Mataos 6 - Kálara Zyɛ̌m Edwán é mpʉ̌n

Mpʉ bʉr lé ejala le edwiibɨ Zyɛm ɨ

¹ «Diʼe ga ncye é lɔb esa lɛʼla. Adwiibɨ ga Zyɛm é mih mo bʉr, ó bɨn nkʉʼ beɔ. ǃBɨn si sa no nɛʼɛ, bɨn bé aŋa bi mpaŋ myɛna boo Sɔŋ win ndɨ é jobo kʉ ɨ.

² «Ebe no, ǃgo óbe ó lé edwe baanteʼenteʼe o bʉr mɔn nɛʼɛ, ato le elɛɛ sa yaa kʉ kʉ, mpʉ baanya-bɨkʉʉŋʉ lé esa é mompah mɨnjwɨʼla mɨn le moman mɨmpaʼa ɛ. Bé esa no ó, bʉr nkʉʼ seʼle be. Me elɛɛ bɨn cyecye ó nɛɛ: bɨha bʉr, bɨ bɛa bi myɛna mɔɔ.

³ Sa gwar, ǃgo si dwe baanteʼenteʼe o bʉr mɔn nɛʼɛ, mbo emyɛl go, wé l'ayi gʉa sa mbo ejʉm sa ɛ,

⁴ é l'efu ó, edwɛna lo, lé nkʉʼ syɛɛ é mofo. Sɔŋ go lé ebee sa yiyɛh ndɨ fela ɛ, nye ódwe go mpaŋ myɛna tɨ.»

Sikʉlʉ é lɔb mɨnjwɨʼla

⁵ «Jɔʼ bɨn lé ejwɨʼla e Zyɛm ɨ, asa ga mpʉ baanya-bɨkʉʉŋʉ lé esa ɛ. Bé ejwɨʼla-jwɨʼla ó, ocɨcyel é mompah mɨnjwɨʼla mɔɔ le moman mɨmpaʼa, ó bʉr, bé beŋɨ be. Me elɛɛ bɨn cyecye ó nɛɛ: bɨ bɛa bi mɔɔ myɛna.

⁶ Sa gwar, gwɔɔ, é jɔʼ go lé ejɨ kpɛl sa Sɔŋ go mɨnjwɨʼla ɛ, niʼe é tiʼe yo, dible ebe, jwɨʼla e Sɔŋ go ndɨ é l'efo tʉŋlʉ ɨ. No ó, waa ndɨ ebee sa go lé esa é l'efo e, nye ódwe go mpaŋ myɛna.

⁷ «É mɨnjwɨʼla bɨn ndɨ ejwɨʼla e Zyɛm ɨ, abul ga mokan ndɨ abe e nyɔm ɨ, mpʉ bʉr o ndɨ abe obuʼla ɛ, lé esa ɛ. Bé ebuʼla ó, ozyɛm bɔɔ, bé ókʉ ka joʼo be ó njɨ ebe mpuo mokan.

⁸ Ebe no, abaŋa ga be, ebe, Sɔŋ win, nye ebɛa gʉa sa lé esa bɨn sɔɔlʉ ɨ, bɨn l'apa jaʼ nye ya.»

Mɨnjwɨʼla mo Da Yesʉs

⁹ «Ebe no, bɨn bɛɛ, dɨʼe jwɨʼla ga e Zyɛm é mbi wi: “Sɔŋ wih ndɨ é jobo tʉŋlʉ ɨ, lɛʼla bʉr bɨbɛh ó, go ó Zyɛm ndɨ ti ɨ.

¹⁰ Jwɨ̀ʼa yo, yé ntaʼ. Gwɨma yo, yé syɛŋɨ é si nwa, mpʉ nteme yé ndɨ é jobo tʉŋlʉ ɨ.

¹¹ Dweʼ bɨh muh mode mo jala e bɨh ɨ.

¹² Pɛʼɛ bɨbaa bɨ ebebe bɨh go di eniʼe é lɔb mɨsyem mɨh ɨ, mpʉ bɨh lé epɛʼ byaa bɨ bʉr o ndɨ esa bɨh ebebe e.

¹³ Ato e bɨh é mobʉbla tʉŋlʉ. Syɛbɨ bɨh é mobo mo Bɨbla-mʉr. [Ebe, mojwɨ̀ʼa e nkul ndwe e moncɛnba, byé ó byo, to pyal é mɨmya mimyɛh. Amɛn!]”

¹⁴ «ǃBɨn si pɛʼ bɨbaa bɨ ebebe bɨn bé a niʼe bʉr nɛʼɛ, Sɔŋ win ndɨ é jobo kʉ ɨ, nye nteme ópɛʼ bɨbaa nye a niʼe bɨn é lɔb bɨgwìh bin ɨ.

¹⁵ Sa gwar, ǃbɨn si kʉ láa bɨbaa bɨ ebebe bɨn bé a niʼe bʉr nɛʼɛ, Sɔŋ win óláa bɨbaa nye a niʼe bɨn é lɔb motie bɨn bé a ntaa ɛ.»

Sikʉlʉ é lɔb eti mode lé edwiibɨ Zyɛm

¹⁶ «No ó, é jɔʼ bɨn lé eti mode e, mʉr alwaare monceme mpʉ baanya-bɨkʉʉŋʉ lé esa-sa ɛ. Bé elwaare-lwaare monceme ó, lé ekpɛl lɛʼle bʉr ó, bé mu ó lé eti mode. Me elɛɛ bɨn cyecye ó nɛɛ: bɨ bɛa bi mɔɔ myɛna.

¹⁷ No ó, ǃgwɔɔ si ti mode nɛʼɛ, jwɨ̀ŋɨ mpom go. Lama mulo.

