Markus 5 - Kálara Zyɛ̌m Edwán é mpʉ̌n

Yesʉs lé edwih mʉr eleme

¹ No ó bé a to pyal é lʉʉ ebʉm e maŋ mo Galɨle, é l'ebʉm e maŋ e nkɔm-nkɛɛ, é lal Gerazen.

² Pie Yesʉs a kʉ fulo é byɛl, nuu mʉr ntɔʼ ze duho é mbaa mofoo, ze bɔma e nye. To kœb ó, mʉr waa a be ó e bɨbla sisim.

³ Nye a di-di ó, é mɨnguʼ mokoʼ myaa, gumo odwè, bé a debe e. Abe e mʉr a be e nkul ekaʼ nye, dam be e mɨkʉkob bɨnkoho.

⁴ É jɔʼ yiyɛh bé a gba-gba nye mboʼo é kʉ, kaʼɔ nye mobo e mɨkʉkob ɨ, nye a be-be ó, lé ebʉ we, le etɨ mɨkʉkob myaa. Abe e mʉr a be e nkul ekoʼo nye.

⁵ É jɔʼ yiyɛh, moho e pum, nye a be-be ó, njɨ paʼra mofoo le é mocwɨʼ kʉ, lé eto le ebʉ bɨtim le ebɛble nyʉl we e mokoʼ.

⁶ No ó mpʉ nye a bɛa dweʼe Yesʉs lé eze ká ká ɛ, nye ntɔʼ fim kam, to bɨʼ mpom we si é mih me,

⁷ ntɔʼ behe Yesʉs. Nye ó: «Yesʉs, Mwan mo Zyɛm ndɨ Lʉ bɨsa bibyɛh ɛ! Go esaa yé e me? Paʼ kʉ de mɨnkɛla é die mo Zyɛm ó, go aŋa dwe me ntɨʼa!»

⁸ (Nye a lwib no ó, ebe, Yesʉs a be ó si lɛɛ nye ó: «Bɨbla sisim, duha mʉr nwaʼ é nyʉl!»)

⁹ Yesʉs ntɔʼ dî e nye ó: «Die lo, lé zé?» Nye ntɔʼ bɨha e nye ó: «Die lam, lé ó Daa-e-moleme, ebe, bɨh bé é buo.»

¹⁰ Nye ntɔʼ kʉ gba zyee lé ejwɨʼla e Yesʉs ó, nye l'aka nyamle cen bɨbɨbla mɨsisim byaa é lal fih.

¹¹ Tina, yé a be ó e bwaʼbwaʼ daa le onkʉ lé ede é nʉa ecwɨʼ kʉ.

¹² Bɨbɨbla mɨsisim bɨnɨ ntɔʼ jwɨʼla e Yesʉs ó: «Cenɨ yɛɛ bɨh é daa le onkʉ lɨʼ ó, bɨh toʼ, to ni be é monyʉl!»

¹³ Nye ntɔʼ mɛʼle ó, yé syɛŋɨ no. Bɨbɨbla mɨsisim byaa, byé ntɔʼ duho mʉr waa é nyʉl, ntɔʼ to ni é monyʉl mo onkʉ. Daa le onkʉ ze fulo ecwɨʼ. Ecwɨʼ laa, lé a be nteme ó akoo. Mpululu, to lʉŋa é maŋ, bɨbɛh sie lé edwè. Tɔɔ onkʉ baa a be ó kwoʼ be otɔɔyin oba.

¹⁴ Obɔʼlʉ be onkʉ ntɔʼ kpɛɛ, toŋɔ e lɔɔ waa é nkana, le mompɔ́ɔ́ e mompɔ́ɔ́ mɛh. Bʉr ze tɨbla, lé eze bee bɨsa byé a syɛɛlɨ ɨ.

