Lʉkas 4 - Kálara Zyɛ̌m Edwán é mpʉ̌n

Satan lé eboblo Yesʉs

¹ Yesʉs mu lwɨŋla e Mbɨambɨa Sisim, nye ntɔʼ duho é dibe Yʉrdɛŋ. Mbɨambɨa Sisim ntɔʼ to e nye é feha si.

² Njwɨɨ moleme a si boblo nye gʉ, tɔɔ molu mowʉm monâ. É molu maa, nye a be ó, ade mode. Nye ze joʼo za pie tɨ.

³ Njwɨɨ moleme ntɔʼ ze lɛɛ e Yesʉs ó: «Yé be ó, go ó Mwan mo Zyɛm nɛʼɛ, lɛŋɨ ekoʼ lɨʼ ó, lé lihba bler.»

⁴ Yesʉs ntɔʼ lɛɛ e nye ó: «Yé ó tila é Kalara Zyɛm ó: “Mʉr, nye abe e nkul etiʼe njɨ e mode mé ome.”»

⁵ Njwɨɨ moleme ze nʉa nye tina, ze lɛʼle nye mɨlal mɨ si mimyɛh jɔʼ gwar.

⁶ Nye ze lɛɛ e nye ó: «Me ódwe go nkul mojwɨ̀ʼa é mɨlal miʼ mimyɛh, le okum e l'ogbaa o tɨ. Me a si bɛa dweŋɔ mye ó, me dweʼ mʉr nyiwɛh me ókpɛl ɨ.

⁷ Ebe no, ǃgo si bɨʼ mpom go si é mih mam lé edwiibɨ me nɛʼɛ, bɨsa bɨnɨ bibyɛh, byé di byaa byo!»

⁸ Yesʉs ntɔʼ lɛɛ e nye ó: «Yé ó tila é Kalara Zyɛm ó: “Go ejala le ebɨʼ mpom go si é mih mo Sɔŋ go Da Zyɛm. Dwiibɨ mʉr ó, njɨ nye.”»

⁹ Njwɨɨ moleme ze bâʼle nʉa nye, ze to e nye Yerʉsalɛm, é lon Mpah Zyɛm. Nye e nye ó: «Yé be ó, go ó Mwan mo Zyɛm nɛʼɛ, lyaha wâ, to cyɛb si,

¹⁰ ebe, yé ó tila é Kalara Zyɛm ó: “Zyɛm ótiile beengles be etie é lɔb go ó, bé dɨʼe kamle e go.”

¹¹ Yé ó tila nteme ó: “Bé ónkɛɛ go e mobo mɔɔ é l'efu ó, kʉ go nkʉʼ be, agʉra é l'ekoʼ.”»

¹² Yesʉs ze bɨha e nye ó: «Hɨʼɨ, ebe, yé ó tila é Kalara Zyɛm ó: “Aboblo Sɔŋ go Da Zyɛm.”»

¹³ É jɔʼ Njwɨɨ moleme a be si sil boblo nye mɨmbi mimyɛh ɛ, nye ntɔʼ duho é gumo Yesʉs a be e, lé ebono lʉʉ dobo.

Etɛɛrɨ e syɛɛ mo Yesʉs ɨ Galɨle

¹⁴ Yesʉs ntɔʼ to lal we Galɨle, nye mu lwɨŋla e nkul lé eduho boo Mbɨambɨa Sisim ɨ. Lɔɔ we ze jala lal waa wiwɛh.

¹⁵ Nye ze yeʼle-yeʼle bʉr é mompah mɨnjwɨʼla mɔɔ. Bʉr bɨbɛh bé a joʼo-joʼo nye e, ze seʼlɔ nye.

Bʉr o Nazarɛt, bé ebene Yesʉs

¹⁶ Yesʉs ze to kwar we Nazarɛt, gumo nye a sa mʉr ɨ. Moho saba ze pyal. Nye ze ni é mpah mɨnjwɨʼla, ebe, yé a bɛa be ó njwɨr we. No ó nye a ze cyɛb cɨcyel, ó nye láŋa peh Kalara Zyɛm.

