Mɨlʉmlʉ 10 - Kálara Zyɛ̌m Edwán é mpʉ̌n

Pyɛr bé e Kɔrnɛl

¹ Nuu mʉr a be ó ɨ Sezare, die le Kɔrnɛl. Nye a be ó njwɨɨ nter bɨzima. Nye ó b'a be njwɨɨ é ntoo bɨzima ndɨ ejebɔ ó, Ntoo lal Italia ɛ.

² Bé e mbɛr bʉr we wiwɛh, bé a be-be ó lé edwaabe Zyɛm. Nye a be nteme ó lé ebul gul baanteʼenteʼe o bʉr oYʉden, le ejwɨʼla e Zyɛm jɔʼ yiyɛh é buobuo.

³ Ngbaa le eka be, yé mu lé eto saa mowala molɛl nɛʼɛ, nye ntɔʼ bee sa jehe: engles mo Zyɛm lé eni é mbɛr we, engles waa lé eze lɛɛ e nye ó: «Kɔrnɛl!»

⁴ Nye ze dwɛʼ engles waa é tʉʉʉŋ e bʉa. Nye e nye ó: «Yé mu nyá, Da?» Engles ntɔʼ bɨha e nye ó: «Zyɛm, nyi bɨha mɨnjwɨʼla myo mbɨmbɨa. Nye etoŋlo go ó, ebe ngula go lé egul baanteʼenteʼe e.

⁵ Banana, loma bʉr Yope, bé toʼ, to baŋle Simɔn, waa ndɨ ejebɔ ó, Pyɛr ɨ!

⁶ Nyi fil é mbɛr mo mʉr ndɨ efeh bɨkʉr bɨ otir ɨ, die le Simɔn. Mbɛr we, wé ó é nkpah maŋ.»

⁷ É jɔʼ engles a laa ɛ, Kɔrnɛl ntɔʼ jebe bʉʉ osyɛl o mosa be, oba, ndwe e yʉʉ zima é l'esama e bɨzima byé a sea-sea e nye e. Zima yaa nteme, yé a be ó lé edwaabe Zyɛm.

⁸ Kɔrnɛl ntɔʼ lɛɛ be sa yiyɛh yé a pyal nye e. Pie tɨ, nye ze lomo be Yope.

⁹ É mɛn tɨ, bé dina zi e zi, bé mu lé ekunbo e Yope nɛʼɛ, Pyɛr ze bere kʉ mie, lé eto jwɨʼla e Zyɛm gʉ. Yé a be ó, yé mu lé eto saa teme moho.

¹⁰ Nye a be nteme ó lé ejɨ de, e za é mo é nyɛʼrɛ. É jɔʼ bʉr o mbɛr, bé a be, bé dina lé ejam nye mode e, nye ze bee sa jehe é lima.

¹¹ Nye ze bee ó, jobo lé ebɔa, le yʉʉ sɔʼɔ mpʉ bwaʼbwaʼ ndomo lé eduho é jobo kʉ, fulo si é ntiii. Nye a be ó tiila é modumo monâ.

¹² É ndomo waa tʉŋlʉ, yé a be ó e l'otir mɨmbi mimyɛh ndɨ e mokʉ monâ ɛ, le onyʉa, ndwe e bɨnɔn.

¹³ Nuu twii ntɔʼ lɛɛ e nye ó: «Pyɛr, mʉŋa si. Jʉʼo. Go à de.»

¹⁴ No ó Pyɛr a bɨha e nye ó: «Abana, Da, ebe, me apa de mode bɨh ndɨ ecyɛl, maa ndɨ e nkul elœʼ mʉr é mih mo e.»

¹⁵ Nye ze bâʼle joʼo twii lé elɛɛ e nye ó: «Sa Zyɛm mu si pubo e, aka nyamle lɛɛ ó, yé ó sa ndɨ elœʼ mʉr é mih mo Zyɛm ɨ.»

¹⁶ Sa yaa, yé ntɔʼ bâʼle pyal nye no byʉʉ bɨjɔʼ bɨba. Cye e cye yaa, ndomo waa ntɔʼ bula, bere é jobo kʉ, aka ntɨhɔ si.

¹⁷ É mpʉ Pyɛr a bee sa jehe yaa é lima ɛ, nye ze saa egʉa ndumlo tɨ. Nye dina lé epahle ye nɛʼɛ, bʉr ze pyal é kpɨm, duho boo Kɔrnɛl, bé mu é l'ebe e mbɛr mo Simɔn.

