Mataos 21 - Kálara Zyɛ̌m Edwán é mpʉ̌n

Epyal mo Yesʉs: Nyaʼ-nɔn, nye ó odumo o Yerʉsalɛm!

¹ É jɔʼ bé a be, bé mu kunokuno e Yerʉsalɛm, kunokuno e Batfagee, é l'Ecwɨʼ le olivye e, Yesʉs ze lomo ompʉn be oba.

² Nye e be ó: «Toʼ ga kwar ndɨ bɨn tina dolo nɨ. Bɨn bé ókpahbe kœb myɛl jakah tiila gʉ, bé e mwan we kunokuno e nye. Tiŋɨ ga bye. Bɨn ntaʼ me e bya wâ.

³ ǃƗ mʉr si dî bɨn yʉʉ sɔʼɔ nɛʼɛ, bɨha ga nye ó: “Ebe, Tî wih, nye egwɨm bye.” É jɔʼ yaa ó nye ókpahbe mɛʼle ó, bɨn nʉŋa bye, asa tab.»

⁴ Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we ó:

⁵ «Lɛŋɨ ga bʉr o nkana Sion ó: “Mbe njwɨɨbʉr go lé eze e? Nye é bul tala njwɨr. Nye eze ó, é myɛl jakah kʉ; nye é ma jakah kʉ é kal.”»

⁶ Ompʉn be ntɔʼ to, to saŋɔ mpʉ Yesʉs a lɛɛ be e.

⁷ Bé ntɔʼ bula e myɛl jakah ndwe e mwan we. Bé ze kɛl bye mɨkan myɔɔ é mɨkoo, Yesʉs ntɔʼ kable tɨ.

⁸ Ntuntuma bʉr, yé ze to le ejan mɨkan myɔɔ mpaʼa e mpaʼa. Bʉʉ ze taare lé etiʼe mompuho bɨlɨ le ejanɔ me mpaʼa e mpaʼa.

⁹ Le bʉr o b'a dɨ to nye dolo e, le baa b'a dɨ du nye pihe e, bé a be ó lé ebʉ bɨyaŋa, lé elɛɔ ó: «Kɛɛɛɛɛɛ! Mwan mo David ó nɨ ɔɔ! Mocyɛʼ mo mpom, mé swɨŋɨ é waa lé eze e die mo Da nwa ɔɔ! Kɛɛɛɛɛɛ é lal mo Zyɛm ɔɔ!»

¹⁰ É jɔʼ Yesʉs a ni Yerʉsalɛm ɨ, nkana yiyɛh, yé a si di é gum-gum. Baʼ bʉr ze dîila paʼra wɔɔ ó: «Nwaʼ mʉr, nye nyá ɛ?»

¹¹ No ntuntuma bʉr, yé a bɨha e be ó: «Yé ó Yesʉs, ngwiha mɨlɔb, mʉr nkana Nazarɛt, é lal Galɨle!»

Yesʉs lé ekɛ̂m obɛma o bɨsɔʼɔ é jahla bii mo Zyɛm

¹² Yesʉs ze ni é jahla bii mo Zyɛm. Nye ntɔʼ fo bʉr o b'a di-di tɨʼ lé ebɛma bɨsɔʼɔ, le baa b'a ze-ze lé eze bwam ɨ, bɨbɛh. Nye ntɔʼ nkɛŋ oteble o bʉr o b'a siila-siila bɨmɔn ɨ, ndwe le eloʼlo bɨdia bɨ bʉr o b'a dɨ bɛma mopɨba ɛ.

¹³ Nye ze lɛɛ e be ó: «Yé ó tila é Kalara Zyɛm ó: “Mbɛr wam, wé óbe ó mbɛr mɨnjwɨʼla.” No ó bɨn bɛɛ, bɨ liŋ we eboʼo e bɨzilngan!»

¹⁴ Ontim le baanya-bɨjyɛm ze dihle fum nye a be é jahla bii mo Zyɛm ɨ, nye ntɔʼ tiʼ be.

