Mataos 22 - Kálara Zyɛ̌m Edwán é mpʉ̌n

Kɨkɛna ebʉʼ le eba

¹ Yesʉs a be ó lé ebâʼle sa be bɨkɨkɛna. Nye ó:

² «Jwɨ̀ʼa mo Da, yé enwɨɨla ó e guu njwɨɨbʉr wé a cyel zɔɔ eba é l'efu e mwan we e.

³ Nye ze lomo osyɛl o mosa be ó, bé toʼ, to jebe bʉr o nye a baŋle é zɔɔ waa ɛ. Bé ntɔʼ bene lé eze.

⁴ Nye ze bâʼle lomo bʉʉ osyɛl o mosa be. Nye ó: “Lɛŋɨ ga e bʉr me a baŋle ó nɛɛ: Mɨ sil kaʼ dina ebe bɨn. Mɨ tiʼe mɨnjʉm bɨntɛɛ e bwa bɨntɛɛ ndɨ é nwaʼbe e. Sa yiyɛh mu ó kwɨmla. Ntaʼ ga é zɔɔ eba.”

⁵ Bʉr o nye a baŋle e, bɛɛ ze pyeh lɔɔ we waa, atoŋɔ. Bé a sa-sa ó: nwaʼ, to é ye peme; nuu, to é we mbɛr mompɛma.

⁶ Baa bʉʉ, mɛrɔ osyɛl o mosa onɨ, saŋɔ be cere, jʉŋɔ be.

⁷ Njwɨɨbʉr waa, wé ze kpaa empime, ze lomo bɨzima bye, le eto jʉ ojʉl o bʉr baa, le ediʼ nkana yɔɔ mɨfu.

⁸ Pie tɨ, nye ze lɛɛ e l'osyɛl o mosa be ó: “Zɔɔ eba nyɛɛ, dina ó kwɨmla. No ó, bʉr me a taare baŋle e, bé ajala le edi tɨ.

⁹ Ebe no, cyɛba ga é moman mɨmpaʼa. Bɨn bé à baŋle mʉr nyiwɛh bɨn bé ófuuba e nye e. Nye ntaʼ é zɔɔ eba!”

¹⁰ Osyɛl o mosa be ntɔʼ to é mozi mɨmɛh, to le egohlo bʉr o b'a bɔma-bɔma e be e, le bɨbɨbla bɨ bʉr ndwe e baa be embɨa. Mbɛr zɔɔ eba ze loŋlo e bʉr, bɨbɛh ondindil lé ede.

¹¹ «É jɔʼ njwɨɨbʉr, wé a ni mbɛr ɨ, wé ze dwɛʼ bʉr o b'a be ondindil lé ede e. Nye ka bee nɛʼɛ, nuu mʉr, abe e mɨkan mɨ zɔɔ eba é nyʉl!

¹² Nye ze dî e nye ó: “Fo wam! Ebe yé go ze wâ, abwar kan zɔɔ eba ɛ?” Mʉr waa kar ebɨha sɔʼɔ. Nye a kʉ di ó diʼe, njɨ é jwɨm.

¹³ Njwɨɨbʉr, wé ze lɛɛ e l'osyɛl o mosa be ó: “Kaʼa ga nye mobo e mokʉ. Bɨn guha nye kʉl é l'edurʉ le ankom-nkom, nko nye óto dɨ time le elwaare moje e.”»

¹⁴ Yesʉs ze ko tɨʼ ó: «Ebe, baa lé ebaŋlɔ ɛ, bé é buo. Sa gwar, baa ndɨ mɨpɛha ɛ, bé ó titia.»

Ejɛna tœa mo Kɛɛza

¹⁵ OFarizyɛŋ ze to bòno pɨʼ ó, bé lam ó Yesʉs é mbi lwib nye óbɨha e be e.

