Mataos 23 - Kálara Zyɛ̌m Edwán é mpʉ̌n

Yesʉs lé ebâm e l'oyeʼle o motie bé e l'oFarizyɛŋ

¹ No ó Yesʉs a ze lwib e ntuntuma bʉr bé e l'ompʉn be ó:

² «É jɔʼ oyeʼle o motie bé e l'oFarizyɛŋ, bé mu lé edwe sikʉlʉ ɨ, bé edi é Dia mo Moyiz, yé abe no?

³ Ebe no, saʼ ga mpʉ bé lé elɛɛ bɨn ɨ. Duʼo ga sikʉlʉ yɔɔ yaa. Sa gwar, abaŋa ga yɛɛ bɨsyɛɛla byɔɔ, ebe, bé elɛɛ ó lɛŋɨ, asa.

⁴ Bé ekaʼ mɨmbeʼ modile, gbaŋɔ bʉr mya é mobɛʼ é ziʼrɨ. Sa gwar, bé bʉr o tɨ, bé agwɨm nkɛɛ mye, dam be e dine gwar.

⁵ Bé esa bɨsyɛɛla byɔɔ bibyɛh ó, bʉr beŋɨ be. Ebe no ó bé lé ebœʼ pɔb motie mo Zyɛm yɔɔ ɛ, le ejyɛɛle mozeʼle lé ezyɛmla si é mɨkan myɔɔ ɛ.

⁶ Bé nteme, bé ekpɛl-kpɛl ó, njɨ mɨmpaŋ bɨdia bɨ dolo, gumo bé lé ede dina ɛ, le bɨdia bɨ efoʼ é mompah mɨnjwɨʼla.

⁷ Bé ekpɛl nteme ó, bʉr taara soho be, le edwiibɨ be é mobɨm bɨnkana, lé ejebe-jebe be ó, “Yeʼle”.

⁸ Mʉr ngwar é l'esama lɨn l'anyamle bir ba ó, bé jeba nye “Yeʼle”, ebe, yeʼle win, nye ó ngwar! Bɨn bɨbɛh, bé ó obɨɔ e l'obɨɔ.

⁹ Ajebe ga nteme nuu mʉr ndɨ é si nwaʼ ó, “Sɔŋ wam”, ebe, sɔŋ win, nye ó ngwar, njɨ waa ndɨ é jobo kʉ ɨ!

¹⁰ Abir ga ó, bé jeba bɨn “oyeʼle”, ebe, yeʼle win, nye ó njɨ ngwar: Lœma mulo mo Zyɛm!

¹¹ Mʉr lé elaa bʉʉ é mpwaʼ nkʉŋ ɨ, nye ejala le ebe bɨn syɛl mosa.

¹² Mʉr lé enkɛɛ nyʉl ɨ, nye ófilɔ si; waa lé efil nyʉl si ɨ, nye óbɨnɔ kʉ.

¹³ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé ela bʉr zi lé eto gumo jwɨ̀ʼa mo Da ndɨ ɨ. Bɨn bʉr o tɨ, bɨn bé ajyɛl é zi waa. Bɨn bé adwe nteme bʉr o lé esaa ecwɨɨ tɨʼ ɨ, zi. [

¹⁴ A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ, bɨn bé esà mɨkuho, nʉa bɨsa bibyɛh myé ndɨ eliʼ e tɨʼ ɨ. Bɨn bé ejwɨʼla-jwɨʼla nteme e Zyɛm ó, bul mokan, lé esa lɛʼla. Ebe no ó bɨn bé óbul dweŋɔ mobe le ekabɔ bɨntɨʼa.]

¹⁵ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ, bɨn bé entaa maŋ, ntaa é si nwaʼ nyiwɛh, bɨn nkʉʼ niŋle dam be mʉr ngwar é buʼo yin. To kœb ó, é jɔʼ mʉr waa mu si ni é nkɔm win ɨ, bɨn bɨ liŋ nye mʉr lé ejala e Bɨ-siʼe e, laa bɨn bʉr o tɨʼ zɔʼ ba.

