Markus 1 - Kálara Zyɛ̌m Edwán é mpʉ̌n

Etɛɛrɨ e Mbɨambɨa Lɔɔ mo Yesʉs-Krɨst

¹ Etɛɛrɨ e Mbɨambɨa Lɔɔ lé etiibe e Yesʉs-Krɨst, [Mwan mo Zyɛm] ɨ.

² Yé ó mpʉ yé ndɨ tila é kalara mo ngwiha mɨlɔb Ezayi ɨ. Yé ó tila ó: «Mbe! Me muno ze cen mwa mɨlʉmlʉ wam zi dolo, nye toʼ, to komlo go zi.

³ Mʉr, nye etuno é feha si, lé elɛɛ ó: “Komla ga zi mo Da ɔɔ! Bɨn bé à cyel mozi me é liim ɔɔ!”»

⁴ Kʉ be jwɨʼ gwar mpʉ Ezayi a tile e, no nteme ó Yʉanes Ndubʉr a be e! Nye a be ó é feha si. Nye a lɛɛ-lɛɛ e bʉr ó: «Gwɨma ga mobebe mɨn ɔɔ! Bɨn bé à dwir mɨleme ɔɔ! Bɨn bé à nʉa ndubo, ó Zyɛm pɛʼɛ bɨbaa bɨ ebebe bin ɔɔ!»

⁵ No ó bʉr o lal Yʉda le baa o Yerʉsalɛm bɨbɛh, bé a ze gumo nye a be e, ze gwihɔ mɨsyem myɔɔ, Yʉanes ze dù be é dibe Yʉrdɛŋ.

⁶ Yʉanes a be ó lé ebwar kan wé a be tia e mye mɨ kamtʉl ɨ. Kana nye a tiile-tiile é kubo e, a saŋɔ ó e kʉr tir. Nye a de-de ó baaceme-bɨka e l'egbɔʼ.

⁷ Yʉanes a be ó lé esa tuno. Nye ó: «Mʉr lé edu me é koo pihe e, nye e nkul mojwɨ̀ʼa, laa me. Me abe mbi mʉr lé ejala le egwabro si, le etii nye mɨkol mɨ osilpah be e.

⁸ Mɛm, me edù bɨn ó e modibe. Nyɛɛ, nye ódù bɨn ó é Mbɨambɨa Sisim!»

Ndubo mo Yesʉs

⁹ É molu maa, Yesʉs ze mʉa Nazarɛt é lal Galɨle, ntɔʼ to é l'ebʉm e dibe Yʉrdɛŋ. Tɨʼ ó Yʉanes a dù nye e.

¹⁰ Jɨh tɨʼ Yesʉs a sil duho é modibe, nye ntɔʼ ze bɨn mih kʉ, bee jobo, yé osi nyɛɛ, le ebee nteme Mbɨambɨa Sisim lé efulo é baaa mpʉ epɨba, ze bebre nye é nyʉl.

¹¹ Twii ze duho é jobo kʉ lé elɛɛ ó: «Go ó mwan kpɛl wam! Me ekʉ mɨɨla e go.»

Satan lé eboblo Yesʉs

¹² Pie tɨ, Mbɨambɨa Sisim ze tine nye é feha si.

¹³ Nye a ja gʉʼ é feha si ó, tɔɔ molu mowʉm monâ. É molu mowʉm monâ maa, Satan a be ó lé eboblo nye. É gumo yaa, bé e l'otir ó b'a di-di, beengles bɛɛ lé esea e nye.

Yesʉs lé ejebe ompʉn be efoʼ be

¹⁴ Pie tɨ, Yesʉs ze to Galɨle, to le elɛɛ Mbɨambɨa Lɔɔ lé eduho boo Zyɛm ɨ. Tina, yé a be ó Yʉanes, nye osi gbaŋɔ é mbʉʼ.