¹⁵ É mpʉ ojwɨɨ be opara ndwe e l'oyeʼle o motie, bé a bee bɨsyɛɛla Yesʉs a sa ɛ, le ejoʼo mpʉ bwɔɔncyom, bé a bʉ bɨyaŋa é jahla bii mo Zyɛm, le elɛɔ ó: «Kɛɛɛɛɛɛ! Mwan mo David ó nɨ!» ɨ, bé ntɔʼ joʼo be ebebe.

¹⁶ Bé ze dî e nye ó: «Zê go ajoʼo sa bé lé elɛɛ ɛ?» Nye ze bɨha e be ó: «Zê bɨn bé a baasi láa peh Kalara Zyɛm yiʼ ɛ? Yé ó tila ó: “Go a be ó si sa ó, bwɔɔncyom bé e bɨcyee lé edehlɔ mobel ɨ, bé dwiibɨ go.”»

¹⁷ Nye ntɔʼ liʼe be, pyal kʉl, to Betani, gumo nye a to lɛŋ pum waa ɛ.

Yesʉs lé ekáale lɨ figye

¹⁸ É dwine mɛn, é jɔʼ Yesʉs a be, nye mu lé ebula lé eto nkana ɛ, nye a be ó, nye mu lé ekʉ joʼo za.

¹⁹ Nye ze bee lɨ figye é l'empàh e mpaʼa. Nye ntɔʼ jyɛl lé eto saa mpumo, akœb bumo gwar tɨ. Nye a kʉ ka kœb ó njɨ bɨka e bɨka. Nye ze lɛɛ e lɨ figye ó: «Abe e lʉʉ dobo, bumo, yé óka cyèl é go!» Cye e cye yaa nɛʼɛ, lɨ figye yaa, yé ntɔʼ dwɛhla!

²⁰ Mbea ompʉn, bé a bee no e, bé ntɔʼ jehe lɔb waa mɨnʉm mɨmbeʼ, le edîŋɔ ó: «Wáa mbi lɨ figye yiʼ bana kʉ dwɛhla é cye e cye mpʉnʉ nɨ ɛ?»

²¹ Yesʉs ze bɨha e be ó: «Me elɛɛ bɨn cyecye ó nɛɛ: ǃbɨn si jyɛʼ taa buʼo yin boo Zyɛm, asoŋlo é bɨn bʉr o tɨʼ nɛʼɛ, sa bɨn bé ósa ɛ, yé ólaa sa saŋɔ lɨ figye e. ǃBɨn si lɛɛ e l'ecwɨʼ lɨʼ ó: “Mʉŋa naa. Toʼ, to nkaŋa é maŋ” nɛʼɛ, lɔɔ win, wé ókʉ bana dira cyecye.

²² No ó, sa yiyɛh bɨn lé edî e mɨnjwɨʼla ɛ, bɨn bé óbi ye, ǃbɨn bé óbuʼla wa.»

Nkul mojwɨ̀ʼa mo Yesʉs, nye eduho nko?

²³ Yesʉs ze bâʼle ni é jahla bii mo Zyɛm. É jɔʼ nye a be lé edwe bʉr sikʉlʉ tɨʼ ɨ, ojwɨɨ be opara ndwe e l'otamabʉr o lal «mpululu», ze dî e nye ó: «É wáa nkul mojwɨ̀ʼa go ndɨ esa mbi bɨsyɛɛla go lé esa biʼ ɛ? Go nteme go epa kʉ sa bye é die mo zé?»

²⁴ Yesʉs ntɔʼ bɨha e be ó: «Mɛm nteme, me paʼ dî bɨn tia ngwar nwa. ǃBɨn si kʉ gʉa ebɨha nɛʼɛ, é jɔʼ yaa ó me ólɛɛ bɨn die e mʉr lé edwe me nkul mojwɨ̀ʼa ó, me saʼ bɨsyɛɛla byaa ɛ.

