Lʉkas 21 - Kálara Zyɛ̌m Edwán é mpʉ̌n

Ndwɛa kuho mʉma

¹ Ngbaa le eka be nɛʼɛ, Yesʉs, nyi syɛm mih, bee ó obil o bɨsa lé egba mɨndwɛa myɔɔ é wolo mɨndwɛa é jahla bii mo Zyɛm ɨ,

² le ebee nteme nuu anteʼenteʼe kuho mʉma lé egba bwa o mih mo kaba moba.

³ Nye ze lɛɛ e l'ompʉn be ó: «Me elɛɛ bɨn cyecye ó nɛɛ: anteʼenteʼe kuho wi, wé be ó si bul gba mɔn, laa bʉr bɨbɛh,

⁴ ebe, bʉʉ bɨbɛh, mpʉ bé ndɨ é twiha bɨsa ɛ, bé gba ó, paʼ mɔn ndɨ abe be e nyɔm é l'ekʉm lɔɔ ɛ. Nyɛɛ, dam be é l'enteʼe le tʉŋlʉ, nye gba ó, bim yiyɛh nye be e ye e, mobi me mɨmɛh.»

Mpah Zyɛm Yerʉsalɛm muno ze gbɔa

⁵ É jɔʼ yaa, bʉʉ ompʉn be, bé a be ó lé elwibla e jehe é mɨleme, tiibe e lɔb Mpah Zyɛm, mpʉ nye a fumɔ e mbɨambɨa mokoʼ e. Nye a fumɔ ó e bɨsa bʉr, bé a dwe-dwe Zyɛm ɨ. No ó Yesʉs a lɛɛ ó:

⁶ «Bɨsa bɨn lé ebee bi, é mɨmoho lé eze e, pɨpɨm gwar, yé aŋa ka liʼ cɨcyel wâ, nkʉ ekoʼ egwar kɛla é lʉʉ kʉ. Mɨmɛh, mé ósil lé enkɛŋɔ si!»

Bɨsa ndɨ ecemle esie e mbi jɔʼ yiʼ ɨ

⁷ No ó bé a dî e nye ó: «Yeʼle, bɨsa bɨnɨ, byé ósyɛɛ é yáa jɔʼ? Nteme, yáa dweʼle yé ólɛʼle ó, byé muno ze pyal, bibyɛh ɛ?»

⁸ No ó Yesʉs a lɛɛ ó: «Diʼe ga ncye! Abir ga ó, mʉr gomla bɨn é bebebebe zi. Buobuo bʉr, bé óze e die lam, lé elɛɛ-lɛɛ ó: “Mɛm ó di Lœma mulo mo Zyɛm!” Bé ólɛɛ nteme ó: “Jɔʼ nɨ, yé mu ó kunokuno le epyal!” Sa gwar, mʉr adu ga be.

⁹ Bɨn bé ójoʼo bʉr lé elwib-lwib mɨlɔb mɨ mɔm le ejoʼo nteme mpʉ bʉr mu lé ebɨn mɨlʉ, kaŋa e mojwɨ̀ʼa ɛ. É jɔʼ bɨn bé ójoʼo no e, mʉr ayi joʼo bʉa. Yé ejala ó, bɨsa byaa taara syɛɛlɨ. Dam be no, esie e mbi jɔʼ yi, lé ákwoʼ kpahbe pyal.»

¹⁰ No ó nye a bâʼle lɛɛ e be ó: «Yiʼ kul bʉr, yé ólwimla e yʉʉ; nwaʼ njwɨɨ lwimla e nuu.

¹¹ Si óncyeŋa bɨgumo bɨgumo. Za ónyaŋla. Bɨnumò, byé ópyal-pyal é byʉʉ bɨgumo. Bɨsyɛɛla ndɨ esa ó bʉr joʼa bʉa ɛ, ndwe e bɨbwaʼbwaʼ bɨdweʼle bɨ nkul, byé ósyɛɛ é jobo kʉ.

