Mɨlʉmlʉ 12 - Kálara Zyɛ̌m Edwán é mpʉ̌n

Jacques, nyi jʉŋɔ; Pyɛr nyɛɛ to é mbʉʼ

¹ Pie tɨ, njwɨɨbʉr Erod Agripa ze taare lé enaʼ bʉʉ bʉr o Mbɛr-Zyɛm mobo é nyʉl, le etíile be.

² Nye ze jʉ Jacques, tʉl mo Yʉanes, e fòŋ.

³ É jɔʼ nye a bee ó, oYʉden, bé a si bul kpɛl syɛɛla yaa ɛ, nye ze bâʼle to dolo, naʼ Pyɛr mobo é nyʉl. (Syɛɛla yaa, yé a syɛɛ ó, é jɔʼ ebʉʼ e Bɨbler ndɨ ebubɔ, agbaŋɔ levure ɨ.)

⁴ É jɔʼ Erod a be si naʼ Pyɛr mobo é nyʉl ɨ, nye ze gba nye é mbʉʼ. Nye ze pɛh bɨntoo bɨzima bɨnâ, dwe be syɛɛ ó, bé baʼla nye é mbɛr mɨmbʉʼ. Ntoo yiyɛh, bɨzima bɨnâ bɨnâ. Erod a tiʼe é leme we ó, nye bono ó esie e Paska. Bé òcyel Pyɛr é mih me é jɔʼ bʉr o lal, bé óbe tɨʼ é modia ɛ, ntɔʼ timle lɔb we.

⁵ Pyɛr a be ó kɛʼa é mbɛr mɨmbʉʼ, bʉr o Mbɛr-Zyɛm bɛɛ, lé esa zyee lé esa Zyɛm mɨnjwɨʼla é l'efu le.

⁶ É guu pum, Pyɛr a be ó njaʼa si paʼra bɨzima bɨba, mbo wiwɛh kɛʼa e kʉkob, bɨzima bɨba, é mompàh mo nyʉl we, e mɨkʉkob mɨkɛʼa é mɔɔ mobo. Byʉʉ bɨzima byɛɛ, byé a be ó é l'ebe e mbɛr mɨmbʉʼ si. Erod a be lé egwɨm ó, é mɛn tɨ, nye ócyel Pyɛr é mih me ó, lɔb we, wé kaʼ lwibɔ.

⁷ Pyɛr dina é dwo, nye ka twɨra nɛʼɛ, engles mo Da, nyi pyal é kpɨm! Myɛn, wé ntɔʼ pan é mbɛr mɨmbʉʼ tʉŋlʉ. Engles ze ŋmɛh Pyɛr é l'empàh e nyʉl, jɨm nye é dwo. Nye e nye ó: «Kpahba mʉa si.» Mɨkʉkob, myé ntɔʼ pʉʼa nye é mobo, kur si!

⁸ Engles ze lɛɛ e nye ó: «Tiila kana go. Go à bwar osilpah bo.» Pyɛr ntɔʼ sa no. Engles ze bâʼle lɛɛ ó: «Bwara nteme len kʉr go. Duʼo me.»

⁹ Pyɛr ntɔʼ du engles, é du, du, ze pʉʼa é mbɛr mɨmbʉʼ, pyal kʉl. Nye a dɨ bee sa nɨ yiyɛh, nyɛɛ lé egʉa ó, yé ó njɨ sa jehe bʉr lé ebee-bee é bɨlima ɛ. Nye a baagʉa ó, syɛɛla engles a sa nɨ, yé a kʉ be ó cyecye!

¹⁰ É jɔʼ bé a laa mbɔʼlʉ efoʼ ndwe e waa mba ɛ, bé ze pyal é l'ebe e bɨnkoho lé eto nko nkana ɛ. Ebe laa, lé ntɔʼ diba lé ome! Bé ntɔʼ pyal kʉl. Bé osi laa mpaʼa ngwar nɛʼɛ, é cye e cye yaa, engles ntɔʼ dim Pyɛr é mih.

¹¹ É jɔʼ Pyɛr a ka gʉa sa yé a laa ɛ, nye ó: «Banana, me egʉa bee ó, yé ó cyecye! Da, nyi lomo engles we, lé eze pɛʼ me é mobo mo Erod! Nyi pɛʼ me é sa yiyɛh oYʉden, bé a bono-bono ó, bé ósa me e!»

