Lʉkas 7 - Kálara Zyɛ̌m Edwán é mpʉ̌n

Yesʉs lé etiʼ syɛl mosa

¹ Jɔʼ Yesʉs a sil lɛɛ bʉr bɨsa byaa bibyɛh ɛ, nye ntɔʼ ze mʉa, ni Kapernaʉm.

² Ɨ gʉ, yé a be ó e nuu njwɨɨ nter bɨzima bɨ Rom. Nye a be ó e nuu syɛl mosa nye a be é bul kpɛl ɨ. Syɛl mosa we waa a be ó lé esyɛb, nye mu tiʼ le efie.

³ É jɔʼ njwɨɨ nter bɨzima waa a joʼo bʉr lé elab-lab lɔb mo Yesʉs ɨ, nye ntɔʼ lomo bʉʉ otamabʉr be oYʉden ó, bé toʼ, to dî e Yesʉs nkʉ nye óbɛm ze tiʼ syɛl mosa we waa.

⁴ Bé ze to, to jwɨʼla e Yesʉs é mpɨna-mpɨna ó, nye tiʼɨ nye syɛl mosa we waa. Bé e Yesʉs ó: «Yé ekʉ jala yɛɛ ó, go gulɨ mʉr nɨ.

⁵ Nye é bul kpɛl kul ga yina. Nye ó b'a fumo mpah mɨnjwɨʼla ga wina.»

⁶ Yesʉs ntɔʼ mʉa si, bé e boo nɔɔ toŋɔ mbɛr mo mʉr waa. Ngbaa le eka be, bé mu si kunbo e mbɛr waa nɛʼɛ, njwɨɨ nter bɨzima nɨ ntɔʼ lomo ofo be ó, bé toʼ, to bɔma e Yesʉs e mpaŋla nwaʼ ó: «Da, antɨʼ nyʉl go mbɛh. Mbi bɨbla mʉr me ndɨ ɨ, yé ajala ó, go niʼe ɨ modwii mam.

⁷ Ebe no ó me bee ó, yé ajala nteme ó, me mʉr tɨʼ soha go e. Lɛŋɨ njɨ ekan egwar, syɛl mosa wam tiʼa!

⁸ Me egʉa ó, go e nkul esa no, ebe, me ó e bʉr o ndɨ ejwɨʼ me e. Me nteme, me e bɨzima é mojwɨ̀ʼa mam. Me elɛɛ e yiʼ ó: “Toʼ”, yé ntɔʼ to. Me e yʉʉ ó: “Ntaʼ”, yiha ze. Me eka lɛɛ e syɛl mosa wam ó: “Saʼ sa yiʼ”, nyɛɛ sa-sa saʼ.»

⁹ Ejoʼo Yesʉs a joʼo mokan maa ɛ, nye kʉ ze jehe nye, ze dwibra, dwɛʼ mpampaʼ bʉr yé a du nye é koo pihe e. Nye ó: «Me elɛɛ bɨn ó nɛɛ: Ebee me lé ebee buobuo buʼo e, lé ó lɨ. Abe e mʉr Ɨzraɛl ndɨ esa no.»

¹⁰ Ofo onɨ, bé ntɔʼ fiʼ, bula to mbɛr mo njwɨɨ nter bɨzima. Epyal bé a ka to pyal gʉʼ ɨ, bé a ka to kœb ó, syɛl mosa nɨ mu si tiʼe!

Yesʉs lé epɛ̀h mwan mo kuho mʉma

¹¹ Dobo lé a bɔma ɛ, Yesʉs ze to é nuu kwar, die Nayin, ompʉn be ndwe e mpampaʼ bʉr lé edu nye é koo pihe.

¹² É jɔʼ nye a be, nye mu kunokuno e l'eniŋlɨ e nkana ɛ, nye ntɔʼ bee bʉr lé enkɛɛ muu é zimɨ, lé eto dɨlɔ. Yé a be ó muu etiʼe e mwan mo guu kuho mʉma. Buobuo bʉr o nkana yaa nteme, bé a be ó lé eto mbaa mofoo nko muu wé a be lé etoŋɔ e we e.

