Mɨlʉmlʉ 2 - Kálara Zyɛ̌m Edwán é mpʉ̌n

Epyal mo Mbɨambɨa Sisim

¹ É jɔʼ ebʉʼ e Paŋtekot, lé a pyal ɨ, obuʼla bɨbɛh, bé a be ó zyɛŋa, gumo gwar.

² Cye e cye yaa, bwaʼbwaʼ duu ze duho é jobo kʉ, nwɨɨla e duu nkuo lé ekuulo e nkul ɨ. Yé a si dibe mbɛr waa wiwɛh, gumo bɨbɛh, bé a be ondindil ɨ.

³ Bé ka dwɛʼ nɛʼɛ, bé bee ó, byʉʉ bɨsɔʼɔ, nwɨɨla e bwa mɨnjʉl mɨ siʼe. Byé ntɔʼ myɛma, to le ecyɛb bɨbɛh é mɨlʉ kʉ.

⁴ Bɨbɛh, bé a be ó, bé mu lwɨŋla e Mbɨambɨa Sisim. Bé ntɔʼ taare lé elwib bɨlwib bɨfih, byaa Sisim waa, wé a dwe be nkul ó, bé lwibɨ ɨ.

⁵ Tɨʼ ɨ Yerʉsalɛm, yé a be ó e l'oYʉden bé a be lé edwaabe Zyɛm ɨ. Bé a byɛl ó, é mɨlal mimyɛh ndɨ é si nwaʼ ɛ.

⁶ É jɔʼ bé a joʼo duu yaa ɛ, bé ze fwal gumo gwar, mɨnʉm mɨmbeʼ, ebe, mʉr nyiwɛh é sama yɔɔ a si joʼo lɔɔ Zyɛm é lwib ye! Myé a cwɨɨ ó, é zi nuu mbuʼla lwib fih.

⁷ Bé a si laŋle jehe mɨnʉm mɨmbeʼ. Bé ó: «Bʉr bɨbɛh lé elwib ba, bé ntʉʼ bʉr o Galɨle?

⁸ Yé be no nɛʼɛ, a, ebe yé mʉr nyiwɛh é sama ga yina mu lé ejoʼo bé lé elwib é lwib nye mʉr tɨʼ a byɛl ɨ?

⁹ É sama ga yina yi, yé é buo bʉr o b'a duho mɨlal e mɨlal ɨ: baʼ duho é lal Partia, bé e waa Med, e Elam, ndwe e waa Mezopotami, ka kɛl lal Yʉda, le waa Kapadosia. Bʉʉ duho é lal Pɔŋtos, bé e waa Azia,

¹⁰ le waa Frigia, le waa Pamfilia, le waa Egipten ndwe e bʉr o Libi, baa b'a duho é nkana Sirɛn ndwe e bɨnkɔra bɨ nkana yaa ɛ, ka kɛl ojyoo bé a duho é nkana Rom ɨ,

¹¹ baʼ, bé ó oYʉden, bʉʉ, bʉr o bɨkul bé a ni é buʼo ga yina ɛ. Yé nteme, yé ó e bʉr o dine Krɛt le baa o lal Arabi. Sa jehe, yé ó, bɨna ga bɨbɛh, bé ejoʼo be lé elwib é bɨlwib ga bina, tiibe e bɨsyɛɛla bɨnɨnɨ mo Zyɛm!»

¹² Bɨbɛh, bé a si jehe, aka gʉa ndumlo tɨ. Bé ntɔʼ dîila paʼra wɔɔ ó: «Wáa mbi lɔb wi?»

¹³ Sa gwar, bʉʉ, bé a be ó lé ekpeʼle obuʼla. Bé ó: «Bé mu ó lé efwaʼ monwoʼ!»

Tɔɔlʉ mo Pyɛr

¹⁴ No ó Pyɛr a ze cyɛb cɨcyel, bé e l'esama le ompʉn ewʉm e ngwar. Nye ze bɨn twii kʉ, ze lɛɛ e ntuntuma bʉr yaa ó: «Bɨn bʉrʉm o lal Yʉda ɔɔ! Bʉr bɨbɛh lé edi ɨ Yerʉsalɛm ba ɔɔ! Gʉŋa ga lɔb wiʼ ɔɔ! Bɨn bé à kʉ gʉa joʼlo sa muno ze lɛɔ bɨn yiʼ ɔɔ!

¹⁵ Bʉr o bɨn lé ebee ba, bé afwaʼ monwoʼ, mpʉ bɨn lé ejwɨʼ nɨ. Dobo, lé dina ó, mowala bu mo mɛn.

