Lʉkas 2 - Kálara Zyɛ̌m Edwán é mpʉ̌n

Ebyɛl mo Yesʉs-Krɨst

¹ Twii mojwɨʼa a be ó si duho boo Kɛɛza Ogust ó, bʉr bɨbɛh, bé toʼ, to tibla mie é láŋ-bʉr.

² No yé a be ó jɔʼ efoʼ ó, bé láŋa bʉr é jɔʼ Kirinios a be ngoman é lal Siria ɛ.

³ No ó bʉr bɨbɛh bé a ze to, to dɨ tibla é láŋ-bʉr, mʉr nyiwɛh é nkana bɨmpam bye byé a di-di ɨ.

⁴ Yoseb nteme ze mʉa é nkana Nazarɛt é lal Galɨle, ze to lal Yʉda. Gʉʼ ó nye a to, nko nkana eveh le, Betɛlɛhɛm, gumo njwɨɨbʉr David a byɛl ɨ. Nye a to gʉʼ ó, ebe, nye a be ó mʉr mpoŋbʉr mo David.

⁵ No ó nye a to tibla é láŋ-bʉr, bé e Maaria, mʉma bé e nɔɔ bé a be e l'etie le eba ɛ. Maaria a be ó, nye mu e l'ebum é ntuumo.

⁶ É jɔʼ jɔʼ ebya, yé ze pyal nye e, bé a be ó, bé mu gʉ.

⁷ Nye ntɔʼ bya ma mʉrʉm, mwan modweʼe we. Nye ze dîble nye é kan, jyɛʼ nye é dwom. Dwom yaa, yé a be ó gumo bɨtab byé a de-de mode mɔɔ ɛ, ebe, yé a baaka be e ja é mbɛr ojyoo.

Okobla o bɨntœme bé e beengles

⁸ Yé a be ó e bʉʉ okobla o bɨntœme é nkɔra yaa, bɛɛ lé elɛŋ pum waa kʉl, gumo bé a cyɛb é vaa lé ekoblo daa e bɨntœme lɔɔ ɛ.

⁹ Nuu engles mo Da ntɔʼ pyal be motwɨra. Moncɛnba mo Da, mé ntɔʼ pan é gumo bé a be e. Bé ntɔʼ taare lé esaʼ é zɔm-zɔm é bʉa.

¹⁰ No ó engles a ze lɛɛ e be ó: «Ajoʼo ga bʉa. Mbe ga: mɨ ze bɨn e Mbɨambɨa Lɔɔ! Bʉr o kul yin, bɨbɛh, bé óbul soho we.

¹¹ É pum wi, é nkana mo David, Tiʼbʉr win, nyi byɛl! Nye ó Lœma mulo mo Zyɛm le Tî ga wina.

¹² Mbe ga: é mpʉʼ ó bɨn bé ódweʼe nye e. Bɨn bé ókœb mwan, nye osi dîblɔ é kan, njyɛʼa é dwom, gumo bɨntœme ndɨ ede mode e.»

¹³ Cye e cye yaa, esama e dɔm e beengles ze duho é jobo kʉ, ze kœb engles waa. Bé e boo nɔɔ bɨbɛh ntɔʼ dwiibɨ Zyɛm. Bé ó:

¹⁴ «Kum mo Zyɛm, nye bera kʉ, laa jobo e l'ejyoo le ebantɛn. Bʉr o si nwa, bé diʼe é motala, ebe, Zyɛm, nyi bee be mbɨmbɨa.»

¹⁵ É jɔʼ beengles, bé a liʼe be, ntɔʼ bâʼle berɔ é jobo kʉ ɨ, okobla o bɨntœme ze lɛɛla paʼra wɔɔ ó: «Ncʉʼ ga Betɛlɛhɛm. Bɨna toʼ, to bee ga sa syɛɛlɨ gʉʼ ɨ, mpʉ Da tɨe bɨna ga ɛ.»

¹⁶ Bé ze nkɔŋa e mɨkam, to beɔ Maaria bé e Yoseb ndwe e ma cyee, njyɛʼa é dwom, gumo bɨntœme ndɨ ede mode e.

¹⁷ É jɔʼ okobla o bɨntœme, bé a bee be e, bé ze taŋle be mokan mɨmɛh beengles bé a lɛɛ be, tiibe e mwan waa ɛ.

¹⁸ Bʉr bɨbɛh bé a joʼo lɔɔ waa ɛ, ze bul jehe sa okobla o bɨntœme bé a lɛɛ, tiibe e mɨlɔb myaa ɛ.

¹⁹ Maaria nyɛɛ ze baʼle mɨlɛa myaa mimyɛh é leme we, ze taare lé epahle mye é puuu.