¹² É jɔʼ nye a gʉa no e, nye ze to mbɛr mo Maaria, nyɔŋ mo Yʉanes, waa ndɨ e lʉʉ die ó, Markus ɨ. Ɨ tɨʼ ó bʉr é buobuo, bé a gwɨhla, lé ejwɨʼla e Zyɛm ɨ.

¹³ Pyɛr ntɔʼ kwaʼle ebe. Nuu syɛl mosa mʉma a be die Roda ɛ, ze pyal é l'ebe, ntɔʼ joʼo ecel le.

¹⁴ Njoʼa nye a joʼo ecel le e, nye ze kʉ dweʼe twii lwib mo Pyɛr, ntɔʼ bul soho. Laa ó, nye dibɨ nye ebe, nye a kʉ ka bula ó njɨ e kam, to mbɛr, to lɛɛ ó: «Pyɛr, nye ó kaʼ kʉl sikuo!»

¹⁵ Bɛɛ ntɔʼ lɛɛ e nye ó: «Go mu ó lé ekaa ogʉ!» Nye ze lwib lé eyɨm twii ó: «Yé ó kʉ be cyecye!» Bé ntɔʼ lɛɛ ó: «Yé ó bɛm be engles we!»

¹⁶ Pyɛr a be ó lé esa zyee lé ekwaʼle ebe. É jɔʼ bé a ka dib nye la ɛ, bé ntɔʼ di é jehe lé ebee nye.

¹⁷ Nye ze peble be mbo. É jɔʼ bʉr bɨbɛh, bé a be, bé mu é gʉʼʉʉ ɨ, nye ntɔʼ taŋle mpʉ Da a pɛʼ nye é mbɛr mɨmbʉʼ ɨ. Nye ó: «Toʼ, to lɛɛ ga Jacques bé e l'obuʼla ga bɨna no.» Nye ze laa, to é yʉʉ gumo.

¹⁸ Ngbaa le eka be é molama mo mɛn nɛʼɛ, bɨzima, byé a be ó é zaaama, agʉa gumo Pyɛr a to be e.

¹⁹ É jɔʼ Erod a saa nye, é saa saa, abee nye e, nye ntɔʼ pahle obɔʼlʉ baa, ntɔʼ dwe nkul ó, bé pɛʼɛ be modwɛʼla. Pie tɨ, nye ze mʉa ɨ Yʉda, to Sezare, gumo nye a to di ɨ.

Efie mo Erod Agripa efoʼ

²⁰ Tina, yé ó, Erod Agripa a be ó lé ekpaa empime e bʉr o Tir ndwe e baa o Sidɔn. No ó, bʉr o Tir bé e baa o Sidɔn onɨ, bé a kʉ ka bwam mode ó njɨ é lal mo njwɨɨbʉr Erod. No ó, mpʉ bé a joʼo e nye e, bé ze di ó twii é nko paʼ wɔɔ, bé ntɔʼ pyalɔ gumo nye a be e, bé osi bɛa kolo Blastus, a be lé edwɛʼ bɨsa bɨ jwɨɨ ye e. Bé e boo Blastus ze toŋɔ boo Erod, lé edî nye sa yé a ngbaa sa ó, mɨlɔb, myé kwɨmlɨ paʼra wɔɔ ɛ.

²¹ Nye ze cyel moho ekomlo mɨlɔb paʼra wɔɔ. É jɔʼ moho waa, wé a ka pyal ɨ, nye ze bwar kan mojwɨ̀ʼa we, ntɔʼ di si é dia tiʼà mɨlɔb ye é ntiii. Nye ze taare lé ejʉŋla lɔɔ we, mɨlʉmlʉ mɨnɨ lé ejoʼo e.

²² Bʉr baa ntɔʼ bɨn motwii kʉ. Bé ó: «Ntʉʼ mʉr lé elwib nwa. Yé ó twii mo nuu zyɛm!»

²³ É jɔʼ gwar e gwar yaa, engles mo Da ntɔʼ ŋmɛh nye, ebe, nye a baadwe Zyɛm kum. No ó, mɨfom, myé a ze poʼlo nye e, nye ntɔʼ dwè.

²⁴ No ó bʉr, bé a to le elɛɛ lɔɔ Zyɛm le emyɛm we gumo yiyɛh ɛ.

²⁵ Jɔʼ Barnabas bé e Sol, bé a sil to gul obuʼla o Yerʉsalɛm ɨ, bé ze bula, bé e Yʉanes, waa ndɨ e lʉʉ die ó, Markus ɨ.