Mɨlʉmlʉ 16 - Kálara Zyɛ̌m Edwán é mpʉ̌n

Timote, nye eni é sama mo Pol

¹ Pol ze pyal ɨ Dɛrbe ndwe e Listra. Nuu mpʉn a byɛl ó Listra, die le Timote. Nyɔŋ a be ó sile Yʉden wé a be mbuʼla ɛ. Sɔŋ we nyɛɛ a be ó mʉr Grɛs.

² Obuʼla bé a be Listra ndwe e Ikoniʉm ɨ, bé a be ó lé eseʼle Timote é lɔb ebò e cyen nye a dɨ kœʼ œ.

³ Pol a be e gwɨma ó, Timote diʼe liʼla we. No nteme ó nye a sa nye mpʉn ɨ, ebe, oYʉden bɨbɛh bé a be é lal waa ɛ, bé a be lé ekʉ gʉa ó, sɔŋ a be ó mʉr Grɛs.

⁴ É bɨnkana bibyɛh bé a cwɨɨ-cwɨɨ ɨ, bé a be ó lé eto le elɛɛ obuʼla mpʉ mɨlʉmlʉ ndwe e l'ocyɛb be efoʼ o mbɛr Zyɛm Yerʉsalɛm, bé a nʉa mɨtiʼa é lɔb motie mo Moyiz ɨ. Bé nteme, bé a lɛɛ-lɛɛ e be ó, bé duʼo mɨtiʼa myaa.

⁵ No ó mɨmbɛr mɨ Zyɛm, myé a nʉa pim é buʼo e. Tɔɔ obuʼla nteme ze kʉ buo-buo bua dobo lɨlɛh.

Pol lé ebee sa jehe é lima: mʉr lal Masedwan lé elwib e nye

⁶ Mbɨambɨa Sisim a si kamle be lé elɛɛ mɨlɔb mo Da é lal Azia. No ó bé a to laa lal Frigia, bé e waa Galat.

⁷ É jɔʼ bé a pyal kunokuno e lal Misia ɛ, bé a si saa eto Bitini. Sa gwar, Sisim mo Yesʉs, wé a baamɛʼle jwɨʼ yɔɔ yaa.

⁸ É jɔʼ bé a laa Misia ɛ, bé ze to nkana Troas.

⁹ É pum nɛʼɛ, Pol ze bee sa jehe é lima! Nye a bee ó, nuu mʉr Masedwan cɨcyel, lé ejwɨʼla e nye ó: «Ntaʼ kaʼ, Masedwan. Ntaʼ, ze gul bɨh!»

¹⁰ No ó, pie sa jehe nye a bee é lima nɨ, bɨh ze kwɨmla cyen lé eto Masedwan kam e kam, ebe, bɨh bé a si bee ó, Zyɛm a si jebe bɨh ó, bɨh toʼ, to lɛɛ Mbɨambɨa Lɔɔ é lal waa.

Lidia, nyi jyɛʼ taa buʼo ye boo Yesʉs

¹¹ No ó bɨh bé a ze kable é titima é Troas, ze tɨŋɔ cyen, ze nʉa cɨcyel zi lé eto dine Samotras ɨ. Bɨh ze ja tɨʼ elu egwar. É mɛn tɨʼ ó bɨh bé a pyal Neapolis ɨ.

¹² É jɔʼ bɨh bé a pʉʼa tɨʼ ɨ, bɨh ntɔʼ to pyal Filipi, nkana efoʼ é lal Masedwan, peh si yé a be é mojwɨ̀ʼa mo bʉr o Rom ɨ. Bɨh ntɔʼ di mʉʉ molu abuo tɨʼ é nkana yaa.

¹³ É moho saba, bɨh ze mʉa é nkana, ze to é pɨn dibe, gumo bɨh bé a be lé ebɛa gʉa ó, bɨh bé ókœb oYʉden lé ejwɨʼla ɛ. Pyala bɨh bé a pyal tɨʼ ɨ, bɨh ntɔʼ komlo dia, taare lé elwib e sama bʉba bɨh bé a kœb, bé osi syɛŋa tɨʼ ɨ.