¹⁶ No ó bé a ze lomo bʉʉ ompʉn bɔɔ nko nye a be e, bé e bʉr o mpoʼo Erod. Bé e nye ó: «Yeʼle, bɨh bɨ gʉa ó, go elɛɛ ó ocyecye. Go nteme, go edwe bɨh sikʉlʉ tiibe e Zyɛm é l'ocyecye. Sa mʉr fih lé ebee é we paʼ ɛ, yé alɛɛ go sɔʼɔ. Go ádwaabe bʉr é lɔb mompom mɔɔ.

¹⁷ Ebe no, lɛŋɨ bɨh é go paʼ, nkʉ motie ga mɨna, mé akamle mʉr ó, nye jɛna ga Kɛɛza tœa ɛ? Zê yé ó kɔmlʉ ó, mʉr jɛna nye nya ɛ?»

¹⁸ Tina, yé ó, Yesʉs nyɛɛ lé ekʉ gʉa bɨbebebebe bɨjwɨʼ byɔɔ. Nye ze dî be ó: «Bɨn baanya-bɨkʉʉŋʉ ba! Ebe yé bɨn lé ejwɨʼla saa elam me é mbi lwib me óbɨha e bɨn ɨ?

¹⁹ Lɛʼla ga me mɔn bɨn lé ejɛna-jɛna tœa e tɨʼ ɨ.» Bé ntɔʼ lɛʼle nye saŋ denie.

²⁰ Yesʉs ntɔʼ dî e be ó: «Dweʼle mpom le die mo zé ndɨ lula é saŋ wiʼ ɨ?»

²¹ Bé e nye ó: «Yé ó byaa mo Kɛɛza!» Nye e be ó: «Ebe no, dweʼ ga Kɛɛza bɨsa mo Kɛɛza; bɨn bé à dwe Zyɛm byaa mo Zyɛm.»

²² Njoʼa bé a joʼo nye lé elɛɛ no e, bé ntɔʼ jehe nye mɨnʉm mɨmbeʼ, liʼɔ nye, toŋɔ.

Sikʉlʉ é lɔb pɛ̀ha foo

²³ É dobo egwar laa nteme ó, oSadwisyɛŋ, bé a ze pyalɔ boo Yesʉs ɨ. (OSadwisyɛŋ bɛɛ, bé ó baa lé elɛɛ-lɛɛ ó, odwè, bé ákwoʼ pàh é mofoo e.) Bé ze dî e nye tia ó, é mbi wi:

²⁴ «Yeʼle, Moyiz a be ó si tiile bɨna ga etie lɨ. Lé ó tila ó: “ǃƗ mbɛa mʉr, wé si dwè, aliʼe mwan nɛʼɛ, yé ejala ó, ncyom we, nye baʼ kuho mʉma we. Bé e mʉma waa nkʉʼ bya bwan é l'efu e tʉl.”

²⁵ To kœb ó, yé a be bɨh wâʼ ó e bʉʉ bɨɔ tambɛl. Waa modweʼe ze ba mʉma. Di é di di di, nye ntɔʼ dwè, aliʼe mwan. Mpʉ nye a baabya ɛ, nye ntɔʼ liʼ é mobo mo ncyom we, waa a bɔma nye e.

²⁶ Syɛɛla yaa pyal é waa mba, le waa lɛl, to-to ó toʼ, to pyal é waa tambɛl.

²⁷ É jɔʼ bé a be si sil dwè e, mʉma waa ka ze dwè.

²⁸ Ebe no, é dobo bɨn lé elɛɛ ó, bʉr bé ópàh é mofoo e, mʉma waa ógumo e zé é l'obɨɔ tambɛl ba? Ebe, bɨbɛh, bé a be ó si ba nye!»

²⁹ Yesʉs ze bɨha e be ó: «Bɨn bé esa bɨgwìh, ebe, bɨn bé agʉa Kalara Zyɛm, nkʉ nkul we.