¹³ Mbea Da a bee kuho waa ɛ, nye ntɔʼ kʉ ze jwɨʼ we nkoo, ntɔʼ lɛɛ e we ó: «Gwaʼ edwe.»

¹⁴ Nye ntɔʼ dihle, ze kuna e zimɨ é mbo. Tina, yé ó, yé a baapa diblɔ. Onkɛa ntɔʼ cyɛb. Nye e muu ó: «Ma soho, me lɛɛ e go ó: mʉŋa.»

¹⁵ Ndwè ntɔʼ mʉa si, di ndindil, ze taare lé elwib. Yesʉs ze timle nye nyɔŋ.

¹⁶ Bʉr bɨbɛh ze joʼo bʉa. Bé ntɔʼ dwe Zyɛm kum. Bé ó: «Sa nɨnɨ ngwiha mɨlɔb, yi pyal é bɨna ga!» Lɛɔ nteme ó: «Zyɛm, nyi ze gba kul bʉr ye nkul é monyʉl!»

¹⁷ Lɔɔ syɛɛla we waa, wé ntɔʼ kʉ ze jala lal Yʉda wiwɛh, ndwe é mɨlal myé a be é mompah ɛ.

Mɨlʉmlʉ mo Yʉanes Ndubʉr

¹⁸ Ompʉn mo Yʉanes ze taŋle nye mɨlɔb myaa mimyɛh.

¹⁹ Yʉanes ze jebe bʉʉ ompʉn be oba, lomo be ó, bé dîʼe e Da ó: «Zê go ó mʉr bɨh lé ebono ó, nye óze e? Zê bɨh bâʼla bono fih ɛ?»

²⁰ Bé ze to, to pyal gumo Yesʉs a be e. Bé e nye ó: «Yʉanes Ndubʉr lomo bɨh ó, bɨh ntaʼ, ze dî e go ó: “Zê go ó mʉr bɨh lé ebono ó, nye óze e? Zê bɨh bâʼla bono fih ɛ?”»

²¹ É jɔʼ gwar yaa, bé a pyal ó, kœb Yesʉs lé etiʼ mɨsyoblʉ é buobuo, baa b'a be e bɨnumò e, le baa b'a be e bɨjyɛm ɨ, le baa b'a sia e moleme e. Nye a si tiʼ nteme buobuo ontim, sa ó, bé bula bee.

²² Nye ze bɨha e be ó: «Bula to lɛɛ ga Yʉanes sa bɨn a bee le ejoʼo e. Ontim, bé mu ó lé ebâʼle bee. Bʉr o b'a dɨ tɨa ɛ, bé mu ó lé ekœʼ mbɨmbɨa. Mɨzɨzam, myé etiʼɔ. Ontoʼ, bé mu ó lé ejoʼo; odwè lé epàh é mofoo. Mbɨambɨa Lɔɔ, wé mu ó lé elɛɔ baanteʼenteʼe o bʉr.

²³ Mocyɛʼ mo mpom, mé ó e mʉr bɨsyɛɛla byam byé óbe, akol ebɔʼ lé ódumo nye e!»

²⁴ É jɔʼ mɨlʉmlʉ mo Yʉanes, myé a bula ɛ, Yesʉs ze taare lé elɛɛ ntuntuma bʉr, tiibe e Yʉanes ó: «Yé bɨn bé a to bee é feha si ɨ? Zê ka lé epɨʼba é pubo e?

²⁵ A no ó? Bɨn bé a to bee yé? Zê mʉr mbœra e bɨdime mɨkan ɛ? Tɨtoʼo! Bʉr o ndɨ ebwar bɨdime mɨkan, baa lé ekpɛl jaale e bɨtiʼ bɨnɨnɨ ɨ, bé ó ndɨ edi é mɨmbɛr mɨnjwɨɨbʉr.

