Mataos 27 - Kálara Zyɛ̌m Edwán é mpʉ̌n

Yesʉs lé ekɛhɔ boo Pilat

¹ É dwine mɛn, ojwɨɨ be opara bɨbɛh ndwe e l'otamabʉr o lal ze bòno pɨʼ, ó bé nkʉʼ jʉ Yesʉs.

² É jɔʼ bé a be, bé mu si kaʼ nye monkara ɛ, bé ntɔʼ ze to e nye, to kɛhɔ nye boo Pilat, a be ngoman ɨ.

Efie mo Yʉdas

³ Yʉdas, mʉr a kɛha Yesʉs ɨ, é jɔʼ nye a bee ó, bɨ dwe nye mobe mo jala e l'efie e, nye ntɔʼ gwɨma syɛɛla ye, ze to ó, nye to ó, buulo mɨsaŋ mɨ mɔn mowʉm molɛl bé a dwe nye e, dwe ojwɨɨ be opara ndwe e l'otamabʉr o lal.

⁴ Nye ó: «Mɨ sa syem, ebe, me si kɛha mʉr nyoonkan a baakunbo e mpɨŋ ɨ!» No ó bé a ze bɨha e nye ó: «A bɨh bɛɛ, bé e wáa lɔb tɨ? Lɔb go ó nɨ!»

⁵ Nye ze guho be mɨsaŋ mɨ mɔn myaa é Mpah Zyɛm tʉŋlʉ, ntɔʼ pyal kʉl, to tiile kol é twii, dwè.

⁶ Ojwɨɨ be opara ze tœʼ mɨsaŋ mɨ mɔn myaa. Bé ó: «Yé ó kɔmlʉ ó, mʉr koma mbi mɔn yiʼ é kar mɨndwɛa mɨ Mpah Zyɛm, ebe, yé ó tɔɔ motié.»

⁷ No ó bé a ze bòno pɨʼ, ze nʉa bɨmɔn byaa, ntɔʼ bwamɔ peh si mo mel mompɨ. Bé a ka liŋ tɨʼ ó, mbaa mofoo é l'efu le ojyoo.

⁸ Ebe no ó bé ndɨ ejebe mbaa mofoo waa die Peme motié e. Nye e die laa, ze pyal é muh é dobo lɨ.

⁹ Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Yeremi ó: «Bé a si nʉa mɨsaŋ mɨ mɔn myaa mowʉm molɛl, tɔɔ mɔn bwa b'Ɨzraɛl bé a kpɛl bwam nye e tɨʼ ɨ.

¹⁰ No ó bé a nʉa bye, bwamɔ peh si mo mel mompɨ, lé edu mpʉ Da a tɨe me e.»

Yesʉs é mih mo Pilat

¹¹ No ó Yesʉs a ze pyal é mih mo ngoman. Ngoman ze dî e nye ó: «Zê go ó ndɨ njwɨɨbʉr oYʉden ɛ?» Yesʉs ntɔʼ bɨha e nye ó: «Yé ó mpʉ go lɛɛ nɨ!»

¹² Ojwɨɨ be opara ndwe e l'otamabʉr o lal ze buʼɔ nye mɨlɔb. Sa gwar, nye a baabɨha sɔʼɔ.

¹³ No ó Pilat a ze dî e nye ó: «Zê go ajoʼo bim mɨlɔb bé lé epur go miʼ ɛ?»

¹⁴ Yesʉs a baakar é lɔb ngwar. Nye a kʉ ka di ó njɨ titil. Ngoman ze jehe lɔb waa nʉm mbeʼ.

Lɔb, wi tiʼ ó, Yesʉs jʉŋɔ

¹⁵ No ó, yé a be-be ó é jɔʼ ebʉʼ, lé a dɨ pyal ɨ, ngoman a be-be ó, lé ebir-bir be mʉr mɨmbʉʼ ngwar. Nye a bir-bir mbʉʼ ó, waa ntuntuma bʉr, yé a bul gwɨm ó, nye birɨ ɨ.

¹⁶ To kœb ó, guu mbʉʼ, wé a be ó tɨʼ é mbu waa, die le Barabas. Wé a si bul jwɨ̂ʼlɨ e lɔb bɨntʉ.

¹⁷ Ebe no, mpʉ bɨbɛh, bé a be si fwal tɨʼ ɨ, Pilat ntɔʼ dî e be ó: «Zê bɨn bé lé egwɨm ó, me birɨ bɨn Barabas ɛ? Zê Yesʉs, waa bɨn ndɨ ejebɔ ó, “Krist” ɛ?»

