Lʉkas 23 - Kálara Zyɛ̌m Edwán é mpʉ̌n

Yesʉs é mih mo Pilat

¹ No ó bʉr ó gwɨhla yaa, bé a ze mʉa e Yesʉs, toŋɔ e nye Pilat ye.

² Bé ze taare lé epurɔ nye. Bé ó: «Bɨh bé a si bee mʉr nwaʼ lé enyiŋ kul yih ó, yé kaŋa e Kɛɛza, ebe, nye amɛʼle ó, kul yih, yé ejala le ejɛna tœa mo Kɛɛza. Nye a si kʉ lɛɛ nteme ó, nye ó ndɨ Lœma mulo mo Zyɛm le njwɨɨbʉr.»

³ Pilat ze dî e nye ó: «Zê go ó ndɨ njwɨɨbʉr oYʉden ɛ?» Yesʉs ntɔʼ bɨha e nye ó: «Yé ó mpʉ go lɛɛ nɨ.»

⁴ É mokan maa, Pilat ntɔʼ lɛɛ ojwɨɨ be opara bé e ntuntuma bʉr yaa ó: «Mɨ pahle mʉr nwa, abee ó, nye egʉa lɔb ngwar é bɨsa bɨn lé epur nye e tɨʼ ɨ.»

⁵ Bé ntɔʼ lɛɛ okʉkʉ ó: «Bol sikʉlʉ nye lé edwe-dwe bɨh ɨ, yé eto le ebya bɨntʉ é lal Yʉda. Nye a taare lé esa no ó, é lal Galɨle. No ó, nyi ka ze kumo nteme gumo bɨna ndɨ ga wâʼ yi!»

⁶ Njoʼa Pilat a joʼo mɨlɔb myaa ɛ, nye ze dî ó: «Zê mʉr nwa, nye ó mʉr Galɨle ɛ?»

⁷ É jɔʼ nye a gʉa ó, Yesʉs a duho lal njwɨɨbʉr Erod Antɨpas a jwɨ̀ʼ ɨ, nye ntɔʼ cen Yesʉs boo nye. Erod nteme a be ó, ɨ Yerʉsalɛm é molu maa.

⁸ É jɔʼ bé a pyal e Yesʉs boo Erod ɨ, Erod kʉ ze laŋle soho, ebe, nye a si bɛa joʼo bʉr lé elɛɛ mɨlɔɔ lé etiibe e Yesʉs ɨ. Ebe no ó nye a be lé ejoʼo dweh ebee Yesʉs lé esa dweʼle nkul we e.

⁹ Nye ntɔʼ ntɛŋ nye buobuo motia. Yesʉs nyɛɛ l'abɨha tia ngwar.

¹⁰ Ojwɨɨ be opara bé e l'oyeʼle o motie, bé a be ó tɨʼ lé ebuʼɔ nye buobuo mɨlɔb.

¹¹ Erod bé e bɨzima bye kʉ ze kpeʼlɔ nye, le ezyɛmɔ nye le ebœrɔ nye bodime kan mo njwɨɨbʉr. Erod ntɔʼ buulo nye Pilat ye.

¹² Tina, yé ó, Erod bé e Pilat, bé a taare be ó bʉr o dɔm. No ó, é dobo laa ó bé a ka fuʼla ofo e.

¹³ É jɔʼ Yesʉs a bâʼle pyal boo Pilat ɨ, Pilat ze syɛŋ ojwɨɨ be opara bé e l'otamabʉr o lal, ndwe e mɨzɨze mɨ bʉr.

¹⁴ Nye ó: «Bɨn ze me e mʉr nwaʼ ó, nye ó lé egomlo bʉr é bebebebe zi. Mbe ga: mɨ pahle nye, bɨn lé ebee. Me abee ó, nye egʉa lɔb ngwar é bɨsa bɨn lé epur nye e tɨʼ ɨ.

¹⁵ Erod nteme be ó abee nye e mobe, ebe, nye si buulo nye me ye. No ó, mʉr nwa, nye abe e sa ebebe gwar nye sa, lé ejala ó, nye dwèʼ e!

¹⁶ Ebe no, me óturo nye lʉ, me òbir nye.» [

¹⁷ ]

¹⁸ Bʉr bɨbɛh ntɔʼ bɨn motwii kʉ kʉ lé elɛɛ ó: «Jʉʼo mʉr nwa. Go à bir bɨh Barabas.»

¹⁹ Tina, yé ó, Barabas waa ó b'a gbaŋɔ é mbʉʼ, ebe, bé e jyɛɛ ye, bé a si sa bɨntʉ é nkana. Mʉr a si laa muu tɨ.

²⁰ No ó mpʉ Pilat a be lé edɨ bir Yesʉs ɨ, nye ze bâʼle lɛɛ be ó, nye bir ó nye.

²¹ No ó, bé ntɔʼ lɛɛ okʉkʉ ó: «Cyèlɨ nye é klos kʉ! Cyèlɨ nye é klos kʉ!»

