Markus 9 - Kálara Zyɛ̌m Edwán é mpʉ̌n

¹ No ó Yesʉs a lɛɛ e be ó: «Me elɛɛ bɨn cyecye ó nɛɛ: é sama bʉr o ndɨ wâʼ bananaʼ ɛ, bʉʉ bé aŋa dwè, l'apa bee jwɨ̀ʼa mo Zyɛm lé ecyelɔ cyecye.»

Yesʉs lé esiila nyʉl

² Molu tobo, mé osi laa nɛʼɛ, Yesʉs ze nʉa Pyɛr bé e Jacques ndwe e Yʉanes. Nye ze to e be é bwaʼbwaʼ ecwɨʼ. Bé a be gʉʼ ó bé ome. Nye ze siila nyʉl é mih mɔɔ.

³ Mɨkan mye, myé a be ó lé ebul pan, myé mu é pumo-pumo, abe ó, yé e mʉr ngwar ndɨ e nkul eliŋ mɨkan é pumo-pumo é mbi waa ɛ.

⁴ No ó Élie bé e Moyiz, bé a ze nyin gumo bé a be e, Yesʉs, bé e boo nɔɔ ze lɛɛla.

⁵ No ó Pyɛr a ze lɛɛ e Yesʉs ó: «Yeʼle, yé é laŋle mbɨa ó, bɨna diʼe ga wâ. Bɨna saʼ ga mompaʼ, bɨsaʼ bɨlɛl: le yo, le yaa mo Moyiz ndwe e yaa mo Élie!»

⁶ (Nye a baapa kʉ gʉa sa nye a jala le elɛɛ ɛ, ebe, bé e bʉʉ ompʉn, bé a be ó lé ebul joʼo bʉa.)

⁷ Dwine ze buuro be. Ompʉn, bé ka joʼo ó, nuu twii lé eduho é mɨnkur tʉŋlʉ, lé elɛɛ ó: «Nwa, nye ó mwan kpɛl wam. Joʼa ga nye.»

⁸ Cye e cye yaa, ompʉn ka dwɛʼla mpʉʼ nɛʼɛ, bé a kʉ ka bee ó njɨ Yesʉs nye ome.

⁹ É jɔʼ bé a be, mu teme efulo ecwɨʼ ɨ, no ó Yesʉs a cyel be mpene ó, bé l'anyamle lɛɛ mʉr sa bé bee e, to pyal é jɔʼ nyɛɛ, Mwan mo Mʉr óbe si pàh é foo e.

¹⁰ No ó bé a ze baʼle lɔɔ nye a lɛɛ be e, ntɔʼ to le edîila paʼra wɔɔ ó: «Nye epa kʉ gwɨm lɛɛ é yé, tiibe e “l'epàh é foo” wiʼ ɛ?»

¹¹ No ó bé a ze dî e nye ó: «Ebe yé oyeʼle o motie bɛɛ lé elɛɛ ó, yé ókʉ be Élie é nere-nere ó, nye taara pyal ɨ?»

¹² Nye ze bɨha e be ó: «Yé ó no! Yé ekʉ jala ó, Élie taara pyal, lé eze komlo bɨsa bibyɛh. Sa gwar, paʼ pahle ga! Ebe yé yé ndɨ tila é Kalara Zyɛm ó, Mwan mo Mʉr ósia e mɨtuu é buobuo, le epyehɔ ɛ.

¹³ No ó me lé elɛɛ e bɨn ó: Élie, nyi bɛa pyal! Bé a lɛʼle nye ó, mbi cere wiwɛh bé a kpɛl lɛʼle nye e, é mpʉ yé ndɨ tila é Kalara Zyɛm é lʉ we e.»

Yesʉs lé etiʼ mwan a sia e l'eleme e

¹⁴ No ó, é jɔʼ Yesʉs bé e l'ompʉn baa, bé a bula, toŋɔ nko bʉʉ ompʉn bé a liʼ ɨ, bé a to kœb ó, ntuntuma bʉr, yé a be ó lé ebʉmra be é nka, kœbɔ nteme ó, oyeʼle o motie, bé a be ó lé epɨra mokan e be.

¹⁵ Jɨh tɨʼ ntuntuma bʉr, yé a kʉ bee Yesʉs, bé ntɔʼ ze twɨra, ze fimɔ mɨkam, lé eto sohɔ nye.

¹⁶ Nye ze dî e be ó: «Bɨn e boo nɔɔ, bé epɨra mokan é wáa lɔb?»

¹⁷ Nuu mʉr é ntuntuma bʉr yaa ze nʉa lwib, ze lɛɛ e nye ó: «Yeʼle, me be ó si ze e soho wam boo go, ebe, nye e bɨbla sisim ndɨ esa ó, nye diʼe gʉ́ʼ ɨ.

¹⁸ No ó gumo yiyɛh sisim waa lé emɛr nye e, wé enkɛŋ-nkɛŋ nye si, mogul dɨ pyal nye é nʉm é ntomo-ntomo, nye dɨ lwaare moje, nye mu é sʉnʉnʉ. No ó, me be ó lé ejwɨʼla e l'ompʉn bo ó, bé dwihɨ nye wa, bɛɛ l'akoʼo!»

