Markus 13 - Kálara Zyɛ̌m Edwán é mpʉ̌n

Mpah Zyɛm muno ze gbɔa

¹ Ngbaa le eka be, Yesʉs mu lé eduho é jahla bii mo Zyɛm nɛʼɛ, nuu mpʉn we ze lɛɛ e nye ó: «Yeʼle, dwɛʼa wiʼ mbi mokoʼ! Dwɛʼa wiʼ mbi fumo!»

² No ó Yesʉs a bɨha e nye ó: «Zê bɨn bɨ gʉa bee fumo nwaʼ nyiwɛh ɛ? A vwaʼ e Mpah Zyɛm, ebe, pɨpɨm gwar, yé aŋa ka liʼ cɨcyel wâ, nkʉ ekoʼ egwar kɛla é lʉʉ kʉ. Mɨmɛh, mé ósil lé enkɛŋɔ si!»

Bɨsa ndɨ ecemle dobo le efuʼla e si nwaʼ ɛ

³ Yesʉs, nye osi di si é l'Ecwɨʼ le olivye mbɨembɨe e Mpah Zyɛm nɛʼɛ, Pyɛr bé e Jacques e Yʉanes ndwe e Andreas, bé ze dî nye tia, bé mu bé ome ó:

⁴ «Lɛŋɨ bɨh jɔʼ bɨsa bɨnɨ, byé ósyɛɛlɨ ɨ. Lɛŋɨ bɨh nteme dweʼle yé ólɛʼle ó, byé muno ze pyal, bibyɛh ɛ.»

⁵ No ó Yesʉs a lɛɛ e be ó: «Diʼe ga ncye! Bé amu jaa gomlo bɨn é bebebebe zi,

⁶ ebe bʉr é buobuo, bé óze e die lam, lé elɛɛ-lɛɛ ó: “Mɛm ó di Lœma mulo mo Zyɛm!” Bé ógomlo bʉr é buobuo é bebebebe zi.

⁷ Bɨn bé ójoʼo mɨlɔɔ é lɔb mɔm bé mu lé elwimla ɛ, ndwe é lɔb mɔm bé lé edɨ kaʼ ɛ. É jɔʼ bɨn bé ójoʼo no e, mʉr ayi twɨra, ebe, yé ókʉ be bɨn é nere-nere ó, bɨsɨa byaa taara syɛɛlɨ. Dam be no, ntʉʼ bɨsɨa byaa, byé ócemle esie e mbi jɔʼ yi.

⁸ Yiʼ kul bʉr, yé ólwimla e yʉʉ; nwaʼ njwɨɨ lwimla e nuu. Si óncyeŋa bɨgumo bɨgumo. Za ónyaŋla. Bɨsa bi, byé ótaare syɛɛlɨ. Tina, yé óbe ó etɛɛrɨ e mokpaa, nwɨɨla e mokpaa mo min.»

Motɨɨ lé etiibe e tíila ɛ

⁹ «No, pɨrɨ ga mokʉ si. Bé óto e bɨn é mompʉm mo otamabʉr mɔɔ, to pur bɨn le ebuʼo bɨn mɨlɔb gʉ. Bé ónyuo bɨn mɨmbihe é mompah mɨnjwɨʼla myɔɔ. Bé óto e bɨn é mih mo ongoman le mɨnjwɨɨbʉr é lɔb wam. Bɨn bé ósaŋɔ no ó, bɨn nkʉʼ gʉa lɛɛ ocyecye bɨn lé egʉa é lɔb wam ɨ, bɛɛ lé ejoʼo.

¹⁰ Sa efoʼ, yé ekʉ jala ó, Mbɨambɨa Lɔɔ taara lɛɔ é bɨkul bibyɛh.

¹¹ ǃBé si naʼ bɨn mobo é nyʉl, to e bɨn é mompah mɨlɔb nɛʼɛ, asyɛl ga ba e nye mʉr tɨ, tiibe e sa bɨn bé ólɛɛ dobo laa ɛ. Bɨn bé ólɛɛ ó, sa yé ópyal bɨn ó, bɨn lɛŋɨ é jɔʼ gwar yaa ɛ, ebe, ntʉʼ bɨn bé ólwib. Mbɨambɨa Sisim ó ngo lwib é bɨn.

¹² «Mɨɔ ókɛha mɨɔ we ó, bé jʉʼo nye. Sɔŋ ókɛha mwan we. Bwan, bé óbene mojwɨ̀ʼa mo obyɛl bɔɔ, le esa ó, bé jʉŋɔ.

¹³ Bʉr bɨbɛh, bé ónwim bɨn é lɔb wam. No ó waa ódihbe, to pyal é l'esie e, nyiha ó ngo bi tiʼ molu mo mpoʼ mɨmɛh.»

Mɨtuu e mɨndɛl mɨnɨnɨ

¹⁴ (Mɛm Markus, me elɛɛ waa lé eláa nwa ó, nye gʉa joʼo sa yi!) No Yesʉs a lɛɛ e be ó: «Mʉr bé lé ejebe-jebe ó, Ambuhlo-modɛɛ ɛ, nye óteʼbe bʉr é mih gumo nye ndɨ ajala le edi ɨ, é jɔʼ bɨn bé óbee mʉr waa ɛ, bʉr o lal Yʉda, bé ejala le ekpɛɛ, toŋɔ é mocwɨʼ!

¹⁵ Mʉr óbe é mie kʉ ɨ, nye l'aka nyamle fulo, ni mbɛr, ó nye toʼ, to kaale bɨsa bɨ mbɛr.

¹⁶ Waa óbe peme e, nye l'aka nyamle bula pihe, ó nye toʼ, to nʉa len kʉr we.