¹⁸ Go saʼ no é l'efu ó, go nkʉʼ di alɛʼle ó, go eti mode. Sɔŋ go nye ome ndɨ naa é l'efo e, nye ó go lé elɛʼle e. Sɔŋ go lé ebee sa go lé esa é mofo e, nye ójɛna e go mpaŋ myɛna.»

Mpaŋ okum e l'ogbaa

¹⁹ «Daʼ maʼ ga okum e l'ogbaa win é si nwa, gumo osyoʼ le myeŋle lé elɨr bɨsɔʼɔ, mɨndiblʉ bʉ mobe le edíbe e.

²⁰ Maʼa ga okum e l'ogbaa win é lal mo Zyɛm, gumo osyoʼ le myeŋle ndɨ alɨr bɨsɔʼɔ, mɨndiblʉ abʉ mobe, díbe e.

²¹ Maʼa ga okum e l'ogbaa win gʉ, ebe, gumo okum win ndɨ ɨ, tɨʼ nteme ó mɨleme min, myé óbe e!»

Diʼe ga é myɛn tʉŋlʉ

²² «Dih, lé ó, é nyʉl mʉr tʉŋlʉ mpʉ elama. Ebe no, yé be ó, dih lo, lé ó mbɨmbɨa nɛʼɛ, lɛɛ ó, nyʉl go nyiwɛh ókʉ be ó é myɛn tʉŋlʉ.

²³ Ebe no, ǃɨ dih lo be lé esyɛb, abe mbɨmbɨa nɛʼɛ, nyʉl go nyiwɛh óbe ó é l'edurʉ tʉŋlʉ. Yé be ó, myɛn go a niŋe ó, go e we é nyʉl ɨ, wi lihba edurʉ nɛʼɛ, edurʉ laa, lé óbe ó, laa le antimentime!»

Mʉr esaŋɔ mojoʼo

²⁴ «Abe e mʉr ndɨ e nkul esea e l'ojwɨ̀ʼa oba é jɔʼ gwar, ebe, nye ónwim nuu, kpɛl nuu; nkʉ ntɔʼ ó, nye ódwaabe nuu; pyeh nuu. No ó, bɨn bé abe e nkul esea e Zyɛm syɛɛ, sea e l'Okum-e-l'ogbaa é jɔʼ gwar.»

Asyɛl ga ba e bɨn bʉr o tɨ, tiibe e nyɔmlʉ nkʉ mompor

²⁵ «Ebe no, me elɛɛ bɨn ó nɛɛ: asyɛl ga ba e bɨn bʉr o tɨ, tiibe e nyɔmlʉ [ndwe e monyʉla mɨn]. Asyɛl ga ba nteme e monyʉl mɨn, tiibe e mompor. Zê bɨn bé agʉa ó, mʉr, nye abe njɨ ede, le nteme ó, kubo nyʉl, wé e nyɔm, laa mompor ɛ?

²⁶ Dwɛʼa ga bɨnɔn lé epiili kʉ ɨ. Byé ali bɨpeme nkʉ bè. Byé ato é mɨngol yʉʉ gumo. Byé abe e mode mɨkɛɛla é monkuna. Sɔŋ win ndɨ é jobo kʉ ɨ, nye ó ndɨ edwe bye mode. Bɨn bé é bul buo dime, laa bɨnɔn.

²⁷ Zé é sama yin ndɨ e nkul eko elu egwar é molu mo tiʼ ye ebe ba nye lé esyɛl é leme e?

²⁸ Ebe yé bɨn lé esyɛl ba e monyʉl mɨn, tiibe e mompor ɨ? Paʼ dwɛʼ ga mpʉ ofulawa lé eto le ebuʼba le esam é bɨpeme e. Ofulawa baa, bé abe lé esea syɛɛ, nkʉ tie mɨkan.

²⁹ Me elɛɛ bɨn ó nɛɛ: dam be Salomɔŋ é jɔʼ nye a be e l'okum e l'ogbaa we e, nye a baabœrɔ mompor é mbɨa mbɨa, mpʉ Zyɛm lé ebœr ofulawa baʼ ɛ.

³⁰ Bɨka, byé etiʼe muh. Byé nteme, byé ó sa yé óguhɔ omɛn é duro e. Zyɛm pa taare bœr bɨka mompor, a dwɛʼra e bɨn! Yé, yé ósa ó, nye l'ayi bœr bɨn, laa naa ɛ? A twaʼbe buʼo yin ɛ!

³¹ Ebe no, asyɛl ga ba e bɨn bʉr o tɨ, tiibe e mɨlɔb mɨnɨ. Alɛɛ ga ó: “A bɨna bé óde-de ga máa monyɔmlʉ le máa monyʉla ee? A bɨna bé óbwar-bwar ga yé ee?”

³² Bʉr o bɨkul bɨfih bibyɛh, bé ekʉ ka du ó njɨ bɨsɨa byaa. To kœb ó, Sɔŋ win ndɨ é jobo kʉ ɨ, nye ebɛa gʉa ó, bɨn nteme bé ejɨ bye bibyɛh.

³³ Sa efoʼ, kʉ bul saa ga eni é jwɨ̀ʼa ye, ndwe le ekœʼ ebò e cyen é l'ocɨcyel. Bɨsa bibyɛh bɨn lé ejɨ bɨnɨ, Zyɛm óloŋlo bɨn bya.

³⁴ Ebe no, mʉr asyɛl ga ba e nye mʉr tɨ, tiibe e sa yé ósyɛɛ omɛn ɨ, ebe, omɛn, wé eyeʼbe wé mʉr tɨ. Mɨtuu mɨ moho, myé jala ó, e lɨha dobo.»