¹⁶ «A vwaʼ e bɨn, ontim lé eliʼle bʉʉ bʉr ɨ! Bɨn bé elɛɛ ó: ǃɨ mʉr si de mɨnkɛla lé egba die le “Mpah Zyɛm!” é mɨnkɛla nɛʼɛ, mɨnkɛla myaa, myé abe e lɔb. ǃNye si ka de mɨnkɛla, gba die e gol Odia mo Zyɛm é mɨnkɛla nɛʼɛ, mɨnkɛla myaa, myé ó myaa nye lé ekʉ jala le eloŋlo e.

¹⁷ Bɨn bɨgʉ, ndɨ nteme ontim bi! Yé yɛɛ lé epa kʉ laa yʉʉ é modile? Zê gol ɛ? Zê Mpah Zyɛm lé esa ó, gol yaa, yé diʼe sa ndɨ ti ɨ?

¹⁸ Bɨn bé elɛɛ nteme ó: “ǃƗ mʉr si de mɨnkɛla, lé egba die e taa mɨndwɛa é mɨnkɛla nɛʼɛ, mɨnkɛla myaa, myé abe e lɔb. ǃNye si ka gba die e motwina ndɨ kɛla tɨʼ kʉ é mɨnkɛla ma nɛʼɛ, mɨnkɛla myaa, myé ó myaa nye lé ekʉ jala le eloŋlo e.”

¹⁹ Bɨn ontim ba, yé nyá ɛ? Yé yɛɛ lé epa kʉ laa yʉʉ é modile? Zê motwina ɛ? Zê taa mɨndwɛa, yaa ndɨ esa ó, motwina maa, mé diʼe sa ndɨ ti ɨ?

²⁰ Ebe no, mʉr nyiwɛh lé egba die e “taa mɨndwɛa” é mɨnkɛla ɛ, nye egba nteme ó, die e bɨsa bibyɛh ndɨ kɛla tɨʼ kʉ ɨ, é mɨnkɛla myaa.

²¹ Mʉr nyiwɛh lé egba die le “Mpah Zyɛm” é mɨnkɛla ɛ, nye egba nteme ó, die mo “Zyɛm”, mʉr ndɨ tɨʼ tʉŋlʉ ɨ, é mɨnkɛla myaa.

²² Mʉr nyiwɛh lé egba die e “jobo kʉ” é mɨnkɛla ɛ, nye egba nteme ó, die e “dia taʼa” ndɨ gʉʼ ɨ, é mɨnkɛla, bé e Zyɛm, mʉr lé edi tɨʼ ɨ.

²³ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, ebe, bɨn dam bi bɨsa ndɨ é twaʼbe e, mpʉ bɨka monumo, bɨka bɨ dʉm ndwe e l'atuŋɔ-mbɛh, bɨn bé ebana dwe Zyɛm nkɔb ewʉm tɨ. To kœb ó, bɨn bé adu motie ndɨ é bul dile e. Mé ó: etiʼe bʉr mɨlɔb é l'ocɨcyel, elɛʼle ncwɨncwɨa, le edira monkɛʼ. Yé a kʉ jala ó, bɨn duʼo motie monɨ, ajɨha nteme lé edwe nkɔb ewʉm é bwa o bɨsa bin byaa.

²⁴ Ontim lé eliʼle bʉʉ ontim ba, bɨn bé ebɛn monwoʼ lé epɛʼ ontwii ó, bɨn bé amu jaa mine be. Sa gwar, bɨn bé emɛʼle mine bɨkamtʉl bɨntinɨ!

²⁵ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, é jɔʼ bɨn lé ejɨ pub bɨfua e l'okob ɨ, bɨn bé efuʼro bye njɨ é nko paʼ kʉl. To kœb ó, bɨfua byaa, byé ó lwɨŋla e bɨsa ndɨ é bebe e. Bɨn bé é bul kpɛl dɛn bɨsa bɨ bʉr. Bɨn bé abe e nkul emɛr mɨleme.

²⁶ Ontim be oFarizyɛŋ, taara fuʼro ga paʼ tʉŋlʉ. É jɔʼ yaa ó paʼ kʉl, wé óka fwiʼrɨ ɨ.