¹⁸ (Nye a lwib no ó, ebe, nye a be ó si gʉa ó, bé a pur Yesʉs ó, ebe, bé a be ó lé esie nye.)

¹⁹ É jɔʼ nye a be, nye dina lé elwib lɔb waa é dia tiʼà mɨlɔb ɨ, myɛl ntɔʼ lomlo nye twii ó: «Atœb lɔb wi, ebe, me be ó si bul sia e bɨlima muh é pum wiʼ é lʉ mo cɨcyel mʉr nɨ.»

²⁰ No ó ojwɨɨ be opara bé e l'otamabʉr o lal, bé a dɨ soʼlo ntuntuma bʉr ó, yé dîʼe ó, nye birɨ be Barabas, bé jʉʼo Yesʉs.

²¹ No ó ngoman a ze dî e be ó: «É bʉr oba ba, zé bɨn lé egwɨm ó, me birɨ bɨn nwa ɛ?» Bé ntɔʼ bɨha ó: «Barabas!»

²² Pilat, nye e be ó: «Yé be no nɛʼɛ, Yesʉs, waa bɨn ndɨ ejebɔ ó, Krɨst ɨ, me saʼ nye nyá ɛ?» Bʉr bɨbɛh ntɔʼ bɨha ó: «Cyèlɨ nye é klos kʉ!»

²³ Pilat, nye e be ó: «Ebe yé? Nye sa yáa syɛɛla ebebe?» Bé ntɔʼ yɨm motwii, lɛɔ ó: «Cyèlɨ nye é klos kʉ!»

²⁴ Mpʉ Pilat a bee ó, bé a baakpɛl joʼo nye e, ndwe nteme ó, ntuntuma bʉr, yé amu jaa sa bɨntʉ ɨ, no ó nye a ze nʉa modibe, ze jwɨ̀ɨ mobo me é mih mo ntuntuma bʉr yaa. Nye ó: «É paʼ efie mo mʉr nwa, me ó mʉr ndɨ agʉa lɔb ɨ! Lɔb win ó nɨ!»

²⁵ Bɨbɛh ntɔʼ bɨha kʉ kʉ. Bé ó: «Motié me, mé swɨŋɨ é mɨlʉ mih ndwe e myaa mɨ bwan bɨh!»

²⁶ No ó Pilat a ka ze bir be Barabas. Nye ze lomo bʉr ó, bé fuura Yesʉs mɨmbihe, ze liʼe nʉm ó, bé toʼ, to cyèl nye é klos kʉ.

Bɨzima lé ezyɛm Yesʉs

²⁷ Bɨzima ntɔʼ toŋɔ e Yesʉs é bii mo ngoman, ngoman ntɔʼ gohlo ntoo bɨzima yiyɛh ye.

²⁸ Bé ntɔʼ fo Yesʉs mɨkan mye, ze bœrɔ nye len kʉr mo njwɨɨbʉr akaa-e-kaa.

²⁹ Bɨzima ze pene nye epʉʼlʉ e kol modwaʼ, dilɔ nye la é lʉ, dweŋɔ nye peh sʉŋ, ó nye mɛrɨ é mbo ejʉm tɔɔ ntum njwɨɨ. Bé ntɔʼ kur moboo si é mih me lé ekpeʼlɔ nye. Bé ó: «Moswɨhlɨ, njwɨɨbʉr oYʉden!»

³⁰ Bé ze dɨ syɛɛ nye mocyeele é mih, le enʉŋɔ peh sʉŋ waa, ŋmɛhɔ-ŋmɛhɔ nye wa é lʉ é tʉb-tʉb.

³¹ É jɔʼ bé a be, bé mu si bul kpeʼle nye e, bé ze fo len kʉr waa, ze bula bœrɔ nye mɨkan mye, ntɔʼ toŋɔ e nye ó, nye toʼ, to cyèlɔ é klos kʉ.

Zi mɨtuu mɨ efie é klos

³² Bé mu é l'odumo o nkana nɛʼɛ, bé ze fuuba e mʉr Sirɛn a be die ó, Simɔn ɨ. Bé ze yɨm nye ó, nye nkɛŋɨ klos mo Yesʉs.

³³ No ó bé a to e Yesʉs é gumo lé ejwɨrɔ die ó, Golgota ɛ. (No, yé edwirɔ ó Gumo koko lʉ.)

