Lʉkas 6 - Kálara Zyɛ̌m Edwán é mpʉ̌n

Sikʉlʉ é lɔb moho saba

¹ É guu moho saba, Yesʉs bé e l'ompʉn be, bé a be ó lé ecwɨɨ é bɨpeme bɨ ble. Ompʉn be, bé ze taare lé ebuʼo mɨtu mɨ ble é peme yaa, goblo, mwaʼle mpumo, deŋɔ.

² No ó bʉʉ oFarizyɛŋ, bé a ze dî e be ó: «Ebe yé bɨn lé esa sa ndɨ kɔmlʉ é moho saba ɛ?»

³ Yesʉs ntɔʼ bɨha e be ó: «Bɨn bé a baasi láa mpʉ David a sa, é jɔʼ bé e l'esama le, bé a be, mɨmo zoʼo e?

⁴ Zê bɨn bé agʉa ó, bé a si ni é l'Odia mo Zyɛm tʉŋlʉ ɛ? David bana nʉa bɨbler byé a be koma é nko paʼ duu mo Zyɛm ɨ, de guu paʼ tɨ. Pie tɨ, nye ze pɛ̂ʼ bʉr o sama ye ya, mʉr peh, mʉr peh, bɨbɛh ze de. To kœb ó, yé a be ó kɔmlʉ ó, mʉr deʼ bye, alaa ó mʉr waa, nye ó para.»

⁵ Yesʉs ze lɛɛ e be ó: «Mwan mo Mʉr ó ndɨ ejwɨʼ moho saba.»

Yesʉs lé etiʼ mʉr é moho saba

⁶ É guu moho saba, Yesʉs a be ó si ni é nuu mpah mɨnjwɨʼla, ze yeʼle bʉr. Tɨʼ é mpah mɨnjwɨʼla waa, yé a be ó e nuu mʉr a be e mbo ejʉm we é fwam-fwam ɨ.

⁷ No ó oyeʼle o motie bé e l'oFarizyɛŋ, bé a be ó lé ebaʼ Yesʉs, lé ebono bee nkʉ nye ótiʼ mʉr waa, dam be é moho saba. Bé a sa no ó, lé elamɔ nye é mbi syɛɛla nye ósa ɛ.

⁸ To kœb ó, Yesʉs a be ó lé ekʉ gʉa bɨjwɨʼ byɔɔ. Nye e mʉrʉm a be e mbo é fwam-fwam nɨ ó: «Mʉŋa si, cyɛba teme bʉr ba.» Nye ntɔʼ mʉa si, cyɛb cɨcyel.

⁹ Yesʉs ze lɛɛ e be ó: «Me edî bɨn ó: Zê embɨa ɛ? Zê ebebe ɛ? Etie ga lɨna, lé lé ekamle yé é moho saba ɛ? Zê etiʼ mʉr ɛ? Zê edimle mʉr ɛ? Yé ndɨ kɔmlʉ ɛ?»

¹⁰ No ó nye a ze to le edwɛʼ bɨbɛh. Nye e syoblʉ ó: «Syɛmɨ mbo.» Syoblʉ ntɔʼ sa nteme no, mbo mu nye mbɨmbɨa.

¹¹ Bʉʉ bʉr é bʉr o b'a bee no e, kʉ ze kpaa empime. Bé ntɔʼ lwibla lé epahle mbi ebebe bé a jala le esa Yesʉs ɨ.

Yesʉs lé epɛh ompʉn ewʉm e l'oba

¹² É jɔʼ yaa, Yesʉs ntɔʼ bere é l'ecwɨʼ kʉ, lé eto jwɨʼla e Zyɛm. Pum waa wiwɛh ntinɨ, wé a sie ó, njɨ nye lé ejwɨʼla e Zyɛm.

¹³ No ó, é jɔʼ mɛn, wé a lama ɛ, nye ze jebe ompʉn be, ntɔʼ pɛh bʉʉ o tɨ. Bim nye a pɛh ɛ, bʉr ewʉm e l'oba. Nye ntɔʼ cyel be é dia mɨlʉmlʉ mye.

