Mɨlʉmlʉ 8 - Kálara Zyɛ̌m Edwán é mpʉ̌n

¹ Sol a be ó lé emɛʼle efie mo Etyɛn. É moho ngwar waa, bé ze taare lé etíile mbɛr Zyɛm wé a be Yerʉsalɛm ɨ. Ompʉn bɨbɛh, pɛʼ njɨ mɨlʉmlʉ, ze gbɛha é mɨlal mɨ Yʉda ndwe e Samari.

Sol lé etíile ompʉn mo Yesʉs

² No ó bʉrʉm bé a be lé edwaabe Zyɛm ɨ, bé a ze dɨl Etyɛn, ze jɨŋɔ é buobuo é l'efie le.

³ Sol ze gba nyʉl lé edimle Mbɛr-Zyɛm. Nye a to-to no ó, mɨmbɛr e mɨmbɛr myɛh, lé eto le edulo bʉba le bʉrʉm bé a buʼla ɛ, bɨbɛh. Bé ze gba be é mbʉʼ.

Filip lé elɛɛ Mbɨambɨa Lɔɔ é Samari

⁴ Baa b'a gbɛha ɛ, ze to mɨlal e mɨlal myɛh, lé eto le elɛɛ lɔɔ Zyɛm.

⁵ Filip nyɛɛ ze to é yʉʉ nkana yé a be é lal Samari ɨ, ze taare lé elɛɛ bʉr ó, Lœma mulo mo Zyɛm ó ndɨ Yesʉs.

^6-7 Ntuntuma bʉr yaa, yé a be ó si joʼlo Filip, le ebee bɨdweʼle bɨ nkul we nye a dɨ sa ɛ. Bɨbɨbla mɨsisim, byé a si bul duho é monyʉl mo bʉr o b'a syɛb-syɛb ɨ, bɛɛ lé ebʉ bɨbwaʼbwaʼ bɨtim. Buobuo mɨsyoblʉ myé a be mɨmbʉmbʉʼ ɨ, bé e bʉr o b'a be lé etɨa ɛ, bé nteme, bé a si tiʼe. Ebe no ó bʉr baa, bé a kʉ joʼlo lɔɔ we e.

⁸ Odil o nkana yaa, bé ntɔʼ joʼo buobuo bɨsʉhʉ.

⁹ Nuu mʉr a be die ó Simɔn. Nye a bɛa di-di ó, tɨʼ é nkana yaa. Molu pihe, é jɔʼ nye a be-be lé esa mosima mo onkaa me e, bʉr o Samari, bé a be-be ó lé ejehe nye. Nye a be é jɔʼ yaa ó, lé ekʉ bul doʼo, le elɛɛ ó, nye ó mʉr nɨnɨ.

¹⁰ Bʉr bɨbɛh, taare é mɨzeze mɨ bʉr, to pyal é l'osabene, bé a be-be ó, lé ejoʼlo nye. Bé a lɛɛ-lɛɛ ó: «Mʉr nwaʼ ó ndɨ e nkul nɨnɨ mo Zyɛm! Mpwaʼ nkul waa ó bé lé ejebe-jebe ó, Anɨnɨn ɨ!»

¹¹ Bé a joʼlo-joʼlo nye no ó, ebe mosima mo onkaa nye a dɨ sa ɛ. Nye a sa be ma ó, bé jeha nye.

¹² Lɛa Filip a lɛɛ be Mbɨambɨa Lɔɔ lé e tiibe e jwɨ̀ʼa mo Zyɛm ndwe e die mo Yesʉs-Krɨst ɨ, bé ntɔʼ buʼla, ze nʉa ndubo, bʉba le bʉrʉm.

¹³ Simɔn nye mʉr tɨʼ ze buʼla nteme, nye ntɔʼ nʉa ndubo. Bé e Filip, bé a ka di-di ó, sama, nyɛɛ lé ejehe lé ebee bɨdweʼle bɨ nkul we ndwe e bɨbwaʼbwaʼ mosima Filip a dɨ sa ɛ.

