Markus 4 - Kálara Zyɛ̌m Edwán é mpʉ̌n

Kɨkɛna mbèl mompœʼ

¹ Yesʉs a be ó é l'ebʉm e maŋ. Nye ntɔʼ ze bâʼle taare lé eyeʼle bʉr. Ntuntuma bʉr, yé ze fwal é gumo nye a be e. Syɛɛla yaa ze sa ó, nye mʉŋa tɨ, to kable é byɛl, di si, ntuntuma bʉr yɛɛ lé eliʼ tin é l'ebʉm e maŋ laa.

² Nye ze dwe be sikʉlʉ é mɨlɔb é buobuo é zi bɨkɨkɛna. Nye e be ó:

³ «Mbɛngɛɛ! Yé a ze be ó, nuu mbèl mompœʼ ze to myɛʼ mompœʼ é modiʼe mo peme ye.

⁴ Mpʉ nye a to le emyɛʼ mompœʼ peme e peme e, wiʼ paʼ mompœʼ ze to le ekur é kakoo. Bɨnɔn ntɔʼ fulo, ze sil tor mompœʼ maa.

⁵ Guu paʼ mompœʼ kur é bah ekoʼ, bwah mpa l'abuo tɨ. Mompœʼ, mé ntɔʼ kpahbe pah, ebe, bwah yé a be tɨʼ ɨ, yé a baabuo.

⁶ É jɔʼ dobo lé a ka kah ɛ, dwehe ze ŋmɛha, ze diʼ mɨpɛha mompœʼ, myé ntɔʼ dwɛhla, ato ká ká, ebe, myé a baabe e mɨkaale mɨmpa, njɨ mɨfòŋ.

⁷ Guu paʼ mompœʼ ze kur é mɨndwinʉ. Mompœʼ ze pah, bé e mɨndwinʉ ze gwɨe sama. Mɨndwinʉ ze kaʼ mɨpɛha mompœʼ myaa, myé ntɔʼ lire, aka gumo mpumo.

⁸ Dam be no, guu paʼ mompœʼ fih wɛɛ, wé a si kur é si mocyɛʼ. Mompœʼ maa ze gwɨe le egumo mpumo. Etin egwar gumo mpumo mowʉm molɛl. Lɨʼ etin, mpumo mowʉm tobo. Lʉʉ, mpumo nter.»

⁹ Nye ze ko tɨʼ ó: «Mʉr ndɨ e mogwal mo ejoʼo e, nye joʼa naa.»

Ebe yé Yesʉs lé elwib é zi bɨkɨkɛna?

¹⁰ É jɔʼ bé a be, bé mu bé ome e, bʉʉ bʉr o b'a be é sama ye e, baʼra e l'Esama le ompʉn ewʉm e l'oba ɛ, bé ze dî nye sa bɨkɨkɛna byaa, byé a dɨ lɛɛ ɛ.

¹¹ Yesʉs ntɔʼ lɛɛ ó: «Bɨn ó Zyɛm a gwih lwib odim lé etiibe e Jwɨ̀ʼa ye e. Sa gwar, é nko paʼ bʉr ofih bɛɛ, bé ekʉ ka gʉa ejoʼo ó njɨ é zi bɨkɨkɛna é l'efu ó, mokan mo ngwiha mɨlɔb, mé dira. Nye a tile ó:

¹² “Bé ósyɛm mih é jɔʼ yiyɛh; sa gwar, bé aŋa gʉa bee. Bé óceŋle mogwal; abi ba pɨʼ. Nkʉ bé a be ó be, bi pɨʼ waa nɛʼɛ, mpa bɨ gwɨma ebebe lɔɔ, le edwir mɨleme. Yé a ngbaa be nteme ó, mɛm lé epɛʼ bɨbaa bɨ ebebe me a niʼe be e.”»

¹³ Nye ntɔʼ ntɛŋ ompʉn be tia, lé edî e be ó: «Bɨn apa taare joʼo kɨkɛna yi, bɨn bé ójoʼo byaa byʉʉ nyá ɛ?

¹⁴ Mʉr peme, nye emyɛʼ ó, lɔɔ Zyɛm.