³⁰ Sa bɨn ndɨ agʉa ɛ, yé ó, é jɔʼ bʉr, bé óbe si pàh é mofoo e, bé aŋa ka bɛa, nkʉ cenɔ é moba. Bé ódi-di ó, mpʉ beengles lé ebɛa di é jobo kʉ ɨ.

³¹ ǃBɨn si dî me tia é nko paʼ odwè, le mpʉ bé ópàh nɛʼɛ, zê bɨn bé a baasi láa sa Zyɛm Sɔŋ a tile bɨn tɨʼ ɨ?

³² “Me ó Zyɛm mo Abraham, Zyɛm mo Ɨzak, le Zyɛm mo Yakɔb.”» Yesʉs ze ko mokan maʼ ó: «No, yé elɛʼle ó, Zyɛm, nye ó Zyɛm bʉr o ndɨ mɨkubla ɛ. Nye abe waa odwè.»

³³ Ntuntuma bʉr yé a be tɨʼ ɨ, yé ze jehe sikʉlʉ Yesʉs a dɨ dwe be e.

Etie lé elaa motie mɨmɛh ɛ

³⁴ É jɔʼ oFarizyɛŋ, bé a joʼo ó, Yesʉs a be ó si pɨr oSadwisyɛŋ mɨnʉm ɨ, bé ntɔʼ syɛŋa gumo yaa é lɔb we.

³⁵ Nuu mʉr é sama yɔɔ a be yeʼle motie e, ze lam Yesʉs é mbi lwib nye óbɨha e nye e. No ó nye a ze dî e nye ó:

³⁶ «Yeʼle, é motie ga mɨna, láa etie ndɨ é bul bwaʼ ɛ?»

³⁷ Yesʉs ze bɨha e nye ó: «Etie ndɨ é bul bwaʼ ɛ, lé ó: “Kpɛlɨ Sɔŋ go Da Zyɛm e leme go wiwɛh, e sisim go wiwɛh ndwe e pɨʼ go nyiwɛh.”

³⁸ Lɨha, lé ó ndɨ é l'efoʼ. Lé nteme, lé ó etie ndɨ é bul bwaʼ ɛ.

³⁹ No ó laa emba, bé e laa le efoʼ, mé edile ó, jwɨʼ gwar. Lɨha, lé ó: “Kpɛlɨ mɨɔ go mʉr mpʉ go lé ekpɛl go mʉr tɨʼ ɨ.”

⁴⁰ Motie moba monɨ, mé ó etin e motie mo Moyiz mɨmɛh, ndwe e sikʉlʉ yiyɛh ogwiha o mɨlɔb, bé a dwe e.»

David bé e Lœma mulo mo Zyɛm

⁴¹ Mpʉ oFarizyɛŋ, bé a be, bé mu si syɛŋa gumo yaa ɛ, Yesʉs ntɔʼ dî be tia nwaʼ ó:

⁴² «Bɨn bé epa kʉ jwɨʼ é yé, tiibe e Lœma mulo mo Zyɛm ɨ? Nye mwan mo zé?» Bé ntɔʼ bɨha e nye ó: «Nye ó mwan mo David.»

⁴³ Yesʉs ze dî e be ó: «A, ebe yé David nye mʉr tɨ, é zi mo Mbɨambɨa Sisim, a jebe Lœma mulo mo Zyɛm ó, “Tî wam” ɨ? Nye a lɛɛ ó:

⁴⁴ Da a lɛɛ e Tî wam ó: “Diʼe si é nko paʼ mbo ejʉm wam, to pyal é jɔʼ me ósa bʉr o dɔm bo ó, bé diʼe cyela mokʉ yo e!”

⁴⁵ David a jebe Lœma mulo mo Zyɛm ó, “Tî wam”. É mpʉ yé ndɨ no e, wáa mbi Lœma mulo mo Zyɛm ndɨ e nkul ebe mwan mo David ɨ?»

⁴⁶ Mʉr a baabe e nkul ebɨha tia we. Pie jɔʼ yaa, mʉr a baaka dihbe lé entɛŋ nye tia.