¹² «No ó, é jɔʼ bɨsa byaa bibyɛh, byé óbe, l'apa syɛɛlɨ ɨ, bé ótaare lé enaʼ bɨn mobo é nyʉl, le etíile bɨn. Bé óto e bɨn é mompah mɨnjwɨʼla mɔɔ, le egba bɨn é mɨmbɛr mɨmbʉʼ. Bé óto e bɨn é mih mɨnjwɨɨbʉr myɔɔ le ongoman bɔɔ é lɔb wam, lé eto pur bɨn le ebuʼɔ bɨn mɨlɔb gʉ.

¹³ Bɨn bé ósaŋɔ-saŋɔ no ó, bɨn nkʉʼ gʉa lɛɛ ocyecye bɨn lé egʉa é lɔb wam ɨ.

¹⁴ Ebe no, bɛa tiʼe ga é mɨleme min ó: bɨn bé ákwoʼ syɛl ba e bɨn bʉr o tɨʼ, tiibe e nkar bɨn bé ófuo monyʉl mɨn e tɨʼ ɨ,

¹⁵ ebe, me mʉr tɨ, me óbɛa dwe bɨn mokan e pɨʼ, é mbi ndɨ ó, bʉr o ndɨ esa bɨn mongan ɨ, bé óbe, abe e nkul eka pɨr, nkʉ tɨ mɨlɛa min ɨ.

¹⁶ Obyɛl bɨn, bé ókɛha bɨn ó, bɨn jʉŋɔ. Obɨɔ bɨn, mɨmbyɛl min e l'ofo bɨn, bé ókɛha bɨn. Bʉʉ bʉr é l'esama lɨn, bé ójʉŋɔ.

¹⁷ Bʉr bɨbɛh, bé ónwim bɨn é lɔb wam.

¹⁸ Sa gwar, koho mpuo ngwar é lʉ win, wé ákwoʼ dim.

¹⁹ Tiʼɨ ga monyʉl mɨn é zi bihbe win.»

Mɨtuu mɨ nkana Yerʉsalɛm

²⁰ «No ó, é jɔʼ bɨn bé óbee mosama bɨzima lé ebʉmra Yerʉsalɛm é nka ɛ, gʉŋa ga ó, jɔʼ Yerʉsalɛm, yé óliʼ é tiilʉ, aka be e bʉr ɨ, yé mu ó kunokuno le epyal.

²¹ É jɔʼ yaa, bʉr o bé óbe Yʉda ɛ, bé ejala le ekpɛɛ, toŋɔ é mocwɨʼ. Baa bé óbe ɨ Yerʉsalɛm tʉŋlʉ ɨ, bé ejala le ekpɛɛ, to ká ká jaabe. Baa bé óbe é mokwar ɨ, bé aka jala le ebâʼle ni é nkana.

²² Ebe, yé óbe ó jɔʼ Zyɛm ókuna bʉr be e. Yé ósyɛɛ no ó, lé edira lɔɔ ndɨ tila é Kalara Zyɛm ɨ.

²³ A vwaʼ e baanya-mobum le baabyɛɛ é molu maa! Ebe, bɨsa byé ógba bʉr bʉa é mɨleme e, byé óbul syɛɛ é si nwa. Zyɛm ólɛʼle nteme mpʉ nye lé ekpaa empime le e bʉr onɨ ɨ.

²⁴ Baʼ bʉr, bé ójʉŋɔ é mɨfòŋ. Bé óto e bʉʉ é l'okomo boo bʉr o bɨkul bɨfih. No ó bɨkul byaa, byé ótiile Yerʉsalɛm e mokʉ mɔɔ, to pyal é jɔʼ jɔʼ yɔɔ, yé óbe si laa ɛ.»