¹⁵ Maʼ mompœʼ, mé a kur ó, é nkpah mpaʼa, gumo lɔɔ waa, wé a kur ɨ, sa nɨ lé edweʼle bʉr o b'a joʼo lɔɔ Zyɛm ɨ. Satan ntɔʼ ze, ze dɛʼ mpœʼ yé a bèŋɔ be é mɨleme e.

¹⁶ Bʉʉ, bé enwɨɨla e bah ekoʼ, gumo mompœʼ, mé a kur ɨ. Bʉr baa, bé ejoʼo lɔɔ Zyɛm, ntɔʼ nʉa we kam e kam e duu ndwe e bɨsʉhʉ,

¹⁷ sa gwar, wɛɛ l'ani be é mɨleme tʉŋlʉ. Bé ekʉ ka baʼle we ó njɨ é ma peh jɔʼ. É jɔʼ bé mu lé esia e mɨtuu le etíilɔ ebe lɔɔ Zyɛm ɨ, bé óka bee ó, wé mu ó ebɔʼ bé lé ebɨm é mɨleme, laa lé ódumo be e.

¹⁸ Bʉʉ nteme, bé enwɨɨla ó e mompœʼ mé a kur é mɨndwinʉ ɨ. Bé a si kʉ joʼo lɔɔ Zyɛm.

¹⁹ Sa gwar, mɨtuu mɨ mbi jɔʼ yiʼ ndwe e gwɨma okum e l'ogbaa, byé a si dimle be. Bé ebul cyèl mɨleme kʉ é l'ebi e bɨsa bɨ jobo yi. Bɨsa byaa ntɔʼ kaʼ lɔɔ Zyɛm, wé l'aka johlo.

²⁰ Bʉʉ bɛɛ, bé enwɨɨla ó e mpœʼ yé a kur é mpaŋ si mocyɛʼ ɛ. Bé ze joʼo lɔɔ Zyɛm, nʉa we mbɨmbɨa. Ebe no ó bé lé egumo mpumo é bɨtiʼ byɔɔ ɛ. Maʼ motin, gumo mpumo mowʉm molɛl. Mʉʉ, mpumo mowʉm tobo. Mʉʉ nteme, mpumo nter.»

Kɨkɛna elama

²¹ Yesʉs ntɔʼ lɛɛ be ó: «Bʉr, bé abe lé eze e l'elama é l'efu le ebur le é kaʼ tʉŋlʉ, nkʉ ó, bé laʼa le é duo si. Yé ejala ó, bé cyelɨ le é teble kʉ.

²² Sa yiyɛh ndɨ fela ɛ, yé ógwiha kʉl. Sa ndɨ mʉr é mo si ɨ, yé ónyin é bʉr é kpɛŋlɛm.

²³ Yé be ó, nuu mʉr, nye e mogwal mo ejoʼo nɛʼɛ, nye joʼa naa.»

²⁴ Nye ze to dolo lé elɛɛ be ó: «Bɨn bé à di ncye é sa bɨn lé ejoʼo e. Bim bɨn lé ekaale bʉʉ bʉr ɨ, bim yaa nteme ó nye ókaale bɨn ɨ. Nye òka bâʼle ko bɨn byʉʉ bɨsɔʼɔ tɨʼ kʉ,

²⁵ ebe, mʉr ndɨ e tɨʼ ɨ, nye óbâʼle bul dweŋɔ. To kœb ó, waa ndɨ tɨtoʼo e, nye ópɛʼɔ ma bim nye ndɨ e tɨʼ ɨ.»

Kɨkɛna mpœʼ lé epah yé ome e

²⁶ Yesʉs ze bâʼle lɛɛ ó: «Jwɨ̀ʼa mo Zyɛm, yé enwɨɨla ó e nuu mʉr a to myɛʼ mompœʼ é modiʼe mo peme ye e.

²⁷ Mʉr waa, nye dam to é dwo, nkʉ jɨma, mompœʼ me, mé ó njɨ lé eto le epah, le egwɨe, nyɛɛ l'agʉa sa lé esa no e.

²⁸ Bwah yé mʉr tɨʼ ó lé esa ó, mpœʼ, yé paha, gumo mpumo, mpumo lele.

²⁹ Jɨh tɨʼ mpumo, nyi kʉ lele, mʉr peme mu kʉ ka sa ó njɨ epɛʼ mode ndɨ é peme e, ebe, jɔʼ eto é mɨngol, yi ka pyal!»

