Lʉkas 19 - Kálara Zyɛ̌m Edwán é mpʉ̌n

Yesʉs bé e Zachée

¹ É jɔʼ Yesʉs a ni ɨ Yeriko e, nye a be ó lé edɨ ntaa nkana.

² Nuu mʉr a be ó tɨ, die le Zachée. Nye ó b'a be cyɛb efoʼ é sama onwɨa o tœa bɨbɛh, nye nteme e l'okum e l'ogbaa.

³ To kœb ó, nye a be nteme ó lé ejɨ bee Yesʉs, le egwɨm gʉa mbi mʉr nye a be e. No ó, mpʉ nye a be é bul gublo mʉr ɨ, nye a baabe e nkul ebee nye, ebe, ntuntuma bʉr yé a be tɨʼ ɨ.

⁴ No ó, nye a to kam dolo, ntɔʼ to jʉ̀ é lɨ sikomɔr kʉ, ó nye nkʉʼ gʉa bee nye, ebe, Yesʉs a be ó, nye laŋa tɨʼ é fum yaa.

⁵ É jɔʼ Yesʉs a pyal gumo yaa ɛ, nye ze syɛm mih kʉ. Nye e nye ó: «Zachée! Kpahba fulo si, ebe, yé ekʉ jala ó, me filɨ é mbɛr go muh!»

⁶ Zachée ntɔʼ kpahbe fulo si, ntɔʼ bɨlan e nye e bɨsʉhʉ.

⁷ Bʉr bɨbɛh bé a bee syɛɛla yaa ɛ, bé a si to le etʉʼra. Bé ó: «Mʉr nwa, nyi to ja é mbɛr mo mʉr ndɨ é bul jwɨ̂ʼlɨ e mɨsyem ɨ!»

⁸ No ó, Zachée a ze cyɛb, lɛɛ e Da ó: «Da, paʼ bee: Me óbɛʼ bɨsa byam, nʉa peh, jala e nkɔb ngwar é monkɔb moba, to dwe baanteʼenteʼe. Yé be ó, me a be ó si kʉa nuu mʉr, nʉa nye mɔn nɛʼɛ, me óbuulo nye ya, ntɔʼ ko bim mɔn yaa zɔʼ nâ tɨʼ kʉ.»

⁹ No ó, Yesʉs a lɛɛ e nye ó: «Bʉr o mbɛr wi, bɨ bi tiʼ molu mo mpoʼ mɨmɛh muh, ebe, mʉr nwaʼ nteme, nye ó ma nta mo Abraham.

¹⁰ Mwan mo Mʉr a ze ó, ze saa baa mu si pɔhba ɛ, ó nye ódwe be tiʼ molu mo mpoʼ mɨmɛh.»

Kɨkɛna mɨsaŋ mɨ gol

¹¹ É jɔʼ bʉr, bé a be, bé mu si joʼo mokan monɨ ɨ, Yesʉs ze bâʼle sa be yʉʉ kɨkɛna. Mpʉ nye a be, nye mu kunokuno e Yerʉsalɛm ɨ, bʉr ntɔʼ jwɨʼ ó, Zyɛm a be ó, nye mu kunokuno le ecyel jwɨ̀ʼa ye cyecye.

¹² No ó nye a lɛɛ e be ó: «Yé a ze be ó, nuu sabene é lal we. Nye ze mʉa, to di é lal wé a be ká ká jaabe e. Nye a to é lal waa ó, bé dilɨ nye é dia njwɨɨ. Pie tɨ, nye òka bula.

¹³ Nye l'apa to nɛʼɛ, nye a si jebe osyɛl o mosa be ewʉm, ze dwe be mʉr ngwar, saŋ gol ngwar. Nye e be ó: “Bulɨ ga me mɔn yi, to pyal é jɔʼ me óbula ɛ.” Nye ze mʉa, to.

¹⁴ «Tina, yé ó, bʉr o lal we, bé a be ó lé enwim nye. No ó bé a lomo bʉr ó, bé duʼo nye, lé eto myɛʼɔ lɔɔ gʉʼ ó: “Bɨh bɛɛ, bé amɛʼle ó, mʉr nwaʼ cyɛbɨ njwɨɨ é paʼ wih.”

¹⁵ «No ó, nko nye a to e, bʉr o lal waa bɛɛ ze cyelɔ nye njwɨɨ. Nye ntɔʼ bula ze é lal we. No ó nye a lɛɛ ó, bé baŋla osyɛl o mosa be, baa nye a timle mɔn ɨ. Nye a be ó lé egwɨm gʉa bim mɔn ye, yé a bya ɛ.