²⁰ Pie tɨ, okobla o bɨntœme ze mʉa, fiʼɔ. Bé a si to le edwiibɨ Zyɛm é buobuo ebe bɨsa bé a joʼo le ebee e. Bɨsyɛɛla byaa bibyɛh, byé a kʉ be ó mpʉ beengles, bé a lɛɛ be e.

²¹ Pie molu mwom, Yesʉs nye osi byɛl, yé ntɔʼ pyal jɔʼ bé a jala le esa nye mpʉn ɨ. Bé ntɔʼ sa nye nya, le ejwɨr nye die ó, Yesʉs, ebe, die laa ó engles a lɛɛ be, nye l'apa nʉŋɔ ebum.

Yesʉs lé eto Mpah Zyɛm

²² Pie tɨ, jɔʼ Maaria bé e Yoseb, bé a jala le edu motie mo Moyiz tiibe e baabyɛɛ ɛ, ze pyal. Moyiz a tiile baabyɛɛ etie ó, abyɛɛ nyiwɛh taara to pubɔ pie byɛɛ é jahla bii mo Zyɛm. Bé ze to e mwan wɔɔ Yerʉsalɛm, to lɛʼlɔ Da nya.

²³ Yé ó mpʉ yé ndɨ tila é Motie mo Da é lʉ we e. Yé ó tila ó: «Ma mʉrʉm ótaare nya sʉ ɨ, nye ekʉ jala le edweŋɔ Da.»

²⁴ Bé nteme, bé a si to dwe motwina ndɨ mɨtila é Motie maa ó, bé dweʼ e. Yé a be tila ó: «Dweʼ ga Da mɨndwɛa, nkʉ bɨduduo bɨba, myɛl e njʉm, nkʉ mopɨba moba, myɛl e njʉm.»

²⁵ To kœb ó, yé a be ó e nuu mʉr ɨ Yerʉsalɛm, die le Simeɔn. Nye a be ó cɨcyel mʉr le ebul dwaabe Zyɛm. Nye a di-di ó, lé ebono mʉr ódwaŋle bwa b'Ɨzraɛl mɨleme e. Mbɨambɨa Sisim a be ó é nye.

²⁶ Nye a si bɛa lɛɛ e nye é zi Mbɨambɨa Sisim ó, nye óbee Lœma mulo mo Zyɛm Da a kɛʼ ɛ, nye l'apa dwè.

²⁷ É jɔʼ yaa, nye a be ó é jahla bii mo Zyɛm mpʉ Mbɨambɨa Sisim a pa tɨe nye e. Pyala obyɛl mo Yesʉs, bé a pyal e mwan wɔɔ, ó bé duʼo motie Moyiz a tiile é nko paʼ obyɛl o bwa o bʉrʉm ɨ,

²⁸ bé e boo Simeɔn «tʉtʉm», Simeɔn kʉ ze jà mwan waa jà jàʼ e mobo me, ze dwe Zyɛm kum. Nye ó:

²⁹ «Da, gɨ kʉ sa mpʉ go a kɛʼ me e! Gɨ sa ó, me laŋa é tiʼ yi, leme, wé osi loŋlo e motala,

³⁰ ebe, mih mam, mɨ bee Tiʼbʉr a duho go ye e.

³¹ Go a ntɨh nye ó, é mih bɨkul bɨ bʉr bibyɛh.

³² Mwan nwa, nye óbe ó myɛn wé ókʉn bʉr o bɨkul bɨfih ó, byé gʉŋa go e. Bʉr bo, bwa b'Ɨzraɛl, bé óbul seʼlɔ ebe nye.»

³³ Sɔŋ e nyɔŋ mo Yesʉs, bé a be ó lé ebul jehe mokan Simeɔn a lɛɛ, tiibe e Yesʉs ɨ.

³⁴ Pie tɨ, Simeɔn ze sʉ be mocyɛʼ mo mpom le elɛɛ e Maaria, nyɔŋ mo Yesʉs ó: «Mwan nwa, nye ó waa Zyɛm a ntɨh ó, nye twehla buobuo bwa b'Ɨzraɛl, le egbɛl bʉʉ. Nye óbe ó e l'ejwɨʼ ndɨ elɛʼle nkul mo Zyɛm ɨ. Bʉʉ bʉr bɛɛ, bé ótɨ mɨlɛa mye.

³⁵ Nye ó sa yé ólɛʼle mbi bɨjwɨʼ bʉr ndɨ efol-fol é mɨleme myɔɔ ɛ. Gwɔɔ mʉma nwa, empime, lé ókpahla go é leme mpʉ fòŋ é jɔʼ go óbee be lé esa nye no e.»

