Markus 8 - Kálara Zyɛ̌m Edwán é mpʉ̌n

Yesʉs lé edwe bʉr otɔɔyin onâ mode

¹ É molu maa, ntuntuma bʉr, yé a be ó si bâʼle fwal gumo Yesʉs a be e. É mpʉ bé a be, abe e sa ede ɛ, Yesʉs ntɔʼ jebe ompʉn be, ntɔʼ lɛɛ e be ó:

² «Me ejwɨʼ bʉr baʼ nkoo, ebe, bɨna ga e boo nɔɔ bɨ di molu molɛl. Bé aka be e sa ede.

³ Bé mu nteme ó, si cyɛʼ e za. ǃMe si kʉ bir ó, bé fiʼɨ, to é mokwar mɔɔ nɛʼɛ, bʉʉ bʉr, bé óto nkaŋa si temezi é l'eguu e za, ebe, bʉʉ bʉr o sama yi, bé jaa ó duho.»

⁴ No ó ompʉn be, bé a dî e nye ó: «Bɨh bé e nkul esa nyá ó, bɨh kœbɨ bim mode mé ójala le ekabɔ bʉr baʼ ɛ, bʉr nteme é lʉn mpʉ?»

⁵ Yesʉs ntɔʼ dî e be ó: «Bɨn bé e bɨbler bɨntɨɛ?» Bé ntɔʼ bɨha ó: «Tambɛl.»

⁶ No ó nye a ze lɛɛ e ntuntuma bʉr ó, bɨbɛh diʼe si. Nye ntɔʼ nʉa bɨbler tambɛl byaa, ze dwe Zyɛm ekiba, ntɔʼ pɛ̂ʼ bye bɨpeh, to le edwe ompʉn be ó, bé kaba bʉr bya. Bé ze nʉa, kab bʉr bɨbɛh.

⁷ Bé a be nteme ó e bwa ofu abuo. Yesʉs ze dwe Zyɛm ekiba é lɔb ofu baa, ntɔʼ dwe ompʉn be ba ó, bé kaba bʉr ba.

⁸ Bʉr baa ze de, díle, kar mode. Mompubuʼo mode ompʉn, bé a to le etʉʼla ɛ, mé a si kaalɔ é mokuro tambɛl.

⁹ Bʉr o b'a be tɨʼ ɨ, bé a be ó kwoʼ be otɔɔyin onâ. Pie tɨ, Yesʉs ze buulo be ó, bé toʼ é mokwar mɔɔ.

¹⁰ Cye e cye yaa, bé e l'ompʉn be, bé ze kable é byɛl, ntɔʼ to lal Dalmanuta.

Yesʉs lé ebene lé esa oFarizyɛŋ dweʼle nkul we

¹¹ Sama oFarizyɛŋ ze pyal boo Yesʉs, bé e boo nɔɔ, bé ntɔʼ taare lé epɨra mokan. Bé a be ó, bé lam ó Yesʉs é mbi lwib nye óbɨha e be e. Bé e nye ó, nye saʼ be dweʼle nkul a duho boo Zyɛm ɨ.

¹² Yesʉs kʉ ze fil mɨswɨh, ze dî e be ó: «Ebe yé bʉr o mya wiʼ lé egwɨm bee-bee bɨdweʼle bɨ nkul wam lé elɛʼle mbi mʉr me ndɨ ɨ? Me elɛɛ bɨn cyecye ó nɛɛ: bé ákwoʼ lɛʼlɔ dweʼle nkul wam gwar!»

¹³ Nye ntɔʼ liʼe be, bâʼle kable é byɛl tʉŋlʉ, to é l'ebʉm e maŋ e nkɔm-nkɛɛ.

Egʉʼla le ompʉn mo Yesʉs

¹⁴ Tina, yé ó, ompʉn be, bé a be ó si jɨha lé enʉa bɨbler. Bé a kʉ ka be ó njɨ e bler gwar é byɛl.

¹⁵ Yesʉs ntɔʼ bal be ó: «Diʼe ga ncye é motɨɨ mo oFarizyɛŋ ndwe e maa mo nkɔm mo Erod é lɔb levure bé ndɨ e ye e!»

¹⁶ Ompʉn be ntɔʼ timle lɔb waa paʼra wɔɔ. Bé ó: «Nye lɛɛ no ó, ebe, bɨna ndɨ aka be ga e bɨbler.»

¹⁷ To kœb ó, Yesʉs a be ó si gʉa sa bé a be lé etimle paʼra wɔɔ ɛ. No ó nye a ze dî e be ó: «Ebe yé bɨn lé etimle lɔb bler yé a liʼ bɨn pihe e? Zê bɨn l'apa cyeble, nkʉ joʼo ba sa me lé elɛɛ bɨn ɨ? Zê mɨleme min, myé é lele lé ejoʼo ɛ?

¹⁸ Zê bɨn bé e mih, abee ɛ? Zê bɨn bé e mogwal, ajoʼo ɛ? Zê bɨn bé abaʼle sɔʼɔ é mɨleme min ɛ?

¹⁹ É jɔʼ me a pɛ̂ʼ bɨbler bɨtɛn, dwe bʉrʉm otɔɔyin otɛn ɨ, bɨn bé a loŋlo bɨkar bɨntɨɛ e mompubuʼo mode maa?» Bé ze bɨha e nye ó: «Ewʉm e moba.»