¹⁴ Mɨlʉmlʉ myé a be ɨ Yerʉsalɛm ɨ, myé ntɔʼ joʼo lɔɔ ó, bʉr o Samari, bé a si buʼla lɔɔ Zyɛm bé a lɛɔ ɛ. Bé ze lomlo be Pyɛr bé e Yʉanes.

¹⁵ Pyala bé a pyal Samari ɨ, bé ze jwɨʼla e Zyɛm é l'efu ó, obuʼla baa nteme biʼe Mbɨambɨa Sisim,

¹⁶ ebe, nye a baapa fulo é mʉr ngwar é sama yɔɔ. Bé a kʉ nʉa-nʉa ndubo ó, njɨ é die mo Da Yesʉs.

¹⁷ No ó, kɛla Pyɛr bé e Yʉanes, bé a kɛl be mobo e, bé ntɔʼ ka bi Mbɨambɨa Sisim.

¹⁸ É jɔʼ Simɔn nyɛɛ a bee mpʉ bʉr, bé a bi Mbɨambɨa Sisim é monyʉl mɔɔ pie kɛla mɨlʉmlʉ, myé a kɛl be mobo e, nye ze sa ó, nye timle ó Pyɛr bé e Yʉanes mɔn.

¹⁹ Nye e be ó: «Ɨ, jàʼ ga! Dweʼ ga me nteme nkul ó, mʉr nyiwɛh me ókɛl mobo e, nye biʼe Mbɨambɨa Sisim!»

²⁰ Pyɛr ze lɛɛ e nye ó: «Bɨn e mɔn yo bɨbɛh dimɨ é jɔʼ gwar, ebe, go si bana jwɨʼ ó, Zyɛm ónol mʉr bɨntɔɔ bye ó, é ziila bɨmɔn!

²¹ Go abe e nkul etœb lɔb wi. Go abe e nuu nkɔb tɨ, ebe, leme go, wé abe cɨcyel é mih mo Zyɛm.

²² No ó, me lɛɛ e go ó, gwaʼa ebɨ-leme go ndɨ e le enɨ. Go à dwir leme go, le ejwɨʼla e Da ó, nye pɛʼɛ go baa nyi niʼe go é lɔb jwɨʼ go be e ye é leme e, nkʉ nye ókpɛl.

²³ Ebe, me ebee ó, leme go, wé ó lwɨŋla e modwie. Go ó mbila é monkara, duho é bɨsyɛɛla bɨ ozyɛhozyɛh byo.»

²⁴ Simɔn ntɔʼ lɛɛ e be ó: «Jwɨʼla ga e Da é l'efu lam ó, sa yiyɛh bɨn lɛɛ nɨ, yé beʼ l'apyal me.»

²⁵ Jɔʼ mɨlʉmlʉ mɨmba myaa, myé a sil tuno mɨlɔb mo Da le eboʼlo sa bé a gʉa é lɔb waa ɛ, myé ntɔʼ bâʼle to Yerʉsalɛm. Zi e zi, bé a be ó lé eto le etuno Mbɨambɨa Lɔɔ é buobuo mokwar mo Samari.

Filip bé e myaʼ mʉr Etiopi

²⁶ No ó engles mo Da a lɛɛ e Filip ó: «Mʉŋa si! Toʼ é nko tie, é mpaʼa lé efulo Yerʉsalɛm, to Gaza ɛ!» Tina, yé ó, mpaʼa waa, wé ecwɨɨ ó, é feha si.

^27-28 Filip ntɔʼ mʉa, to. Ngbaa le eka be, nye dina temezi nɛʼɛ, nye ze bɔma e nuu mʉr a be ndindil é kaliʼ ye kʉ ɨ. Yé a be ó myaʼ mʉr Etiopi, waa a be ngoman é lal waa ɛ. Njwɨɨ lal nyɛɛ a be ó mʉma, die le Kandas. Ngoman waa ó b'a baʼle-baʼle nye okum e l'ogbaa o lal waa wiwɛh. É jɔʼ nye a be ɨ Yerʉsalɛm ɨ, nye a be ó lé edwiibɨ Zyɛm. No ó, é jɔʼ nye a ze fiʼ ɨ, nye a dɨ to ó, é kaliʼ ye, nyɛɛ ndindil lé eláa Kalara Zyɛm. Peh nye a dɨ láa ɛ, yé a be ó yaa ngwiha mɨlɔb Ezayi a tile e.

