Mɨlʉmlʉ 11 - Kálara Zyɛ̌m Edwán é mpʉ̌n

Pyɛr lé elɛɛ ompʉn mo Yesʉs sa jehe nye a bee é lima ɛ

¹ Mɨlʉmlʉ ndwe e l'obuʼla bé a be Yʉda ɛ, ze joʼo lɔɔ ó, bʉr o ndɨ abe oYʉden ɨ, bé nteme, bé a si buʼla lɔɔ Zyɛm bé a lɛɔ ɛ.

² É jɔʼ Pyɛr a bula, pyal ɨ Yerʉsalɛm ɨ, obuʼla bé a be, bé mu si saŋɔ mpʉn ɨ, ze nwahle nye tɨ.

³ Bé e nye ó: «Go a si ni mbɛr, di tɨ, bɨn e bʉr o b'a baapa saŋɔ mpʉn ɨ. Bɨn e boo nɔɔ nteme, bé a si bana puhba mobo, de fua gwar!»

⁴ Pyɛr ze taare lé etaŋle be lɔb waa, le elɛɛ mpʉ bɨsa byaa, byé a syɛɛlɨ ɨ. Nye ó:

⁵ «Me a be ó é nkana Yope lé ejwɨʼla e Zyɛm. É jɔʼ yaa, me a si bee yʉʉ sa jehe é lima. Yé a be ó, yʉʉ sɔʼɔ mpʉ bwaʼbwaʼ ndomo lé eduho é jobo kʉ, fulo si é ntiii. Nye a be ó tiila é modumo monâ. Nye ze fulo gumo me a be e.

⁶ Me a si gʉa dwɛʼ nye é tʉʉʉŋ, bee bɨsa byé a be tɨʼ tʉŋlʉ ɨ, ze bee otir, baa ndɨ e mokʉ monâ ɛ, bɨbɛh, le otir ó diʼ, le onyʉa, ndwe e bɨnɔn.

⁷ Me ze joʼo twii. Nye e me ó: “Pyɛr, mʉŋa si. Jʉʼo. Go à de.”

⁸ «No ó me a bɨha e nye ó: “Abana, Da, ebe, mode bɨh ndɨ ecyɛl, maa ndɨ e nkul elœʼ mʉr é mih mo e, me apa de me.”

⁹ «Me ze bâʼle joʼo twii lé eduho é jobo kʉ, lé elɛɛ ó: “Sa Zyɛm mu si pubo e, aka nyamle lɛɛ ó, yé ó sa ndɨ elœʼ mʉr é mih mo Zyɛm ɨ!”

¹⁰ Sa yaa, yé a pyal me no ó, zɔʼ lɛl. Pie tɨ, sa yaa, yé ntɔʼ bula, sa yaa yiyɛh ntɔʼ daʼrɔ é jobo kʉ.

¹¹ É jɔʼ gwar e gwar yaa, bʉrʉm olɛl ze pyal é mbɛr me a be e. Bé a duho ó, Sezare, lé eze saa me.

¹² No ó Mbɨambɨa Sisim a lɛɛ e me ó, bɨh e boo nɔɔ toʼ. Nye a lɛɛ ó, me l'aliʼa lé eto. Obuʼla tobo baʼ nteme, bé a si liʼle me ɨ Sezare. Bɨh e boo nɔɔ ó b'a to ni mbɛr mo nuu mʉr.

¹³ Nye ze lɛɛ bɨh mpʉ nye a bee engles é mbɛr we e. Engles waa ze lɛɛ e nye ó: “Loma bʉr Yope. Bé toʼ, to jebe Simɔn, ndɨ ejebɔ ó, Pyɛr ɨ.

¹⁴ Mɨlɔb nye ólɛɛ go e, myé ó ngo lɛʼle mpʉ go óbi tiʼ molu mo mpoʼ mɨmɛh ɛ. Abe njɨ go ome. Mbɛr bʉr go wiwɛh, wé óbi tiʼ molu mo mpoʼ mɨmɛh nteme.”

¹⁵ «Jɨh tɨʼ me a kʉ nʉa lwib, Mbɨambɨa Sisim ntɔʼ ze fulo é sama yɔɔ yiyɛh. Yé a be ó jwɨʼ gwar mpʉ wé a taare fulo bʉr é l'etɔɔrʉ ɨ.

¹⁶ No ó, me ze toŋlo sa Da a lɛɛ bɨna ga ɛ. Nye a lɛɛ ó: “Yʉanes a dù-dù bʉr ó e modibe. Bɨn bɛɛ, bé ónʉa ndubo ó é Mbɨambɨa Sisim.”

