Mɨlʉmlʉ 4 - Kálara Zyɛ̌m Edwán é mpʉ̌n

Pyɛr bé e Yʉanes é mih mo Bʉm Nɨnɨ oYʉden

¹ Pyɛr bé e Yʉanes dina lé elwib nɛʼɛ, opara le njwɨɨ bɨpulʉm bɨ Mpah Zyɛm, ndwe e l'oSadwisyɛŋ ze pyalɔ é kpɨm.

² Bé a be ó é bul duo mɨleme, ebe, Pyɛr bé e Yʉanes, bé a be ó lé eyeʼle bʉr ndwe le etuno ó, Zyɛm a si pɛ̀h Yesʉs é foo!

³ No ó bé a ze naʼ be mobo é nyʉl, gbaŋɔ be é mbɛr mɨmbʉʼ, bonɔ mɛn tɨ, ebe, yé a be ó, pum mu lé edwine.

⁴ Buobuo bʉr o b'a joʼo mɨlɔb myaa ɛ, bé a si buʼla. Tolɔɔ bʉrʉm bé a buʼla ɛ, a si pyal kwoʼ be otɔɔyin otɛn.

⁵ É mɛn tɨ, ojwɨɨ be oYʉden bé e l'otamabʉr, ndwe e l'oyeʼle o motie ze fwalɔ Yerʉsalɛm.

⁶ Tɨʼ yé a be ó e njwɨɨ opara Anas bé e Kayɨfa, e Yʉanes, ndwe e Alɛksandros e bʉʉ bʉr be eveh le opara onɨnɨ.

⁷ No ó bé a ze cyel Pyɛr ndwe e Yʉanes é mih mɔɔ, le edîŋɔ e be ó: «Bɨn bé a tiʼ nye no e wáa nkul? Yé be ó, bɨn bé a si tublo die mo nuu mʉr nɛʼɛ, yé a be die mo zé?»

⁸ No ó, Pyɛr, nye mu lwɨŋla e Mbɨambɨa Sisim, a lɛɛ e be ó: «Ojwɨɨ o lal ndwe e l'otamabʉr!

⁹ Yé be ó, bɨn bé edî bɨh muh ó: “Yáa syɛɛla ncwɨncwɨa bɨn bé a lɛʼle syoblʉ wiʼ ɨ?” nkʉ nteme “Wáa zi bɨn bé a tiʼ nye e tɨʼ ɨ?” nɛʼɛ,

¹⁰ bɨn bɨbɛh le bwa b'Ɨzraɛl bɨbɛh, gʉŋa ga be ó, mʉr bɨn lé ebee lé ecyɛb cɨcyel nwa, nye mu mbɨmbɨa ó, é nkul die mo Yesʉs-Krɨst, mʉr Nazarɛt, waa bɨn bé a bomlo e mosen, bɨnɔ nye é klos kʉ ɨ. To kœb ó, Zyɛm a si pɛ̀h nye é foo!

¹¹ Mʉr waa ó ndɨ waa Kalara Zyɛm lé elwib, tiibe e nye ó: “Ekoʼ bɨn, ofim o mbɛr, bé a pyeh ɨ, lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ.”

¹² «Bʉr o ndɨ ebi tiʼ molu mo mpoʼ mɨmɛh ɛ, bé ebi ye ó, é zi mo Yesʉs, ebe, é si nwaʼ nyiwɛh, yé abe e lʉʉ die efih Zyɛm a lɛʼle bʉr ó, lé ó e nkul edwe be tiʼ molu mo mpoʼ mɨmɛh ɛ, nkʉ yé abe laa le.»

¹³ Bʉr o bʉm ntɔʼ jehe lé ejoʼo mpʉ Pyɛr bé e Yʉanes, bé a lwib e be, anyam mɨnʉm, bɛɛ yɛɛ abe bʉr o b'a sa sikʉlʉ ɨ. Bé ntɔʼ ka ze dweʼe ó, bé a kʉ be ó é sama bʉr o b'a kœʼ-kœʼ e Yesʉs ɨ.

¹⁴ Bé a si bee nteme mʉr bé a tiʼ ɨ, naa cɨcyel kunokuno e Pyɛr bé e Yʉanes. Bé a baabe e nkul etɨ mɨlɛa myɔɔ.

¹⁵ Bé ze pyɛl be kʉl, pɛʼ be é mih mo Bʉm Nɨnɨ, ntɔʼ bònɔ pɨʼ.

¹⁶ Bé a lɛɛla paʼra wɔɔ ó: «Bɨna saʼ ga bʉr baʼ nyá ɛ? Ebe, bʉr o Yerʉsalɛm bɨbɛh, bɨ gʉa é kpɛhla ó, bɨ sa dweʼle nkul wɔɔ tɨ. Bɨna bé abe e nkul eka soŋlo ga.

¹⁷ Dam be no, é l'efu ó, lɔɔ syɛɛla yi, wé l'ayi ka jʉŋla é lal ga wina wiwɛh, bɨna bɛŋɨ ga be ó, bé beʼ l'aka bâʼle lwib e mʉr fih é die mo Yesʉs!»

¹⁸ Bé ze bâʼle baŋle Pyɛr bé e Yʉanes, ze cyel be mpene ó, bé l'anyamle lwib e bʉr é die mo Yesʉs, nkʉ dwe be sikʉlʉ é lɔb we.

¹⁹ Pyɛr bé e Yʉanes bɛɛ, ze bɨha e be ó: «Yé ekʉ jala ó, bɨn tiʼa ga lɔb wi: nkʉ yé é mbɨa é mih mo Zyɛm ó, bɨh joʼa njɨ bɨn, asa nyɛɛ mojoʼo.

