Mataos 11 - Kálara Zyɛ̌m Edwán é mpʉ̌n

¹ No ó, é jɔʼ Yesʉs a be si sil dwe Esama le ompʉn ewʉm e l'oba be motɨɨ ɨ, nye ze duho é gumo yaa, to le eyeʼle bʉr ndwe le elɛɛ lɔɔ Zyɛm é bɨnkana bɨ lal waa.

Mɨlʉmlʉ mo Yʉanes Ndubʉr

² Jɔʼ Yʉanes a be é mbɛr mɨmbʉʼ ɨ, nye a be ó si joʼo lɔɔ bɨsyɛɛla mo Krɨst. No ó nye a lomo bʉʉ ompʉn be nko Yesʉs a be e, ó bé toʼ, to dî e nye ó:

³ «Zê go ó mʉr bɨh lé ebono ó, nye óze e? Zê bɨh bâʼla bono fih ɛ?»

⁴ Yesʉs ze bɨha e be ó: «Bula to lɛɛ ga Yʉanes sa bɨn lé ejoʼo le ebee e:

⁵ Ontim, bé mu ó lé ebâʼle bee. Bʉr o b'a dɨ tɨa ɛ, bé mu ó lé ekœʼ mbɨmbɨa. Mɨzɨzam, myé epɛʼɔ sa ndɨ elœʼ be é mih mo Zyɛm ɨ. Ontoʼ, bé mu ó lé ejoʼo; odwè lé epàh é mofoo. Mbɨambɨa Lɔɔ, wé mu ó lé elɛɔ baanteʼenteʼe o bʉr.

⁶ Mocyɛʼ mo mpom, mé ó e mʉr bɨsyɛɛla byam byé óbe, akol ebɔʼ lé ódumo nye e!»

⁷ Jɔʼ ompʉn mo Yʉanes, bé a be, bé mu si bula ɛ, Yesʉs ze taare lé elɛɛ ntuntuma bʉr yaa, tiibe e Yʉanes ó: «Yé bɨn bé a to bee é feha si ɨ? Zê ka lé epɨʼba é pubo e?

⁸ A no ó? Bɨn bé a to bee yé? Zê mʉr mbœra e bɨdime mɨkan ɛ? Tɨtoʼo! Bʉr o ndɨ ebwar bɨdime mɨkan ɨ, bé ó baa ndɨ edi é mɨmbɛr mɨnjwɨɨbʉr ɨ.

⁹ A, bɨn bé a to bee yé ɛ? Zê ngwiha mɨlɔb ɛ? Me elɛɛ bɨn cyecye ó nɛɛ: nye elaa ngwiha mɨlɔb,

¹⁰ ebe, nye ó waa lɔb we ndɨ tila é Kalara Zyɛm ɨ. Yé ó tila ó: “Mbe! Me muno ze cen mwa mɨlʉmlʉ wam zi dolo, nye toʼ, to komlo go zi.”»

¹¹ Yesʉs ze to dolo lé elɛɛ e be ó: «Me elɛɛ bɨn cyecye ó nɛɛ: é sa yiyɛh yé a nya sʉ ɨ, abe e mʉr ngwar ndɨ é bwaʼ le buo kum mpʉ mo Yʉanes Ndubʉr. To kœb ó, mʉr ndɨ é twaʼbe é jwɨ̀ʼa mo Da ɛ, nye é bul bwaʼ, laa nye.

¹² Taare é jɔʼ Yʉanes Ndubʉr a taare lé edù bʉr ɨ, ze pyal é banana: jwɨ̀ʼa mo Da, yé efuŋɔ e nkul. Bʉr o cere, bé esaa ó, bé dɛnɨ ye e nkul.

¹³ Taare é motie mo Moyiz, to pyal é l'ogwiha o mɨlɔb bɨbɛh, bé a be ó si bɛa gwih mɨlɔb mo Zyɛm, ze pyal é Yʉanes nye mʉr tɨ.

¹⁴ ǃBɨn si mɛʼle joʼo me nɛʼɛ, gʉŋa ga ó, Yʉanes ó ndɨ Élie, waa zea we, wé a bɛa lɛɔ ɛ.»

¹⁵ Nye ze ko tɨʼ ó: «Mʉr ndɨ e mogwal mo ejoʼo e, nye joʼa naa.

¹⁶ «Me jwɨʼɨ mya bʉr wiʼ e wáa? Wé ekʉ nwɨɨla ó e bwɔɔncyom ndɨ é l'ebɨm e nkana ondindil, ka dɨ jebla.