¹⁵ É jɔʼ bé a pyal gumo Yesʉs a be e, bé ze bee mʉr a sia e moleme e, nye mu tina ndindil é nkwɨblʉ, e mɨmpaŋ mɨkan é nyʉl, e pɨʼ we nyiwɛh. Bʉr o b'a ze e, kʉ ze jehɔ nye.

¹⁶ Bʉr bé a bee sa yé a syɛɛlɨ ɨ, bé ze taŋle sa yé a pyal é mʉr a sia e moleme e, le sa yé a pyal é l'onkʉ ɨ.

¹⁷ No ó bé a ze jwɨʼla e Yesʉs ó, nye pʉʼa be é lal.

¹⁸ É jɔʼ Yesʉs a kable é byɛl ɨ, mʉr a taare sia e moleme e, ze jwɨʼla e nye ó, bé e boo nɔɔ, bé kaʼ di-di sama.

¹⁹ Yesʉs nyɛɛ a baamɛʼle gwɨma yaa. Nye e nye ó: «Toʼ kwar go. Toʼ, to bee bʉr bo. Toʼ, to lɛɛ sa yiyɛh Da sa go e, le mpʉ nye jwɨʼ go nkoo e.»

²⁰ No ó nye a to lal ndɨ e bɨnkana ewʉm ɨ, to le elɛɛ bʉr o bɨnkana byaa sa yiyɛh Yesʉs a sa nye e. Bʉr bɨbɛh ze jehe lɔɔ we waa mɨnʉm mɨmbeʼ.

Yesʉs lé etiʼ sile mo Yarwis

²¹ É jɔʼ Yesʉs a bâʼle bula é l'ebʉm e maŋ lɔɔ, ntuntuma bʉr, yé ze bʉmra nye é nka é l'ebʉm e maŋ laa.

²² Nuu mʉr a be ó njwɨɨ mpah mɨnjwɨʼla, die le Yarwis. Nye a si pyal, ze bee Yesʉs. Mbea nye a bee nye e, nye ze bɨʼ mpom we si é mih me,

²³ ze jwɨʼla e nye e nkoo nyiwɛh ó: «Me liʼe mwan wam ó, nye mu tiʼ le efie. No ó, me ejwɨʼla e go: Ncʉʼ ga. Go toʼ, to kɛl nye mobo é nyʉl, nye nkʉʼ bâʼle sa mbɨmbɨa, tiʼe.»

²⁴ Yesʉs ntɔʼ to, bé e nɔɔ. Mpampaʼ bʉr ntɔʼ du nye. Bʉʉ, bé a be ó lé emana nye.

²⁵ É mpampaʼ bʉr yaa, yé a be ó e guu syoblʉ mʉma, motié lé esolo-solo nye é nyʉl. Nye a be ó si baran e l'esyɛb laa tɔɔ mɨmbu ewʉm e mɨmba.

²⁶ Nye a be ó si bul dihbe mɨtuu lé esaa tiʼ boo odɔbra é buobuo, le esil mɔn ye yiyɛh é pe lé esaa dʉm, luʼo le ebi ba ngula, esyɛb asie-sie. Lé a bwaʼ-bwaʼ ó bwaʼa.

²⁷ Mpʉ nye a joʼo bʉr lé elwib, tiibe e Yesʉs ɨ, nye ntɔʼ ni é mpampaʼ bʉr yaa é myaaa, ntɔʼ pyal Yesʉs pie koo, ze dihle kunokuno e nye, cen mbo, kuna e kan we,

²⁸ ebe, nye a be ó lé elɛɛ-lɛɛ é leme we ó: «ǃMe si kuna e kan we nɛʼɛ, me bana kʉ tiʼe!»

²⁹ Cye e cye yaa, esyɛb laa, lé ntɔʼ sie lɨlɛh é jɔʼ gwar, nye ntɔʼ jʉʼra nyʉl we ó, nyi tiʼe, le egʉa ó, nye aka be e l'esyɛb!

