Markus 12 - Kálara Zyɛ̌m Edwán é mpʉ̌n

Kɨkɛna bɨbɨbla bɨ osyɛl o mosa

¹ No ó Yesʉs a ze taare lé edwe bʉr sikʉlʉ é zi bɨkɨkɛna. Nye ó: «Yé a ze be ó, mʉr ze li peme, ze bè motin mo orezɛŋ tɨ, ntɔʼ fumo ekɔʼ lé ekɛb peme yaa é nka, kpaʼ ekoʼ enɨnɨ, sa epar, fum eman mpumo, ze fumo toloŋo mbɛr tɨ, fum ecyel bʉr é vaa. Nye ze liʼe ye e l'osyɛl o mosa be, ó bé sea nye ya, ó bé nkʉʼ dɨ cen nye we nkɔb é jɔʼ nkono. Pie tɨ, nye ze tɨ cyen, to é guu lal fih.

² É jɔʼ nkono, yé a pyal ɨ, nye ze jebe syɛl mosa we, ze lomo nye boo osyɛl o mosa baa, ó nye toʼ, to nʉa we paʼ mpumo a gumo é peme ye e.

³ Osyɛl o mosa baa bɛɛ ze mɛr mwa mɨlʉmlʉ waa, bîŋɔ nye, foŋɔ nye, buulɔ nye mobo mobo.

⁴ No ó mʉr peme a bâʼle lomo nuu mwa mɨlʉmlʉ we fih. Bé ze bʉ nyiha pɨɨ é lʉ, le elwɨɔ nye.

⁵ No ó mʉr peme a bâʼle lomo mwa mɨlʉmlʉ lɛl. Nyiha ze jʉŋɔ jʉʼo. Mbi syɛɛla gwar yaa ó bé a sa bʉʉ bʉr bɨbɛh mʉr peme a lomo-lomo e. Bîŋɔ ba; jʉŋɔ ba.

⁶ «No ó mʉr ngwar e ngwar mʉr peme a ka liʼ e nye é mobo e, a be ó njɨ mwan we, nye a be é bul kpɛl ɨ. No ó nye a fuo ka lomo mwan we waa boo osyɛl o mosa baa. Nye ó: “Diŋa ó, osyɛl o mosa bam, bé e nkul edwaabe yɛɛ mwan wam.”

⁷ «No ó osyɛl o mosa baa, bé a ze lɛɛla paʼra wɔɔ ó: “Mbe ga: modila mo mʉr peme ó ma ze nɨ! Ncʉʼ ga! Bɨna jʉʼo ga nye! Bɨliʼ mo sɔŋ we nye a ngbaa bi ɨ, byé nkʉʼ fuʼla mopoʼ ga mɨna.”

⁸ No ó bé a ze mɛr nye, jʉŋɔ nye, ntɔʼ myahɔ muu we mpomo peme.

⁹ «Yé be no nɛʼɛ, bɨn bɛɛ bee ó, mʉr peme ósa nyá ɛ? Mɛm, me ebee ó, nye óze jʉ osyɛl o mosa baa, ntɔʼ ka cyel bʉʉ bʉr ofih é peme.

¹⁰ Bɨn bé a baasi láa sa ndɨ tila ó: “Ekoʼ ofim o mbɛr bé a pyeh e, lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ.

¹¹ Yé a syɛɛlɨ no ó, é nkul mo Da. Yé ó sa bɨna lé ejehe ga ɛ?”»

¹² No ó bé ntɔʼ taare lé ebà bɨjwɨʼ bɨ enaʼ Yesʉs mobo é nyʉl. Sa gwar, bé a be yɛɛ ó, lé ekpɛɛ ntuntuma bʉr, ebe, bé a be ó si gʉa ó, nye a sa kɨkɛna yaa ó, bé ó ndɨ osyɛl o mosa, ó die le «osyɛl o mosa», lé a dɨ tublo ó be! Bé ze liʼe nye, ntɔʼ to.

Tœa mo Kɛɛza

¹³ No ó bé a ze lomo bʉʉ oFarizyɛŋ bé e bʉʉ bʉr o mpoʼo Erod, ó bé toʼ, to pyal boo Yesʉs, lé esa ó, bé lam ó nye é mbi lwib nye óbɨha e be e.

¹⁴ No ó bé a ze lɛɛ e nye ó: «Yeʼle, bɨh bé egʉa ó, go elɛɛ ó ocyecye. Sa mʉr fih lé ebee é we paʼ ɛ, yé alɛɛ go sɔʼɔ. Go ádwaabe bʉr é lɔb mompom mɔɔ. Go edwe-dwe bɨh sikʉlʉ ó, lé eyeʼle mpʉ mʉr lé ejala le ekœʼ ebò e cyen Zyɛm lé ekpɛl ó, bʉr kœʼœ œ. No ó, lɛŋɨ bɨh: Zê motie ga mɨna, mé ekamle mʉr lé ejɛna tœa mo Kɛɛza ɛ? Zê yé kɔmlʉ ó, mʉr jɛna nye ya ɛ? Zê bɨna jɛna ga ɛ? Zê bɨna beʼ l'ajɛna ga ɛ?»

