Markus 7 - Kálara Zyɛ̌m Edwán é mpʉ̌n

Mɨnjwɨr bɨmpam bɨ oYʉden

¹ OFarizyɛŋ bé e bʉʉ oyeʼle o motie bé a duho Yerʉsalɛm ɨ, ze fwal é gumo Yesʉs a be e.

² No ó bé a ze bee bʉʉ ompʉn be lé ede e mobo oFarizyɛŋ bɛɛ lɛɛ ó, mé ó maa ndɨ «e mobomo» e. No, yé ó, bé a baajwɨ̀ɨ me mpʉ mɨnjwɨr mɨ buʼo oYʉden lé elɛɛ ɛ.

³ To kœb ó, oFarizyɛŋ ndwe e bʉʉ oYʉden bɨbɛh, bé abe lé ede, apa taare jwɨ̀ɨ mobo lé edu mpʉ buʼo yɔɔ lé elɛɛ ɛ. Bé esa no ó, lé edu mɨnjwɨr bɨmpam byɔɔ, byé a liʼe e.

⁴ É jɔʼ bé lé ebula-bula lé eto bwam bɨsɔʼɔ é mobɨm bɨnkana ɛ, bé abe e nkul ede, apa sa ndubo mobo mpʉ oYʉden lé elɛɛ ɛ. OFarizyɛŋ, bé ebaʼle myʉʉ mɨnjwɨr mɨfih, mpʉ myaa lé elɛʼle mpʉ mʉr lé ejala le efuʼro mompele, mɨkaʼ, le mompɨ bɨnkoho mbɨmbɨa ɛ.

⁵ No ó oFarizyɛŋ bé e l'oyeʼle o motie, bé a ze dî e Yesʉs ó: «Ebe yé ompʉn bo ndɨ adu mɨnjwɨr bɨmpam ga bina, byé a ntɛŋ bɨna ga ɛ? Ebe yé bɛɛ lé ede mode, mobo e mobomo e?»

⁶ No ó Yesʉs a bɨha e be ó: «Ezayi a be ó si kʉ gʉa gwih mɨlɔb min, baanya-bɨkʉʉŋʉ, baa ndɨ e lɔb wɔɔ tila é kalara we e! Yé ó tila ó: “Zyɛm, nye elɛɛ ó: ‘Kul yi, yé ekʉ dwiibɨ me ó, njɨ é bɨbɨʼ bɨ nʉm kʉl. To kœb ó, mɨleme myɔɔ, mi bul cɛra e me.

⁷ Mbi bʉr baa lé edwiibɨ me e, wé ó kʉ be tɨtoʼo, abe ba e nyɔm, ebe, sikʉlʉ bé lé edweela paʼra wɔɔ ɛ, yé ó njɨ yaa bʉr.’”»

⁸ Yesʉs ntɔʼ ko tɨʼ ó: «Bɨn bé ekʉ bene mɨtiila mo Zyɛm, ka kpɛl du-du sɔʼɔ, njɨ motum bɨmpam bin, byé a ntɛŋ bɨn ɨ.

⁹ A mbɨa lé ebee mpʉ bɨn lé egbɛɛ motie mo Zyɛm é l'efu ó, bɨn nkʉʼ bul du mɨnjwɨr bɨmpam bin, byé a liʼe bɨn mi ɛɛ!

¹⁰ Ebe, Moyiz a lɛɛ ó: “Dwaaba sɔŋ e nyɔŋ go.” Nye a lɛɛ nteme ó: “Mʉr lé ekáale sɔŋ, nkʉ nyɔŋ ɨ, nye ejala ó, jʉŋɔ.”

¹¹ To kœb ó, bɨn bɛɛ, bé elɛɛ ó, mʉr nyiwɛh óbɛm lɛɛ e sɔŋ e nyɔŋ ó: “Sa bɨn ngbaa bi ó, yé diʼe bɨn e nyɔm ɨ, yé mu ó kɔrbaŋ.” (No, yé ó “sa me ófuʼla dwe Zyɛm ɨ.”)

¹² ǃƗ mʉr si lɛɛ no nɛʼɛ, mbea win, wé ó, nye abe e nkul eka gul sɔŋ, nkʉ nyɔŋ, e tɨ.

¹³ Mbi mɨnjwɨr mɨnɨ ó lé egbɛɛ lɔɔ Zyɛm é l'efu le edu mɨnjwɨr bɨn bé a ntɛŋ bʉʉ bʉr ɨ. Bɨn bé esa byʉʉ bɨsa bɨ ebebe é mbi waa é buobuo.»

Sa ndɨ kʉ elœʼ mʉr é mih mo Zyɛm ɨ

¹⁴ No ó Yesʉs a bâʼle jebe ntuntuma bʉr, nye e ye ó: «Mbɛngɛɛ, bɨn bɨbɛh ɛɛ! Bɨn bé à kʉ gʉa joʼlo sa yi.

¹⁵ Ntʉʼ sa ndɨ eduho kʉl, ze ni mʉr é nyʉl ndɨ e nkul elœʼ mʉr é mih mo Zyɛm. Sa yaa, yé ó yaa lé eduho mʉr waa é nʉm ɨ. [

¹⁶ Nkʉ mʉr, nye e mogwal mo ejoʼo, nye joʼa naa.»]

¹⁷ No ó, é jɔʼ Yesʉs a duho gumo bʉr, bé a be e, nye ze to ni mbɛr. No ó ompʉn be, bé a ze dî e nye ó, nye pɛʼla be kɨkɛna yaa.