¹⁵ Nye a lɛɛ-lɛɛ ó: «Jɔʼ Zyɛm ócyel jwɨ̀ʼa ye cyecye e, yé mu ó kunokuno le epyal ɔɔ! Gwɨma ga mobebe mɨn ɔɔ! Bɨn bé à dwir mɨleme ɔɔ! Buʼla ga Mbɨambɨa Lɔɔ ɔɔ!»

¹⁶ Yesʉs a be ó lé ekœʼ é nkpah maŋ mo Galɨle. Nye ntɔʼ ze bee Simɔn bé e ncyom we Andreas. Bé a be ó lé ela okʉa é modibe maŋ, ebe, bé a be ó olɛa be okʉa.

¹⁷ Yesʉs ntɔʼ lɛɛ e be ó: «Duʼo ga me. Me ósa ó, bɨn diʼe ogohla o bʉr.»

¹⁸ Cye e cye yaa, bé ntɔʼ liʼe okʉa bɔɔ, duŋɔ nye.

¹⁹ Nye ze laa, to ba dolo, ze bee Jacques bé e ncyom we Yʉanes, bwan mo Zebede, bé osi syel byɛl wɔɔ é pɨn. Bé a be ó tɨʼ lé ekomlo okʉa bɔɔ.

²⁰ Cye e cye yaa, nye ze jebe be. Bé ntɔʼ mʉa, liʼɔ sɔŋ wɔɔ Zebede bé e l'osyɛl o mosa be é byɛl, ntɔʼ duŋɔ Yesʉs.

Yesʉs lé edwih eleme é mʉr é mpah mɨnjwɨʼla tʉŋlʉ

²¹ Bé ze to Kapernaʉm. É moho saba, Yesʉs ntɔʼ taare lé eyeʼle bʉr é mpah mɨnjwɨʼla.

²² Bé a be ó si jehe mbi sikʉlʉ nye a dwe-dwe be e, ebe, nye a yeʼle-yeʼle be ó e nkul mojwɨ̀ʼa, siila e l'oyeʼle o motie bɔɔ.

²³ To kœb ó, é ntuntuma bʉr yé a be mpah mɨnjwɨʼla ɛ, nuu a be ó e bɨbla sisim. Nye ze bahle ó:

²⁴ «Hɛɛya! Yesʉs, mʉr Nazarɛt, bɨna e go bé e wáa lɔb? Zê go ze ó, ze sil bɨh ɛ? Mɨ dweʼe go! Go ó Mʉr mo Zyɛm ndɨ ti ɨ!»

²⁵ Yesʉs ntɔʼ bâm e bɨbla sisim yaa. Nye e ye ó: «Dibla nʉm. Duha mʉr nɨ é nyʉl.»

²⁶ Bɨbla sisim yaa ze ncyeŋ mʉr nɨ e nkul é guʼ-guʼ-guʼ, nye ntɔʼ jebe lé eyɨm twii. Yé ntɔʼ duho nye é nyʉl.

²⁷ Bʉr bɨbɛh ze jehe, ze taare lé elwibla paʼra wɔɔ ó: «Wáa mbi lɔb wi? Edwan e sikʉlʉ lwɨŋla e nkul mojwɨ̀ʼa ó nɨ ɔɔ! ǃNye si lɛɛ e bɨbɨbla mɨsisim ó: “Duha nye é nyʉl” nɛʼɛ, byé ntɔʼ bana sa nye mojoʼo!»

²⁸ Lɔɔ waa ze jʉŋla mpʉ kol eboʼ, jala lal Galɨle wiwɛh.

Yesʉs lé etiʼ mɨsyoblʉ é buobuo

²⁹ Bé ze mʉa é mpah mɨnjwɨʼla waa, pyalɔ kʉl, ze toŋɔ mbɛr mo Simɔn bé e Andreas. Jacques bé e Yʉanes nteme, bé a be ó é sama yaa.