²² Pilat ntɔʼ bâʼle dî be tia é jɔʼ lɛl ó: «Ebe yé? Nye sa yáa sɔʼɔ ndɨ é bul bebe e? Mɛm, me abee sa ebebe nye a pa kʉ sa ó, nye dweŋɔ mobe mo jala e l'efie e. Ebe no ó me óbir nye e, me osi turo nye lʉ.»

²³ Bé ntɔʼ kʉ lɛɛ okʉkʉ ó: «Cyèlɨ nye njɨ é klos kʉ!» Lwib yɔɔ, yé ó b'a ka ntaa yaa mo Pilat é nkul.

²⁴ Nye ntɔʼ fuo mɛʼle ó, nye ósa ó, mpʉ bɛɛ, bé a lɛɛ ɛ.

²⁵ Nye ze bir mʉr bé a bul gwɨm, waa a gbaŋɔ é mbʉʼ ebe bɨntʉ nye a sa ɛ. Mʉr a si laa muu tɨ. No ó nye a ka fuo sa Yesʉs mpʉ ntuntuma bʉr yɛɛ, yé a gwɨm ɨ.

Zi mɨtuu mɨ efie é klos

²⁶ É jɔʼ Yesʉs a be lé etoŋɔ e nye e, bé ntɔʼ ze fuuba e Simɔn, mʉr Sirɛn, lé eduho é lʉn wé a be é nkpah nkana ɛ. Bɨzima ze mɛr nye, yɨmɔ nye ó, nye nkɛŋɨ klos mo Yesʉs, nye òdu nye é koo pihe.

²⁷ Mpampaʼ bʉr nɨnɨ, yé a be ó lé edu nye. Yé a be nteme ó e bʉba lé eze le ejɨ modwe é lʉ we e.

²⁸ Yesʉs ntɔʼ dwibra, dwɛʼ be. Nye ó: «Mɨsile mɨ Yerʉsalɛm! Ajɨ ga é l'efu lam. Jɨʼe ga é l'efu lɨn bɨn bʉr o tɨ, ndwe e bwan bɨn.

²⁹ Molu mo ebebe, mé eze. É jɔʼ yaa ó bé ólɛɛ ó: “Mocyɛʼ mo mpom, mé ó e mɨkun mɨ bʉba, baa b'a baabya bwan nkʉ dehle be ebel ɨ!”

³⁰ Bʉr, bé ólɛɛ e mocwɨʼ monɨnɨ ó: “Duma ga bɨh é monyʉl ɔɔ!” Bé ólɛɛ e mocwɨʼ motwaʼa ó: “Folɨ ga bɨh ɔɔ!”

³¹ Bé pa taare saŋɔ mɛm, bɨh lɨ, a dwɛʼra e bɨn, bɨdwidwe!»

³² É jɔʼ bɨzima byé a to e Yesʉs lé eto jʉ nye e, byé a si to nteme e bɨzilngan bɨba.

Yesʉs, nyi bomlɔ é klos

³³ Bé ze pyal gumo bé lé ejebe-jebe ó, Koko lʉ ɨ. Bé ze bomlo nye e mosen, bɨnɔ nye é klos kʉ. Cyèlɔ nteme bɨzilngan é bɨklos: yiʼ, é mbo ejʉm; yʉʉ, é mbo emyɛl.

³⁴ Yesʉs ntɔʼ lɛɛ ó: «Da, pɛʼɛ be baa ebebe go niʼe be e, ebe, bé agʉa sa bé lé esa ɛ.» Bɨzima ntɔʼ kabla mɨkan mye, doŋɔ mye ebya.

³⁵ Bʉʉ bʉr o lal waa, bé a be ó si cyɛb é gumo yaa lé ebee. Otamabʉr o lal bɛɛ, bé a be ó lé etamɔ nye. Bé ó: «Nye a si tiʼ bʉr ofih. Nye kaʼ tiʼ nye mʉr tɨ, nkʉ nye ó Lœma mulo mo Zyɛm le waa Zyɛm a kʉ pɛh ɛ!»

³⁶ Bɨzima nteme, byé a be ó lé ekpeʼle nye. Byé ze dihle, dweŋɔ nye monwoʼ.

³⁷ Bé ó: «Yé be ó, go ó njwɨɨbʉr oYʉden cyecye nɛʼɛ, kaʼ tiʼ go mʉr tɨʼ ʉʉ!»

³⁸ É lʉ we kʉ, bé a be ó si cyèl ebɔm e mɨtila ó: «Nwaʼ ó ndɨ njwɨɨbʉr oYʉden.»

³⁹ É bɨzilngan bɨba byé a cyèlɔ é bɨklos ɨ, nuu mʉr ngwar tɨʼ a si tam Yesʉs. Nye e nye ó: «Ntʉʼ go ndɨ Lœma mulo mo Zyɛm ɨ? Kaʼ tiʼ go mʉr tɨʼ be. Go à tiʼ nteme bɨh!»