¹⁸ Nye ze dî ó: «Zê bɨn dina ó mɨmiʼ ɛ? Zê bɨn bé agʉa ó, ntʉʼ sa ndɨ eduho kʉl, ni é nyʉl mʉr ɨ, ndɨ elœʼ nye é mih mo Zyɛm ɨ?

¹⁹ Ebe, yé ani nye é leme tʉŋlʉ. Yé eni ó, é mo, ka pyal kʉl, to kur é duʼ.» (É lwib yaa, Yesʉs a be ó lé egwɨm lɛɛ ó, mode mɨmɛh mu ó bɛm deŋɔ, mé l'alœʼ mʉr é mih mo Zyɛm.)

²⁰ No ó nye a bâʼle lɛɛ e be ó: «To kœb ó, sa lé eduho é nʉm ɨ, yɛɛ ó ndɨ elœʼ mʉr é mih mo Zyɛm,

²¹ ebe, bɨbebebebe bɨsa bibyɛh, byé eduho ó, é leme tʉŋlʉ. Byé ó: bɨbebebebe mɨpɛhla, bɨmala, díbe, ejwɨɨ e bʉr,

²² mɨfyɛba, zɔɔ bɨsa, bɨn, bɨlwib bɨkʉʉŋʉ, bɨmala zam e l'ekomo, egu, movoʼ, pyeh e nkɛa nyʉl, ompʉ.

²³ Bɨsa bɨnɨ bibyɛh, byé eduho mʉr ó, é nyʉl tʉŋlʉ, ntɔʼ sil lé elœʼ mʉr tɨʼ é mih mo Zyɛm.»

Mʉma bɨkul lé ejyɛʼ taa buʼo ye boo Yesʉs

²⁴ No ó Yesʉs a ze mʉa é gumo yaa, ze to lal ndɨ kunokuno e bɨnkana Tir ndwe e Sidɔn ɨ, ze ni é guu mbɛr é piʼlɨ. Nye a baakpɛl ó, mʉr gʉŋa ó, nye ó tɨʼ tʉŋlʉ. Sa gwar, abe e mbi nye a be e nkul efwab.

²⁵ No ó, yé a be ó e mʉma a be e ma esehe le e. Mwan we waa a be ó lé esia e bɨbla sisim. No ó mʉma waa nteme a ze joʼo lɔɔ lé etiibe e Yesʉs ɨ. Jɨh tɨʼ nye a kʉ joʼo we, nye ntɔʼ ze pyal gumo Yesʉs a be e, ze bɨʼ mpom we si é mih me.

²⁶ Nye a be ó mʉma bɨkul bɨfih. Nye a byɛl ó, é nkɔra Fenis é lal Siria. Nye a ze ó, ze jwɨʼla e Yesʉs ó, nye dwihɨ eleme lé a be ɨ sile we e.

²⁷ No ó Yesʉs a ze lɛɛ e nye ó: «Birɨ bwa o mbɛr, bé paʼ taare de é de de, díle, ebe, yé ambɨa ó, mode lé ejala le edweŋɔ bwan ɨ, mé bula dweŋɔ bwa ompye.»

²⁸ No ó nye a ze bɨha e nye ó: «Da ɛ, yé ó no. Dam be no, ompye ndɨ é teble si ɨ, bé ede bɨtwiʼ mode bwan lé efiʼ ɨ.»

²⁹ No ó Yesʉs a lɛɛ e nye ó: «Ebe mpɨha go nɨ, bula. Toʼ kwar go. Eleme mo sile go, lɨ duho.»

³⁰ No ó mʉma a bula, to mbɛr we, to kœb mwan we njaʼa si é duo, eleme, lé osi duho nye é nyʉl.

Yesʉs lé etiʼ ntoʼ, nye nteme gʉ́ʼ

³¹ No ó Yesʉs a bâʼle duho lal Tir, ntɔʼ to cwɨɨ é lal Sidɔn, ze bâʼle fulo é l'ebʉm e maŋ mo Galɨle, lé eto ntaa lal ndɨ e bɨnkana ewʉm ɨ.

³² No ó bé a ze nye e mʉr a be ntoʼ, agʉa pyɛɛ mokan ɨ. Bé ze jwɨʼla e Yesʉs ó, nye kɛlɨ nye mobo é nyʉl, lé etiʼ nye.

³³ No ó Yesʉs a ze to e syoblʉ waa gumo bʉʉ bʉr, bé a baabe e, ntɔʼ gba nye mpine é mogwal tʉŋlʉ, ntɔʼ syɛɛ mocyeele me, fuulo nye ma é jɨm.

³⁴ Nye ntɔʼ dwɛʼ kʉ, fil mɨswɨh. Nye e mʉr waa ó: «Efata.» (No, yé ó Bɔa.)

³⁵ [Cye e cye yaa], mogwal mo mʉr waa ntɔʼ bɔa. Jɨm ye nteme, ze kɔa. Nye ntɔʼ taare lé elwib mbɨmbɨa.

³⁶ Yesʉs ze cyel be mpene ó, bé l'alɛɛ mʉr fih lɔɔ waa. Dam be no, bim nyɛɛ a lɛɛ ó, bé l'ayi lɛɛ ɛ, bim yaa nteme ó bé a to le elɛɛ lɔɔ waa ɛ.

³⁷ Bé a be ó si bul laŋle jehe bɨsyɛɛla byaa. Bé ó: «Sa yiyɛh nye lé esa ɛ, yé é mbɨa! Dam be ontoʼ, bé ebana joʼo. Bʉr o b'a be bɨgʉ́ʼ ɨ, bé mu ó lé elwib!»