¹⁴ Nye a pɛh ó, Simɔn, mʉr nye a jwɨr njɨblɨ Pyɛr ɨ, bé e ncyom we Andreas, ndwe e Jacques, Yʉanes, Filip, Bartelemi,

¹⁵ Mataos, Tomas, Jacques, mwan mo Alfe, Simɔn, mʉr a jebɔ ó, Mʉr ndɨ ekamle e bʉr o lal ɨ,

¹⁶ bé e Yʉdas, mwan mo Jacques, le Yʉdas Iskariot, mʉr a be ó, nye ókɛha nye e.

Mpampaʼ bʉr lé edu Yesʉs

¹⁷ É jɔʼ Yesʉs bé e l'ompʉn be, bé a fulo ecwɨʼ, pyalɔ gumo yé a be si e si ɨ, bé ze bɔma e l'ompʉn be ofih é buobuo. Yé a be nteme ó e ntuntuma bʉr. Baʼ, bé a duho ó, é nkana Yerʉsalɛm, bʉʉ, duho é lal Yʉda, bʉʉ nteme é nkɔra yé a be é nkpah maŋ ɨ. Nkɔra yaa, yé ó yaa ndɨ e nkana Tir e nkana Sidɔn ɨ.

¹⁸ Bé a ze ó, bé joʼla sikʉlʉ mo Yesʉs, le eze jʉmba mosyɛb mɔɔ. Nye a si tiʼ bʉr o b'a sia e bɨbɨbla mɨsisim ɨ.

¹⁹ Bʉr bɨbɛh é mpampaʼ bʉr yaa, bé a be ó lé esaa ó, bé dɨʼe kuna e nye, diŋa ó, bé ótiʼe. Nkul a be ó si duho é Yesʉs, nye ntɔʼ tiʼ mɨsyoblʉ mimyɛh myé a be tɨʼ ɨ.

Mocyɛʼ mo mpom e bɨkɔ́ɔlʉ

²⁰ No ó nye a ze dwɛʼ nko ompʉn be, bé a be e, ze lɛɛ e be ó: «Mocyɛʼ mo mpom, mé e bɨn, baanteʼenteʼe. Jwɨ̀ʼa mo Zyɛm, yé cyela ó, é l'efu e bʉr o ndɨ mpʉ bɨn ɨ.

²¹ Mocyɛʼ mo mpom, mé e bɨn, bʉr o ndɨ ejoʼo moza é bananaʼ ɛ, ebe, bɨn bé óde é de de, díle. Mocyɛʼ mo mpom, mé e bɨn, bʉr o ndɨ ejɨ é bananaʼ ɛ, ebe, modwe mɨn, mé óka fuʼla ó, bɨsʉhʉ.»

²² Yesʉs ze ko tɨʼ ó «Bɨn bé e mocyɛʼ mo mpom é jɔʼ bʉr lé enwim bɨn ɨ, le é jɔʼ bé lé epem bɨn, lwɨɨ bɨn, le enʉa bɨn mpʉ osyɛl be ebebe é lɔb taa buʼo bɨn lé ejyɛʼ boo Mwan mo Mʉr ɨ.

²³ Soha ga é dobo laa. Lyaha ga e bɨsʉhʉ. Myɛna monɨnɨ le embɨa, byé ebono bɨn é jobo kʉ. Bɨmpam byɔɔ, byé a be ó lé etíile ogwiha o mɨlɔb no.»

²⁴ «A vwaʼ e bɨn, mɨkukum, ebe, bɨn bɨ bɛa gbaŋɔ nkul é monyʉl é zi okum e l'ogbaa win.

²⁵ A vwaʼ e bɨn, bʉr mu si díle e, ebe, bɨn bé ódi é za. A vwaʼ e bɨn, bʉr o ndɨ edwo é bananaʼ ɛ, ebe, bɨn bé óbʉ modwe mpʉ mɨkuho. Bɨn bé ótime.»

²⁶ «A vwaʼ e bɨn é jɔʼ bʉr lé ebul seʼle bɨn ɨ, ebe, bɨmpam byɔɔ, byé a seʼle-seʼle mɨmpʉmpʉl mɨ ogwiha o mɨlɔb ó mpʉnʉ.»

