebe, me a si pɛh mʉr nɨ. Lɔɔ wam, wé óto lɛɔ boo bʉr o ndɨ abe oYʉden ó, é zi we. Nye ólɛɛ nteme mɨnjwɨɨbʉr mɨ bʉr baa, bé e bwa b'Ɨzraɛl.

¹⁶ Me mʉr tɨ, me ólɛʼle nye bim mɨtuu nye lé ekʉ jala le esia e mye é lɔb wam ɨ.»

¹⁷ No ó nye a ze mʉa, to pyal é mbɛr waa. Nye ntɔʼ kɛl Sol mobo. Nye e nye ó: «Mɨɔ wam, Sol, Da Yesʉs, mʉr a pyal go temezi é jɔʼ go a be lé eze kaʼ ɛ, nyi lomo me ó, me saʼ ó, go bula bee, le nteme ó, go diʼe lwɨŋla e Mbɨambɨa Sisim.»

¹⁸ Cye e cye yaa, byʉʉ bɨsɔʼɔ, nwɨɨla e bɨpapa, byé ntɔʼ pʉʼa Sol é mih, nye ntɔʼ bula taare lé ebee mbɨmbɨa. Nye ze mʉa é duo, ntɔʼ nʉa ndubo.

¹⁹ Pie tɨ, nye ntɔʼ bâʼle taare lé ede mode, le ebi nkul é nyʉl. Sol bé e l'ompʉn mo Yesʉs bé a be Damas ɨ, bé ntɔʼ di bwa molu.

Sol ɨ Damas

²⁰ Pie tɨ, nye ze taare lé elɛɛ lɔɔ lé etiibe e Yesʉs ɨ, é mompah mɨnjwɨʼla mo oYʉden. Nye a lɛɛ-lɛɛ e be ó, Yesʉs, nye ó Mwan mo Zyɛm.

²¹ Baa bɨbɛh bé a joʼlo nye e, bé a si bul jehe, ze dîila paʼra wɔɔ ó: «Ntʉʼ mʉr nwaʼ a dimle bʉr onɨ, baa o Yerʉsalɛm lé ejwɨʼla e Zyɛm, pere e die mo Yesʉs ba ɛ? Nye a baasi ze wâʼ lé eze mɛr bʉr o sama yaa, ó nye to e be ó Yerʉsalɛm boo ojwɨɨ be opara ɛ?»

²² Sol nyɛɛ a kʉ lɛɛ-lɛɛ be sɔʼɔ ó, njɨ lɔɔ waa e buobuo nkul. OYʉden bé a di-di Damas ɨ, bé a baagʉa ekan bé lɛŋɨ. Nye a si dwe be bɨdweʼle byé a kʉ lɛʼle be ó, Lœma mulo mo Zyɛm ó ndɨ Yesʉs.

²³ Buobuo molu, mé osi laa nɛʼɛ, oYʉden ze di twii ó, bé jʉ ó nye.

²⁴ Sol ntɔʼ bɛa jʉʼra bʉm yɔɔ yaa. Bé a bono-bono nye ó, é moniŋlɨ mo nkana moho e pum, ó bé jʉ ó nye.

²⁵ No ó, ompʉn mo Sol, bé a nʉa nye é pum, gbaŋɔ nye é l'ekuro tʉŋlʉ, ntɔʼ ntɛŋ nye é guu paʼ pɨpɨm nkana, gumo egʉa, lé a bɛa be e.

Sol ɨ Yerʉsalɛm

²⁶ Taare é jɔʼ Sol a pyal ɨ Yerʉsalɛm ɨ, nye a be ó lé esaa ó, nye baʼra ó e l'ompʉn mo Yesʉs, abana-bana, ebe, bɨbɛh, bé a kʉ kpɛɛ nye ó kpɛŋɨ, bɛɛ l'amɛʼle ó, nye a be nteme ó mpʉn mo Yesʉs.

²⁷ No ó Barnabas a ze nʉa nye, bé e nɔɔ to nko mɨlʉmlʉ myé a be e. Nyɛɛ ntɔʼ taŋle be lɔɔ mo Sol, le mpʉ nye a bee Da Yesʉs temezi ɨ, le ekan Da Yesʉs a lɛɛ e nye e. Nye a si lɛɛ nteme mpʉ Sol a to Damas, le elɛɛ lɔɔ Zyɛm é nkul die mo Yesʉs é kpɛŋlɛm, abe e bʉa ɛ.

²⁸ Ebe no ó Sol a ka di é sama yɔɔ ɛ. Bé e boo nɔɔ ó b'a kœʼ sama ɨ Yerʉsalɛm, lé elɛɛ-lɛɛ lɔɔ Zyɛm é die mo Da Yesʉs é kpɛŋlɛm, abe e bʉa.