Jwɨ̀ʼa mo Zyɛm, yé ófuʼla bwaʼ

³⁰ Yesʉs ntɔʼ bâʼle dî nye mʉr tɨʼ tia ó: «Bɨna bé e nkul elɛɛ ga ó, jwɨ̀ʼa mo Zyɛm, yé enwɨɨla e yáa sɔʼɔ? Zê yé ó e kɨkɛna fih me óka bâʼle sa bɨn lé edwe bɨn dweʼle, bɨn gʉŋa mpʉ yé ndɨ ɨ?

³¹ Nye enwɨɨla ó e mpœʼ ndɨ bim boho nʉo e. É jɔʼ bé lé emyɛʼ nye é bɨbwah ɛ, nye ó é ka bul twaʼbe é sama mompœʼ mo si mɨmɛh.

³² To kœb ó, é jɔʼ nyi bèŋɔ ɛ, nye epah, ntɔʼ bana sa mpœʼ nɨnɨ lé elaa mompœʼ mɨmɛh é mpwaʼ ɛ. Yé ecyɛb e mɨlɔɔ mɨnɨnɨ é ntuuu. Bɨnɔn, byé óbɛm kʉ duʼbo é mɨlɔɔ mye si, le ebebre tɨʼ é mɨlɔɔ.»

Yesʉs lé edwe bʉr sikʉlʉ é zi bɨkɨkɛna

³³ Yesʉs a lɛɛ-lɛɛ be bɨsa bɨnɨ bibyɛh ó, é zi bɨkɨkɛna é buobuo, mpʉ byaa nye a bɛa lɛɛ ɛ. Nye a lɛɛ-lɛɛ be lɔɔ Zyɛm ó, bim cye bé a be e nkul ejoʼo e.

³⁴ É jɔʼ bé e bʉr bɨbɛh, bé a be-be sama ɛ, nye a lwib-lwib ó, é zi bɨkɨkɛna. Nye a baalwib e be é zi fih. To kœb ó, é jɔʼ bé e l'ompʉn be, bé a ka be bé ome e, nye a lwib-lwib ó, pɛʼle mokan.

Yesʉs lé ebâm e nkuo

³⁵ É moho ngwar waa, é jɔʼ dobo lé a lɨŋa ɛ, Yesʉs, nye e l'ompʉn be ó: «Ncʉʼ ga. Bɨna ntaŋa ga maŋ, to é l'ebʉm e maŋ e nkɔm-nkɛɛ.»

³⁶ É jɔʼ bé a be, bé mu si liʼe ntuntuma bʉr yaa ɛ, bé ntɔʼ to kœb Yesʉs é fum nye a be é byɛl ɨ. Bé e boo nɔɔ ntɔʼ to. Mʉʉ mɛl nteme, mé a be ó fum byɛl waa, wé a be e.

³⁷ No ó bwaʼbwaʼ nkuo a taare lé ekuulo. Oboʼo o maŋ ze taare lé eswɨɨ é byɛl, byɛl ntɔʼ taare lé eloŋlo e modibe, wé mu lé edɨ.

³⁸ Nyɛɛ a be ó nko ndʉa byɛl, lé eja dwo, lʉ kɛla é l'eboolo. Bé ntɔʼ jɨm nye. Bé e nye ó: «Yeʼle! Zê go ayeʼbe ba bɨtiʼ bih é nkuo mu lé esa ó, bɨna dwèʼ ga nwaʼ ɛ? Bɨna muno ze dwè ga!»

³⁹ Yesʉs ze mʉa, ntɔʼ bâm e nkuo. Nye e maŋ ó: «Diʼe é puuu! É gʉʼʉʉ!» Nkuo ntɔʼ sie. Sa yiyɛh mu é myeeŋ.

⁴⁰ Nye e l'ompʉn be ó: «Ebe yé bɨn lé ejoʼo bʉa ɛ? Ebe yé bɨn ndɨ ajyɛʼ taa buʼo yin boo Zyɛm ɨ?»

⁴¹ Bé ze joʼo bʉa laŋle le elɛɛla paʼra wɔɔ ó: «Wiʼ mbi mʉr, wé zé, ndɨ, nkuo e maŋ, bana sa nye mojoʼo wi?»