¹⁷ Bé ó: “Bɨh bɨ lʉo ndie, bɨn l'abwal! Bɨh bɨ jɛɛ bɨjɛɛ bɨ efie, bɨn atʉl e modwe!”

¹⁸ To kœb ó, Yʉanes, nyi ze: adɨna, akuna e bele monwoʼ. Bé ó: “Nye e l'eleme!”

¹⁹ É jɔʼ yi, Mwan mo Mʉr, nyi ka pyal: nye ede mode le enyʉl monwoʼ. Bé ó: “Dwɛʼa ga. Nwaʼ mʉr, nye ó kʉ be ancyadoʼ, fufwɔʼ monwoʼ, fo onwɨa o tœa, fo bʉr o ndɨ é bul jwɨ̂ʼlɨ e mɨsyem ɨ!” Sa gwar, bʉr, bé eka mɛʼle ó, Zyɛm, nye ó cɨcyel é jɔʼ bé ndɨ ebee ebò e cyen mɨcɨcyoo ndɨ ekœʼ œ.»

É bɨnkana lé ebene lé ebuʼla ɛ

²⁰ No ó Yesʉs a tɛɛ bʉr o b'a bee-bee mosima me, bé yɛɛ l'agwɨma mobebe mɔɔ, nkʉ dwir mɨleme e. Nye ó:

²¹ «A vwaʼ e bɨn, bʉr o Korazin! A vwaʼ e bɨn, bʉr o Betsɛda! Nkʉ mosima me a sa bɨn ye e, mé a be ó be, syɛɛ é bɨnkana bɨ Tir e Sidɔn nɛʼɛ, mpa bʉr o tɨ, bé a kʉba ó, mɨnkura é monyʉl mɔɔ, le elama mofii lé elɛʼle ó, bɨ gwɨma mobebe mɔɔ, le edwir mɨleme.

²² Ebe no ó me lé egʉa kʉ lɛɛ bɨn ó, é dobo le etiʼ e mɨlɔb, bʉr o Tir e Sidɔn, bé aŋa bul kabɔ bɨntɨʼa mpʉ bɨn.

²³ A gwɔɔ, Kapernaʉm, zê go óbɨnɔ, to pyal pyala é jobo kʉ ɛ? Tɨtoʼo! Go ófilɔ si, to pyal kwar odwè! Nkʉ mosima mé a syɛɛlɨ bɨn ye e, mé a be ó be, syɛɛlɨ ɨ Sodɔm nɛʼɛ, mpa nkana yaa, yé dina ó tɨ, ze pyal é muh é dobo lɨ.

²⁴ Ebe no, me elɛɛ bɨn ó nɛɛ: é dobo le etiʼ e mɨlɔb, bʉr o lal Sodɔm, bé aŋa kabɔ bɨntɨʼa mpʉ mo go, Kapernaʉm.»

Egbala, lé ó boo Yesʉs

²⁵ É jɔʼ yaa ó Yesʉs a ze lɛɛ ó: «Da, me edwiibɨ go, gwɔɔ Njwɨɨ kʉ e si, ebe, go a be ó si lɛʼle bʉr o ndɨ mpʉ bwɔɔncyom ɨ, bɨsa go a fol mɨcɨcyoo e l'ogwɨa o si nwaʼ ɛ.

²⁶ Da, yé ó no! Me ekʉ dwiibɨ go, ebe, go a bɛa tiʼe é leme go ó, yé syɛŋɨ no.

²⁷ «Sɔŋ wam a si dwe me bɨsa bibyɛh. Abe e mʉr lé egʉa Mwan mo Zyɛm, pɛʼ njɨ Zyɛm Sɔŋ nye ome. Abe e mʉr ndɨ egʉa Zyɛm Sɔŋ, pɛʼ njɨ Mwan mo Zyɛm ndwe e baa Mwan lé ekpɛl lɛʼle e.

²⁸ «Ntaʼ ga boo me, bʉr bɨbɛh mu si cyɛʼ lé enkɛɛ bɨdiledile mɨmbeʼ e. Me ódwe bɨn egbala.

²⁹ Niʼe ga é jwɨ̀ʼa yam. Bɨn bé à joʼlo motɨɨ mam, ebe, me é tala njwɨr e nyʉl fila si. Bɨn nkʉʼ bi egbala é mɨsisim min,

³⁰ ebe, jwɨ̀ʼa yam, yé anyan. Mbeʼ wam, wé adile.»