⁴⁰ Waa nuu ntɔʼ bâm e nye. Nye ó: «Zê go akpɛɛ ba Zyɛm ɛ? Bɨna ga e boo nɔɔ ó ndɨ edweŋɔ mobe mo jala le efie mbi ngwar.

⁴¹ Bɨna ó ndɨ ejala e mbi tuu wi, ebe, bɨna ó b'a sa bɨsyɛɛla ndɨ é bul bebe e. Nyɛɛ a baasa syɛɛla ebebe gwar.»

⁴² No ó nye a ze lɛɛ e Yesʉs ó: «Yesʉs mana, go à toŋlo me é jɔʼ go muno cyel jwɨ̀ʼa yo cyecye e.»

⁴³ Yesʉs, nye e nye ó: «Me elɛɛ go cyecye ó nɛɛ: é muh é dobo lɨ, bɨna e go bé ódi ɨ Paradis!»

Efie mo Yesʉs

⁴⁴ Ngbaa le eka be, yé mu lé eto saa teme moho nɛʼɛ, edurʉ, lé ntɔʼ fulo é si nwaʼ nyiwɛh, to pyal é mowala molɛl mo bii kʉʼ.

⁴⁵ É jɔʼ edurʉ lé a dɨ mara be no e, kan ebe, wé a be-be cyèla é Mpah Zyɛm tʉŋlʉ ɨ, wé ntɔʼ nyɛɛ é wɛɛɛb teme tɨ.

⁴⁶ Yesʉs ntɔʼ jwɨʼla e Zyɛm lé eyɨm twii ó: «Da, mɨ bir sisim wam é mobo mo!» Jɨh tɨʼ nye a kʉ sil lwib, nye ntɔʼ fil mɨswɨh mɨ epihe.

⁴⁷ Njwɨɨ nter bɨzima a be tɨʼ ɨ, mbea nye a bee sa yiyɛh yé a syɛɛlɨ ɨ, nye ntɔʼ dwe Zyɛm kum. Nye ó: «Mʉr nwaʼ a bana kʉ be ó cɨcyel mʉr!»

⁴⁸ No nteme ó mpampaʼ bʉr, yé a ze, lé eze bee sa yé a syɛɛlɨ ɨ. Mbea bé a bee no e, bé ntɔʼ taare lé ebula e mobo é mɨlʉ.

⁴⁹ Jyɛɛ Yesʉs bé e bʉba bé a du nye é koo pihe, taare é lal Galɨle, to kumo ɨ Yerʉsalɛm ɨ, bé a dɨ cyɛb ó, ba pɨnʉ, lé ebeɔ bɨsyɛɛla byaa bibyɛh.

Muu mo Yesʉs, wé edebe é foo

^50-51 Nuu mʉr a be ó tɨʼ é sama bʉr yaa, die le Yoseb, mʉr Arimate, nkana oYʉden. Nye a be ó cɨcyel mʉr lé esa-sa bʉr bɨsyɛɛla bɨ ncwɨncwɨa ɛ. Nye a be ó lé ejoʼo dweh ebee Zyɛm lé ecyel jwɨ̀ʼa ye cyecye. Nye nteme a be ó mʉr ngwar é Bʉm Nɨnɨ. Sa gwar, nye a baamɛʼle bɨjwɨʼ bʉʉ bé a bà, tiibe e Yesʉs ɨ, bé e syɛɛla yɔɔ.

⁵² Mʉr nɨ ntɔʼ mʉa, to bee Pilat, to jaʼ nye muu mo Yesʉs. Mpʉ Pilat a mɛʼle e, Yoseb ze bâʼle pyal gumo muu mo Yesʉs wé a be cyèla ɛ.

⁵³ Nye ze fil we si, dîble we e ndomo kan é pumo-pumo, ntɔʼ to dɨl we é foo, tuba nguʼ ekoʼ. Foo waa a be ó waa bé a baapa dɨl mʉr tɨʼ ɨ.

⁵⁴ Tina, yé a be ó é dobo bé a kʉmsa ebʉʼ ɨ. Moho saba, wé a be ó, wé mu kunokuno le epyal.

⁵⁵ É jɔʼ Yoseb a to dɨl muu mo Yesʉs ɨ, bʉʉ bʉba ntɔʼ bee, ze duŋɔ nye, lé eto beɔ foo, beɔ nteme mpʉ muu, wé a ka jyɛʼɔ é foo e. Bʉba baa ó b'a bɛa be é mpampaʼ bʉr yé a du Yesʉs ɨ, taare é lal Galɨle, to kumo ɨ Yerʉsalɛm.

⁵⁶ É jɔʼ bé a sil bee sa yiyɛh ɛ, bé ze fiʼ, toŋɔ nkana, to komlɔ mulo mo elama ndwe e labina. Mpʉ moho saba, wé a pyal ɨ, bé ze di gumo gwar, atɨla, lé edu mompene mɔɔ lé edwɛʼ moho saba ɛ.