Lʉkas 3 - Kálara Zyɛ̌m Edwán é mpʉ̌n

Mɨtuno mo Yʉanes Ndubʉr

¹ Yé a be ó é mbu ewʉm e tɛn Kɛɛza Tibɛrios a cyɛb njwɨɨ ɨ. Pɔŋtos Pilat a be ó ngoman é lal Yʉda; Erod Antɨpas nyɛɛ, njwɨɨbʉr é lal Galɨle. Ncyom we, die le Filip, a be ó lé ejwɨʼ mɨlal mɨ Itwire ndwe e Trakonitos. Lisanias nyɛɛ a jwɨɨ ó e lal Abilen.

² Anas bé e Kayɨfa ó b'a be ojwɨɨ be opara. É jɔʼ yaa ó Zyɛm a ze lwib e Yʉanes, mwan mo Zakari, nye ndɨ é feha si.

³ Pie tɨ, nye ze taare lé elɛɛ lɔɔ Zyɛm é nkɔra Yʉrdɛŋ yiyɛh. Nye a lɛɛ-lɛɛ e bʉr ó: «Gwɨma ga mobebe mɨn ɔɔ! Bɨn bé à dwir mɨleme ɔɔ! Bɨn bé à nʉa ndubo, ó Zyɛm pɛʼɛ bɨbaa bɨ ebebe bin ɔɔ!»

⁴ No ó, syɛɛla ye yaa, yé a si bɔma e sa ngwiha mɨlɔb Ezayi a tile e. Yé ó tila ó: «Mʉr, nye etuno é feha si, lé elɛɛ ó: “Komla ga zi mo Da ɔɔ! Bɨn bé à cyel mozi me é liim ɔɔ!

⁵ Mɨndwaŋ, myé biilɔ ɔɔ! Mocwɨʼ monɨnɨ ndwe e maa motia, mé bʉŋɔ é siilʉ ɔɔ! Mɨmpaʼa swɨʼɔ é liim, abe e mɨmboo ɔɔ! Bɨgumo ndɨ bɨnkono bɨnkono e, byé diʼe é pyah ɔɔ!

⁶ Bʉr bɨbɛh, bé óbee mpʉ Zyɛm ótiʼ bʉr yi ɔɔ!”»

Gwɨma ga mobebe mɨn. Bɨn bé à dwir mɨleme.

⁷ Ntuntuma bʉr, yé a ze ó, Yʉanes dùʼo be. Ebe no ó nye a lɛɛ e be ó: «Kampaŋa bɨgurokɔɔ yi, zé a pa kʉ lɛɛ e bɨn ó, bɨn bé e nkul ecɨŋ empime mo Zyɛm é jɔʼ nye ókpaa le e bɨn ɨ?

⁸ Guma ga mɨmpaŋ mɨ mpumo lé ejala e bʉr mu si gwɨma mobebe mɔɔ, dwir mɨleme e. Ataare ga lé elɛɛla paʼra win ó: “Bɨna ga bé e sɔŋ ó, Abraham,” ebe, me elɛɛ bɨn cyecye ó nɛɛ: Zyɛm óbɛm liŋ mokoʼ maʼ bwan mo Abraham.

⁹ Zwɨɨ, nye mu ó é car lé etwɛ̀l lɨ nko evuʼ. Nye ótwɛ̀l lɨ yiyɛh ndɨ agumo mɨmpaŋ mɨ mpumo e, guho ye é l'ebeʼe e siʼe.»

¹⁰ Ntuntuma bʉr, yé ze dî e nye ó: «Yé be no nɛʼɛ, bɨh bé ejala le esa yé ɛ?»

¹¹ Nye ntɔʼ lɛɛ e be ó: «Mʉr ndɨ e bɨdur bɨba ɛ, nye pɛʼɛ yʉʉ, dwe mʉr ndɨ fufwah ɛ. Mʉr ndɨ é twiha mode e, nye bɛʼɛ mʉʉ, dwe mʉr ndɨ é za ɛ!»

¹² Onwɨa o tœa nteme, bé a si ze, lé eze nʉa ndubo. Bé ze dî e Yʉanes ó: «Yeʼle, bɨh bɛɛ, bé ejala le esa nyá ɛ?»

¹³ Nye ó: «Daʼ nʉa ga tœa, ntaa bim tî win a lomo bɨn ó, bɨn nʉŋa ɛ.»

¹⁴ Bɨzima nteme ze dî e nye ó: «Bɨh bɛɛ nteme, bé ejala le esa nyá ɛ?» Nye ó: «Daʼ nʉa ga mɔn e nkul. Abuʼo ga bʉr mɨlɔb. Mɨɨla ga e bim myɛna bé lé edwe bɨn ɨ.»

¹⁵ To kœb ó, bʉr bɨbɛh, bé a be ó lé ebono Lœma mulo mo Zyɛm. Bé a be ó lé elwibla é mɨleme myɔɔ ó, Yʉanes óbɛm be mʉr waa.

¹⁶ Yʉanes ze lɛɛ e bɨbɛh ó: «Mɛm, me edù bɨn ó e modibe. Sa gwar, mʉr ndɨ e nkul mojwɨ̀ʼa, laa me e, nye eze. Me abe mbi mʉr lé ejala le etii nye mɨkol mɨ osilpah be e. Nyɛɛ, nye ódù bɨn ó é Mbɨambɨa Sisim ndwe e siʼe.