Cwɨa ga e bʉr o dɔm bɨn

²⁷ «É paʼ win, bʉr o ndɨ ejoʼo me e, me elɛɛ bɨn ó nɛɛ: kpɛlɨ ga bʉr o dɔm bɨn. Cwɨa ga e bʉr o ndɨ enwim bɨn ɨ.

²⁸ Sʉʼo ga bʉr mocyɛʼ mo mpom é jɔʼ bé lé esyɛm bɨn ɨ. Yé be ó, bʉr, bé esa bɨn ebebe nɛʼɛ, jwɨʼla ga é l'efu lɔɔ.

²⁹ ǃƗ mʉr si jaa go bɛh é l'emuʼ le ejʉm nɛʼɛ, syɛmɨ nteme laa le emyɛl. ǃƗ mʉr si dɛʼ go len kʉr nɛʼɛ, birɨ nye, nye nʉŋa ndwe e dur.

³⁰ ǃƗ mʉr si jaʼ go sɔʼɔ nɛʼɛ, go à dwe nye ya. Adu bɨsa bʉr lé edɛn go e.

³¹ «Mpʉ bɨn lé egwɨm ó, bʉr saʼ bɨn ɨ, dɨʼe sa ga nteme be no.

³² Yé be ó, bɨn bé ekpɛl ó, njɨ baa lé ekpɛl bɨn nɛʼɛ, ebe yé bɨn lé enkɛɛ monyʉl ó, bʉr seʼla bɨn ɨ? Dam be bʉr o ndɨ é bul jwɨ̂ʼlɨ e mɨsyem ɨ, bé ekpɛl nteme baa lé ekpɛl be e.

³³ Yé be ó, bɨn bé ecwɨa njɨ e bʉr o ndɨ ecwɨa e bɨn nɛʼɛ, ankɛɛ ga monyʉl ó, bʉr seʼla bɨn. Dam be osyɛl o mɨsyem, bé esa nteme ó no.

³⁴ Yé be ó, bɨn bé ekʉl bʉr mɔn ó, pɛh njɨ baa bé óbuulo bɨn ya nɛʼɛ, ankɛɛ ga monyʉl ó, bʉr seʼla bɨn. Dam be bʉr o ndɨ é bul jwɨ̂ʼlɨ e mɨsyem ɨ, bé ekʉl bʉʉ osyɛl o mɨsyem mɔn e mbɛla é mɨleme ó, bé ófuʼla bula bi bim gwar yaa.

³⁵ Sa gwar, é nko paʼ win, kpɛlɨ ga bʉr o dɔm bɨn. Saʼ ga be bɨsyɛɛla bɨ ncwɨncwɨa. Kʉlɨ ga bʉr mɔn. Daʼ pɛh baa bɨn lé ebuʼla ó, bé óbuulo bɨn ya ɛ. Bɨn bé ókʉ bi myɛna tɨ! No ó bɨn bé óbe bwan mo Zyɛm ndɨ Lʉ bɨsa bibyɛh ɛ, ebe, nye mʉr tɨ, nye elɛʼle bʉr o ndɨ elono nye e, ncwɨncwɨa, bé e bʉr o jeele e laŋ.

³⁶ Jwɨʼɨ ga bʉr nkoo mpʉ Sɔŋ win ndɨ e njwɨʼa-nkoo e.»

Adwe ga bʉʉ bʉr mobe

³⁷ «Atiʼe ga mɨlɔb mɨ bʉʉ bʉr; Zyɛm nkʉʼ be, atiʼe myaa min. Adwe ga bʉr mobe, bɨn jaa dweŋɔ mobe. Pɛʼɛ ga bʉr bɨbaa bɨ ebebe bɨn bé a niʼe be e, Zyɛm nkʉʼ pɛʼ bɨn byaa nye lé eniʼe bɨn ɨ.

³⁸ Dwɛna ga; bɨn nteme nkʉʼ dweŋɔ. Zyɛm ójwɨʼ bɨn bya e kar ndɨ é bwaʼ mo e. Nye ókaale bɨn bya ó, le ekaale, le edine, le ekaale, le edine, to dʉʉ, guu paʼ swɨɨ si. Bim bɨn lé ekaale bʉʉ bʉr ɨ, bim yaa nteme ó nye ókaale bɨn ɨ.»

