Mɨlʉmlʉ 6 - Kálara Zyɛ̌m Edwán é mpʉ̌n

Osyɛl o mosa é mbɛr Zyɛm, bé epɛhɔ

¹ É molu maa, mpʉ ompʉn mo Yesʉs, bé a be, bé mu si bul buo e, oYʉden bé a be lé edu egʉa esa ndwe e motum mo bʉr o Grɛs ɨ, bé ze taare lé etooro oYʉden bé a be lé edu njɨ egʉa esa ndwe e motum mo bʉr o b'Ebrœ œ. Bé a lɛɛ-lɛɛ ó, bɨha, bé a be ó lé elɨha-lɨha mɨkuho myɔɔ é nkɔb mode.

² No ó, Esama le ompʉn ewʉm e l'oba, bé a baŋle ompʉn bɨbɛh, ze lɛɔ e be ó: «Yé ajala ó, bɨh l'aka lɛɛ lɔɔ Zyɛm é lɔb nkɔb mode.

³ No ó, obɨɔ ga bam aa! Pɛhɛ ga bʉrʉm tambɛl é l'esama lɨn, baa ndɨ é bul gʉŋɔ ó, bé ó mɨlwɨŋla e Mbɨambɨa Sisim ndwe e l'ocyoo e. Bé ó bɨh bé ótimle syɛɛ yaa ɛ.

⁴ Bɨh bɛɛ, bé óka gba monyʉl ó, njɨ é syɛɛ mɨnjwɨʼla, le yaa elɛɛ bʉr lɔɔ Zyɛm.»

⁵ Bʉr o sama bɨbɛh ze mɛʼle jwɨʼ yaa. Bé ntɔʼ pɛh Etyɛn, mʉr a bul jyɛʼ taa buʼo ye boo Krɨst, waa a be lwɨŋla e Mbɨambɨa Sisim ɨ. Bé ze bâʼle pɛh nteme: Filip, Prokɔros, Nikanor, Timon, Parmenas ndwe e Nikola, mʉr Antios. (Nye a taare ni ó, é buʼo oYʉden.)

⁶ Bʉr o mbɛr Zyɛm ntɔʼ cyel be é mih mɨlʉmlʉ. Myé ze jwɨʼla e Zyɛm, le ekɛl be mobo é mɨlʉ.

⁷ Bʉr ntɔʼ to dolo lé elɛɛ lɔɔ Zyɛm. Lɔɔ we ze myɛma. Tɔɔ ompʉn ntɔʼ kpahbe buo ɨ Yerʉsalɛm. Buobuo bʉr é sama opara ze jyɛʼɔ taa buʼo yɔɔ boo Zyɛm, le esa nye mojoʼo.

Etyɛn lé emɛrɔ

⁸ Etyɛn a be ó mʉr Zyɛm a sʉ mocyɛʼ mo mpom me, waa nye a gba buobuo nkul é nyʉl ɨ. Nye a be-be ó lé esa bɨbwaʼbwaʼ bɨsa bɨ jehe ndwe e bɨdweʼle bɨ nkul é mih mo bʉr.

⁹ No ó bʉʉ bʉr, bé a mʉa, bé e boo Etyɛn ntɔʼ taare lé epɨra mokan. Bé a be ó bʉr o mpah mɨnjwɨʼla ndɨ e die ó, Mpah bʉr o b'a taare di é dia olʉa ɛ. Baʼ bʉr, bé a duho ó, é nkana Sirɛn; bʉʉ, duho nkana Alɛksandri, ndwe e lal Silisia, e waa Azia. Mpʉ bé a be lé epɨra mokan e l'Etyɛn ɨ,

¹⁰ bé ze bee ó, bé a baabe e nkul etɨ mɨlɛa mye, ebe, nye a lwib ó e l'ocyoo ndwe e nkul mo Mbɨambɨa Sisim.

¹¹ No ó, bé ze bwam bʉrʉm é mofo. Bé e be ó, bé lɛŋɨ ó: «Bɨh bé a si joʼo nye lé epyeh Moyiz bé e Zyɛm!»

¹² Bé ze soʼlo mɨzɨze mɨ bʉr, ndwe e l'otamabʉr o lal, kɛl oyeʼle o motie ó, bé saʼ ntʉ. Bʉr ntɔʼ nkɔŋa, to nko Etyɛn a be e. Mɛrɔ nye, toŋɔ e nye é mih mo bʉr o Bʉm Nɨnɨ,

¹³ fwanɔ bʉr o b'a buʼo nye mɨlɔb ɨ, bɛɛ lé elɛɛ ó: «Mʉr nwa, nye agwaʼ lé elɛɛ mokan é bebebebe teme bʉr é kpɨbɨbɨ. Mokan nye lé epyɛl lé elwimla e Mpah wina ndɨ e l'ekɛn ɨ, mé emɛr nteme, ndwe e motie mo Zyɛm!

¹⁴ Bɨh bé a si joʼo nye lé elɛɛ ó, Yesʉs, mʉr Nazarɛt ógbah gumo yi, ntɔʼ lɛʼle bʉr edwan le ebò e cyen bé óka kœʼ œ, le esiila mɨnjwɨr Moyiz a liʼe bɨna ga e mye ɛ!»

¹⁵ Bʉr o Bʉm Nɨnɨ, é jɔʼ bé a dwɛʼ Etyɛn é tʉʉʉŋ ɨ, bɨbɛh, bé ka bee nɛʼɛ, mpom we a be ó, nye mu lé enwɨɨla e mpom engles!