Mataos 19 - Kálara Zyɛ̌m Edwán é mpʉ̌n

Ejwɨɨ le eba

¹ É jɔʼ Yesʉs a sil lwib no e, nye ze mʉa ɨ Galɨle, ze to lal Yʉda, ntɔʼ ntaa, to é pɨn Yʉrdɛŋ nkɔm-nkɛɛ.

² Mpampaʼ bʉr, bé ze du nye gʉ. Nye ntɔʼ tiʼ mɨsyoblʉ myé a be é ntuntuma bʉr yaa ɛ.

³ No ó bʉʉ oFarizyɛŋ, bé a ze fum nye a be e, lé eze lamɔ nye é mbi lwib nye óbɨha e be e. No ó bé a ze dî e nye ó: «Zê motie ga mɨna, mé akamle mʉr ó, nye buula myɛl ebe mbi ebebe wiwɛh nye sa nye e?»

⁴ Nye ze dî e be ó: «Bɨn bé a baasi láa ó, é l'etɔɔrʉ, Zyɛm Kwihbʉr a cye be ó, nwaʼ, mʉrʉm; nuu, mʉma ɛ?»

⁵ Nye ze bâʼle lɛɛ ó: «Ebe no ó mʉrʉm óliʼe sɔŋ e nyɔŋ, to nara e mʉma we e. Bɨbɛh oba, bé óbe ó nya e puno, sʉn ngwar.

⁶ Bé aka be oba, njɨ ngwar. Ebe no, adɛɛ ga sa Zyɛm, nyi nɛr ɨ.»

⁷ Bé ntɔʼ bâʼle dî e nye ó: «Yé be no nɛʼɛ, ebe yé Moyiz a tiile etie ó, ǃɨ mʉr si kpɛl buulo myɛl nɛʼɛ, nye tila kalara ejwɨɨ le eba, dwe myɛl, nye òbir nye e?»

⁸ Nye ó: «Moyiz a fuo tiile etie laa ó, bɨn nkʉʼ bir-bir bʉba bɨn ó, ebe, bɨn bé é bul lele mɨlʉ. To kœb ó, é l'etɔɔrʉ, etie laa, lé a baabe tɨ.

⁹ Me elɛɛ bɨn ó nɛɛ: ǃɨ mʉr si buulo myɛl—nyɛɛ yɛɛ l'asa mɨfyɛba—ntɔʼ ba mʉma fih nɛʼɛ, nyi sa mɨfyɛba ó tɨʼ ɨ.»

¹⁰ No ó ompʉn be, bé a ze lɛɛ e nye ó: «Yé be ó, tiʼ mʉma e mʉrʉm, yé óbe no nɛʼɛ, lɛɛ ó, yé agum ka jala ó, mʉr baʼ.»

¹¹ Yesʉs ze lɛɛ e be ó: «Ntʉʼ bʉr bɨbɛh ndɨ e nkul enʉa lɔɔ wi. Bʉr o b'a taare dweŋɔ nkul waa ɛ, bé ome ó ndɨ e nkul enʉa we.

¹² Ebe, é bʉr o ndɨ aba ɛ, yé e bʉr o ndɨ bɨmpwaʼre duho é mɨmo mɨ onyɔŋ bɔɔ ɛ. No nteme, yé e baa lé ecwɨhɔ cwɨhɨ ebe bʉr ofih lé ecwɨh be e. Yé nteme, yé e baa lé etil bé bʉr o tɨʼ bʉba, ó bé nkʉʼ ni é jwɨ̀ʼa mo Da ɛ. Waa ndɨ e nkul enʉa lɔɔ wiʼ ɨ, nye nʉŋa we.»

Yesʉs lé esʉ bwɔɔncyom mocyɛʼ mo mpom

¹³ Bʉr ntɔʼ ze nye e bwan bɔɔ, ó nye kɛlɨ be mobo le ejwɨʼla é l'efu lɔɔ. Ompʉn be ze bâm e l'obyɛl o bwan, ó bé l'ayi bâʼle sa no.

¹⁴ Yesʉs nyɛɛ ze lɛɛ e be ó: «Birɨ ga bwɔɔncyom, bé ntaʼ boo me. Afu fo ga be, ebe, jwɨ̀ʼa mo Da, yé cyela ó, é l'efu e bʉr o ndɨ mpʉ be e.»

¹⁵ Nye ntɔʼ kɛl bwan baa mobo, ze laa gumo yaa.

Mbil bɨsa

¹⁶ Nuu mʉr ze dihle nko Yesʉs a be e, ze dî e nye ó: «Yeʼle, me saʼ yáa mpaŋ syɛɛla é l'efu ó, me biʼe tiʼ molu mo mpoʼ mɨmɛh?»