¹⁷ A vwaʼ e baanya-mobum le baabyɛɛ é molu maa!

¹⁸ Jwɨʼla ga e Zyɛm é l'efu ó, bɨsɨnɨ bɨnɨ, byé l'ayi pyal é jɔʼ kolo.

¹⁹ Ebe é molu maa, mɨtuu e mɨndɛl, myé óbul buo. Taare é l'etɔɔrʉ, é jɔʼ Zyɛm a cye si nwaʼ nyiwɛh ɛ, ze pyal é banana, bʉr, bé apa sia e mɨtuu é mbi waa. Guu tuu fih, wé aŋa ka bâʼle laa miha.

²⁰ Nkʉ Da a be ó be, atuŋlo molu maa nɛʼɛ, mpa bʉr bɨbɛh, bɨ sil dwè. Sa gwar, nye ótuŋlo me ó, é l'efu e bʉr o nye a pɛh ɛ.

²¹ ǃƗ mʉr si lɛɛ e bɨn ó: “Mbe ga: Lœma mulo mo Zyɛm ó ndɨ wâʼ nwa!” nkʉ ntɔʼ ó: “Nye ó kaʼ” nɛʼɛ, abuʼla ga mʉr waa,

²² ebe, mɨmpʉmpʉl mɨlœma mɨ mulo mo Zyɛm, myé e mɨmpʉmpʉl mɨ ogwiha o mɨlɔb, myé ópyal, lé eze le esa bɨdweʼle bɨ nkul wɔɔ e bɨsa bɨ jehe, lé esaa egomlo bʉr o Zyɛm a pɛh ɛ, é bebebebe zi, nkʉ bé ókoʼo.

²³ Pɨrɨ ga mokʉ si. Mɨ bal bɨn é lɔb bɨsyɛɛla byaa bibyɛh, byé l'apa syɛɛ ó nɨ.»

Mpʉ Mwan mo Mʉr óbula ze e

²⁴ «Sa gwar, é molu maa, mɨtuu e mɨndɛl mɨnɨ, myé óbe si laa nɛʼɛ, dobo, lé ódime, alomo aka pan.

²⁵ Baatwitwɛn, bé óduma, duho é jobo kʉ. Bɨsa bɨ nkul bɨnɨnɨ ndɨ é jobo kʉ ɨ, byé ólwɨʼlɨ.

²⁶ É jɔʼ yaa ó bé óbee Mwan mo Mʉr lé eze é nkur tʉŋlʉ, lwɨŋla e mpwaʼ nkul we ndwe e moncɛnba me e.

²⁷ É jɔʼ yaa nteme ó nye ólomo beengles é modumo mo si mɨmɛh monâ, lé eto syɛŋ baa nye a pɛh ɛ, taare é modumo mo si, to pyal é modumo mo jobo kʉ.»

Sikʉlʉ lɨ figye lé edwe e

²⁸ «Jwɨʼɨ ga sikʉlʉ lɨ figye yé mʉr tɨʼ lé edwe bɨn ɨ. Jɨh tɨʼ lɨ, yi dwanba, bɨka mu lé etaare lé epah, bɨn bé edweʼe ó, nkono, yé mu ó kunokuno le epyal.

²⁹ Jwɨʼ gwar e gwar yaa nteme ó, é jɔʼ bɨn bé óbee bɨsyɛɛla bibyɛh byaa lé esyɛɛlɨ ɨ, gʉŋa ga ó, jɔʼ Mwan mo Mʉr óbâʼle pyal ɨ, yé mu ó kunokuno le epyal. Nye óbe ó, nye mu ó é l'ebe.

³⁰ Me elɛɛ bɨn cyecye ó nɛɛ: mya bʉr wiʼ l'apa sie, bɨsyɛɛla bɨnɨ bibyɛh, byé ósyɛɛlɨ.

³¹ Kʉ e si, byé ólaa; mɨlɔb myam myɛɛ, myé ódi njʉmdia e njʉmdia.»

Zé óbe lé ebono nye é l'esie e mbi jɔʼ yi?

³² «Sa gwar, mʉr, nye agʉa moho nkʉ ewala laa, dam be beengles ndɨ é jobo kʉ ɨ, dam be Mwan mo Zyɛm. Njɨ Zyɛm Sɔŋ nye ome ó lé egʉa.

³³ No ó, diʼe ga é doʼlo [lé esa mɨnjwɨʼla], ebe, bɨn bé agʉa jɔʼ yaa.

³⁴ É jɔʼ yaa, yé ónwɨɨla ó e mpʉ mʉr a be ó, nye tɨʼe cyen ɨ. Nye eliʼe mbɛr we ó, nye osi kab osyɛl o mosa be bɨsyɛɛ, mʉr nyiwɛh e we nkul mojwɨ̀ʼa é l'efu ó, nye sea syɛɛ ye, nye osi cyel nteme mʉr é l'ebe, ó nye cyɛba é vaa. Nye a tiile nye etie ó, nye diʼe nkehe.

³⁵ Jwɨʼ gwar e gwar yaa e bɨn! Diʼe ga nkehe, ebe, bɨn bé agʉa dobo mʉr mbɛr ópyal ɨ, nkʉ é bii kʉʼ, nkʉ teme pum, nkʉ é kuo efoʼ, nkʉ é molama mo mɛn.

³⁶ Diʼe ga ncye. Nye amu jaa pyal bɨn motwɨra, kœb bɨn é bɨdwo.

³⁷ Sa me lé elɛɛ bɨn ɨ, me elɛɛ ye ó, é l'efu e mʉr nyiwɛh: “Diʼe ga nkehe.”»