Mataos 10 - Kálara Zyɛ̌m Edwán é mpʉ̌n

Yesʉs lé epɛh ompʉn ewʉm e l'oba

¹ No ó Yesʉs a ze jebe Esama le ompʉn ewʉm e l'oba be, ntɔʼ dwe be nkul ó, bé dwihɨ bʉr bɨbɨbla mɨsisim le etiʼ mɨsyoblʉ mimyɛh myé a be e mosyɛb nkʉ bɨjyɛm ɨ.

² Mɨlʉmlʉ mo Yesʉs ewʉm e mɨmba myaa ó mi: waa efoʼ, Simɔn ndɨ ejebɔ ó, Pyɛr ɨ, bé e ncyom we Andreas, Jacques, mwan mo Zebede, le ncyom we Yʉanes;

³ Filip bé e Bartelemi, Tomas bé e Mataos, mʉr a taare be nwɨa tœa ɛ, Jacques, mwan mo Alfe bé e Tade,

⁴ Simɔn, mʉr Kanan, bé e Yʉdas Iskariot, mʉr a be ó, nye ókɛha nye e.

⁵ Esama le ompʉn ewʉm e l'oba onɨ ó Yesʉs a lomo, nye osi lɛɛ be ó: «Laa ó, bɨn toʼ boo bʉr o ndɨ abe oYʉden ɨ, nkʉ é bɨnkana bɨ bʉr o Samari,

⁶ fuo to ga yɛɛ boo bwa b'Ɨzraɛl, é bɨntœme mu si pɔhba, to dim ɨ.

⁷ Zi e zi, dɨʼe tuno ga ó: “Jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ!”

⁸ Tiʼɨ ga mɨsyoblʉ. Pɛ̀hɛ ga bʉr é mofoo. Pɛʼɛ ga sa ndɨ elœʼ mɨzɨzam é mih mo Zyɛm ɨ. Dwihɨ ga moleme. Bɨn bɨ bi, abwam. Dweʼ ga nteme, abɛma.

⁹ Mʉr anʉa ga mɨsaŋ mɨ gol, nkʉ myaa mɨ nkoho mɔn, dam be dih e kaba é mɨmpɨʼ min.

¹⁰ Mʉr anʉa ga myah é cyen yi, nkʉ e bɨdur bɨba, nkʉ opia be osilpah oba, nkʉ fumo, ebe, syɛl mosa, nye ejala le edweŋɔ mode me.

¹¹ «É bɨnkana le mokwar bɨn bé óni ɨ, taara dî ga nkʉ yé e mbi mʉr lé ejala le ebɨlan e bɨn tɨʼ ɨ. Bɨn bé à di é mbɛr we, bɨn e boo nɔɔ, to pyal é jɔʼ bɨn bé ólaa tɨʼ ɨ.

¹² ǃBɨn si ni mbɛr waa nɛʼɛ, lɛŋɨ ga e bʉr o mbɛr waa ó: “Motala, mé diʼe é bɨn!”

¹³ ǃƗ bʉr o mbɛr waa si bɨlan e bɨn mbi ndɨ ejala nɛʼɛ, motala mɨn, mé liʼɨ é sama yɔɔ é jɔʼ bɨn bé ólaa, to e. Yé be ó, bé abɨlan e bɨn no nɛʼɛ, motala mɨn maa, mé óbula ze kœb bɨn.

¹⁴ ǃƗ mʉr si be, amɛʼle bɨlan e bɨn é guu mbɛr, nkʉ é yʉʉ nkana, le amɛʼle joʼo lwib yin nɛʼɛ, é jɔʼ bɨn mu lé eduho é mbɛr waa nkʉ é nkana yaa ɛ, bɨn bé à tɨ koho dih.

¹⁵ Me elɛɛ bɨn cyecye ó nɛɛ: é dobo le etiʼ e mɨlɔb, bʉr o Sodɔm e Gomɔr, bé aŋa bul kabɔ bɨntɨʼa mpʉ bʉr o kwar waa.»