¹⁸ Bé ze taare lé elwib lé eyɨm twii, dîŋɔ ó: «Bʉr o mbɛr wiʼ ɔɔ! Zê bɨn bé e nuu njyoo wâʼ é mbɛr win wi, die le Simɔn, ndɨ ejebɔ ó, Pyɛr ɨ?»

¹⁹ Pyɛr, nye dina lé epahle sa jehe nye a bee é lima nɛʼɛ, Mbɨambɨa Sisim ze lɛɛ e nye ó: «Bʉr olɛl, bé ó wâʼ lé esaa go.

²⁰ Mʉŋa si. Fula. Bɨn e boo nɔɔ, bé à to. Aliʼa lé eto, ebe, me ô lomo be.»

²¹ No ó Pyɛr a ze fulo si, le elɛɛ e bʉr baa ó: «Me ó ndɨ mʉr bɨn lé esaa nɨ. Ebe yé bɨn ze pyal me e?»

²² Bé ntɔʼ bɨha ó: «Bɨh ze ó, é lʉmlʉ mo njwɨɨ nter bɨzima wih, die le Kɔrnɛl. Nye ó cɨcyel mʉr lé edwaabe Zyɛm ɨ. Nye é bul jwɨ̂ʼlɨ e bɨsyɛɛla bɨ ncwɨncwɨa nye lé elɛʼle oYʉden bɨbɛh ɛ. Nuu engles mo Zyɛm tɨe nye ó, nye baŋla go, go toʼ, to pyal nye ye, ó nye joʼla sa go ólɛɛ nye e.»

²³ Pyɛr ze niŋle be mbɛr, komlo be bɨja é mbɛr mo Simɔn. É mɛn tɨ, bé e boo nɔɔ ze to, bʉʉ obuʼla o Yope lé eliʼle nye.

²⁴ É moho wé a ka bɔma ɛ, bé ze pyal Sezare. Kɔrnɛl a be ó lé ebono be, bé e mɨmbyɛl mye, ndwe e l'ofo be nye a baŋle e.

²⁵ Nia Pyɛr a ni mbɛr ɨ, Kɔrnɛl ze to bɔma e nye, ze bɨʼ mpom we si é mih me lé edwiibɨ nye.

²⁶ Pyɛr nyɛɛ ze gbɛl nye si. Nye e nye ó: «Mʉŋa si, ebe, me nteme, me ó njɨ mʉr.»

²⁷ Nye ze lwib e Kɔrnɛl. É jɔʼ bé a to ni mbɛr ɨ, Pyɛr a kœb ó, buobuo bʉr, bé osi fwal tɨ.

²⁸ Nye e be ó: «Bɨn bé ekʉ gʉa ó, yé ó kɔmlʉ é nko paʼ wih oYʉden, ó bɨh syɛŋa zi e mʉr kul fih, nkʉ dihle ba nko nye ndɨ ɨ. Sa gwar, Zyɛm, nyi kʉ lɛʼle me ó, me l'ayi ka cyɛl mʉr nkʉ lɛɛ ó: “Mbi mʉr wi, wé e nkul elœʼ mʉr nduo we é mih mo Zyɛm.”

²⁹ Ebe no, me baapeere é jɔʼ bɨn jebe me ó, me ntaʼ ɛ. No ó, kaʼ lɛɛ ga me sa bɨn jebe me e tɨʼ ɨ.»

³⁰ No ó Kɔrnɛl a bɨha e nye ó: «Yé mu ó, muh molu monâ, é l'ewala lɨ, me a be ó é mbɛr wi, lé esa mɨnjwɨʼla, myaa saŋɔ-saŋɔ é mowala molɛl ɨ. Nuu mʉr ze nyin me motwɨra, e mɨkan é pumo-pumo, ze cyɛb me é mih.

³¹ Nye e me ó: “Kɔrnɛl! Zyɛm, nyi joʼo mɨnjwɨʼla myo mbɨmbɨa! Nyi toŋlo mbi go lé egul baanteʼenteʼe e.

³² Banana, loma bʉr Yope. Bé toʼ, to jebe Simɔn, waa ndɨ ejebɔ ó, Pyɛr ɨ. Nye be ó si fil é mbɛr mo Simɔn, mʉr ndɨ efeh bɨkʉr bɨ otir ɨ. Mbɛr we, wé ó, é nkpah maŋ.”

³³ No ó me ze kpahbe lomo bʉr é sɔɔlʉ go e. Go be ó si kʉ gʉa esa, lé ebana ze. Bɨh bɨbɛh mu si fwal wâʼ bananaʼ é mih mo Zyɛm ó, lé ejɨ joʼlo lɔɔ wiwɛh Da a lɛɛ e go ó, go ntaʼ, ze ntɛŋ bɨh ɨ.»