²⁵ Zé a pa kʉ dwe Yʉanes nkul ó, nye toʼ le edù bʉr? Zê Zyɛm ɛ? Zê bʉr ɛ?» Bé ze timle lɔb waa paʼra wɔɔ. Bé ó: «ǃBɨna si bɨha ga ó: “Zyɛm ó b'a lomo nye” nɛʼɛ, nye óbâʼle dî e bɨna ga ó: “Yé be no nɛʼɛ, ebe yé bɨn bɛɛ, bé a baabuʼla nye e?”

²⁶ ǃBɨna si bɨha ga ó: “Bʉr ó b'a lomo nye” nɛʼɛ, bɨna bé ejala le ekpɛɛ ga ntuntuma bʉr é jɔʼ yaa, ebe, bʉr bɨbɛh, bé enʉa Yʉanes mpʉ ngwiha mɨlɔb.»

²⁷ Bé ntɔʼ bɨha e Yesʉs ó: «Bɨh bé agʉa.» Yesʉs, nye e be ó: «Yé be no nɛʼɛ, me nteme, me ákwoʼ lɛɛ bɨn die e mʉr lé edwe me nkul mojwɨ̀ʼa ó, me saʼ bɨsyɛɛla bɨnɨ ɨ.»

Kɨkɛna bwan oba

²⁸ Yesʉs, nye e be ó: «Bɨn bé epahle sa yiʼ nyá ɛ? Yé a ze be ó, nuu mʉr e bwa o bʉrʉm oba. Nye ze lɛɛ e waa efoʼ ó: “Mwan wam, toʼ, to sea é peme yam muh.”

²⁹ Nyɛɛ ze bɨha e sɔŋ ó: “Mé ato.” Pie tɨ, nye ze gwɨma ebɨh le, ntɔʼ to, to sea é peme yaa.

³⁰ Sɔŋ ze laa, to bee nuu mwan, lɛɛ nteme e nye jwɨʼ gwar nye a lɛɛ mwan efoʼ e. Nyiha ze bɨha e nye ó: “Eee, Da, me óto”, nyɛɛ l'ato.

³¹ É bwan oba baa, waa wáa a sa gwɨma mo sɔŋ ɨ?» Bé ze bɨha e nye ó: «Waa efoʼ.» Yesʉs ze lɛɛ e be ó: «Yé ó no! Me elɛɛ bɨn cyecye ó nɛɛ: onwɨa o tœa bé e mɨmbambama, bé ó ngo taare pyal e bɨn é jwɨ̀ʼa mo Zyɛm,

³² ebe, Yʉanes a ze paʼra win ó, lé elɛʼle bɨn cɨcyel zi, bɨn bɛɛ l'akpɛl buʼla nye. To kœb ó, onwɨa o tœa ndwe e mɨmbambama bɛɛ, bé a si buʼla nye. Bɨn bɛɛ nteme lé ebee no, bɨn bé a baagwɨma mobebe mɨn, nkʉ dwir ba mɨleme, le ebuʼla lɔɔ we.»

Kɨkɛna bɨbɨbla bɨ osyɛl o mosa

³³ Yesʉs ze lɛɛ e be ó: «Joʼla ga yʉʉ kɨkɛna. Yé a ze be ó, mʉr ze li peme, bè motin mo orezɛŋ tɨ, ze fumo ekɔʼ lé ekɛb peme yaa é nka, kpaʼ ekoʼ enɨnɨ lé esa epar, fum eman mpumo, ze fumo toloŋo mbɛr tɨ, fum ecyel bʉr é vaa. Nye ze liʼe ye e l'osyɛl o mosa be, ó bé nkʉʼ dɨ dwe nye we nkɔb é jɔʼ nkono. Pie tɨ, nye ze tɨ cyen, to di é l'ejaa.