²⁷ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé enwɨɨla ó e mofoo ndɨ kɔna, mɨndwiba e l'epɛm ɨ. Mé enyin é mbɨa mbɨa ó, é nko paʼ kʉl. To kœb ó, mé ó e bɨdwehe bɨ bʉr, sa lé lœʼ be é mih mo Zyɛm ɨ!

²⁸ Bɨn bʉr o tɨ, é mih mo bʉr, bɨn bé enyin ó, mpʉ ocɨcyel o bʉr. To kœb ó, bɨkʉʉŋʉ ndwe e l'ebebe, byé ó bɨn lwɨŋla é mɨleme.

²⁹ «A vwaʼ e bɨn, oyeʼle o motie e l'oFarizyɛŋ! Bɨn baanya-bɨkʉʉŋʉ ba, bɨn bé enyin kʉl ó, bɨn bé edwaabe ogwiha o mɨlɔb omya bé e l'ocɨcyel o bʉr, ebe, bɨn bé ekɔn be mofoo, le egba ojaa tɨ.

³⁰ Bɨn bé elɛɛ nteme ó: “Nkʉ yé a be ó be, be bɨh é dia bɨmpam bih nɛʼɛ, mpa bɨh bé a baatœb ejwɨɨ le ogwiha o mɨlɔb laa.”

³¹ Mpʉ bɨn lé ekɔn mofoo mɔɔ no e, bɨn bé eboʼlo tɨʼ é l'ocyecye ó, bɨn bé ó kʉ bana be bwan o bʉr o b'a jʉ ogwiha o mɨlɔb ɨ!

³² Yé be no nɛʼɛ, toʼ ga be dolo lé efwahle bɨsyɛɛla bɨ ebebe bɨmpam bin, byé a bɛa taare lé esa ɛ!

³³ «Bɨn, kul onyʉa! Bɨn, kampaŋa bɨgurokɔɔ yi! Zê bɨn bé e nkul esyɛhle tiʼa mɨlɔb wé ócen bʉr é Bɨ-siʼe e?

³⁴ Ebe no ó, mbe ga! Me ólomlo bɨn ogwiha o mɨlɔb bé e mɨpɨpɨʼ mɨ bʉr ndwe e l'oyeʼle o motie e. Baʼ bʉr, bɨn bé ójʉ jʉʼo. Bʉʉ, bɨn bé ócyèl é bɨklos kʉ. Bʉʉ nteme, bɨn bé ófuura be mɨmbihe é mompah mɨnjwɨʼla mɨn. Bɨn bé ótíile be, le edwih be é yiʼ nkana, le eto pɛʼ be é yʉʉ.

³⁵ Bɨn bé óto le esa no, sa é sa sa, to pyal é jɔʼ motié mɨmɛh mo bʉr o b'a jʉŋɔ, akunbo e mpɨŋ ɨ, mé óswɨɨ é mɨlʉ min, taare é l'efie mo Abɛl, akunbo e mpɨŋ ɨ, to pyal é laa mo Zakari, mwan mo Barakiyah, waa bɨn bé a jʉ paʼra Mpah Zyɛm e taa mɨndwɛa ɛ.

³⁶ Me elɛɛ bɨn cyecye ó nɛɛ: mobebe mɨmɛh maa, mé ópyal bʉr o mya wi!»

Yesʉs lé etooro bʉr o Yerʉsalɛm

³⁷ «Yerʉsalɛm, Yerʉsalɛm, gwɔɔ mʉr lé ebɛa jʉ ogwiha o mɨlɔb ndwe le elumo baa Zyɛm lé elomlo go e, mokoʼ e! Zɔʼ ntɨɛ me a be lé egwɨm syɛŋ bwan bo, mpʉ abyɛɛ-kuo lé esyɛŋ bwan be é mompaba me si ɨ, bɨn bɛɛ kʉ bene-bene bena.

³⁸ Dwɛʼa ga: mbɛr win, wé óliʼ fo,

³⁹ ebe, me elɛɛ bɨn ó nɛɛ: bɨn bé aŋa ka bee me, to pyal é jɔʼ bɨn bé ólɛɛ ó: “Nyaʼ-nɔn, nye ó odumo! Mocyɛʼ mo mpom, mé swɨŋɨ é waa lé eze e die mo Da ɛ!”»