¹⁴ Nuu mʉma a be ó tɨʼ é bʉba baa, die le Lidia, sile nkana Tiatir. Nye a bɛma-bɛma ó, bɨdime mɨkan mɨ akaa-e-kaa. Nye a be ó si taare lé edwaabe Zyɛm oYʉden. Nye ze joʼo bɨh, Da ze dib nye zi ó, nye gʉa joʼlo sa Pol a lwib-lwib ɨ.

¹⁵ Nye ze nʉa ndubo, bé e mbɛr bʉr we nteme. No ó nye a ze jwɨʼla e bɨh ó: «ǃBɨn si mɛʼle ó, me ó é zyɛŋa wih boo Da Yesʉs, le mʉr ebuʼla nɛʼɛ, ntaʼ, ze ni ga be ɨ modwii mam.» No ó nye a yɨm bɨh ó, bɨh mɛʼla ɛ.

Pol bé e Silas é mbɛr mɨmbʉʼ ɨ nkana Filipi

¹⁶ É guu moho, bɨh ze to gumo bé a dɨ sa-sa mɨnjwɨʼla ɛ, lʉʉ elʉa e mʉma, lé a be ó e kuʼ nyʉa nye a sa-sa mpʉbla e we e, syɛɛ yaa lé ekʉ twe mɔn twiha. Lé ze bɔma e bɨh. Ojwɨʼa be, bé a be ó lé ekʉ biʼ e nye.

¹⁷ Nye ze taare lé edu bɨh e Pol pihe, e tim é nʉm. Nye a lɛɛ-lɛɛ ó: «Bʉr ba, bé ó osyɛl o mosa mo Zyɛm ndɨ Lʉ bɨsa bibyɛh ɛ. Bé ó ndɨ etuno edib e zi ebi tiʼ molu mo mpoʼ mɨmɛh.»

¹⁸ Nye a si sa no molu é buobuo. É l'elu le epihe, Pol a be ó é bul duo leme. Nye ntɔʼ ze dwibra, lɛɛ e l'eleme laa ó: «É nkul die mo Yesʉs-Krɨst, me lɛɛ e go ó, duha nye é nyʉl.» É jɔʼ gwar yaa, eleme ntɔʼ pʉʼa ma mʉma waa é nyʉl.

¹⁹ Ojwɨʼa be, bé a baaka be e mbɛla é mɨleme ó, bé óbâʼle ka bi sɔʼɔ é zi we. No ó bé a ze mɛr Pol bé e Silas, ze toŋɔ e be é l'ebɨm e nkana yaa, lé edulo be si e si, ó bé to ó pur be gʉʼ é mih mo ongoman o Rom.

²⁰ Pyala bé a pyal e be gʉʼ ɨ, bé ze to e mye ó: «Bʉr baʼ, bé ó oYʉden! Bé ekʉ sa ó njɨ sa ndɨ elɨr nkana ga yina ɛ,

²¹ le eyeʼle mɨnjwɨr ndɨ kɔmlʉ é lal ga wina ɛ. Mɨnjwɨr myɔɔ, myé abe sa bɨna ga bʉr o lal Rom ndɨ e nkul emɛʼle, nkʉ sa.»

²² Ntuntuma bʉr, yé ntɔʼ liŋa e mɨlʉmlʉ. Ongoman baa, bé ze fo Pol bé e Silas mɨkan é monyʉl, le edwe nkul ó, bé fuura be mɨmbihe.

²³ É jɔʼ bé a be, bé osi nyuo be mɨmbihe e, bé ze gba be é mbɛr mɨmbʉʼ. No ó bé a ze lɛɛ ó, mbɔʼlʉ mɨmbʉʼ, nye gʉa baʼle be.

²⁴ É jɔʼ nye a joʼo tî we lé elwib no e, nye ze to e be é ma tiʼe a be é mbɛr mɨmbʉʼ waa tʉŋlʉ ɨ, gba be mɨmboʼo é mokʉ.

²⁵ Kunokuno e teme pum nɛʼɛ, Pol bé e Silas, bé a be ó teme ejwɨʼla e Zyɛm, le ejɛɛ bɨjɛɛ é l'efu le egumlo Zyɛm, myʉʉ mɨmbʉʼ lé ejoʼlo be.

²⁶ Cye e cye yaa, si ze ncyeŋa é buobuo. Modwii mo mbɛr mɨmbʉʼ ze pɨŋla. Mobe mɨmɛh ntɔʼ diba. Mɨkʉkob mɨmbʉʼ mimyɛh ntɔʼ tiiba.