¹⁷ Bé ze dwe nye mbom kalara ngwiha mɨlɔb Ezayi a tile e. Nye ze gwih kalara waa, ntɔʼ láa é peh yé a be tila ó:

¹⁸ «Sisim mo Da, wé e me. Nye a lœm me mulo, ntɔʼ lomo me ó, me toʼ le elɛɛ Mbɨambɨa Lɔɔ we boo baanteʼenteʼe. Nye a lomo me ó, me toʼ le elɛɛ e mɨkomo ó, mi pɛʼɔ é l'okomo. Me lɛŋɨ nteme ontim ó, bé mu ó lé ebee. Me lɛŋɨ baa lé etíilɔ ɛ, ó bɨ pɛʼɔ é mpel.

¹⁹ Me lɛŋɨ bʉr bɨbɛh ó, mbu Da a bee mbɨmbɨa ó, nye cwɨa e bʉr ɨ, wi pyal!»

²⁰ Yesʉs ze bula pile kalara waa, dwe mʉr a komo-komo okalara baa ɛ. Nye ntɔʼ di si. Bʉr bɨbɛh bé a be é mpah mɨnjwɨʼla ɛ, ntɔʼ dwɛʼɔ nye é tʉʉʉŋ.

²¹ No ó nye a ze lɛɛ be ó: «Yi syɛɛ muh lé edira lɔɔ mo Da ndɨ tila é Kalara Zyɛm ɨ, é jɔʼ bɨn joʼo me e!»

²² Bʉr bɨbɛh, bé a si boʼlo bɨsyɛɛla nye a dɨ sa ɛ, ndwe le ejehe Yesʉs ebe mbɨambɨa mokan nye a lɛɛ ɛ. Bé nteme ze lɛɛ ó: «Ntʉʼ mwan mo Yoseb nwaʼ ɛ?»

²³ No ó nye a ze lɛɛ e be ó: «Abe e mosono, bɨn bé ólɛɛ tina muh ó, me saʼ mpʉ kɨkɛna lé elɛɛ ó: “Dɔbra, taara tiʼ go mʉr tɨ.” Nteme, bɨn bé ólɛɛ e me ó: “Paʼ kʉ sa bɨh bɛɛ mbi mosima bɨh bé a joʼo ó, go a dɨ sa Kapernaʉm ɨ! Saʼ me wâʼ é lal go!”»

²⁴ Yesʉs ze kɛl mokan maʼ ó: «Me elɛɛ bɨn cyecye ó nɛɛ: abe e ngwiha mɨlɔb ngwar ndɨ enʉŋɔ e modile é lal we.

²⁵ Me elɛɛ bɨn cyecye ó nɛɛ: yé a be ó e mɨkuho mɨ bʉba é buobuo é lal Ɨzraɛl é jɔʼ mo Élie, é jɔʼ mpie a cyɛb, aka nwɨɨ tɔɔ mɨmbu mɨlɛl e peh, mya za a nyaŋla é si waa nyiwɛh ɛ.

²⁶ Sa gwar, Zyɛm a baalomo Élie boo guu kuho lal Ɨzraɛl. Nye a kʉ ka lomo nye ó njɨ boo bʉr o Sidɔn bé ome, é kwar Sarɛpta, gumo guu kuho mʉma, wé a di-di ɨ.

²⁷ Mɨzɨzam, myé a be ó é buo é lal Ɨzraɛl é jɔʼ mo ngwiha mɨlɔb Elize. Sa gwar, nye a baapɛʼ baa bé a be gʉʼ ɨ, sa yé a lœʼ be é mih mo Zyɛm ɨ. Nye a tiʼ ó njɨ Naman, mʉr Siria.»

²⁸ Njoʼa bʉr o mpah mɨnjwɨʼla, bé a joʼo mokan monɨ ɨ, bé ntɔʼ kʉ kpaŋɔ mompime.

²⁹ Bé ze fo nye é nkana, tinɔ nye, pyalɔ e nye é l'odumo o kwar, gumo nʉa ecwɨʼ, wé a be e, é l'efu le ebyɛʼ nye tɨʼ si.

³⁰ Sa gwar, Yesʉs a si laa paʼra wɔɔ, to.