Mpʉ Mwan mo Mʉr óbula ze e

²⁵ «Bɨbwaʼbwaʼ bɨdweʼle bɨ nkul ndwe e mosima, byé ódɨ syɛɛ é dobo e l'alomo ndwe e baatwitwɛn tʉŋlʉ. Oboʼo o maŋ, bé ólaŋle pɨʼba le edùo. Bʉr o bɨkul bɨ si nwaʼ bibyɛh, bé ójoʼo bʉa, mɨleme é mo é zaaama.

²⁶ Bʉa óbul mɛr bʉr é mɨleme, bé ntɔʼ puro mpal lé etoŋlo sa yé óbe, yé mu lé eze syɛɛ é si nwaʼ ɛ, ebe, bɨsa bɨ nkul bɨnɨnɨ ndɨ é jobo kʉ ɨ, byé ólwɨʼlɨ.

²⁷ É jɔʼ yaa ó bé óbee Mwan mo Mʉr lé eze é nkur tʉŋlʉ, lwɨŋla e nkul ndwe e buobuo moncɛnba ɛ.

²⁸ É jɔʼ bɨsyɛɛla byaa, byé ótaare lé esyɛɛlɨ ɨ, soha ga. Bɨn bé à syɛm mih kʉ. Jɔʼ Zyɛm ódwih bɨn é mpila ebebe lɨn é pololo e, yé mu ó kunokuno l epyal.»

Sikʉlʉ lɨ figye lé edwe e

²⁹ No ó Yesʉs a ze sa be kɨkɛna yi. Nye e be ó: «Dwɛʼa ga lɨ figye ndwe e byʉʉ bɨlɨ é buobuo.

³⁰ Jɨh tɨʼ lɨ, yi dwanba, bɨka mu lé etaare lé epah, bɨn bé edweʼe ó, nkono, yé mu ó kunokuno le epyal.

³¹ Mpʉ yaa nteme ó, é jɔʼ bɨn bé óbee bɨsyɛɛla bibyɛh byaa lé esyɛɛlɨ ɨ, gʉŋa ga ó, jɔʼ Zyɛm ócyel jwɨ̀ʼa ye cyecye e, yé óbe ó, yé mu kunokuno le epyal.

³² Me elɛɛ bɨn cyecye ó nɛɛ: mya bʉr wiʼ l'apa sie, bɨsyɛɛla bɨnɨ bibyɛh, byé ósyɛɛlɨ.

³³ Kʉ e si, byé ólaa; mɨlɔb myam myɛɛ, myé ódi njʉmdia e njʉmdia.»

Diʼe ga ncye

³⁴ «Diʼe ga ncye! Monyʉl mɨn, mé amu jaa cyɛʼ ebe mpwaʼ edɨɨ ndwe e mpur monwoʼ, nkʉ ebe mɨpɛhla mɨ tiʼ si nwa. Esie e mbi jɔʼ yi, lé amu jaa pyal bɨn motwɨra, mpʉ tir lé etwɨra é jɔʼ nyi bil é syɛm ɨ.

³⁵ Dobo laa, lé ópyal bʉr bɨbɛh ndɨ é si nwaʼ ɛ.

³⁶ Diʼe ga nkehe. Jwɨʼla ga é jɔʼ yiyɛh, ó bɨn nkʉʼ syɛhle bɨsyɛɛla bɨ moho waa bibyɛh. Jwɨʼla ga nteme ó, bɨn nkʉʼ be e nkul ecyɛb é mih mo Mwan mo Mʉr.»

³⁷ Yesʉs a dwe-dwe bʉr sikʉlʉ é jahla bii mo Zyɛm ó, é mɨmoho. No ó, é mpii bɨkʉʼ nyɛɛ, nye a to ja-ja ó, é l'ecwɨʼ bé lé ejebe ó, Ecwɨʼ le olivye e.

³⁸ No ó, é dwine mɛn ntuʼkolo, bʉr bɨbɛh, bé a be ó si to é jahla bii mo Zyɛm, lé eto joʼlo mpʉ nye a dɨ dwe bʉr sikʉlʉ ɨ.