¹⁶ Lɔɔ ngwiha mɨlɔb Joël a bɛa lɛɛ ɛ, wi dira muh. Nye a lɛɛ ó:

¹⁷ “Zyɛm a lɛɛ ó: ‘É molu mé ófuʼla ɛ, me ólomlo bʉr bɨbɛh Mbɨambɨa Sisim. Nye óbe ó, é be. Bwa o bʉba le bwa o bʉrʉm bɨn, bé ógwih mɨlɔb myam. Mɨsoho min, myé óbee mɨfela bɨsɔʼɔ. Mɨnjʉ̌m min, myé ójɨm bɨlima.

¹⁸ Eee, me ólomlo be Mbɨambɨa Sisim, osyɛl o mosa bam, bʉba le bʉrʉm, é molu maa. Bé ógwih mɨlɔb myam.

¹⁹ Me ósa bɨsa bɨ jehe é jobo kʉ le bɨdweʼle bɨ nkul wam é si nwa. Motié, bé e siʼe e dwine bɨduulʉ, byé ónyin.

²⁰ Myɛn dobo, wé ólihba edurʉ. Alomo óbe ó é zʉʉŋ mpʉ motié. Bɨsa byaa, byé óbɛa syɛɛ ó, dobo le etiʼ e mɨlɔb mo Da Zyɛm, lé l'apa pyal. Moho waa, wé óbe ó moho nɨnɨ le moho kum.

²¹ É jɔʼ yaa, mʉr nyiwɛh ósa mɨnjwɨʼla é die mo Da ɛ, nye óbi tiʼ molu mo mpoʼ mɨmɛh.’”

²² «Mbɛngɛɛ! Bɨn bwa b'Ɨzraɛl ɔɔ! Zyɛm a be ó si bɨlan e Yesʉs, mʉr Nazarɛt, lé esa mosima e bɨsa bɨ jehe ndwe e bɨdweʼle bɨ nkul we é mih mɨn. Zyɛm a sa bɨsyɛɛla byaa é mobo me no ó, nye nkʉʼ lɛʼle bɨn mbi mʉr Yesʉs a be e. Bɨn bé ekʉ gʉa no.

²³ Zyɛm a bɛa gʉa ó, bɨn bé ókɛha nye é mobo mo bʉr o ndɨ entaa motie e. Bɨn bé a kʉ du ó, mpʉ nye a bɛa tiʼe é leme we e. Bé ze cyèl nye é klos kʉ, jʉŋɔ nye.

²⁴ Zyɛm ze pɛ̀h nye é foo, pɛʼ nye é mokpaa mo efie, ebe, efie, lé a baabe e nkul mɛr nye é bɛabɛa,

²⁵ ebe, David a tile, tiibe e nye ó: “Me a be ó lé ebee Da bɨjɔʼ bibyɛh e mih mam. Nye efuʼo me, é mbi ndɨ ó, me l'apɨn, ebe, nye emɛr me é mbo ejʉm.

²⁶ Ebe no ó leme wam lé eloŋlo e bɨsʉhʉ ɨ. Mokan mam nteme, maa bɨsʉhʉ. Leme wam, wé óloŋlo e mbɛla,

²⁷ ebe, go ákwoʼ bir sisim wam kwar odwè. No nteme, go aŋa mɛʼle ó, Mʉr go ndɨ ti ɨ, boʼ é foo.

²⁸ Gɨ taare lɛʼle me mozi me lé ejala le ecwɨɨ tɨʼ ɨ. Go óloŋlo leme wam e bɨsʉhʉ é jɔʼ bɨna bé ódi gumo gwar ɨ.”»

²⁹ Pyɛr ze ko tɨʼ ó: «Obɨɔ ga bam aa! Me paʼ kʉ gwih bɨn ocyecye é kpɨbɨbɨ é lɔb mpam ga yina David. Nye a si dwè, debe. No ó, foo we, nye dina ó tɨʼ lé enyin, ze pyal é muh é dobo lɨ.

³⁰ É mpʉ David a be ngwiha mɨlɔb ɨ, nye a be ó lé egʉa ó, Zyɛm a si kɛʼ, le ede mɨnkɛla ó, nye ópɛh nuu mʉr é mpoŋbʉr we, dil nye é dia taʼa ye.

³¹ David a si bɛa bee sa yé a be ó, yé ópyal ɨ. No ó nye a ze lɛɛ lɔb epàh e foo mo Lœma mulo mo Zyɛm ɨ. Yé a be ó é jɔʼ nye a tile ó: “Nye a baabirɔ kwar odwè. Ebe no ó bɨpuno bye, byé a baabo e.”»

³² Pyɛr ze ko tɨʼ ó: «Mʉr Zyɛm a pɛ̀h é foo nɨ, ó ndɨ Yesʉs. No ó, bɨh bɨbɛh, bé ó oboʼla o lɔb we waa.