³⁰ Tǐ mʉma mo Simɔn a be ó njaʼa si lé esyɛb, nyʉl lé eduo é bɨl-bɨl. Bé ntɔʼ kpahbe lɛɛ Yesʉs lɔb esyɛb laa,

³¹ nye ze dihle kunokuno e nye, ze mɛr nye é mbo, gbɛl nye si. Esyɛb laa ntɔʼ sie é kɛŋ. Mʉma waa ntɔʼ taare lé esea e be.

³² É bii kʉʼ yaa, jɔʼ dobo, lé a lɨŋa ɛ, bʉr ntɔʼ ze boo nye e mɨsyoblʉ myɔɔ mimyɛh le bʉr o b'a sia e moleme e.

³³ Bʉr o nkana yaa bɨbɛh ze fwal kunokuno e l'ebe e mbɛr wɔɔ.

³⁴ Nye ze tiʼ mɨsyoblʉ é buobuo myé a be e mosyɛb é monyʉl mɨmbi mɨmbi ɨ. Nye a si dwih buobuo moleme é bʉr o b'a sia e me e. No ó, nye a si pɨr moleme maa mɨnʉm, ó mé l'alwib, ebe, mé a si kʉ dweʼe nye.

Yesʉs lé elɛɛ Mbɨambɨa Lɔɔ

³⁵ É dwine mɛn ntuʼkolo, Yesʉs ze mʉa si, pyal kʉl, to é lʉn. Tɨʼ ó nye a jwɨʼla e Zyɛm ɨ.

³⁶ Simɔn bé e bʉʉ ompʉn ntɔʼ sanɔ nye, ze to é mɨsɔɔlʉ mye.

³⁷ Bé ze bee nye, ze lɛɛ e nye ó: «Bʉr bɨbɛh, bé esaa go.»

³⁸ No ó Yesʉs a lɛɛ e be ó: «Ncʉʼ ga. Bɨna toʼ ga é mokwar ndɨ kaʼ ɛ, ebe, me ólɛɛ lɔɔ Zyɛm nteme gʉ. Sa me a ze sa kaʼ ɛ, yé ó nɨ.»

³⁹ No ó nye a ze to le edwe bʉr sikʉlʉ é mɨlɔb mo Zyɛm é mompah mɨnjwɨʼla mɔɔ é lal Galɨle wiwɛh, ndwe le edwih bʉr moleme.

Yesʉs lé etiʼ zɨzam

⁴⁰ Guu zɨzam ze pyal boo Yesʉs. No ó wé a ze kur moboo si, le ejwɨʼla e nye. Wé e nye ó: «ǃGo si mɛʼle nɛʼɛ, go óbɛm pɛʼ me sa ndɨ elœʼ me é mih mo Zyɛm ɨ.»

⁴¹ Yesʉs ntɔʼ jwɨʼ nye nkoo, nye ntɔʼ syɛm mbo, ze kuna e nye. Nye e nye ó: «Mɨ mɛʼle! Sa ndɨ elœʼ go é mih mo Zyɛm ɨ, yi pʉʼa go.»

⁴² Cye e cye yaa, zam ntɔʼ pʉʼa mʉrʉm nɨ é nyʉl, nye l'aka be e sa yé a lœʼ nye é mih mo Zyɛm ɨ.

^43-44 Nye e nye ó: «Alɛɛ mʉr mpʉ go tiʼe e. Toʼ, to lɛʼle opara mo Zyɛm mpʉ go mu ɨ. Go à to dwe sa Moyiz a lɛɛ ó, go lɛʼla be, bé nkʉʼ pubo go e. Yé ósa ó, bʉr gʉŋa ó, gɨ kʉ tiʼe.» Nye ntɔʼ ze kɛ̂m nye.

⁴⁵ Dam be mpʉ Yesʉs a si lɛɛ nye no e, mʉr waa a kʉ ka sa ó njɨ to le emyɛʼ lɔɔ waa é gumo yiyɛh. Ebe no ó Yesʉs a baabe e nkul eka ni é bɨnkana é pono e. Nye a fuo ka di-di ó, njɨ é bɨlʉn. Bʉr, bé a be lé eto boo nye ó, duho-duho é bɨgumo bibyɛh.