²⁹ Nye a si lwib nteme e l'oYʉden bé a be lé edu egʉa esa ndwe e motum mo bʉr o Grɛs ɨ, ze taare lé epɨra mokan e be. Bɛɛ ze saa ejʉ nye.

³⁰ É jɔʼ obuʼla bɨna bé a joʼo no e, bé ze to e nye Sezare, ntɔʼ cenɔ nye é nkana Tarsʉs.

³¹ No ó, Zyɛm ze dwe bʉr o Mbɛr-Zyɛm jɔʼ ó, bé diʼe é motala é mɨlal mɨ Yʉda, Galɨle ndwe e Samari mimyɛh. Bé a si bul nʉa pim é buʼo, ebe, Mbɨambɨa Sisim a be ó lé egba be nkul é monyʉl. Mbɛr-Zyɛm ntɔʼ bwaʼ le gwɨe. Bé a tiʼe-tiʼe nteme ó, lé ekʉ dwaabe Da Yesʉs.

Pyɛr lé etiʼ Ayɨneas é die mo Yesʉs

³² Mpʉ Pyɛr a to le ekœʼ é lal wiwɛh ɛ, nye a si to bee mɨsaŋ mɨ bʉr myé a di nkana Lida ɛ.

³³ Nye ze kœb nuu mʉr gʉ, die le Ayɨneas. Nye a be ó mbwamle é duo, tɔɔ mɨmbu mwom, ebe, nye a be ó mbʉmbʉʼ.

³⁴ No ó Pyɛr a lɛɛ e nye ó: «Ayɨneas! Yesʉs-Krɨst, nyi tiʼ go. Mʉŋa si. Bâʼa tɔɔ go.» Cye e cye yaa, Ayɨneas ntɔʼ mʉa si.

³⁵ Bʉr o Lida bɨbɛh ndwe e baa o nkɔra Sarɔn, mpʉ bé a ka bee nye no e, bé ntɔʼ dwir mɨleme ndwe le ejyɛʼɔ taa buʼo yɔɔ boo Da Yesʉs.

Pàha foo mo Tabita

³⁶ Nuu mpʉn mʉma a be ó ɨ Yope, die le Tabita. (No yé é lwib grɛk ó, Dɔrkas.) Jɔʼ yiyɛh, nye a be ó lé ebul sa bɨsyɛɛla bɨ ncwɨncwɨa, le efuʼo-fuʼo baanteʼenteʼe.

³⁷ Lɨʼ dobo nɛʼɛ, nyi ze syɛb, ntɔʼ dwè. Bé ze jwɨ̀ɨ muu we, ze nɛŋɔ we é yʉʉ tiʼe toloŋo mbɛr.

³⁸ Ɨnɨ, Yope, yé acɛra e Lida. Ompʉn baa, bé ntɔʼ jʉʼra ó, Pyɛr a be ó Lida. Bé ntɔʼ lomlo nye mpaŋla e bʉr oba. Bé e nye ó: «Bɨh bé ejwɨʼla e go, ó go kpahba ze kaʼ kam e kam!»

³⁹ No Pyɛr a mʉa si, bé e boo nɔɔ ze to. É jɔʼ bé a pyal ɨ, bé ze to e nye é tiʼe mbɛr waa. Mɨkuho mɨ bʉba mimyɛh, myé a be ó lé ejɨŋɔ modwe. Bé ntɔʼ bʉmra Pyɛr é nka, le elɛʼle nye bɨdur le mɨlen mɨ okʉr Dɔrkas a bœr be é jɔʼ nye a baapa dime mih ɨ.

⁴⁰ No ó, Pyɛr ntɔʼ pyɛl bʉr bɨbɛh kʉl, kur moboo si, ze jwɨʼla e Zyɛm. Nye ntɔʼ dwibra nko muu, wé a be e, ze lɛɛ ó: «Tabita! Mʉŋa si.» Nye ntɔʼ bɛɛ mih, bee Pyɛr, ntɔʼ di ndindil!

⁴¹ Pyɛr ntɔʼ mɛr nye é mbo, gbɛl nye si. Nye ze jebe mɨsaŋ mɨ bʉr mo Zyɛm ndwe e mɨkuho mɨ bʉba, ze lɛʼle be nya, nye osi pàh.

⁴² Bʉr ze joʼo lɔɔ tɨʼ é nkana Yope yiyɛh. Buobuo bʉr ntɔʼ jyɛʼ taa buʼo yɔɔ boo Da Yesʉs.

⁴³ Pyɛr ze di gʉʼ ba é bɛabɛa é mbɛr mo Simɔn, mʉr a be lé efeh bɨkʉr bɨ otir ɨ.