³⁴ Bé a be ó si ngbaa dwe nye monwoʼ mo rezɛŋ mpuhba e mir é dwie-dwie, ó nye deʼ. É jɔʼ nye a boblo me e, nye kʉ ze bene lé enyʉl.

³⁵ É jɔʼ bé a be, bé mu si bomlo nye e mosen, bɨnɔ nye é klos kʉ ɨ, bé ze kabla mɨkan mye, doŋɔ mye ebya.

³⁶ Pie tɨ, bé ze di si, baʼlɔ nye.

³⁷ Bé ntɔʼ nʉa ebɔm, ntɔʼ tile tɨʼ sa nye a sa ó, nye dweŋɔ mobe mo jala e l'efie e, ntɔʼ pɛnɔ le é lʉ we kʉ. Yé a be tila ó: «Nwaʼ ó ndɨ Yesʉs, njwɨɨbʉr oYʉden.»

³⁸ Bé a cyèl nye kʉ ó, sama e bɨzilngan bɨba, ze cyèlɔ nteme bye é bɨklos: yiʼ klos, é nko paʼ mbo ejʉm mo Yesʉs; yʉʉ, é nko paʼ mbo emyɛl.

³⁹ Bɨlaa-nwan, byé a be ó lé elwɨɨ nye ndwe le esiʼrɔ mɨlʉ,

⁴⁰ le elɛɔ e nye ó: «Gwɔɔ, mʉr a lɛɛ ó, go ógbɛɛ Odia mo Zyɛm, ntɔʼ bâʼle fumo we njɨ é molu molɛl ɨ, kaʼ tiʼ go mʉr tɨʼ ʉʉ! Yé be ó, go ó Mwan mo Zyɛm cyecye nɛʼɛ, paʼ kʉ fulo é klos nɨ si ʉʉ!»

⁴¹ Ojwɨɨ be opara, oyeʼle o motie ndwe e l'otamabʉr o lal, bé a be nteme ó lé ekpeʼle nye. Bé ó:

⁴² «Nye a si tiʼ bʉr ofih. No ó, nye akoʼo lé etiʼ nye mʉr tɨ! Yé be ó, nye ó cyecye “Njwɨɨbʉr lal Ɨzraɛl” nɛʼɛ, nye paʼ kʉ fulo si é klos é banana, bɨna nkʉʼ jyɛʼ ga taa buʼo ga yina boo nye.

⁴³ Nye ejyɛʼ taa buʼo ye boo Zyɛm. Yé be ó, Zyɛm dina lé ekpɛl nye nɛʼɛ, nye kaʼ syɛb nye é l'ebebe lɨʼ é bananaʼ ʉʉ, ebe, nye a lɛɛ-lɛɛ nteme ó, nye ó Mwan mo Zyɛm!»

⁴⁴ Bɨzilngan bɨba bé e boo nɔɔ, bé a be mɨcyèla é bɨklos kʉ ɨ, byé nteme ntɔʼ taare lé elwɨɔ nye jwɨʼ gwar yaa.

Efie mo Yesʉs

⁴⁵ É jɔʼ teme moho, yé a pyal ɨ, edurʉ ntɔʼ fulo é si nwaʼ nyiwɛh, to pyal é mowala molɛl mo bii kʉʼ.

⁴⁶ Yé mu lé eto saa mowala molɛl nɛʼɛ, Yesʉs ze bʉ tim. Nye ó: «Eli! Eli! Lama sabaktani?» (No yé elɛɛ ó: «Zyɛm wam, Zyɛm wam! Ebe yé go ka myah me e?»)

⁴⁷ Bʉr o b'a be tɨʼ ɨ, é mpʉ bé a be lé ejoʼo nye lé etime e, bé ze lɛɛla. Baʼ, bé ó: «Nye mu ó lé ejebe Élie!»

⁴⁸ Pie tɨ, nuu mʉr é sama bʉr baa ze to kam, to dubo éponge é monwoʼ, ze pɛn le é peh sʉŋ, ntɔʼ cen nye la é nʉm ó, nye duʼo.

⁴⁹ Bʉʉ bɛɛ, bé a lɛɛ e nye ó: «Bona. Bɨna paʼ bee ga yinɨ, nkʉ Élie óbɛm pyal, ze tiʼ nye.»

⁵⁰ No ó Yesʉs a ze bâʼle time kʉ kʉ, ntɔʼ fil mɨswɨh mɨ epihe.

