Markus 11 - Kálara Zyɛ̌m Edwán é mpʉ̌n

Epyal mo Yesʉs: Nyaʼ-nɔn, nye ó odumo o Yerʉsalɛm!

¹ É jɔʼ bé a be, bé mu kunokuno e Yerʉsalɛm, kunokuno e Batfagee le Betani, é l'Ecwɨʼ le olivye e, Yesʉs ze lomo ompʉn be oba.

² Nye ó: «Toʼ ga kwar ndɨ bɨna ga tina dolo nɨ. É jɔʼ bɨn bé ópyal gʉʼ ɨ, bɨn bé ókœb ma jakah tiila, nye dina, mʉr apa kable nye é koo kʉ. Bɨn bé à tii nye. Bɨn bé òze e nye wâ.

³ ǃƗ mʉr si dî bɨn ó: “Ebe yé bɨn lé esa mpʉnʉ nɨ ɨ?” nɛʼɛ, bɨn bé à bɨha e nye ó: “Ebe, Tî wih, nye egwɨm nye. Nye ókpahbe buulo nye wâʼ é banana.”»

⁴ No ó bé a to, ze to kœbɔ ma jakah nɨ tiila kʉl é l'ebe, é nkpah mpaʼa. Bé ntɔʼ tii nye.

⁵ Bʉʉ bʉr o bé a kœb tɨʼ ɨ, bé ze dî e be ó: «Ebe yé bɨn lé etii ma jakah nɨ ɨ?»

⁶ Bé ntɔʼ bɨha e be mpʉ Yesʉs a lɛɛ be e. Bʉr baa ntɔʼ bir be ó, bé toʼ e nye.

⁷ Bé ntɔʼ bula e ma jakah, ntɔʼ lɛʼle Yesʉs nya. Bé ze kɛl jakah mɨkan myɔɔ é koo, Yesʉs ntɔʼ kable tɨ.

⁸ Bʉr é buobuo ze jan mɨkan myɔɔ mpaʼa e mpaʼa. Bʉʉ ze taare lé etiʼe mompuho bɨlɨ le ejanɔ me mpaʼa e mpaʼa.

⁹ Bʉr o b'a be nye dolo, le baa b'a du pihe e, bé a be ó lé ebʉ bɨyaŋa, lé elɛɛ ó: «Kɛɛɛɛɛɛ! Mocyɛʼ mo mpom, mé swɨŋɨ é waa lé eze e die mo Da nwa ɔɔ!»

¹⁰ «Mocyɛʼ mo mpom, mé e jwɨ̀ʼa mu lé eze, yaa Sɔŋ mpam ga wina, David a bɛa bòno yi ɔɔ! Kɛɛɛɛɛɛ é lal mo Zyɛm ɔɔ!»

¹¹ Yesʉs ze pyal Yerʉsalɛm, ntɔʼ to ni é jahla bii mo Zyɛm, ntɔʼ dwɛʼ é mompàh mɨmɛh. É jɔʼ nye a sil dwɛʼ ɛ, nye ntɔʼ pyal kʉl, to Betani, bé e l'Esama le ompʉn ewʉm e l'oba, ebe, edurʉ, lé a be ó, lé mu lé emara be.

Yesʉs lé ekáale lɨ figye

¹² É mɛn tɨ, é jɔʼ bé a mʉa Betani ɨ, Yesʉs a be ó, nye mu lé ejoʼo za.

¹³ Mpʉ nye a cyɛb ká ká, bee lɨ figye e bɨka é lyoʼ-lyoʼ e, nye ntɔʼ dihle kunokuno e lɨ, ze to dwɛʼ nkʉ nye óbɛm kœb bumo ede tɨ. Pyala nye a ka pyal é l'etin le si ɨ, nye a kʉ ka kœb ó njɨ bɨka e bɨka, ebe, yé a baabe jɔʼ nkono bɨlɨ bɨ ofigye.

¹⁴ No ó Yesʉs a ze lɛɛ e lɨ figye ó: «Abe e lʉʉ dobo mʉr óka de bumo fig yo!» Ntɔʼ laŋɔ, ompʉn bɛɛ lé ejoʼo sa nye a lɛɛ ɛ.

Yesʉs lé ekɛ̂m obɛma o bɨsɔʼɔ é jahla bii mo Zyɛm

¹⁵ No ó bé e boo Yesʉs, bé a pyal ɨ Yerʉsalɛm, nye ze bâʼle ni é jahla bii mo Zyɛm. Nye ntɔʼ taare lé efo bʉr o b'a di-di tɨʼ lé ebɛma bɨsɔʼɔ, le baa b'a ze-ze lé eze bwam ɨ, bɨbɛh. Nye ntɔʼ nkɛŋ oteble o bʉr o b'a siila-siila bɨmɔn ɨ, si ndwe le eloʼlo bɨdia bɨ bʉr o b'a dɨ bɛma mopɨba ɛ.

¹⁶ Nye a baadwe ba mʉr epʉla lé etiʼe jahla bii mo Zyɛm lé enkɛɛ yʉʉ sɔʼɔ.

¹⁷ Nye ntɔʼ dwe be sikʉlʉ yi. Nye a dî e be ó: «Zê yé abe tila é Kalara Zyɛm ó: “Mbɛr wam, wé óbe ó mbɛr mɨnjwɨʼla é l'efu e bɨkul bibyɛh” ɛ? No ó bɨn bɛɛ, bɨ liŋ we eboʼo e bɨzilngan!»