¹⁹ Yesʉs ntɔʼ lɛɛ e be ó: «Bɨn bʉr o ndɨ akpɛl buʼla ɛ! Me kaʼ diibe é sama yin, to pyal é yáa jɔʼ? Me ódihbe bɨn, to fiʼ yáa gumo? Ntaʼ ga me e mwan nɨ wâ.»

²⁰ Jɨh tɨʼ sisim waa, wé a kʉ bee nye, wé ntɔʼ ze ncyeŋ mwan waa é guʼ-guʼ-guʼ, nkɛŋ nye si. Nye ntɔʼ to le ebiila si e si, egul é nʉm é ntomo-ntomo.

²¹ Yesʉs ze dî e sɔŋ mwan ó: «Yé mu mɨmbu mɨntɨɛ nye ndɨ e l'esyɛb lɨʼ ɨ?» Sɔŋ ze bɨha ó: «Taare é l'oncyom we, ze pyal é muh é dobo lɨ.

²² Biʼ bɨjɔʼ, wé enkɛŋ nye é duro. Byʉʉ bɨjɔʼ, wé enkɛŋ nye é modibe ó, wé jʉ ó nye. Dam be no, gwɔɔ, jwɨʼɨ bɨh nkoo. Kɛmɨ bɨh, ǃgo be e nkul ekoʼo wa.»

²³ Yesʉs, nye e nye ó: «Gwɔɔ lɛɛ ó: “ǃGo be e nkul ekoʼo wa!...” Sa gwar, mɛm, me elɛɛ e go ó, sa yiyɛh, yé óbɛm saŋɔ boo mʉr lé ejyɛʼ taa buʼo ye boo Zyɛm ɨ.»

²⁴ Cye e cye yaa, sɔŋ mwan ntɔʼ lɛɛ kʉ kʉ ó: «Mɨ jyɛʼ taa buʼo yam boo nye! Sa gwar, ntaʼ, ze gul me é nko paʼ abuʼla wam.»

²⁵ Yesʉs ntɔʼ bee ntuntuma bʉr yé a be lé emaʼla é gumo yaa ɛ. Nye ze bâm e bɨbla sisim. Nye ó: «Bɨbla sisim lé esa ó, mwan nwaʼ diʼe ntoʼ ndwe e gʉ́ʼ ɨ, me lɛɛ e go ó: duha nye é nyʉl. Aka bâʼle ze ni nye é nyʉl.»

²⁶ Sisim waa ntɔʼ bahle nkœme, ncyeŋ mwan waa é buobuo, ze duho, liʼe nye tina si é sehe. Bʉr é buobuo, bé a lɛɛ ó: «Nyi dwè!»

²⁷ No ó Yesʉs a ze mɛr nye é mbo, ze gbɛl nye si, cyel nye cɨcyel.

²⁸ É jɔʼ Yesʉs a bula mbɛr ɨ, ompʉn be, ze dî e nye, bé mu bé ome ó: «Ebe yé bɨh baakoʼo lé edwih we e?»

²⁹ Nye ó: «Winɨ mbi bɨbla sisim, yé ekʉ ka dwihɔ-dwihɔ ó njɨ é zi mɨnjwɨʼla.»

Yesʉs lé ebal ompʉn be é lɔb efie le é jɔʼ mba

³⁰ Bé ntɔʼ laa gumo yaa, ze ntaa lal Galɨle. Yesʉs a baakpɛl ó, bʉr gʉŋa fum nye a be e,

³¹ ebe, nye a be ó lé eyeʼle ompʉn be. Nye ó: «Mwan mo Mʉr ókɛhɔ é mobo mo bʉr. Bé ójʉ nye. No ó, é jɔʼ bé óbe si jʉ nye é moho lɛl pie tɨʼ ɨ, nye ópàh!»

³² Dam be no, ompʉn be, bé a baagʉa joʼo sa nye a lɛɛ be e. Bé nteme bé a be ó lé ekpɛɛ lé edî nye tia tɨ.

Zé ndɨ e nkʉŋ é bwaʼbwaʼ é jwɨ̀ʼa mo Zyɛm?

³³ No ó bé a ze pyal Kapernaʉm. É jɔʼ bé a be, bé mu mbɛr ɨ, Yesʉs ze dî e l'ompʉn be ó: «Yé bɨn be lé etimle zi e zi paʼra win ɨ?»

³⁴ É jɔʼ bé a joʼo tia waa ɛ, bé a kʉ ka di ó njɨ é puuu, ebe, zi e zi bé a be ó lé etimle lɔb paʼra wɔɔ, lé egwɨm gʉa mʉr é l'esama lɔɔ a laa bʉʉ é mpwaʼ nkʉŋ ɨ.