²⁰ «Ndwe é jɔʼ me a pɛ̂ʼ bɨbler tambɛl, dwe bʉr otɔɔyin onâ ɛ, bɨn bé a loŋlo mokuro montɨɛ e mompubuʼo mode maa?» Bé e nye ó: «Tambɛl.»

²¹ No ó nye a ze dî e be ó: «A no ó, zê bɨn bé apa gʉa joʼo ɛ?»

Yesʉs lé etiʼ ntim Betsɛda

²² Bé ze pyal Betsɛda. Bʉr ntɔʼ ze nye e ntim, ze jwɨʼla e nye ó, nye kɛlɨ nye mbo.

²³ No ó nye a ze mɛr ntim waa é mbo, bé ntɔʼ duho kwar waa, to é ma lʉn. Nye ntɔʼ syɛɛ nye mocyeele é mih, ntɔʼ kɛl nye mobo é nyʉl, ntɔʼ dî e nye ó: «Zê go mu lé ebee sɔʼɔ ɛ?»

²⁴ Ntim ntɔʼ bɛɛ mih. Nye e nye ó: «Me ebee ó bʉr lé enwɨɨla e bɨlɨ lé ekœʼ œ!»

²⁵ No ó Yesʉs a bâʼle kɛl nye mobo é mih. Ntim ntɔʼ dwɛʼ é tʉʉʉŋ, ntɔʼ kʉ tiʼe mbɨmbɨɨɨa. Nye a be ó, nye mu lé ebee bɨsa bibyɛh é sʉlʉlʉ.

²⁶ Yesʉs ntɔʼ buulo nye mbɛr we. Nye e nye ó: «Abâʼle cwɨɨ é kwar nɨ!»

Yesʉs ó ndɨ Lœma mulo mo Zyɛm

²⁷ Yesʉs bé e l'ompʉn be, ze toŋɔ é mokwar kunokuno e nkana Sezare mo Filip. Nye ze cyel be, bé mu temezi, ntɔʼ dî e be ó: «Bʉr, bé epa kʉ lɛɛ tina ó, me zé?»

²⁸ Ompʉn be ntɔʼ bɨha ó: «Baʼ bʉr, bé elɛɛ ó, go ó Yʉanes Ndubʉr. Bʉʉ, bé ó, go ó Élie. Bʉʉ nteme, bé ó, go ó nuu ngwiha mɨlɔb fih.»

²⁹ Nye ntɔʼ bâʼle dî e be ó: «A bɨn bɛɛ, bɨn bé elɛɛ ó, me zé?» Pyɛr ntɔʼ bɨha ó: «Go ó Lœma mulo mo Zyɛm!»

³⁰ Yesʉs ntɔʼ cyel be mpene, adwo ba ó, bé l'alɛɛ mʉr sa yaa.

Yesʉs lé ebal ompʉn be é lɔb efie le é jɔʼ efoʼ

³¹ Yesʉs ze taare lé eyeʼle ompʉn be. Nye ó: «Yé ókʉ be me é nere-nere ó, me sia e mɨtuu é buobuo, mɛm, Mwan mo Mʉr. Otamabʉr o lal bé e l'ojwɨɨ be opara, ndwe e l'oyeʼle o motie, bé ópyeh nye. Nye nteme ójʉŋɔ. Nye òbula pàh é l'elu elɛl.»

³² Nye a kʉ lɛɛ be ya ó anyam nʉm. No ó Pyɛr a ze to e nye é l'empàh, ze dwe nye mobe.

³³ Yesʉs ze dwibra, dwɛʼ nko ompʉn be, bé a be e, ze bâm e Pyɛr. Nye e nye ó: «Satan, pʉʼa me é mih! Mɨpɛhla myo, myé abe myaa mo Zyɛm, njɨ myaa mɨ bʉr.»

«Me du ó Yesʉs» nye ó, go nkɛŋɨ klos yo

³⁴ No ó Yesʉs a ze jebe ntuntuma bʉr le ompʉn be. Nye ó: «Yé be ó, mʉr, nye egwɨm du me nɛʼɛ, nye bena nye mʉr tɨ. Nye à nkɛɛ klos ye. Nye òdu me,

³⁵ ebe, mʉr lé egwɨm kamle e tiʼ ye e, nye ódimle ye. Waa lé emɛʼle ó, nye fuo dimle tiʼ ye é lɔb wam le waa Mbɨambɨa Lɔɔ ɛ, nyiha óbaʼle ye.

³⁶ ǃƗ mʉr si nʉa bɨsa bɨ si nwaʼ bibyɛh, nye yɛɛ lé efib tiʼ molu mo mpoʼ mɨmɛh nɛʼɛ, wáa nyɔm ndɨ nye tɨʼ ɨ?

³⁷ Yáa sɔʼɔ mʉr ndɨ e nkul esiila e ye ó, nye bula nʉa tiʼ ye e?

³⁸ Bʉr o mya wi, bé ó kʉ be odul be ozyɛm ofih! Mʉr nyiwɛh lé ejoʼo fwon lé eboʼlo e bʉr ó, nye ó mpʉn wam, le waa lé ejoʼo fwon lé emɛʼle sikʉlʉ yam teme bɨbɨbla bɨ bʉr o mya wiʼ ɨ, Mwan mo Mʉr ójoʼo nteme fwon lé ejoʼo mʉr waa lé egban nye é dobo nye óze é moncɛnba mo Sɔŋ we, moncɛnba me zyɛŋa e maa beengles ndɨ mɨsaŋ ɨ.»