²⁹ Mbɨambɨa Sisim ntɔʼ lɛɛ e Filip ó: «Toʼ, to di kunokuno e mʉr ndɨ é kaliʼ kʉ nɨ.»

³⁰ Filip ntɔʼ to kam, to di kunokuno e kaliʼ, ntɔʼ joʼo mʉr Etiopi waa lé eláa kalara ngwiha mɨlɔb Ezayi a tile e. Nye ntɔʼ dî e nye ó: «Zê go lé ejoʼo sa go lé eláa nɨ ɛ?»

³¹ Nye e nye ó: «ǃƗ mʉr be, apyɛɛ me mokan mo tɨʼ nɛʼɛ, me abe e nkul ejoʼo ye.» No ó, nye a lɛɛ e Filip ó, nye kabla é kaliʼ, bɨbɛh diʼe é dia ye yaa.

³² Tina, yé ó, é peh Kalara Zyɛm nye a láa-láa ɛ, yé a be tila ó: «Nye a di ó mpʉ ntœme mu lé eto tiʼɔ ɛ. Nye a be ó mpʉ ma ntœme di-di é puuu é jɔʼ bé lé ecwɨa nye mye e. Nye a be ó, abɛɛ nʉm.

³³ Bé a si samle nye, agwɨm dwe nye mokebe. Zé ólɛɛ ó, mpoŋbʉr we, nye dina ó, ɨ si nwa, ze pyal é muh é dobo lɨ? Abe e mʉr a ngbaa lwib no, ebe, bé a si pɛʼ nye é si nwa.»

³⁴ Myaʼ mʉr waa ntɔʼ dî e Filip ó: «Lɛŋɨ me, me ejwɨʼla e go: ngwiha mɨlɔb nwa a tile mpʉnʉ, tiibe e wáa mʉr? Zê nye lé etile, tiibe e nye mʉr tɨʼ ɛ? Zê nye lé etile, tiibe e nuu mʉr fih ɛ?»

³⁵ No ó Filip a ze nʉa lwib, ze lɛɛ nye Mbɨambɨa Lɔɔ lé etiibe e Yesʉs ɨ, taare é peh Kalara Zyɛm gwar e gwar yaa.

³⁶ É mpʉ bé a to-to zi e zi ɨ, bé ze pyal é dibe. Myaʼ mʉr waa ntɔʼ lɛɛ e nye ó: «Paʼ bee modibe ma. Yé ndɨ e nkul eka kamle me lé enʉa ndubo ɛ?» [

³⁷ Filip ze bɨha ó: «Yé be ó, go ejyɛʼ taa buʼo yo boo Yesʉs e leme go wiwɛh nɛʼɛ, yé abe e sa kamle go lé enʉa ndubo.» Nye ze lɛɛ ó: «Me ebuʼla ó, Yesʉs-Krɨst, nye ó Mwan mo Zyɛm.»]

³⁸ Nye ntɔʼ dwe twii ó, bé cyelɨ kaliʼ. Filip, bé e nɔɔ bɨbɛh ze fulo é modibe, Filip ntɔʼ dù nye.

³⁹ Epʉʼa bé a pʉʼa é modibe e, Sisim mo Da ntɔʼ pɛʼ Filip tɨ, myaʼ mʉr ntɔʼ liʼ naa, aka bee nye. Nye ntɔʼ laa, to e cyen ye dolo lé ekʉ soho.

⁴⁰ Filip nyɛɛ a ka to nyin ó, Azotɔs. Nye a be ó lé elaa bɨnkana e bɨnkana byɛh, lé eto le etuno Mbɨambɨa Lɔɔ é mokwar mɨmɛh, to pyal é jɔʼ nye a pyal é Sezare e.