²⁶ A no ó, bɨn bé a to bee yé ɛ? Zê ngwiha mɨlɔb ɛ? Me elɛɛ bɨn cyecye ó nɛɛ: nye elaa ngwiha mɨlɔb!

²⁷ Ebe, nye ó waa lɔb we ndɨ tila é Kalara Zyɛm ɨ. Yé ó tila ó: “Mbe! Me muno ze cen mwa mɨlʉmlʉ wam zi dolo, nye toʼ, to komlo go zi.”»

²⁸ Yesʉs, nye e be ó: «Me elɛɛ bɨn ó nɛɛ: é sa yiyɛh yé a nya sʉ ɨ, abe e mʉr ngwar ndɨ é bwaʼ le buo kum mpʉ mo Yʉanes. To kœb ó, mʉr ndɨ é twaʼbe é jwɨ̀ʼa mo Zyɛm ɨ, nye é bul bwaʼ, laa nye.»

²⁹ (Mɨzɨze mɨ bʉr mimyɛh, dam be ó, onwɨa o tœa, bé a be ó lé egʉa kʉ joʼlo sa Yʉanes a lɛɛ-lɛɛ ɛ. Bé a be ó si gʉa ó, Zyɛm ó ndɨ e l'ocɨcyel. No ó bé a ze sa ó, Yʉanes dùʼo be.

³⁰ Sa gwar, oFarizyɛŋ bé e l'oyeʼle o motie, bé a si kʉ bene bɨsa Zyɛm a bɛa tiʼe é leme we nɨ. Ebe no ó bé a baamɛʼle ó, Yʉanes dùʼo be e.)

³¹ Yesʉs ze lɛɛ ó: «Ebe no, me jwɨʼɨ bʉr o mya wiʼ e l'ozé? Bé nteme, bé enwɨɨla e wáa mbi bʉr?

³² Bé ekʉ nwɨɨla ó e bwɔɔncyom ndɨ é l'ebɨm e nkana ondindil, ka dɨ jebla. Bé ó: “Bɨh bɨ lʉo ndie, bɨn l'abwal! Bɨh bɨ jɛɛ bɨjɛɛ bɨ efie, bɨn l'agum jɨ!”

³³ Ebe, zea Yʉanes Ndubʉr a ze e, wé a be ó, ade bler, nkʉ nyʉl monwoʼ. Bɨn ntɔʼ ze e movoʼ tɨ. Bɨn bé ó: “Nye e l'eleme!”

³⁴ É jɔʼ yi, Mwan mo Mʉr, nyi ka pyal: nye ede mode le enyʉl monwoʼ. Bɨn bé ó: “Dwɛʼa ga. Nwaʼ mʉr, nye ó kʉ be ancyadoʼ, fufwɔʼ monwoʼ, fo onwɨa o tœa, fo bʉr o ndɨ é bul jwɨ̂ʼlɨ e mɨsyem ɨ!”

³⁵ Sa gwar, ocyoo mo Zyɛm wɛɛ, wi bi mokebe é bʉr bɨbɛh lé edu we e.»

Yesʉs é mbɛr mo Simɔn, Farizyɛŋ

³⁶ Nuu Farizyɛŋ ze baŋle Yesʉs ó, bé e boo nɔɔ, bé puhba mobo. Yesʉs ntɔʼ to mbɛr we, ze taare lé ede.

³⁷ É nkana yaa, yé a be ó e nuu mʉma a be é bul jwɨ̂ʼlɨ e mɨsyem ɨ. É jɔʼ nye a joʼo ó, Yesʉs a be ó lé ede é mbɛr Farizyɛŋ waa ɛ, nye ntɔʼ ze e ntaʼ piʼla é l'ekoʼ e albâtre lwɨŋla e labina,

³⁸ ntɔʼ cyɛb pie koo mo Yesʉs, pie mokʉ me, ntɔʼ jɨ é buobuo, myɛɛle me ntɔʼ bor mokʉ mo Yesʉs. Nye ntɔʼ du nye mokʉ e nʉm é mpyɔʼ-mpi-mpyɔʼ, pim me e mpuo we, ze lœm mokʉ me labina yaa.