Lɔɔ mo Pyɛr é mbɛr mo Kɔrnɛl

³⁴ No ó Pyɛr a ze nʉa lwib. Nye ó: «Mɨ kʉ gʉa cyecye é bananaʼ ó, Zyɛm, nye adwaabe bʉr é lɔb mompom mɔɔ.

³⁵ Zyɛm, nye ebee mbɨmbɨa ó, mʉr nyiwɛh lé edwaabe nye, ndwe le esa syɛɛla ndɨ cɨcyel ɨ. Nye esyɛŋ bʉr baa ó, lé edwih be é bɨkul bibyɛh.

³⁶ Bɨn bé egʉa lɔɔ Zyɛm a ntɨh bwa b'Ɨzraɛl ɨ. Mbɨambɨa Lɔɔ waa, wé ó wi: Zyɛm óbula gba mʉr motala é leme ó, dumo e Yesʉs-Krɨst, ndɨ Tî bʉr bɨbɛh ɛ.

³⁷ Bɨn bʉr o tɨ, bɨn bé egʉa sa yé a syɛɛlɨ é Yʉda yiyɛh ɛ. Yé a taare ó, é lal Galɨle, pie ndubo Yʉanes a dù bʉr ɨ.

³⁸ Bɨn bé egʉa nteme mpʉ Zyɛm a lœm Yesʉs, mʉr Nazarɛt, Sisim we, le edwe nye nkul nɨnɨ ɨ. Bɨn bé egʉa nteme, mpʉ Yesʉs a kœʼ mɨlal e mɨlal, lé eto le esa embɨa, le etiʼ baa bé a sia e Njwɨɨ moleme e, ebe, bé e Zyɛm ó b'a be.

³⁹ Bɨh bɛɛ ó ndɨ oboʼla be, bʉr o ndɨ egʉa bɨsyɛɛla bibyɛh nye a sa ɨ Yerʉsalɛm, ndwe e myʉʉ mɨpaʼ mɨ nkɔra oYʉden ɨ. Bé a si cyèl nye é klos kʉ, jʉŋɔ nye.

⁴⁰ Sa gwar, Zyɛm a si pɛ̀h nye é foo é l'elu elɛl. Nye ze sa ó, bʉr bâʼla bee nye.

⁴¹ Abe yɛɛ oYʉden bɨbɛh. Bɨh ome, bʉr o Zyɛm a bɛa pɛh ɛ, bɨh ó ndɨ eboʼlo é l'ocyecye, tiibe e nye. Bɨh e nɔɔ, bé a si puhba mobo pie jɔʼ Zyɛm a pɛ̀h nye é foo e.

⁴² Nye a lomo bɨh ó, bɨh toʼ le elɛɛ oYʉden Mbɨambɨa Lɔɔ, le eboʼlo ó, Yesʉs ó ndɨ mʉr nye a cyel é dia tiʼà mɨlɔb, waa ótiʼe mɨkubla le odwè mɨlɔb ɨ.

⁴³ Nye ó mʉr lɔb we ndɨ tila é l'okalara be ogwiha o mɨlɔb bɨbɛh ɛ. Bé a lɛɛ-lɛɛ ó, mʉr nyiwɛh ójyɛʼ taa buʼo ye boo nye e, Zyɛm ópɛʼ bɨbaa nye lé eniʼe é lɔb mɨsyem mye e. Nye ósa no ó, ebe die mo Yesʉs.»

⁴⁴ Pyɛr l'apa fil lwib nɛʼɛ, Mbɨambɨa Sisim ntɔʼ fulo é mʉr nyiwɛh a joʼo lɔɔ we e.

⁴⁵ Obuʼla bé e boo Pyɛr bé a ze, baa b'a saŋɔ mpʉn ɨ, bé a si bul laŋle jehe lé ebee bʉr o ndɨ abe oYʉden ɨ, lé ebi Mbɨambɨa Sisim nteme.

⁴⁶ Bé a jehe ó, ebe, bé a be ó, bé mu lé elwib bɨlwib bɨfih, le egumlo mpwaʼ kum mo Zyɛm. No ó Pyɛr a ka dî ó:

⁴⁷ «Zê mʉr, nye e nkul eka kamle bʉr baʼ lé enʉa ndubo modibe ɛ? Banana, bé mu ó lé ebi Mbɨambɨa Sisim nteme, jwɨʼ gwar mpʉ bɨna ga!»

⁴⁸ No ó nye a ze lɛɛ e be ó, bé nʉŋa ndubo é nkul die mo Yesʉs-Krɨst. No ó bé a ze jwɨʼla e Pyɛr ó, nye jaʼ mʉʉ molu tɨ.