²⁷ É jɔʼ mbɔʼlʉ mɨmbʉʼ a lʉʼa é dwo e, nye a ka bee ó, mobe mo mbɛr mɨmbʉʼ, mé a be ó mɨmbeʼ. Nye ze gœm fòŋ we é pɔb, ze saa ó, nye jʉ ó nyʉl we, ebe, nye a jwɨʼ ó, mɨmbʉʼ, myé a si sil lé ekpɛɛ.

²⁸ No ó, Pol a lwib e nye lé eyɨm twii ó: «Asa go mʉr tɨʼ ebebe. Bɨh bɨbɛh dina ó wâ.»

²⁹ No ó mbɔʼlʉ mɨmbʉʼ a tumo molama, ze kpahbe to kam é ma tiʼe waa tʉŋlʉ, lé ejoʼo bʉa. Nye ze bɨʼ mpom we si é mih mo Pol bé e Silas,

³⁰ ze pyɛl be kʉl. Nye ó: «Oda, me ejala le esa nyá, é l'efu ó me biʼe tiʼ molu mo mpoʼ mɨmɛh?»

³¹ Bé ntɔʼ bɨha e nye ó: «Jyɛʼɛ taa buʼo yo boo Da Yesʉs, go nkʉʼ bi tiʼ molu mo mpoʼ mɨmɛh, bɨn e mbɛr bʉr go wiwɛh!»

³² Mbɔʼlʉ mɨmbʉʼ ntɔʼ to e be mbɛr we, ntɔʼ lɛʼle be bʉr bɨbɛh bé a be mbɛr we e. Pol bé e Silas, ntɔʼ tuno be mɨlɔb mo Da.

³³ Mbɔʼlʉ waa ze nʉa be é l'ewala e pum laa, ze jwɨ̀ɨ be mopɨɨ. Jɨh tɨʼ nye a kʉ sil jomo be mopɨɨ, nye mʉr tɨ, bé e mbɛr bʉr we wiwɛh, bé ntɔʼ ze nʉa ndubo.

³⁴ No ó nye a baʼle Pol bé e Silas, é mbɛr we, lé edwe be mode. Leme we, wé a si loŋlo e bɨsʉhʉ, bé e mbɛr bʉr we wiwɛh, ebe, bé a si jyɛʼ taa buʼo yɔɔ boo Zyɛm.

³⁵ É jɔʼ mɛn, wé a lama ɛ, ongoman o Rom ze lomo bʉr ó, bé toʼ, to lɛɛ e mbɔʼlʉ mɨmbʉʼ ó, nye birɨ bʉr baa.

³⁶ Mbɔʼlʉ mɨmbʉʼ waa ze cen Pol mpaŋla waa. Nye e nye ó: «Ongoman, bɨ ntɨh twii ó, bɨn birɔ. No ó, bɨn mu ó e nkul eka pyal kʉl. Toʼ ga é motala.»

³⁷ Pol nyɛɛ ntɔʼ bɨha e bʉr baa ó: «Bé a si bî bɨh teme bʉr, lɔb wih apa tiʼɔ, bɨh bɛɛ nteme bʉr o Rom! Bɨ ka ze gba bɨh é mbʉʼ. No ó, banana, bé eka gwɨm bir bɨh é mofo. Yʉʉ sɔʼɔ, yé abe no! Bé bʉr o tɨ, bé ntaʼ, ze dwih bɨh wâ!»

³⁸ No ó bʉr bé a lomo e, bé a to lɛɛ ongoman mpɨha waa ɛ. Bɛɛ kʉ ze twɨra lé ejoʼo ó, Pol bé e Silas, bé ó bʉr o Rom.

³⁹ No ó ongoman, bé a ze dî ó, bé duʼo be lé esi sa be mbi syɛɛla nɨ, ntɔʼ pyɛlɔ be é mbɛr mɨmbʉʼ, le ejwɨʼla e be ó, bé pʉʼa é nkana.

⁴⁰ É jɔʼ Pol bé e Silas, bé a pʉʼa é mbɛr mɨmbʉʼ ɨ, bé ze to mbɛr mo Lidia. Jɔʼ bé a sil bɛɛla e l'obuʼla, le ebâʼle gba be nkul é monyʉl ɨ, bé ze mʉa tɨ, toŋɔ.