³⁹ No ó, é jɔʼ Farizyɛŋ a baŋle Yesʉs ɨ, a bee syɛɛla yaa ɛ, nye ntɔʼ taare lé elwib é leme we tʉŋlʉ ó: «Nkʉ mʉr nwaʼ a be ó be, be ngwiha mɨlɔb cyecye nɛʼɛ, mpa nyi gʉa ó, mʉma lé ekuna e nye nwa, nye ó é bul jwɨ̂ʼlɨ e mɨsyem!»

⁴⁰ Yesʉs ze nʉa lwib. Nye e Farizyɛŋ nɨ ó: «Simɔn, me e sa elɛɛ go.» Simɔn, nye e nye ó: «Yeʼle, lwibɨ, me ejoʼo.»

⁴¹ Yesʉs ntɔʼ lɛɛ ó: «Yé a ze be ó, bʉr oba e mpɔla mɔn boo nuu mʉr a kʉl-kʉl bʉr mɔn ɨ. Nwaʼ, mɨsaŋ mɨ odenie mɨnter mɨtɛn; nuu, mɨsaŋ mɨ odenie mowʉm motɛn.

⁴² Mpʉ bɨbɛh oba, bé a baabe e nkul ebuulo mompɔla maa ɛ, mʉr waa ntɔʼ fuo bir be e ma. É bʉr oba baa, waa wáa ókpɛl mʉr waa, laa nuu ɛ?»

⁴³ Simɔn ntɔʼ bɨha e nye ó: «Me ejwɨʼ ó, yé ó waa a birɔ e mpɔla é buobuo e.» Yesʉs, nye e nye ó: «Gɨ kebe!»

⁴⁴ Nye ntɔʼ dwibra nko mʉma waa a be e. Nye e Simɔn ó: «Beŋɨ mʉma nwa. Me ze ó, go, é mbɛr go, gwɔɔ l'adwe me modibe mo ejwɨ̀ɨ mokʉ. Mʉma nwaʼ nyɛɛ, nyi bor me mokʉ e myɛɛle me, pim nteme me e mpuo we.

⁴⁵ Gwɔɔ, go baadu me emuʼ. Nyɛɛ, cye me pyal, nye agwaʼ lé edu me mokʉ e nʉm é mpyɔʼ-mpi-mpyɔʼ.

⁴⁶ Go baalœm me mulo é lʉ. Nyɛɛ, nyi lœm mokʉ mam labina!

⁴⁷ Ebe no, me elɛɛ go ó nɛɛ: é mpʉ nye ndɨ si lɛʼle mpwaʼ kpɛl no e, yé elɛʼle ó, Zyɛm, nyi pɛʼ nye bɨbaa bibyɛh nye a niʼe é lɔb mɨsyem mye e. Myé nteme, myé a be ó é bul buo! No ó, é jɔʼ Zyɛm lé epɛʼ bɨbaa bɨ ebebe ba bim ɨ, mʉr pɛʼɔ bɨbaa byaa ɛ, nye ókpɛl Zyɛm ó ba bim.»

⁴⁸ Nye ntɔʼ lɛɛ e mʉma ó: «Bɨbaa bɨ ebebe byo, bi pɛʼɔ!»

⁴⁹ Bʉr o bé e boo nɔɔ, bé a de e, bé ntɔʼ lɛɛ é mɨleme myɔɔ ó: «Nwaʼ mʉr, nye zé, waa ndɨ ejwɨʼ ó, nye e nkul epɛʼ bɨbaa Zyɛm lé eniʼe bʉr é lɔb mɨsyem myɔɔ ɛ?»

⁵⁰ Yesʉs ntɔʼ lɛɛ e mʉma ó: «Buʼo yo, yi tiʼ go! Toʼ é motala.»