¹⁷ Nye e pyɛba é mobo. Nye ólwal mpumo, ntɔʼ pyɛb. Pie tɨ, nye ógwamle duò epyɛb yaa, ntɔʼ komo mɨpyɛba é bɨtaa bye. No ó, mpʉn nyɛɛ, nye ósyɛŋ nye é syɛŋ syɛŋ, ntɔʼ sʉ é siʼe ndɨ adime-dime e.»

¹⁸ Ebe no ó nye a ze bâʼle tɨe be é myʉʉ mɨlɔb é buobuo e, lé elɛɛ be Mbɨambɨa Lɔɔ.

¹⁹ To kœb ó, njwɨɨbʉr Erod Antɨpas a be ó si di e Erodiad, myaa ncyom we. Nye nteme a be ó si sa byʉʉ bɨsa bɨ ebebe é buobuo. É jɔʼ yaa yiyɛh, Yʉanes a be-be ó lé edwe nye mobe tɨ.

²⁰ No ó Erod a ze kɛl yʉʉ syɛɛla ebebe tɨ: gba Yʉanes é mbʉʼ.

Ndubo mo Yesʉs

²¹ É mpʉ ntuntuma bʉr, yé a be si fwal lé eze nʉa ndubo e, Yesʉs nteme a si ze, lé eze nʉa we. Mpʉ nye a be si sil dùŋɔ ɛ, jɨh tɨʼ nye a kʉ sil jwɨʼla e Zyɛm, jobo ntɔʼ ze bɔa,

²² Mbɨambɨa Sisim ze fulo nye é nyʉl é baaa, mpʉ epɨba. Twii ze duho é jobo kʉ, lé elɛɛ ó: «Go ó mwan kpɛl wam. Me ekʉ mɨɨla e go.»

Láa-ntan mo Yesʉs

²³ Yesʉs a taare lé esea syɛɛ ye ó, nye mu kwoʼ be mɨmbu mowʉm molɛl. Bʉr, bé a jwɨʼ ó, yé a be ó mwan mo Yoseb, a be é mpoʼo mo Heli ɨ.

²⁴ Heli a be ó mwan mo Matat; Matat, mwan mo Levi; Levi, mwan mo Mɛlki; Mɛlki, mwan mo Yanayi; Yanayi, mwan mo Yoseb;

²⁵ Yoseb, mwan mo Matatias; Matatias, mwan mo Amos; Amos, mwan mo Naum; Naum, mwan mo Esli; Esli, mwan mo Nagai;

²⁶ Nagai, mwan mo Mat; Mat, mwan mo Matatias; Matatias, mwan mo Semeyɨn; Semeyɨn, mwan mo Yoseh; Yoseh, mwan mo Yoda;

²⁷ Yoda, mwan mo Yoanan; Yoanan, mwan mo Resa; Resa, mwan mo Zorobabɛl; Zorobabɛl, mwan mo Salacyɛl; Salacyɛl, mwan mo Nɛri;

²⁸ Nɛri, mwan mo Mɛlki; Mɛlki, mwan mo Adi; Adi, mwan mo Kosam; Kosam, mwan mo Elmadam; Elmadam, mwan mo Ɛr;

²⁹ Ɛr, mwan mo Yesʉa; Yesʉa, mwan mo Eliezer; Eliezer, mwan mo Yorim; Yorim, mwan mo Matat; Matat, mwan mo Levi;

³⁰ Levi, mwan mo Simeɔn; Simeɔn, mwan mo Yʉda; Yʉda, mwan mo Yoseb; Yoseb, mwan mo Yonam; Yonam, mwan mo Eliakim;

³¹ Eliakim, mwan mo Melea; Melea, mwan mo Mena; Mena, mwan mo Matata; Matata, mwan mo Natan; Natan, mwan mo David;

³² David, mwan mo Yese; Yese, mwan mo Obed; Obed, mwan mo Boaz; Boaz, mwan mo Sala; Sala, mwan mo Naasɔn;

³³ Naasɔn, mwan mo Aminadab; Aminadab, mwan mo Admin; Admin, mwan mo Arni; Arni, mwan mo Ɛsrɔn; Ɛsrɔn, mwan mo Perɛs; Perɛs, mwan mo Yʉda;

³⁴ Yʉda, mwan mo Yakɔb; Yakɔb, mwan mo Ɨzak; Ɨzak, mwan mo Abraham; Abraham, mwan mo Tera; Tera, mwan mo Nakɔr;

³⁵ Nakɔr, mwan mo Serʉk; Serʉk, mwan mo Rehu; Rehu, mwan mo Falɛk; Falɛk, mwan mo Ebɛr; Ebɛr, mwan mo Sala;

³⁶ Sala, mwan mo Kayɨnam; Kayɨnam, mwan mo Arpaksad; Arpaksad, mwan mo Sem; Sem, mwan mo Noe; Noe, mwan mo Lamɛk;

³⁷ Lamɛk, mwan mo Matusala; Matusala, mwan mo Enɔk; Enɔk, mwan mo Yarɛd; Yarɛd, mwan mo Malelɛl; Malelɛl, mwan mo Kenam;

³⁸ Kenam, mwan mo Enɔs; Enɔs, mwan mo Sɛt; Sɛt, mwan mo Adam; Adam a be ó mwan mo Zyɛm.