Mataos 1 - Kálara Zyɛ̌m Edwán é mpʉ̌n

Láa-ntan mo Yesʉs

¹ Bɨmpam mo Yesʉs, Lœma mulo mo Zyɛm, a be mwan mo Abraham, mwan mo David ɨ.

² Abraham a si bya Ɨzak. Ɨzak ze bya Yakɔb. Yakɔb bya Yʉda bé e l'obɨɔ be.

³ Yʉda bé e mʉma we Tamar ze byaŋɔ Perɛs le Zerah. Perɛs ze bya Ɛsrɔn. Ɛsrɔn bya Aram.

⁴ Aram bya Aminadab. Aminadab bya Naasɔn. Naasɔn bya Salma.

⁵ Salma bé e mʉma we Rahab ze byaŋɔ Boaz. Boaz bé e mʉma we Rwit ze byaŋɔ Obed. Obed ze bya Yese.

⁶ Yese bya njwɨɨbʉr David. David bé e mʉma mo Uri ze byaŋɔ Salomɔŋ.

⁷ Salomɔŋ bya Robwam. Robwam bya Abia. Abia bya Asaf.

⁸ Asaf bya Yosafat. Yosafat bya Yoram. Yoram bya Ozias.

⁹ Ozias bya Yoatam. Yoatam bya Akaz. Ahaz bya Ezekyas.

¹⁰ Ezekyas bya Manase. Manase bya Amon. Amon bya Yosiyah.

¹¹ Yosiyah bya Yekoniyah bé e l'obɨɔ be é jɔʼ bé a to é l'okomo Babilɔn ɨ.

¹² Pie tœa mɨkomo Babilɔn, wé osi laa nɛʼɛ, Yekoniyah ze bya Salacyɛl, Salacyɛl bya Zorobabɛl.

¹³ Zorobabɛl bya Abyud. Abyud bya Eliakim. Eliakim bya Azɔr.

¹⁴ Azɔr bya Sadok. Sadok bya Akim. Akim bya Elyʉd.

¹⁵ Elyʉd bya Eliazar. Eliazar bya Matan. Matan bya Yakɔb.

¹⁶ Yakɔb bya Yoseb, njʉm mo Maaria. Maaria ó b'a bya Yesʉs, waa bé lé ejebe ó, Lœma mulo mo Zyɛm ɨ.

¹⁷ Nó yé ó, lé etaare é Abraham, to pyal é David, mɨmya mɨ bʉr, myé a be ó ewʉm e mɨnâ. Taare é David, to pyal é jɔʼ bé a to é l'okomo é Babilɔn ɨ, mɨmya mɨ bʉr, myé a be ó ewʉm e mɨnâ. Taare é jɔʼ bé a be é l'okomo Babilɔn ɨ, ze to pyal é l'ebyɛl mo Krɨst ɨ, mɨmya mɨ bʉr, myé a be nteme ó ewʉm e mɨnâ.

Ebyɛl mo Yesʉs-Krɨst

¹⁸ É mbi wiʼ ó Yesʉs-Krɨst a byɛl ɨ: nyɔŋ we Maaria bé e Yoseb, bé a be e l'etie ó, bé óbɛa. Bé l'apa syɛŋa duo, Maaria ze nʉa ebum e nkul mo Mbɨambɨa Sisim.

¹⁹ Njʉm we Yoseb a be ó cɨcyel mʉr. Nye nteme a baakpɛl samle nye teme bʉr. No ó nye a jwɨʼ é leme we ó, nye bir ó nye é mofo, bʉr agʉa ɛ.

²⁰ Nye dina e jwɨʼ yaa é lʉ, engles mo Da ntɔʼ ze pyal nye é lima. Engles waa ze lɛɛ e nye ó: «Yoseb, nta mo David, akpɛɛ lé enʉa mʉma go Maaria, ebe, nye nʉa ebum ó e nkul mo Mbɨambɨa Sisim.

²¹ Nye óbya ma mʉrʉm. Go ójwɨr nye die ó Yesʉs, ebe, nye ó ngo tiʼ kul bʉr ye, lé edwih ye é mpila mɨsyem myɔɔ é pololo.»

²² Bɨsa byaa bibyɛh, byé a syɛɛlɨ no ó, lé edira lɔɔ Da a lɛɛ é nʉm mo ngwiha mɨlɔb we ó:

²³ «Ndu esehe e mʉma, wé ónʉa ebum, bya ma mʉrʉm. Bé ójwɨr nye die ó “Emmanuel”.» No yé edwirɔ ó: «Zyɛm, nye e bɨna ga.»

²⁴ Jɔʼ Yoseb a jɨma é dwo e, nye ntɔʼ ba Maaria, lé edu mpʉ engles mo Da a lɛɛ nye e.

²⁵ Nye a be yɛɛ asyɛŋa duo e nye, to pyal é jɔʼ nye a bya mwan waa ɛ. Nye ntɔʼ jwɨr nye die ó Yesʉs.