³⁴ É jɔʼ nkono, yé a be, yé mu kunokuno e, nye ze lomo osyɛl o mosa be, ó bé toʼ boo osyɛl o mosa be, ó bé toʼ, to nʉa we paʼ mpumo, bula nye e nya.

³⁵ Osyɛl o mosa be baa ze mɛr mɨlʉmlʉ myaa, ntɔʼ bîŋɔ nwa, é bîŋɔ bîŋɔ; jʉŋɔ nuu; lumɔ nteme nuu e mokoʼ, nye ntɔʼ dwè.

³⁶ Mʉr peme ze bâʼle lomo bʉʉ bʉr é bɨjɔʼ é buobuo, laa bim nye a taare lomo e. Osyɛl o mosa baa ze bâʼle sa be jwɨʼ gwar bé a pa sa bʉʉ ɨ.

³⁷ É jɔʼ epihe, nye ntɔʼ ka lomlo be mwan we. Nye ó: “Diŋa ó, osyɛl o mosa bam, bé ó e nkul edwaabe yɛɛ mwan wam.”

³⁸ To kœb ó, mbea bé a bee mwan we waa lé eze e, bé ntɔʼ lɛɛla paʼra wɔɔ ó: “Mbe ga: modila mo mʉr peme ó ma ze nɨ! Bɨna jʉʼo ga nye! Bɨh nkʉʼ nʉa bɨliʼ mo sɔŋ we nye a ngbaa bi ɨ.”

³⁹ No ó bé a ze mɛr nye, ntɔʼ pɛʼɔ nye é peme tʉŋlʉ, to jʉŋɔ nye é mpomo peme.»

⁴⁰ Yesʉs ze dî e be ó: «É jɔʼ mʉr peme óka ze e, bɨn bɛɛ, bé ebee ó, mʉr peme ósa osyɛl o mosa baa nyá ɛ?»

⁴¹ Bé ze bɨha e nye ó: «Nye ókʉ jʉ osyɛl be ebebe baa ó, jʉ jʉʼo, e ncɨr é leme, ntɔʼ cyel osyɛl o mosa ofih é peme yaa, baa bé ódɨ dwe nye we paʼ mpumo é jɔʼ nkono yiyɛh ɛ.»

⁴² Yesʉs ntɔʼ dî e be ó: «Bɨn bé a baasi láa mɨtila miʼ é Kalara Zyɛm ɛ? Yé ó tila ó: “Ekoʼ ofim o mbɛr bé a pyeh ɨ, lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ. Yé a syɛɛlɨ no ó, é nkul mo Da. Yé ó sa bɨna lé ejehe ga ɛ!”» Yesʉs ze ko mokan maʼ ó:

⁴³ «Ebe no, me elɛɛ bɨn ó nɛɛ: Zyɛm muno ze pɛʼ jwɨ̀ʼa ye bɨn ye, lé eka to jwɨ̀ʼ bʉr o ndɨ abe oYʉden ɨ. Bɛɛ, bé ósea e nye syɛɛ ye! [

⁴⁴ Mʉr ótwe é l'ekoʼ lɨʼ ɨ, nye óbwiʼ bɨpeh bɨpeh. Waa ekoʼ, lé óbila ɛ, nye ótwiʼlɨ.]»

⁴⁵ Jɨh tɨʼ nye a lwib no, ojwɨɨ be opara bé e l'oFarizyɛŋ, bé ntɔʼ ka ze gʉa ó, é jɔʼ nye a twar «osyɛl o mosa» ɛ, mpa nye a dɨ lɛɛ ó be!

⁴⁶ Bé ntɔʼ taare lé ebà bɨjwɨʼ bɨ enaʼ Yesʉs mobo é nyʉl. Sa gwar, bé a be yɛɛ ó, lé ekpɛɛ mɨzɨze mɨ bʉr, ebe, bɛɛ, bé a nʉa Yesʉs ó, mpʉ ngwiha mɨlɔb.