¹⁷ To kœb ó, Zyɛm a si dwe nteme be sa gwar e gwar nye a taare dwe bɨna ga é jɔʼ bɨna bé a jyɛʼ ga taa buʼo ga yina boo Da Yesʉs-Krɨst ɨ. É syɛɛla ye yaa, me a baangbaa kamle nye lé edwe be Sisim we.»

¹⁸ Jɔʼ bé a sil joʼo mɨlɔb myaa ɛ, mɨleme ze fila be si. Bé ze dwe Zyɛm kum. Bé ó: «Yé ó no: Zyɛm, nyi toŋlo nteme baa ndɨ abe oYʉden ɨ, ndwe le edib be zi egwɨma mobebe mɔɔ, le edwir mɨleme, bé nkʉʼ bi tiʼ molu mo mpoʼ mɨmɛh.»

Mbɛr Zyɛm ndɨ Antios ɨ

¹⁹ É jɔʼ Etyɛn a jʉŋɔ ɛ, bʉr ze tíile ompʉn. Yé ó b'a sa ó, ompʉn, bé gbɛha. Baʼ bʉr o sama yɔɔ, bé a si to cye Fenis; bʉʉ, to é Siprʉs; bʉʉ nteme, to é nkana Antios. Bé a kʉ lɛɛ-lɛɛ lɔɔ Zyɛm ó, njɨ é l'oYʉden bé ome.

²⁰ To kœb ó, yé a be nteme ó e bʉʉ obuʼla, bé a duho dine Siprʉs ndwe e nkana Sirɛn ɨ. Bɛɛ ntɔʼ toŋɔ Antios, ze to bɔma e bʉr o Grɛs. Bé ze lɛɛ be nteme Mbɨambɨa Lɔɔ lé etiibe e Da Yesʉs ɨ.

²¹ Nkul mo Da a be ó e be. Bʉr, bé a si bul dwir mɨleme, jyɛʼɔ taa buʼo yɔɔ boo Da Yesʉs.

²² Bʉr o mbɛr Zyɛm wé a be Yerʉsalɛm ɨ, bé ze joʼo lɔɔ waa, bé ntɔʼ lomo Barnabas Antios.

²³ É jɔʼ nye a pyal gʉʼ ɨ, nye a ka bee mpʉ Zyɛm a bul cwɨa e l'ompʉn ɨ. Nye ntɔʼ soho, ze tɨe be ó, bé diʼe twii é zyɛŋa wɔɔ boo Da Yesʉs.

²⁴ Barnabas a be ó mbɨambɨa mʉr, lwɨŋla e Mbɨambɨa Sisim ndwe e buʼo. Bʉr é buobuo, bé a si jyɛʼ taa buʼo yɔɔ boo Da Yesʉs.

²⁵ No ó, Barnabas a mʉa, to Tarsʉs, lé eto saa Sol.

²⁶ É jɔʼ nye a bee nye e, nye ntɔʼ bula e nye, bé e nɔɔ ze to Antios. Bé ze syɛŋa, bé e bʉr o mbɛr Zyɛm wé a be tɨʼ ɨ, tɔɔ mbu ntinɨ. Cye yaa yiyɛh, bé a be-be ó, lé eyeʼle bʉr é buobuo. Tɨʼ Antios ó bé a taare lé ejebe ompʉn mo Yesʉs ó, okristen ɨ.

²⁷ É jɔʼ yaa ó ogwiha o mɨlɔb, bé a duho Yerʉsalɛm, to Antios ɨ.

²⁸ Nuu mʉr a be ó é l'esama lɔɔ, die le Agabus. Nye a si lɛɛ bʉr é nkul mo Mbɨambɨa Sisim ó, bwaʼbwaʼ za ónyaŋla é molu maa, jala si nwaʼ nyiwɛh. No ó, za waa a ka nyaŋla ó, é jɔʼ mo Kɛɛza Klodiʉs.

²⁹ Ompʉn, bé bʉr o tɨ, bé a nʉa tiʼa ó, bé ótoŋlo obuʼla bé a di é Yʉda ɛ, mʉr nyiwɛh é sama yɔɔ lé egul be lé edu bim nye a be e ye e.

³⁰ Bé ntɔʼ sa nteme no. Bɨmɔn byaa, byé a lomlɔ ocyɛb be efoʼ o Mbɛr-Zyɛm ó, é zi mo Sol bé e Barnabas.