³⁵ No ó Yesʉs a ze di si, ntɔʼ jebe Esama le ompʉn ewʉm e l'oba. Nye e be ó: «Mʉr lé egwɨm cye efoʼ e, yé ekʉ jala ó, nye diʼe mʉr epihe é l'esama lɨn, bɨn bɨbɛh. Nye diʼe nteme syɛl mosa win, bɨn bɨbɛh!»

³⁶ Pie tɨ, Yesʉs ze nʉa mancyom, cyel nye é mih mɔɔ, ntɔʼ beŋle nye. Nye ó:

³⁷ «Mʉr nyiwɛh óbɨlan e mbi mancyom wiʼ mbɨmbɨa é die lam ɨ, nyi bɨlan e me mʉr tɨ. To kœb ó, mʉr bɨlan e me e, nye abɨlan e me e me; nyi bɨlan nteme ó e mʉr a ntɨh me e.»

Bʉr o ndɨ é l'esama ga lɨna ɛ

³⁸ No ó Yʉanes a lɛɛ e Yesʉs ó: «Yeʼle, bɨh bé a be ó si bee nuu mʉr lé edwih bʉr moleme é die lo! Bɨh ze kamle nye lé ebâʼle sa syɛɛla yaa, ebe, nye abe mʉr lé edu bɨna ga.»

³⁹ No ó Yesʉs a bɨha e nye ó: «Daʼ kamle ga nye, ebe, mʉr, nye abe e nkul esa mosima é die lam, nye ntɔʼ ka fœʼ me é cye e cye yaa.

⁴⁰ Waa ndɨ abe bɨna ga é nkɔm nkɔm-nkɛɛ ɛ, nye ó é nkɔm ga wina.

⁴¹ Me elɛɛ bɨn cyecye ó nɛɛ: ǃɨ mʉr si dwe bɨn bele modibe ebe bɨn bé ó jyɛɛ mo Lœma mulo mo Zyɛm nɛʼɛ, mʉr waa óbi mpaŋ myɛna me.»

Mobʉbla

⁴² «É nko paʼ bwan ndɨ ejyɛʼ taa buʼo yɔɔ boo me e, laa ó, mʉr gomla ngwar tɨʼ é zi mɨsyem, fuo tiile yɛɛ bwaʼbwaʼ ekoʼ é twii zizii wam waa, wé guhɔ é maŋ, ebe, yé a ngbaa mbɨa é paʼ mo zizii wam waa ó, wé guhɔ é maŋ, dwè, abe ó, wé gomla mwan ngwar é zi mɨsyem waa.

⁴³ Yé be ó, mbo go ngwar, wé ó ndɨ esa ó, go duma é l'ebebe nɛʼɛ, tiʼa we. Laa ó, go diʼe e mobo moba mo, go ntɔʼ guhɔ é Bɨ-siʼe, gumo siʼe lé eduo njʉmdia e njʉmdia ɛ, fuo tiʼe yɛɛ we, ebe, yé é bul mbɨa é nko paʼ go ó, go biʼe tiʼ molu mo mpoʼ mɨmɛh. [

⁴⁴ É Bɨ-siʼe yaa, “bɨlumo, byé abe lé edwè; siʼe nteme adime-dime.”]

⁴⁵ Yé be ó, kʉ go, wé ó ndɨ esa ó, go duma é l'ebebe nɛʼɛ, laa ó, go diʼe e mokʉ moba mo, ntɔʼ to guhɔ é Bɨ-siʼe, fuo tiʼe we, go toʼ, to bi tiʼ molu mo mpoʼ mɨmɛh, gwɔɔ yɛɛ e titil kʉ. [

⁴⁶ É Bɨ-siʼe yaa, “bɨlumo, byé abe lé edwè; siʼe nteme adime-dime.”]

⁴⁷ Yé be ó, dih lo, lé ó ndɨ esa ó, go duma é l'ebebe nɛʼɛ, guha le. Laa ó, go diʼe e mih moba mo, ntɔʼ ka to guhɔ é Bɨ-siʼe ndɨ é diʼa diʼa ɛ, fuo guho yɛɛ dih lo, ebe, yé é bul mbɨa é nko paʼ go ó, go diʼe e ntwan dih, to bi tiʼ molu mo mpoʼ mɨmɛh é jwɨ̀ʼa mo Zyɛm.

⁴⁸ É Bɨ-siʼe yaa, “bɨlumo, byé abe lé edwè; siʼe nteme adime-dime,”

⁴⁹ ebe, mʉr nyiwɛh óbe tɨʼ ó, siʼe si ni nye é nyʉl é dwiii mpʉ ekpa.»

Kɨkɛna ekpa

⁵⁰ «Ekpa, lé ó sa ndɨ é mbɨa ɛ. Sa gwar, Sa gwar, ǃɨ ekpa, lé si dimle mojómo me nɛʼɛ, bé óka bula dwe le mojómo nyá ɛ? Diʼe ga ompʉn ompa é l'esama lɨn tʉŋlʉ, mpʉ ekpa, sa ndɨ e nyɔm é mode e. Bɨn bé à tiʼe é motala paʼra win.»