³³ Nye a si bere, to di si é mbo ejʉm mo Zyɛm. Nye ó b'a ntɨh bɨh Mbɨambɨa Sisim, waa Zyɛm Sɔŋ a kɛʼ bɨh ɨ. Wé ó bɨn lé ebee le ejoʼo e.

³⁴ Yé ó no, ebe, ntʉʼ David nye mʉr tɨʼ a bere kʉ. Nye a lɛɛ ó: “Da a lɛɛ e Tî wam ó: ‘Diʼe si wâ, é mbo ejʉm wam,

³⁵ to pyal é jɔʼ me ósa bʉr o dɔm bo ó, bé diʼe cyela mokʉ mo e!’”»

³⁶ Pyɛr ze ko tɨʼ ó: «Bʉr o ndɨ kaʼ é lal Ɨzraɛl ɨ, bé ejala le ekʉ gʉa lɔb wi: mʉr bɨn bé a cyèl é klos kʉ ɨ, die le Yesʉs, nye ó waa Zyɛm a cyel é dia Tî ga wina le é dia Lœma mulo mo Zyɛm!»

³⁷ Njoʼa bʉr, bé a joʼo mokan maa ɛ, mɨleme myɔɔ, myé ntɔʼ loŋlo e bʉa ndwe e l'empime. No ó bé a dî e Pyɛr bé e myʉʉ mɨlʉmlʉ ó: «Obɨɔ bɨh! Bɨh bé ejala le eka sa yé?»

³⁸ No ó Pyɛr a bɨha e be ó: «Gwɨma ga mobebe mɨn. Bɨn bé à dwir mɨleme. Mʉr nyiwɛh é sama yin, nye nʉŋa ndubo é nkul die mo Yesʉs-Krɨst, ó Zyɛm pɛʼɛ nye bɨbaa nye lé eniʼe é lɔb mɨsyem mye e. No ó bɨn bé òka ntɨhɔ Mbɨambɨa Sisim, sa Zyɛm a bɛa kɛʼ bɨn ɨ,

³⁹ ebe, Zyɛm a kɛʼ ó, bɨn e bwan bɨn, ndwe e baa bɨbɛh ndɨ é l'ejaa ɛ, ze pyal é baa bɨbɛh Sɔŋ ga wina Da Zyɛm ójebe e.»

⁴⁰ Pyɛr ze bâʼle boʼlo be myʉʉ mɨlɔb é buobuo, to le egba be nkul é monyʉl. Nye ó: «Kpɛŋɨ ga efie! Syɛhla ga ozyɛhozyɛh o bʉr o mya wi.»

⁴¹ Buobuo bʉr é sama yɔɔ, bé ntɔʼ mɛʼle sa Pyɛr a lɛɛ ɛ, ntɔʼ nʉa ndubo. É moho waa, bʉr kwoʼ be otɔɔyin olɛl, bé a si ni é l'esama le obuʼla.

Tiʼ mbɛr Zyɛm wé a be ɨ Yerʉsalɛm ɨ

⁴² Bé a be ó lé ekʉ gba monyʉl é jɔʼ yiyɛh lé eto joʼlo sikʉlʉ mɨlʉmlʉ myé a dwe-dwe be e. Bé a di-di nteme ó, é zyɛŋa-mɨleme tʉŋlʉ, le ede-de nteme gumo gwar, le ejwɨʼla-jwɨʼla e Zyɛm.

⁴³ Bɨbɛh bé a si joʼo bʉa lé ebee mpʉ Zyɛm a bɨlan e mɨlʉmlʉ lé esa bɨsa bɨ jehe, ndwe e bɨdweʼle bɨ nkul we le mosima ɛ.

⁴⁴ Obuʼla bɨbɛh, bé a ka sa ó, sama gwar; baʼlɔ-baʼlɔ mobi mɔɔ zyɛŋa.

⁴⁵ Bé a si bɛma mosi mɔɔ ndwe e mobi mɔɔ, ze kablɔ bɨmɔn bɨ tɨʼ paʼra wɔɔ, mʉr nyiwɛh nʉa-nʉa bim lé ejala e nye e.

⁴⁶ É dobo lɨlɛh, bé a si to dolo lé egwɨhla é jahla bii mo Zyɛm tʉŋlʉ. Go ó, é mɨmbɛr myɔɔ, bé a be-be ó lé epɛ̂ʼla bler, le edeŋɔ mode mɔɔ, mɨleme myɔɔ, myé osi loŋlo e bɨsʉhʉ byé a duho be é mɨmo si ɨ.

⁴⁷ Bé a be ó lé edwe Zyɛm kum. Bʉr bɨbɛh, bé a be ó lé eseʼle be. É dobo lɨlɛh, Da a be ó lé edwe bʉr tiʼ molu mo mpoʼ mɨmɛh, le eko be é mbɛr Zyɛm wɔɔ.