³⁹ Yesʉs a si bâʼle lwib e be é zi bɨkɨkɛna. Nye ó: «Ntim, nye abe e nkul eliʼle nuu ntim é zi. ǃNye si sa no nɛʼɛ, bɨbɛh oba, bé ólʉŋa é bɨ.

⁴⁰ Mpʉn álaa yeʼle we é duu. Sa gwar, ǃnye si jwɨʼ, é jwɨʼ, jwɨʼ nɛʼɛ, mpʉn waa ófuʼla di mpʉ mʉr a dɨ dwe nye sikʉlʉ ɨ.

⁴¹ «Ebe yé go lé ebee mpum ndɨ mɨɔ go é dih ɨ, gwɔɔ yɛɛ apa jʉʼra pehe go ndɨ enkɛɛ é dih lo e?

⁴² Wáa mbi go ndɨ e nkul elɛɛ e mɨɔ go ó: “Mɨɔ wam, paʼ cyɛb, me pɛʼɛ go mpum ndɨ go é dih ɨ,” gwɔɔ yɛɛ apa bee, nkʉ pɛʼ pehe ndɨ é laa lo dih ɨ? Anya-bɨkʉʉŋʉ nwa, taara pɛʼ pehe ndɨ é dih lo e! É jɔʼ yaa ó go óbee é sʉlʉlʉ, pɛʼ mpum ndɨ mɨɔ go é dih le e.»

Mokan ga mɨna

⁴³ «Mbɨambɨa lɨ, yé abe e nkul egumo bɨbebebebe bɨ mpumo. Bebebebe lɨ agumo mɨmpaŋ mɨ mpumo.

⁴⁴ Mʉr, nye edweʼe lɨ yiyɛh ó, é we mbi mpumo. Bé abe lé emwaʼ mpumo sɔɔ é kpaʼ. Bé abe lé emwaʼ bwan é syɛ̀l.

⁴⁵ Leme mʉr, wé ó mpʉ ekʉm. Mʉr ndɨ é mbɨa ɛ, nye enʉa bɨsa bɨ embɨa bye ó, tɨ, é l'ekʉm le tʉŋlʉ, ntɔʼ pyɛl-pyɛl bye kʉl. Mʉr ndɨ é bebe e, nye enʉa bɨsa bɨ ebebe bye ó, é leme we, ndɨ mpʉ bebebebe ekʉm le e, pyɛl bye kʉl. Sa mʉr ndɨ e ye lwɨŋla é leme we e, yé ó nʉm we lé epyɛl kʉl ɨ.»

Kɨkɛna é lɔb fumo

⁴⁶ «Ebe yé bɨn lé ejebe me ó: “Da ɔɔ, Da ɛɛ!”, bɨn yɛɛ l'akpɛl sa mpʉ me lé elɛɛ bɨn ɨ?

⁴⁷ Mbi mʉr lé eze boo me, joʼo mokan mam, ntɔʼ du me e, wé wáa?

⁴⁸ Me ólɛʼle bɨn mpʉ nye ndɨ ɨ. Nye enwɨɨla ó e mʉr a fumo mbɛr é mbi wiʼ ɨ. Nye a bɨr bɨpab bɨ tɨʼ ó, nye osi pu si, lime mompɨ, to pyal é bah ekoʼ. Nye ntɔʼ cyel modwii mo nkan mé ófuʼo bɨpab é bah ekoʼ yaa ɛ. Mpɨɨ ntɔʼ ni é dɨŋa-dɨŋa-dɨŋa, oboʼo ntɔʼ bila é mbɛr waa. Wé a be yɛɛ ó, abwiʼ, ebe mbɨambɨa fumo nye a fumo we e.

⁴⁹ To kœb ó, mʉr lé ejoʼo mokan mam, adu mpʉ mé lé elɛɛ ɛ, nye enwɨɨla ó e mʉr a fumo mbɛr, cyel we njɨ é bɨbwah kʉ ɨ. Nye a baapu bɨ, nkʉ cyel pab é bah ekoʼ. Nia mpɨɨ a ni ɨ, mbila oboʼo, bé a bila é biha bɨpab ɨ, mbɛr we nɨ, wé ntɔʼ ze swɨɨ si wiwɛh.»