³⁶ Nuu mʉma ngwiha mɨlɔb, a be nteme ó tɨ, die le Ana, sile mo Fanuɛl, é l'eveh mo Aser. Nye a be ó, nye mu si bul jwɨm. É jɔʼ nye a be, nye dina ndu esehe e, nye a si to é l'eba boo nuu mʉrʉm. Bé e njʉm we waa di njɨ mɨmbu tambɛl,

³⁷ njʉm we ze dwè, nyɛɛ ntɔʼ liʼ kuho. Nye a si di é l'ekuho le, to pyal é jɔʼ nye a be, nye mu e mɨmbu mowʉm mwom e mɨnâ ɛ. Nye a baabɔʼa e jahla bii mo Zyɛm. Nye a dwiibɨ Zyɛm tɨʼ ó, moho e pum. Nye a be-be ó lé eti mode e bɨjɔʼ, le ejwɨʼla e Zyɛm.

³⁸ No ó, é jɔʼ gwar yaa, mpʉ Simeɔn a be lé elwib ɨ, Ana ntɔʼ dihle, ze dwiibɨ Zyɛm, ze lwib e bʉr o bé e boo nɔɔ bé a di-di ɨ. Bé nteme, bé a si bono mʉr ókʉr bʉr o Yerʉsalɛm ɨ. Nye ze lɛɛ bʉr baa bɨbɛh sa yé a tiibe e mwan wɔɔ ɛ.

Mpula lé eto Nazarɛt

³⁹ É jɔʼ obyɛl mo Yesʉs, bé a be si sil du motie mo Da ɛ, no ó bé a ze fiʼ, toŋɔ e nye kwar wɔɔ Nazarɛt, ɨ Galɨle.

⁴⁰ Mwan ze gwɨe le egbable. Nye a be ó lwɨŋla e l'ocyoo, ndwe e mocyɛʼ mo mpom mo Zyɛm.

Yesʉs é jahla bii mo Zyɛm tʉŋlʉ

⁴¹ Mɨmbu mimyɛh, obyɛl mo Yesʉs, bé a be ó lé eto Yerʉsalɛm lé eto jeme ebʉʼ e Paska tɨ.

⁴² Mpʉ Yesʉs a be, nye mu e mɨmbu ewʉm e mɨmba ɛ, no ó bé a ka ze to bɨbɛh, mpʉ njwɨr wɔɔ, wé a be e.

⁴³ Mpʉ ebʉʼ, lé a be, lé osi gbɛha ɛ, obyɛl mo Yesʉs, bé ntɔʼ fiʼ, Yesʉs nyɛɛ ze liʼ be pihe ɨ Yerʉsalɛm, bé l'agʉa.

⁴⁴ Bé a be lé egʉa zi e zi ó, bé e boo nɔɔ ó ndɨ sama. Bé ze kœʼ no, moho ntinɨ. Pie tɨ, bé ze san nye, ntɔʼ niŋɔ é sɔɔlʉ we, saŋɔ nye boo mɨmbyɛl myɔɔ, le ofo bɔɔ, é saŋɔ saŋɔ, abeɔ.

⁴⁵ Bé ntɔʼ buulo ntuʼo, to saŋɔ nye Yerʉsalɛm.

⁴⁶ Molu molɛl, mé osi laa nɛʼɛ, bé ntɔʼ bee nye é jahla bii mo Zyɛm. Nye a be ó ndindil, teme oyeʼle o motie, nyɛɛ lé ejoʼlo be, ndwe le edî be motia.

⁴⁷ Sa yiyɛh bé a joʼo nye lé elɛɛ ɛ, bé a si jehe ye, é wiha mbi ocyoo, le mɨmbi mompɨha nye a dɨ bɨha motia mɔɔ ɛ.

⁴⁸ É jɔʼ obyɛl be, bé a bee nye e, bé ze di é jehe. Nyɔŋ we ze dî e nye ó: «Mwan wam! Ebe yé go ka sa bɨh mpʉnʉ nɨ ɨ? Paʼ bee: bɨh e foŋ, bɨ bul saa go, le esyɛl ba e go!»

⁴⁹ No ó nye a ze dî e be ó: «Ebe yé bɨn lé esaa me e? Zê bɨn bé agʉa ó, yé ekʉ jala ó, me diʼe é mbɛr mo Sɔŋ wam ɛ?»

⁵⁰ (To kœb ó, bé a be ó, agʉa joʼo sa nye a be lé ekpɛl lɛɛ be e.)

⁵¹ No ó, bé e boo nɔɔ, bé a fiʼ, toŋɔ Nazarɛt. Nye a be ó si sa be mojoʼo. Nyɔŋ a be ó lé ebaʼle-baʼle mɨlɔb myaa mimyɛh é leme we tʉŋlʉ.

⁵² Yesʉs ze gwɨe é nko paʼ nyʉl, le elele é nko paʼ ocyoo. No ó taare é Zyɛm, to pyal é bʉr bɨbɛh, bé a bee ó, nye ó ndɨ mbɨambɨa mwan.