³⁰ É cye gwar yaa, Yesʉs ntɔʼ jʉʼra ó, nkul a be ó si duho nye é nyʉl. Nye ze dwibra teme bʉr, ntɔʼ dî ó: «Eʼ! Zé kuna e mɨkan myam ɛ?»

³¹ Ompʉn be, bé e nye ó: «Gwɔɔ yɛɛ lé ebee ó, mpampaʼ bʉr yi, yé emana go. Ebe yé go ka bâʼle dî ó: “Zê kuna e me ɛ?”»

³² No ó Yesʉs a ze dwibra, ntɔʼ to le esaa mʉma a sa syɛɛla yaa ɛ.

³³ Mʉma waa ze taare lé esaʼ é ngba-ngba-ngba le ejoʼo bʉa, ebe, nye a be ó lé egʉa sa yé a syɛɛlɨ nye é nyʉl ɨ. Nye ze bɨʼ mpom we si é mih mo Yesʉs, ze lɛɛ nye ocyecye wiwɛh.

³⁴ No ó Yesʉs a lɛɛ e nye ó: «Mwan wam, buʼo yo, yi tiʼ go. Toʼ é motala. Esyɛb lo, lé sia.»

³⁵ Yesʉs dina lé elwib no nɛʼɛ, nuu mwa mɨlʉmlʉ ntɔʼ pyal, duho mbɛr mo Yarwis, njwɨɨ mpah mɨnjwɨʼla. Nye e Yarwis ó: «Sile go, wi dime mih. Ebe yé go lé eka bâʼle ntɨʼ yeʼle e?»

³⁶ Yesʉs nyɛɛ lé ekʉ joʼo sa bé a be lé elɛɛ ɛ, nye a be yɛɛ ó, anʉa ye, gba é nkɔb. Nye ze lɛɛ e njwɨɨ mpah mɨnjwɨʼla ó: «Ajoʼo bʉa. Jyɛʼɛ njɨ taa buʼo yo boo me.»

³⁷ Nye ze bene ó, bʉr l'adu nye. Nye a kʉ ka mɛʼle ó njɨ Pyɛr bé e Jacques ndwe e Yʉanes, ncyom mo Jacques, ó bé e boo nɔɔ toʼ.

³⁸ Bé ntɔʼ ni mbɛr mo njwɨɨ mpah mɨnjwɨʼla. Yesʉs ntɔʼ bee ó, tɨʼ, yé a be ó, yé mu é leŋe-leŋe, bʉr lé ebʉ modwe le ebwɨhla é buobuo.

³⁹ Yesʉs ze ni mbɛr, ze lɛɛ e be ó: «Ebe yé bɨn lé eka sa oleŋeleŋe mpʉnʉ le ebʉ modwe e? Mwan, nye adwè. Nye é dwo.»

⁴⁰ Bé ze dwo nye é cacaca le esoŋlo nye. Nye ze pyɛl bɨbɛh kʉl. Yé a kʉ ka liʼ tɨʼ ó njɨ sɔŋ e nyɔŋ mwan bé e bʉr o sama ye. Bé ze ni é tiʼe, fum mwan a be e.

⁴¹ Nye ntɔʼ mɛr mwan waa é mbo. Nye e nye ó: «Talita, kumɨ!» No yé edwirɔ ó: «Ma mʉma, me lɛɛ e go ó: mʉŋa.»

⁴² Cye e cye yaa, mwan waa ze mʉa, ntɔʼ taare cyen—ebe, nye a be ó, nye mu e mɨmbu ewʉm e mɨmba. Bʉr baa ze jehe syɛɛla yaa é buobuo.

⁴³ Yesʉs ntɔʼ cyel be mpene le egʉa kʉ boʼlo ó, bé l'alɛɛ mʉr sa syɛɛlɨ ɨ. Nye ze lɛɛ e be ó, bé dweʼ nye sa ede.