⁵¹ É jɔʼ yaa, kan ebe, wé a be-be cyèla é Mpah Zyɛm tʉŋlʉ ɨ, wé ntɔʼ nyɛɛ é wɛɛɛb bɨpeh bɨba, taare kʉ, pyal si. Si a be ó si ncyeŋa, mokoʼ dɨ bʉl,

⁵² mofoo diba. Buobuo mɨsaŋ mɨ bʉr myé a dwè e, myé a be ó si dɨ pàh,

⁵³ duho é mofoo mɔɔ. Jɔʼ Yesʉs a be si pàh é foo e, bé a si to nkana ndɨ ti ɨ, gumo buobuo bʉr, bé a bee be e.

⁵⁴ Njwɨɨ nter bɨzima bé e bʉʉ bʉr o b'a be lé ebaʼle Yesʉs ɨ, mbea bé a bee mpʉ si a ncyeŋa ɛ, le byʉʉ bɨsa bibyɛh, byé a syɛɛlɨ ɨ, bé ntɔʼ kʉ ze bil ekɛn. Bé ó: «Mʉr nwaʼ a bana kʉ be ó Mwan mo Zyɛm!»

⁵⁵ Yé a be nteme ó e bʉʉ bʉba é buobuo, bé a be lé edwɛʼ sa yé a be lé esyɛɛlɨ ɨ, cyɛbɔ-cyɛbɔ ká ká. Bé ó b'a du Yesʉs, taare é lal Galɨle, ze kumo Yerʉsalɛm, lé eto le eseɔ e nye.

⁵⁶ É sama bʉba yaa tʉŋlʉ, yé a be ó: e Maaria, sile Magdala bé e Maaria, nyɔŋ mo Jacques bé e Yose, ndwe e nyɔŋ bwan mo Zebede.

⁵⁷ Nuu mbil bɨsa a be ó, die le Yoseb, mʉr Arimate. Nye nteme a be ó mpʉn mo Yesʉs. É jɔʼ bii kʉʼ yé a pyal ɨ, nye ze pyal ɨ Yerʉsalɛm,

⁵⁸ ze to bee Pilat, lé eto jaʼ nye muu mo Yesʉs. Pilat ze lomo bʉr ó, bé dweʼ nye wa.

⁵⁹ Yoseb ntɔʼ nʉa muu, ze dîble we e ndomo kan é pumo-pumo, bé a be si pub ɨ.

⁶⁰ Nye ntɔʼ to dɨl muu é l'edwan e foo le, tuba nguʼ ekoʼ. Nye mʉr tɨʼ ó b'a piʼle ekoʼ laa. Pie tɨ, nye ntɔʼ biŋle lʉʉ ekoʼ enɨnɨ, buuro nʉm foo e tɨ, nyɛɛ ntɔʼ laa, to.

⁶¹ Maaria, sile Magdala, bé e yʉʉ Maaria, bé a be ó tɨʼ ondindil, mbɨembɨe e nʉm foo.

Bɨzima, byé lé edwiile foo

⁶² É mɛn tɨ, wé a be ó moho bé a komlo-komlo bɨsa bɨ moho saba ɛ. Ojwɨɨ be opara bé e l'oFarizyɛŋ ze to beɔ Pilat.

⁶³ Bé e nye ó: «Da, bɨh bé etoŋlo ó, mpʉmpʉl nɨ, é jɔʼ wé a be, wé dina kʉ ɨ, wé a kʉ bana lɛɛ-lɛɛ ó: “É l'elu elɛl, me ópàh.”

⁶⁴ Ebe no, lɛŋɨ bʉr ó, bé gʉa to baʼle foo, tɔɔ molu molɛl. Ompʉn be, bé amu jaa to é mofo, to díbe muu we, to e we, to fol. Bé amu ka lɛɛ-lɛɛ ó, nyi pàh é foo. No ó, lɔɔ mpʉl epihe we, wé amu jaa bul bebe, laa myaa mimyɛh nye a pa lɛɛ-lɛɛ jɔʼ nye a be kʉ ɨ.»

⁶⁵ Pilat ze lɛɛ e be ó: «Mbe ga: bɨzima ó bi! Toʼ ga e bye! Diŋa ó, bɨn e boo nɔɔ, bé óto dwiile foo mbɨmbɨa, mpʉ bɨn bʉr o tɨʼ bé ókpɛl ɨ!»

⁶⁶ Bé ze to, lé egʉa to dwiile foo. Bé ze nɛr luʼ é l'ekoʼ lé a buuro nʉm foo e, ntɔʼ ŋmɛhɔ luʼ e sitam, le ecyelɔ bʉr tɨʼ é vaa.