¹⁷ Yesʉs ze bɨha e nye ó: «Paʼ taare bɨha me tia nwa. Ebe yé go lé edî me tia é lɔb sa ndɨ é mbɨa ɛ? Njɨ mʉr ngwar ó di é mbɨa ɛ. Yé be ó, go egwɨm bi tiʼ molu mo mpoʼ mɨmɛh nɛʼɛ, duʼo motie.»

¹⁸ Soho waa ze dî e nye ó: «Maa máa?» Yesʉs ze bɨha e nye ó: «Yé ó tila ó: “Ajʉ mʉr. Asa mɨfyɛba. Adíbe. Abuʼo mɨɔ go mʉr lɔb.

¹⁹ Dwaaba sɔŋ e nyɔŋ go,” ndwe nteme, “Go kpɛlɨ mɨɔ go mʉr mpʉ go lé ekpɛl go mʉr tɨʼ ɨ.”»

²⁰ No ó ma soho waa a ze bɨha e nye ó: «Mɨ du motie monɨ mɨmɛh. Yé ndɨ eka sa me sɔɔlʉ ɛ?»

²¹ Yesʉs ze lɛɛ e nye ó: «Yé be ó, go egwɨm kumo é l'ombɨmbɨa é mɨpaʼ mimyɛh nɛʼɛ, toʼ, to bɛma bim bɨsa go ndɨ e bye e. Go à dwe baanteʼenteʼe o bʉr mɔn tɨ. É jɔʼ yaa ó go óbi okum e l'ogbaa twiha é lal mo Zyɛm ɨ. Pie tɨ, go òze du me.»

²² É jɔʼ ma soho waa a joʼo mpɨha waa ɛ, nye ntɔʼ bula é gœʼra-gœʼra e mocyɛʼ mo nyʉl, ebe, nye a be ó é twiha bɨsa.

²³ Yesʉs ze lɛɛ e l'ompʉn be ó: «Me elɛɛ bɨn cyecye ó nɛɛ: yé é bul kɔbla lé eni é jwɨ̀ʼa mo Da é jɔʼ mʉr ndɨ e l'okum e l'ogbaa twiha ɛ!

²⁴ Me ebâʼle lɛɛ e bɨn ó nɛɛ: é mpʉ yé ndɨ é kɔbla ó, kamtʉl laŋa é l'egʉa e ndondo e, jwɨʼ gwar e gwar yaa nteme ó ndɨ é bul kɔbla ó, mbil bɨsa niʼe é jwɨ̀ʼa mo Zyɛm ɨ.»

²⁵ É lwib nɨ, ompʉn be ntɔʼ laŋle jehe nye, ze dîila ó: «Yé be no nɛʼɛ, zé nyɛɛ ókoʼo lé ebi tiʼ molu mo mpoʼ mɨmɛh ɛ?»

²⁶ Yesʉs ze dwɛʼ be é tʉʉʉŋ, ntɔʼ lɛɛ e be ó: «Bʉr, bé ákwoʼ bi tiʼ molu mo mpoʼ mɨmɛh ebe syɛɛla yɔɔ bé bʉr o tɨ. Sa gwar, Zyɛm ó ndɨ e nkul ekoʼo bɨsa bibyɛh.»

²⁷ Pyɛr ntɔʼ nʉa lwib. Nye e nye ó: «Paʼ bee! Bɨh bɨ liʼe bɨsa bih bibyɛh, njɨ lé edu go. A bɨh bɛɛ, bé óbi yé?»

²⁸ Yesʉs ze bɨha e be ó: «Me elɛɛ bɨn cyecye ó nɛɛ: bɨn bʉr o b'a du me é koo pihe e, é jɔʼ Mwan mo Mʉr ódi é dia taʼa ye é jɔʼ dɔnwa bɨsa bibyɛh ɛ, bɨn bé ódi é bɨdia bɨ taʼa bin ewʉm e bɨba. Bɨn bé ótiʼe moveh mo bwa b'Ɨzraɛl ewʉm e moba mɨlɔb.

²⁹ Mʉr nyiwɛh ndɨ si liʼe mɨmbɛr mye, obɨɔ be, okɛl be, sɔŋ we, nyɔŋ we, bwan be, nkʉ bɨpeme bye é lɔb wam ɨ, nye óbula bi bye zɔʼ nter, bi nteme tiʼ molu mo mpoʼ mɨmɛh.

³⁰ Sa gwar, buobuo bʉr o ndɨ “mofoʼ” e, bé óliʼ é pihe. Baa ndɨ “mopihe” e, bé ócyɛb é mofoʼ.»