²⁰ É paʼ wih, yé abe e sa ndɨ e nkul esa ó, bɨh kara elɛɛ sa bɨh bé a bee le ejoʼo e.»

²¹ Bʉr o bʉm ntɔʼ bâʼle bɛŋ be, ntɔʼ birɔ be. Bé a baagʉa mpʉ bé a ngbaa kab be bɨntɨʼa ɛ, ebe, bʉr bɨbɛh, bé a be ó lé egumlo Zyɛm ebe syɛɛla bé a sa ɛ,

²² ebe, mʉr a tiʼe é zi dweʼle nkul waa ɛ, a be ó e mɨmbu mowʉm monâ e mpuʼ.

Mɨnjwɨʼla mɨ obuʼla

²³ É jɔʼ Pyɛr bé e Yʉanes, bé a birɔ ɛ, bé ze to nko obɨɔ bɔɔ, bé a be e. Bé ntɔʼ taŋle be sa yiyɛh ojwɨɨ be opara, bé e l'otamabʉr o lal, bé a lɛɛ be e.

²⁴ É jɔʼ bé a joʼo tɔɔlʉ waa ɛ, obuʼla ntɔʼ taare lé ejwɨʼla e Zyɛm. Bé ó: «Da, go ó b'a cye kʉ e si, ndwe e maŋ, le bɨsa bibyɛh ndɨ tɨʼ ɨ.

²⁵ Go a lwib é zi Mbɨambɨa Sisim, cwɨɨ e sɔŋ mpam wih David, syɛl mosa go ó: “Ebe yé bɨkul bɨ bʉr o ndɨ abe oYʉden ɨ, lé ekpaa mompime e? Ebe yé bɨkul lé ekuhlo mopɨʼ mo ndɨ abe e nyɔm ma ɛ?

²⁶ Mɨnjwɨɨbʉr mɨ si nwa, myé a si cyɛb é cye dɔm. Otamabʉr o mɨlal mimyɛh, bɨ gwɨhla, le ebà jwɨʼ ó, bé lwimla ó e Da, lwimla nteme e Lœma mulo mo Zyɛm.”»

²⁷ Obuʼla ze ko tɨʼ ó: «Mpʉ yaa nteme ó yé a ka fuʼla ɛ! Ebe, yé cyecye ó, njwɨɨbʉr Erod Antɨpas bé e ngoman Pɔŋtos Pilat, bé a si syɛŋa é nkana yi, bé e bwa b'Ɨzraɛl, ndwe e bʉr o ndɨ abe oYʉden ɨ. Bɨbɛh, bé a si di bʉm, bònɔ pɨʼ ó, bé lwimla ó e syɛl mosa go Yesʉs, Mʉr ndɨ ti, waa go a lœm mulo e.

²⁸ To kœb ó, syɛɛla bé a sa ɛ, yé ó b'a dira sa go a bɛa tiʼe é leme go, lé edu mpʉ nkul go le gwɨma yo ndɨ ɨ.

²⁹ No ó, Da, banana, joʼla mpʉ bé lé ebɛŋ bɨh ɨ. Dibɨ osyɛl o mosa bo zi ó, bé lɛŋɨ lɔɔ go é kpɛŋlɛm, abaawe sɔʼɔ e bʉr.

³⁰ Lɛʼla nkul go é zi waa. Go à tiʼ mɨsyoblʉ é die e syɛl mosa go Yesʉs, Mʉr ndɨ ti ɨ. Saʼ nteme bɨdweʼle bɨ nkul we ndwe e bɨsa bɨ jehe é die le.»

³¹ Jɨh tɨʼ bé a kʉ sil jwɨʼla e Zyɛm, gumo bé a syɛŋa ɛ, yé ntɔʼ ze ncyeŋa. Mbɨambɨa Sisim ze loŋlo bɨbɛh é mɨleme, bé ntɔʼ taare lé elɛɛ lɔɔ Zyɛm é kpɛŋlɛm, abaawe sɔʼɔ e mʉr.

Obuʼla lé ekabla bɨsa byɔɔ

³² Obuʼla bɨbɛh, bé a be ó leme ngwar ndwe e sisim ngwar. Abe e mʉr ngwar é sama yɔɔ a be e nkul elɛɛ ó, bɨsa bye, byé a kʉ gumo ó njɨ e nye mʉr tɨ, agumo nteme e bʉʉ bʉr. Paʼ wɔɔ, sa yiyɛh, yé a baʼlɔ-baʼlɔ ó zyɛŋa.

³³ Mɨlʉmlʉ mo Da Yesʉs, myé a boʼlo pɛ̀ha foo we ó e buobuo nkul. Ebe no ó Zyɛm a sʉ be mocyɛʼ mo mpom é ntuʼ-ntu-ntuʼ ɨ.

³⁴ Yé a baabe e baanteʼenteʼe é sama yɔɔ tʉŋlʉ, ebe, mʉr nyiwɛh a be e peme ndwe e mbɛr ɨ, a sa ó, bɛmɔ bye, ze e mɔn yé a duho tɨʼ ɨ,

³⁵ ze timle ye mɨlʉmlʉ. No ó myé a nʉa mɔn yaa, ze kab bʉr bɨbɛh mpʉ mɨnyɔm myɔɔ ndɨ ɨ.

³⁶ Nuu mʉr a sa no e, a be die ó Yoseb, mʉr eveh mo Levi, waa a byɛl Siprʉs ɨ. Mɨlʉmlʉ, myé a ka jwɨr nye lʉʉ die ó, Barnabas. (No yé edwirɔ ó: «Mʉr lé egba bʉr nkul é monyʉl ɨ».)

³⁷ Nye a si bɛma peme ye, yé a dɨ joʼo e nye e, ntɔʼ ze e mɔn tɨ, ze timle mɨlʉmlʉ.