¹⁸ Ojwɨɨ be opara bé e l'oyeʼle o motie, é mpʉ bé a joʼo sa nye a lɛɛ ɛ, bé ze taare lé ebà bɨjwɨʼ ó, bé jʉ ó nye. Bé a be yɛɛ ó, lé ekpɛɛ esa no, ebe, ntuntuma bʉr yiyɛh, yé a be ó lé ejehe mbi sikʉlʉ nye a dwe be e.

¹⁹ É jɔʼ dobo lé a lɨŋa ɛ, Yesʉs bé e l'ompʉn be, ze duhɔ nkana.

Lɨ figye, yi bana dwɛhla!

²⁰ É dwine mɛn ntuʼkolo, é jɔʼ bé a laa gumo yaa ɛ, bé a ka kœb ó, lɨ figye yaa mu si dwɛhla, taare é bɨka, to pyal é mɨkaale.

²¹ Pyɛr ze toŋlo sa Yesʉs a lɛɛ ɛ. Nye e Yesʉs ó: «Yeʼle, paʼ bee: lɨ figye go a káale kʉʼ ɨ, yi bana dwɛhla!»

²² Yesʉs ntɔʼ lɛɛ e be ó: «Bɨn bé ejala le ejyɛʼ taa buʼo yin boo Zyɛm.

²³ Me elɛɛ bɨn cyecye ó nɛɛ: ǃɨ mʉr si lɛɛ e l'ecwɨʼ lɨʼ ó: “Mʉŋa tina. Toʼ, to nkaŋa maŋ” nɛʼɛ, lɔɔ we, wé ókʉ bana dira cyecye, ǃɨ mʉr waa óbe be lé ebuʼla wa. Yé ósyɛɛ, ǃnye óbe asoŋlo ó, lɔɔ we, wé ódira é l'efu le wa.

²⁴ Ebe no, me elɛɛ bɨn ó nɛɛ: sa yiyɛh bɨn lé ejwɨʼla e Zyɛm é l'efu le e, buʼla ga ó, bɨn bɨ bi ye, yé ódweŋɔ bɨn!

²⁵ ǃBɨn si cyɛb cɨcyel lé esa mɨnjwɨʼla nɛʼɛ, yé be ó bɨn e boo bʉr, bé e lɔb nɛʼɛ, saʼ ga ó, bɨn taara pɛʼ bɨbaa bɨ ebebe bɨn bé a niʼe be e. No ó Sɔŋ win ndɨ é jobo kʉ ɨ, nye ópɛʼ nteme bɨbaa nye lé eniʼe bɨn é lɔb bɨgwìh bin ɨ. [

²⁶ Sa gwar, ǃbɨn si kʉ láa bɨbaa bɨ ebebe bɨn bé a niʼe bʉr nɛʼɛ, Sɔŋ win ndɨ é jobo kʉ ɨ, nye nteme óláa bɨbaa nye a niʼe bɨn é lɔb motie bɨn bé a ntaa ɛ.»]

Nkul mojwɨ̀ʼa mo Yesʉs, nye eduho nko?

²⁷ Bé ntɔʼ bâʼle to Yerʉsalɛm. É jɔʼ Yesʉs a to le ekœʼ é jahla bii mo Zyɛm. É jɔʼ nye a be lé edwe bʉr sikʉlʉ tɨʼ ɨ, ojwɨɨ be opara bé e l'oyeʼle o motie e l'otamabʉr o lal «mpululu», ze dî e nye ó:

²⁸ Bé e nye ó: «É wáa nkul mojwɨ̀ʼa go ndɨ esa mbi bɨsyɛɛla go lé esa biʼ ɛ? Go nteme go epa kʉ sa bye é die mo zé?»

²⁹ No ó Yesʉs a bɨha e be ó: «Me paʼ dî bɨn tia ngwar nwa. Taara bɨha ga me nya, mé òtublo bɨn die e mʉr lé edwe me nkul mojwɨ̀ʼa ó, me saʼ bɨsyɛɛla bɨnɨ ɨ.

³⁰ Zé a pa kʉ dwe Yʉanes nkul ó, nye toʼ le edù bʉr? Zê Zyɛm ɛ? Zê bʉr ɛ? Bɨha ga me.»

³¹ No ó bé a ze timle lɔb waa paʼra wɔɔ. Bé ó: «ǃBɨna si bɨha ga ó: “Zyɛm ó b'a lomo nye” nɛʼɛ, nye óbâʼle dî ó: “Yé be no nɛʼɛ, ebe yé bɨn bé a baabuʼla nye e?”

³² ǃBɨna si bɨha ga ó: “Bʉr ó b'a lomo nye” wa…» (Bé a be ó lé ekpɛɛ mɨzɨze mɨ bʉr, ebe, bʉr bɨbɛh, bé a be ó si nʉa Yʉanes mpʉ ngwiha mɨlɔb.)

³³ Bé ntɔʼ bɨha e Yesʉs, lɛɛ e nye ó: «Bɨh bé agʉa.» Yesʉs, nye e be ó: «Yé be no nɛʼɛ, me nteme, me ákwoʼ lɛɛ bɨn die e mʉr lé edwe me nkul mojwɨ̀ʼa ó, me saʼ bɨsyɛɛla bɨnɨ ɨ.»