¹⁵ Yesʉs a be ó lé egʉa ó, bé a dî e nye ó, tia njɔŋ. No ó nye a dî e be ó: «Bɨn baanya-bɨkʉʉŋʉ ba! Ebe yé bɨn lé ejɨ saa elam me é mbi lwib me óbɨha e bɨn ɨ? Ntaʼ ga me e saŋ denie, me paʼ bee we e mih!»

¹⁶ No ó bé a ze e saŋ ngwar. Yesʉs ntɔʼ dî e be ó: «Dweʼle mpom le die mo zé ndɨ lula é saŋ wiʼ ɨ?» Bé e nye ó: «Byaa mo Kɛɛza.»

¹⁷ No ó Yesʉs a ze lɛɛ e be ó: «Dweʼ ga Kɛɛza bɨsa mo Kɛɛza; bɨn bé à dwe Zyɛm byaa mo Zyɛm.» Bé a be ó si bul jehe mpɨha we waa.

Sikʉlʉ é lɔb pɛ̀ha foo

¹⁸ No ó oSadwisyɛŋ, bé a ze pyalɔ boo Yesʉs. (Bɛɛ, bé ó bʉr o ndɨ elɛɛ ó, odwè, bé ákwoʼ pàh é mofoo e.) Bé a ze dî nye tia ó, é mbi wi:

¹⁹ «Yeʼle, Moyiz a be ó si tiile bɨna ga etie lɨ. Lé ó tila ó: “ǃƗ mbɛa mʉr, wé óbe si dwè, liʼe kuho mʉma we, luʼo mwan nɛʼɛ, yé ejala ó, ncyom we, nye baʼ kuho mʉma we waa, bé e mʉma waa nkʉʼ bya-bya bwan é l'efu e tʉl.”

²⁰ To kœb ó, yé a be ó e bʉʉ bɨɔ tambɛl. Waa modweʼe ze ba mʉma. Di é di di di, nye ntɔʼ dwè, aliʼe mwan.

²¹ Waa a bɔma nye e, ze ba kuho tʉl a liʼe e, nye nteme dwè, aliʼe mwan si. Waa lɛl nteme sa no.

²² To pyal ó, bɨbɛh, tambɛl, bé a be ó si dwè, aliʼe mwan si. Pie tɨ, mʉma waa nteme ka ze dwè.

²³ No ó, é dobo bɨn lé elɛɛ ó, bʉr bé ópàh é mofoo e, nye óka fuʼla mʉma mo zé? Ebe, bɨbɛh tambɛl bé a be ó si ba nye!»

²⁴ Yesʉs ze lɛɛ be ó: «Bɨgwìh bɨn lé esa binɨ, zê byé aduho é nko paʼ win, mpʉ bɨn ndɨ agʉa Kalara Zyɛm, nkʉ nkul we e?

²⁵ Sa bɨn ndɨ agʉa ɛ, yé ó, é jɔʼ bʉr, bé óbe si pàh é mofoo e, bé aŋa ka bɛa, nkʉ cenɔ é moba. Bé ódi-di ó, mpʉ beengles lé edi é jobo kʉ ɨ.

²⁶ ǃBɨn si dî me tia lé etiibe e mpʉ bʉr, bé ópàh nɛʼɛ, zê bɨn bʉr o tɨ, bé a baaláa sa Moyiz a tile é lɔb njʉl nye a kœb lé eduo é kpaʼ tʉŋlʉ ɨ? Zyɛm Sɔŋ a lɛɛ e nye ó: “Me ó Zyɛm mo Abraham, Zyɛm mo Ɨzak, ndwe e Zyɛm mo Yakɔb.”»

²⁷ Yesʉs ze ko mokan maʼ ó: «No, yé elɛʼle ó, Zyɛm, nye ó Zyɛm bʉr o ndɨ mɨkubla ɛ. Nye abe waa odwè. Gʉŋa ga ó, bɨn bé ó kʉ be é gwìh tʉŋlʉ.»

Etie lé elaa motie mɨmɛh ɛ

²⁸ Nuu yeʼle motie a be ó si joʼo mpʉ bé e boo nɔɔ, bé a be lé epɨra mokan ɨ. Nye a be ó si bee nteme ó, Yesʉs a si gʉa bɨha. Nye ntɔʼ dî e nye ó: «É motie ga mɨna, láa etie lé elaa motie mɨmɛh ɛ?»

²⁹ No ó Yesʉs a bɨha e nye ó: «Etie lé elaa motie mɨmɛh, lé ó: “Joʼa ga, bwa b'Ɨzraɛl: Sɔŋ ga wina Da Zyɛm, nye ó ndɨ Zyɛm nye ome.

³⁰ Kpɛlɨ Sɔŋ go Da Zyɛm e leme go wiwɛh, le sisim go wiwɛh, le pɨʼ go nyiwɛh, le nkul go nyiwɛh.”»

