Mataos 4 - Kálara Zyɛ̌m Edwán é mpʉ̌n

Satan lé eboblo Yesʉs

¹ Mbɨambɨa Sisim ntɔʼ to e Yesʉs é feha si. Nye a to e nye gʉʼ ó, Njwɨɨ moleme bobla nye.

² Nye a di gʉʼ lé eti mode ó, tɔɔ mɨmoho mowʉm monâ ndwe e mɨpum mowʉm monâ. Nye ntɔʼ joʼo za.

³ Satan ze pyal gumo Yesʉs a be e. Nye e nye ó: «Yé be ó, go ó Mwan mo Zyɛm nɛʼɛ, lɛŋɨ mokoʼ maʼ ó, mé lihba bɨbler.»

⁴ Yesʉs ntɔʼ lɛɛ ó: «Yé ó tila é Kalara Zyɛm ó: “Mʉr, nye abe e nkul etiʼe njɨ e mode mé ome. Nye etiʼe ó, ebe ekan lɨlɛh lé epyal é nʉm mo Zyɛm ɨ.”»

⁵ Njwɨɨ moleme ze nʉa nye, ze to e nye é nkana ndɨ e l'ekɛn ɨ. Nye ze cyel nye é lon Mpah Zyɛm.

⁶ Nye e nye ó: «Yé be ó, go ó Mwan mo Zyɛm wa, lyaha, to cyɛb si, ebe, yé ó tila é Kalara Zyɛm ó: “Zyɛm ótiile beengles be etie é lɔb go. Bé ónkɛɛ go e mobo mɔɔ é l'efu ó, kʉ nkʉʼ be, agʉra é l'ekoʼ.”»

⁷ Yesʉs ze bɨha e nye ó: «Hɨʼɨ! Ebe, yé nteme, yé ó tila é Kalara Zyɛm ó: “Aboblo Sɔŋ go Da Zyɛm.”»

⁸ Njwɨɨ moleme ntɔʼ bâʼle ze nʉa nye, to e nye é nʉa ecwɨʼ lé a be é bul jaa kʉ ɨ. Nye ze lɛʼle nye mɨlal mɨ si nwaʼ mimyɛh, le okum e l'ogbaa o mɨlal myaa.

⁹ Njwɨɨ moleme, nye e nye ó: «ǃGo si bɨʼ mpom go si é mih mam, lé edwiibɨ me wa, me kʉ dwe go bɨsa biʼ bibyɛh.»

¹⁰ Yesʉs ntɔʼ bɨha e nye ó: «Satan, pʉʼa me é mih! Ebe, yé ó tila é Kalara Zyɛm ó: “Go ejʉʼa le ebɨʼ mpom go si é mih mo Sɔŋ go Da Zyɛm. Dwiibɨ mʉr ó, njɨ nye.”»

¹¹ Pie tɨʼ ó Njwɨɨ moleme a bir nye, laa ɛ. Beengles ze pyal, bé ntɔʼ taare lé esea e Yesʉs.

Etɛɛrɨ e syɛɛ mo Yesʉs ɨ Galɨle

¹² Yesʉs ze joʼo lɔɔ ó, bé a si gba Yʉanes é mbʉʼ. Nye ze bâʼle to Galɨle.

¹³ No ó nye a mʉa ɨ Nazarɛt, ntɔʼ to di Kapernaʉm é nkpah maŋ. Yé ó é lal mo Zabulon bé e Nɛftali.

¹⁴ Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó:

¹⁵ «Kul bʉr mo Zabulon, bʉr o Nɛftali, bɨn ó ndɨ nko maŋ ndɨ ɨ. Bɨn ó ndɨ é l'opɨn o dibe Yʉrdɛŋ. Bʉr o Galɨle, gumo bʉr o ndɨ abe oYʉden ɨ lé ebuo e!

¹⁶ Baa b'a taare be é l'edurʉ ɨ, bɨ bee bwaʼbwaʼ myɛn! Bʉr o b'a di-di é ka foo e, bé mu ó é myɛn!»

¹⁷ É dobo laa ó Yesʉs a ze taare lé etuno ó: «Gwɨma ga mobebe mɨn ɔɔ! Bɨn bé à dwir mɨleme ɔɔ! Ebe, jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!»

Yesʉs lé ejebe ompʉn be efoʼ be

¹⁸ Yesʉs a be ó lé ekœʼ é nkpah maŋ mo Galɨle. Nye ntɔʼ ze bee bʉr oba, Simɔn a jebɔ ó, Pyɛr ɨ, bé e ncyom we Andreas. Bé a be ó lé ela okʉa é modibe maŋ, ebe, bé a be ó olɛa be okʉa.

¹⁹ Nye ntɔʼ lɛɛ e be ó: «Duʼo ga me. Me ósa ó, bɨn diʼe ogohla o bʉr.»

²⁰ Cye e cye yaa, bé ntɔʼ liʼe okʉa bɔɔ, duŋɔ nye.

²¹ Nye ze laa naa, ntɔʼ bee bʉʉ obɨɔ ofih oba, bwan mo Zebede, Jacques bé e ncyom we Yʉanes. Bé a be ó si syel byɛl wɔɔ. Bé e sɔŋ wɔɔ Zebede, bé a be ó tɨʼ lé ekomlo okʉa bɔɔ. Nye ntɔʼ jebe be.

²² Cye e cye yaa, bé ntɔʼ mʉa, liʼɔ byɛl wɔɔ le sɔŋ wɔɔ, ntɔʼ duŋɔ nye.

Yesʉs lé etiʼ mɨsyoblʉ

²³ No ó Yesʉs a to le ekœʼ é bɨgumo bɨ Galɨle bibyɛh, to le eyeʼle bʉr é mompah mɨnjwɨʼla mɔɔ, le elɛɛ Mbɨambɨa Lɔɔ lé etiibe e jwɨ̀ʼa mo Da ɛ, le etiʼ mɨsyoblʉ mɨ kul bʉr ye, lé epɛʼ mosyɛb mɨmɛh le bɨjyɛm bibyɛh.

²⁴ No ó lɔɔ waa, wé a ze jʉŋla mpʉ kol eboʼ, jala lal Siria wiwɛh. Bé ze ze e mɨsyoblʉ boo nye: baa b'a be lé ejaʼra e mosyɛb e mokpaa mɨmbi mɨmbi ɨ, bʉr o b'a sia e moleme e, baa b'a sile-sile bʉʼ ɨ, le mɨsyoblʉ myé a be-be mɨmbʉmbʉʼ é mɨtɔɔ ɛ. Nye ze tiʼ be.

²⁵ Momɛl mo bʉr, mé a be ó lé edu nye é koo pihe, baʼ duho Galɨle, bʉʉ duho lal ndɨ e bɨnkana ewʉm ɨ, bʉʉ nteme duho nkana Yerʉsalɛm le lal Yʉda le é pɨn dibe Yʉrdɛŋ nkɔm-nkɛɛ.