Yesʉs lé edwih eleme é mʉr é mpah mɨnjwɨʼla tʉŋlʉ

³¹ Yesʉs a si bâʼle to Kapernaʉm, nuu kwar é lal Galɨle. É moho saba, nye ze taare lé edwe bʉr sikʉlʉ é mɨlɔb mo Zyɛm.

³² Bé a be ó si jehe mbi sikʉlʉ nye a dwe be e, ebe, yé a be ó e nkul mojwɨ̀ʼa Zyɛm a dwe nye e.

³³ É ntuntuma bʉr yé a be mpah mɨnjwɨʼla ɛ, nuu mʉr a be ó tɨʼ e l'eleme, bɨbla sisim. Nye ze bahle nkœme ó:

³⁴ «Hɛɛya, Yesʉs, mʉr Nazarɛt, bɨna e go bé e wáa lɔb? Zê go ze ó, ze jʉ me ɛ? Mɨ dweʼe go! Go ó Mʉr mo Zyɛm ndɨ ti ɨ!»

³⁵ Yesʉs ntɔʼ bâm e l'eleme. Nye e le ó: «Dibla nʉm go. Duha mʉr nɨ é nyʉl.» Eleme laa ze nkɛŋ mʉr nɨ si teme bʉr baa bɨbɛh, ntɔʼ duho nye é nyʉl, asa nye ebebe egwar.

³⁶ Bʉr bɨbɛh ze jehe, taare lé elwibla paʼra wɔɔ ó: «Wáa mbi mokan ndɨ mpʉʼ wi? Nye ó e nkul mojwɨ̀ʼa ndɨ ó, ǃnye si lɛɛ e bɨbɨbla mɨsisim ó: “Duha nye é nyʉl” nɛʼɛ, byé ntɔʼ bana duho!»

³⁷ Kum we ze myɛma, jala lal waa wiwɛh.

Yesʉs lé etiʼ mɨsyoblʉ é buobuo

³⁸ Yesʉs ze duho é mpah mɨnjwɨʼla waa, ze to mbɛr mo Simɔn. Tǐ mʉma mo Simɔn a be ó tina lé esyɛb, nyʉl lé eduo é bɨl-bɨl. No ó bé a ze dî e Yesʉs ó, nye tiʼɨ nye.

³⁹ Yesʉs ntɔʼ cyɛb kunokuno e nye, ze bâm e l'esyɛb. Esyɛb laa ntɔʼ sie é kɛŋ. Cye e cye yaa, mʉma nɨ ntɔʼ mʉa si, ze taare lé esea e be.

⁴⁰ É jɔʼ dobo, lé a lɨŋa ɛ, bʉr bɨbɛh, bé a baʼle-baʼle mɨsyoblʉ mɨmbi mɨmbi ɨ, bé ntɔʼ nkɛɛ mye, toŋɔ e mye, lé eto beɔ Yesʉs. Nye a kʉ ka dɨ kɛl mye ó njɨ mobo, myé ntɔʼ tiʼe!

⁴¹ Moleme, mé a be ó lé eduho bʉr é monyʉl é buobuo. Mé a si bʉ bɨtim, le elɛɔ ó: «Go ó Mwan mo Zyɛm!» No ó nye a ze bâm e moleme maa, ndwe le epɨr me mɨnʉm, ó mé l'alwib, ebe, mé a si kʉ gʉa ó, nye ó Lœma mulo mo Zyɛm.

Yesʉs lé elɛɛ Mbɨambɨa Lɔɔ

⁴² É jɔʼ mɛn, wé a lama ɛ, Yesʉs ze mʉa si, pyal kʉl, to é lʉn. Mpampaʼ bʉr ze saa nye, é saa saa, ntɔʼ ka beɔ nye. Bé ze jwɨʼla lehle nye, ó bé e boo nɔɔ diʼe, nye l'aka liʼe be.

⁴³ No ó Yesʉs a ze lɛɛ e be ó: «Yé ekʉ jala ó, me toʼ é byʉʉ bɨnkana bɨfih. Me tuna Mbɨambɨa Lɔɔ lé etiibe e jwɨ̀ʼa mo Zyɛm ɨ, ebe, Zyɛm a lomo me ó, me saʼ no.»

⁴⁴ No ó nye a ze to le etuno lɔɔ waa é mompah mɨnjwɨʼla mé a be é lal Yʉda ɛ.