Motɨɨ lé etiibe e tíila ɛ

¹⁶ «Mbe ga: mɨ lomo bɨn mpʉ bɨntœme teme onkœœ! No ó, diʼe ga ncye! Cɨa ga mpʉ onyʉa. Bɨn bé à tala mɨleme mpʉ mopɨba.

¹⁷ Bɨn bé à di ncye, ebe, bʉr, bé óto e bɨn é mompʉm mo otamabʉr mɔɔ, to pur bɨn gʉ, le efuura bɨn mɨmbihe é mompah mɨnjwɨʼla mɔɔ.

¹⁸ Bé óto e bɨn é mih mo ongoman le mɨnjwɨɨbʉr é lɔb wam. Bɨn bé ósaŋɔ no ó, bɨn nkʉʼ gʉa lɛɛ ocyecye bɨn lé egʉa é lɔb wam ɨ, bɛɛ ndwe e bʉr o ndɨ abe oYʉden ɨ, lé ejoʼo.

¹⁹ ǃBé si naʼ bɨn mobo é nyʉl, to e bɨn é mompah mɨlɔb nɛʼɛ, asyɛl ga ba e bɨn bʉr o tɨ, tiibe e nkar bɨn bé ófuo monyʉl mɨn e tɨʼ ɨ. Asyɛl ga ba, tiibe e mbi mokan bɨn bé ólɛɛ ɛ. Sa elɛɛ, yé ódweŋɔ bɨn tɨʼ é jɔʼ gwar yaa.

²⁰ Ebe, ntʉʼ bɨn bé ólwib. Sisim Sɔŋ win óntɨh bɨn ɨ, nye ó ngo lwib é bɨn.

²¹ «Mɨɔ ókɛha mɨɔ ó, bé jʉʼo nye. Sɔŋ ókɛha mwan we. Bwan, bé óbene mojwɨ̀ʼa mo obyɛl bɔɔ, le esa ó, bé jʉŋɔ.

²² Bʉr bɨbɛh, bé ónwim bɨn é lɔb wam. No ó, waa ódihbe, to pyal é l'esie e, nyiha ó ngo tiʼe.

²³ ǃBé si tíile bɨn é yiʼ nkana nɛʼɛ, bɨn bé à kpɛɛ, to é yʉʉ fih. Me elɛɛ bɨn cyecye ó nɛɛ: bɨn l'apa kumo bɨnkana bɨ lal Ɨzraɛl bibyɛh, Mwan mo Mʉr ópyal.

²⁴ «Mpʉn álaa yeʼle we é duu; syɛl mosa alaa masa we.

²⁵ Mpʉn saʼ mpʉ yeʼle we; syɛl mosa saʼ mpʉ masa we. No ó ndɨ ejala. Lʉ mbɛr bʉr pa taare jwɨrɔ die ó, Belzebul, a dwɛʼra e bʉr o mbɛr bʉr waa! Bé óka jwɨrɔ mie ndɨ é laŋle bebe e!»

Ajoʼo ga bʉa e bʉr

²⁶ «Ebe no, ajoʼo ga bʉa e bʉr, ebe, sa yiyɛh ndɨ é l'efo e, yé ógwiha. Sa yiyɛh ndɨ fela ɛ, yé ókʉ gʉŋɔ.

²⁷ Sa me lé elɛɛ bɨn é l'edurʉ ɨ, bâʼla lɛɛ ga ye é moho é kpɛŋlɛm. Sa mʉr ónyimla bɨn é l'egwal ɨ, cyɛba ga kʉ mie, bɨn bé à tuno ye.

²⁸ Ajoʼo ga bʉa e bʉr. Bé dam jʉ bɨn é nko paʼ bɨpuno. Bɛɛ bé abe e nkul esa bɨn sɔʼɔ é nko paʼ sisim. Laa ó, bɨn joʼa bʉa e be, fuo joʼo ga bʉa yɛɛ e Zyɛm, waa ndɨ e nkul esa ó, nyʉl le sisim bibyɛh, byé toʼ, to dwè é Bɨ-siʼe e.