³¹ Yesʉs ntɔʼ lɛɛ ó: «Etie emba, lé ó: “Kpɛlɨ mɨɔ go mʉr mpʉ go lé ekpɛl go mʉr tɨʼ ɨ.” Yé abe e lʉʉ etie lé elaa maa monɨ.»

³² No ó yeʼle motie a lɛɛ e nye ó: «Yeʼle, go si gʉa lɛɛ! Sa go lé elɛɛ ɛ, yé ó bana be cyecye. Sɔŋ ga wina Da Zyɛm ó ndɨ Zyɛm nye ome; yé abe e nuu zyɛm fih pie nye.

³³ Mʉr, nye ejala le ekpɛl nye e leme we wiwɛh, e pɨʼ we nyiwɛh, le nkul we nyiwɛh. Nye ejala le ekpɛl nteme mɨɔ we mʉr mpʉ nye lé ekpɛl nye mʉr tɨʼ ɨ. Syɛɛla yaa, yé é mbɨa, laa bim motwina bʉr ndɨ e nkul edwe Zyɛm ɨ.»

³⁴ Mpʉ Yesʉs a bee ó, nye a be ó si kʉ gʉa lwib ɨ, nye ntɔʼ lɛɛ e nye ó: «Jwɨ̀ʼa mo Zyɛm, yé aka bul cɛra e go.» Pie tɨ, mʉr a baaka dihbe lé edî nye tia.

David, bé e Krɨst: Lœma mulo mo Zyɛm

³⁵ Yesʉs a be ó é jahla bii mo Zyɛm tʉŋlʉ, lé eyeʼle bʉr. Nye ze dî tia nwa: «Ebe yé oyeʼle o motie, bé lé elɛɛ ó, Lœma mulo mo Zyɛm, nye ó mwan mo David ɨ?

³⁶ Ebe, David nye mʉr tɨ, é nkul mo Mbɨambɨa Sisim, a be ó si lɛɛ ó: “Da a lɛɛ e Tî wam ó: ‘Diʼe si é nko paʼ mbo ejʉm wam, to pyal é jɔʼ me ósa bʉr o dɔm bo ó, bé diʼe cyela mokʉ yo e!’”»

³⁷ Yesʉs ntɔʼ ko tɨʼ ó: «David nye mʉr tɨʼ a jebe Lœma mulo mo Zyɛm ó, “Tî wam”. A wáa mbi Lœma mulo mo Zyɛm ndɨ e nkul ebe mwan mo David ɨ?» Ntuntuma bʉr, yé a be ó lé esoho lé ejoʼo lwib mo Yesʉs.

Yesʉs lé ebâm e l'oyeʼle o motie bé e l'oFarizyɛŋ

³⁸ Nye a lɛɛ-lɛɛ e bʉr o nye a dwe-dwe sikʉlʉ ó: «Gʉa di ga ncye e l'oyeʼle o motie! Bé ekpɛl to le ejaala e bɨdur é jaa jaa é guu-gu-guu, ó bʉr taara soho be, le edwiibɨ be é mobɨm bɨnkana.

³⁹ Bé ekpɛl-kpɛl nteme ó, njɨ bɨdia bɨ efoʼ é mompah mɨnjwɨʼla ndwe e mɨmpaŋ bɨdia bɨ dolo, gumo bé lé ede dina ɛ.

⁴⁰ Bé esà-sà mɨkuho, dɛn-dɛn bɨsa bibyɛh myé ndɨ eliʼ e tɨʼ ɨ. Bé ejwɨʼla-jwɨʼla nteme e Zyɛm ó, bul mokan, lé esa lɛʼla. Bé ó ngo bul dweŋɔ mobe le ekabɔ bɨntɨʼa bɨ tɨ.»

Ndwɛa mo kuho mʉma

⁴¹ No ó Yesʉs a to di si mbɨembɨe e kar, fum bʉr, bé a dɨ gba mɔn mɨndwɛa é wolo mɨndwɛa é jahla bii mo Zyɛm ɨ. Nye a be ó lé ebee mpʉ bʉr, bé a gba-gba mɔn yɔɔ ɛ. Obil o bɨsa bɛɛ, bé a be ó lé egba bɨmɔn twiha.

⁴² No ó nuu anteʼenteʼe kuho mʉma, wé a ze, ntɔʼ gba bwa o mih mo kaba moba, jala e para gwar.

⁴³ No ó Yesʉs a ze jebe ompʉn be. Nye e be ó: «Me elɛɛ bɨn cyecye ó nɛɛ: anteʼenteʼe kuho wi, wé be ó si bul gba mɔn é wolo mɨndwɛa, laa bʉr bɨbɛh,

⁴⁴ ebe, bʉʉ bʉr bɨbɛh, mpʉ bé ndɨ é twiha bɨsa ɛ, bé gba ó, paʼ mɔn ndɨ abe be e nyɔm é l'ekʉm lɔɔ ɛ. Nyɛɛ, dam be é l'enteʼe le tʉŋlʉ, nye gba ó, bim yiyɛh nye be e ye e, mobi me mɨmɛh.»