Markus 16 - Kálara Zyɛ̌m Edwán é mpʉ̌n

Epàh e foo mo Yesʉs

¹ É jɔʼ moho saba, wé a be si laa ɛ, Maaria, sile Magdala, e Salʉma ndwe e Maaria, nyɔŋ mo Jacques, bé a be ó si to bwam labina ó, bé to ó lœm muu mo Yesʉs.

² É dwine mɛn kuno, dobo e sono, é molama mo mɛn, bé a be ó temezi lé eto foo,

³ lé eto le dîila paʼra wɔɔ ó: «Zé óbiŋle bɨna ga ekoʼ ndɨ é nʉm foo e?»

⁴ ǃBé osi kumo, bé mu lé edwɛʼ foo nɛʼɛ, kœbɔ ó, ekoʼ enɨnɨ laa, lé a be ó si bɛa biŋlɔ, lé mu é l'empàh e foo!

⁵ Ntɔʼ niŋɔ é foo, to kœbɔ nuu ma soho ndindil é nko paʼ mbo ejʉm e kan é pumo-pumo é nyʉl. Bé ntɔʼ laŋle joʼo bʉa.

⁶ Soho waa, wé ze lɛɛ e be ó: «Daʼ joʼo ga bʉa. Bɨn bé esaa ó Yesʉs, mʉr Nazarɛt, waa bé a cyèl é klos kʉ ɨ. Nyi pàh! Nye aka be wâ. Mbe ga: fum bé a jyɛʼ muu we ó yi!

⁷ Toʼ, to lɛɛ ga ompʉn be, bé e boo Pyɛr ó, nyi samle, lé eto bono bɨn ɨ Galɨle! Gʉʼ ó bɨn bé óbee nye é mpʉ nye a bɛa lɛɛ bɨn ɨ!»

⁸ No ó bé a mʉa é foo, ntɔʼ kpɛɛ e mɨkam, ebe, bé a be ó lé esaʼ é ngba-ngba-ngba, mopɨʼ lé edim be é mɨlʉ. Bé a be yɛɛ ó, alɛɛ mʉr sɔʼɔ, ebe, bé a be ó lé ejoʼo bʉa.

[Esie e Markus ndɨ é jaa jaa ɛ Okalara o lwib grɛk ndɨ é bul buʼlɔ ɛ, bé abe e bɨpeh 9-20.]

⁹ [É mpʉ Yesʉs a be, nye mu si pàh é foo é dobo e sono egwar laa ɛ, nye a taare lé enyin ó, boo Maaria, sile Magdala, mʉma nye a dwih moleme tambɛl ɨ.

¹⁰ Nye ntɔʼ laa e mpaŋla, to cen bʉr o nduo ye. Bé a be ó, bé dina é l'efie le, le ejɨŋɔ modwe.

¹¹ É jɔʼ bé a joʼo mpʉ mʉma waa a lɛɛ be ó, Yesʉs, nyi pàh, nyi bee nteme nye e, bé a baabuʼla.

¹² Pie tɨ, Yesʉs ze pyal boo bʉʉ ompʉn be oba, ze lɛʼle be nyʉl we, nye mu dɨ nyin guu mbi fih. Bé a be ó zi e zi, lé eto kwar wɔɔ.

¹³ Bɛɛ nteme ntɔʼ to e lɔɔ waa, to lɛɛ bʉʉ ompʉn; bɛɛ, bé a baabuʼla.

¹⁴ Pie tɨ, Yesʉs ntɔʼ lɛʼle esama le ompʉn ewʉm e ngwar le nyʉl we, é jɔʼ bé a be ondindil lé ede e. Nye a si tɛɛ be, ebe, bé a baabuʼla nye, ndwe nteme, bé a be ó e mɨleme é lele lele. Bé a baabuʼla bʉr o b'a lɛɛ be e. Bé a lɛɛ be yɛɛ ó, bé a si bee nye; nyi pàh é foo!

¹⁵ No ó nye a lɛɛ e be ó: «Toʼ ga é si nwaʼ nyiwɛh, lé eto le elɛɛ mɨcyea bɨsa bibyɛh Mbɨambɨa Lɔɔ.

¹⁶ Waa ójyɛʼ taa buʼo ye boo me, ntɔʼ nʉa ndubo e, nye óbi tiʼ molu mo mpoʼ mɨmɛh. Waa óbe, ajyɛʼ taa buʼo ye boo me e, nye ókabɔ bɨntɨʼa ndɨ é laŋle bebe e.

¹⁷ No ó bʉr bé ójyɛʼ taa buʼo yɔɔ boo me e, bé ósa bɨdweʼle bɨ nkul wɔɔ bi: Bé ódwih bʉr moleme é die lam. Bé ólwib bɨlwib bɨfih.

¹⁸ Bé ótœʼ onyʉa. ǃBé si fuuba de dwoʼo nɛʼɛ, yé aŋa jʉ be. Bé ókɛl mɨsyoblʉ mobo, mɨsyoblʉ myaa ntɔʼ tiʼe.»

¹⁹ No ó, é jɔʼ Da Yesʉs a be, nye osi lwib e be no e, nye ze bɨnɔ é jobo kʉ, ntɔʼ to nʉa dia ye é mbo ejʉm mo Zyɛm Sɔŋ.

²⁰ No ó ompʉn be, bé a to le elɛɛ Mbɨambɨa Lɔɔ é gumo yiyɛh ɛ. Pie lɔɔ bé a lɛɛ ɛ, Da Yesʉs a ntɨh-ntɨh bɨdweʼle bɨ nkul we ó, byaa lé eboʼlo ó, lɔɔ wɔɔ, wé a kʉ be ó cyecye e.]