²⁹ Bé ebɛma baatɔlɔ oba ó, para gwar. Dam be no, abe e l'atɔlɔ ngwar ndɨ e nkul ekur si, abe é gwɨma mo Sɔŋ win.

³⁰ Nteme, Zyɛm, nye egʉa tolɔɔ mɨkoho mɨ mpuo ndɨ bɨn é mɨlʉ ɨ.

³¹ Ebe no, ajoʼo ga bʉa. Bɨn bé é bul buo dime, laa buobuo baatɔlɔ!

³² «Ebe no, ǃɨ mʉr si kuro bɨr, gban me é mih mo bʉr nɛʼɛ, mɛm nteme, me ógban nye é mih mo Sɔŋ wam ndɨ é jobo kʉ ɨ.

³³ Sa gwar, ǃɨ mʉr si lɛɛ é pyɛldweh ó, nye agʉa me nɛʼɛ, me ólɛɛ nteme ó, nye a baabe mpʉn wam, sa nɨ é mih mo Sɔŋ wam ndɨ é jobo kʉ ɨ.»

Yesʉs a ze ó, ze nkam bʉr mɨlʉ

³⁴ «Abuʼla ga ó, me a ze ó, lé eze sa ó, bʉr o si nwaʼ diʼe é motala. Me a bé aze gba motala paʼra wɔɔ. Me a ze ó lé eze timle fòŋ!

³⁵ Ebe, me a ze bɛʼ ó, “soho bé e sɔŋ, esehe bé e nyɔŋ, njyɛl bé e mpɔmlʉ mʉma.

³⁶ Mʉr ókœb-kœb bʉr o dɔm ó, njɨ é bɛn ye tʉŋlʉ.”»

«Me du ó Yesʉs» nye ó, go nkɛŋɨ klos yo

³⁷ «Waa lé ekpɛl sɔŋ, nkʉ nyɔŋ, laa bim nye ndɨ ekpɛl me e, nye é dwɛhba, ajala e me. Waa lé ekpɛl ma soho we, nkʉ sile we, laa bim nye ndɨ ekpɛl me e, nye é dwɛhba. Nye ajala e me.

³⁸ Waa ndɨ ankɛɛ klos ye, du me e, nye é dwɛhba. Nye ajala e me.

³⁹ Waa lé ekʉ ka saa ó njɨ ekamle e tiʼ ye e, nye ódimle ye. Waa lé emɛʼle ó, nye fuo dimle tiʼ ye é lɔb wam ɨ, nyiha óbaʼle ye.»

Myɛna

⁴⁰ «Mʉr bɨlan e bɨn mbɨmbɨa ɛ, nye ebɨlan e me. Waa lé ebɨlan e me e, bɨlan ó e mʉr a ntɨh me e.

⁴¹ ǃƗ mʉr si bɨlan e ngwiha mɨlɔb mbɨmbɨa é dia ngwiha mɨlɔb nɛʼɛ, mʉr waa óbi mbi myɛna lé edweŋɔ ogwiha o mɨlɔb ɨ. ǃƗ mʉr si bɨlan e cɨcyel mʉr é mih mo Zyɛm ebe ocɨcyel we waa nɛʼɛ, mʉr waa óbi mbi myɛna lé edweŋɔ ocɨcyel o bʉr ɨ.

⁴² Me elɛɛ bɨn cyecye ó nɛɛ: ǃɨ mʉr si dwe waa ndɨ é bul twaʼbe é l'esama le ompʉn bam, dam be njɨ bele modibe motala gwar e gwar ebe syɛɛ nye lé esea me mpʉ mpʉn wam nɛʼɛ, mʉr waa óbi mpaŋ myɛna me.»