¹⁶ «Mʉr efoʼ pyal. Nye ó: “Da, me a si bâʼle bi mɨsaŋ mɨ mɔn mɨfih ewʉm, duho é saŋ go a timle me e.”

¹⁷ «Sabene, nye e nye ó: “Yé é mbɨa. Go ó mpaŋ syɛl mosa. Gɨ gʉa ebaʼle bɨsa ndɨ titia ɛ. Mɨ cyel go njwɨɨ bɨnkana ewʉm.”

¹⁸ «Waa mba ntɔʼ ze. Nye ó: “Da, me a si bâʼle bi mɨsaŋ mɨ mɔn mɨfih mɨtɛn, baʼra e waa go a timle me e.”

¹⁹ «Sabene, nye e nye ó: “Gwɔɔ, mɨ cyel go é dia ó, go jwɨʼɨ bɨnkana bɨtɛn.”

²⁰ «Waa lɛl ze pyal. Nye ó: “Da, mbe saŋ go? Me a baʼle we ó, tiila é l'elire e kan,

²¹ ebe, me a be ó lé ekpɛɛ go. Me ekʉ gʉa ó, go ó, é lele mbo. Sa go a baakomo e, yé ó go ndɨ enʉa ɛ. Go ekpɛl mwaʼ mode ó, é peme go a baabè mompœʼ œ.”

²² «Sabene, nye e nye ó: “Go sa bɨbla syɛl mosa yi! Me ótiʼe go lɔb é mokan lé eduho é nʉm go e. Go a be ó si gʉa ó, me é lele mbo. Go a gʉa ó, me enʉa-nʉa sa me a baakomo e. Go a bee ó, me ekpɛl mwaʼ mode ó, é peme me a baabè mompœʼ tɨʼ ɨ.

²³ Ebe yé go a baato komo mɔn yam é baŋ ɨ? É mpula wam, me ngbaa ze kœb mɔn yam ndwe e mɨlʉ myé a ntaa kʉ ɨ.”

²⁴ «Nye e bʉr bé a be tɨʼ ó: “Pɛʼɛ ga nye saŋ we. Bɨn bé à timle we mʉr mu e mɨsaŋ ewʉm ɨ!”

²⁵ No ó bé a lɛɛ e nye ó: “Cɨcyoʼ oo, Da! Nye mu ó bɛa be e mɨsaŋ ewʉm!”

²⁶ Nye ó: “Me elɛɛ bɨn ó nɛɛ, mʉr nyiwɛh ndɨ e guu paʼ bɨsa ɛ, nye óbâʼle dweŋɔ byʉʉ. To kœb ó, waa ndɨ tɨtoʼo e, nye ópɛʼɔ ma bim nye ndɨ e tɨʼ ɨ.

²⁷ No ó bʉr o dɔm bam, bé a bene ó, me l'aka cyɛb njwɨɨ é paʼ wɔɔ ɛ, ntaʼ ga me e ba wâ. Bɨn jʉʼo be é mih mam!”»

Epyal mo Yesʉs ɨ Yerʉsalɛm

²⁸ É jɔʼ nye a sil lwib no e, Yesʉs ntɔʼ samle, lé eto Yerʉsalɛm.

²⁹ É jɔʼ bé a be, bé mu kunokuno e Batfagee le Betani, nko ecwɨʼ bé lé ejebe-jebe ó, Ecwɨʼ le olivye e, nye ze lomo ompʉn oba dolo. Nye e be ó:

³⁰ «Toʼ ga kwar ndɨ bɨn tina dolo nɨ. É jɔʼ bɨn bé ópyal gʉʼ ɨ, bɨn bé ókœb ma jakah tiila, nye dina, mʉr apa kable nye é koo kʉ. Bɨn bé à tii nye. Bɨn bé òze e nye wâ.

³¹ ǃƗ mʉr si dî e bɨn ó: “Ebe yé bɨn lé etii jakah nɨ ɨ?” nɛʼɛ, bɨn bé à lɛɛ e mʉr waa ó: “Tî wih, nye egwɨm ye.”»

³² No ó bʉr o nye a lomo e, bé a ze to, to kœbɔ bɨsa bibyɛh mpʉ Yesʉs a lɛɛ be e.

³³ É jɔʼ bé a be lé etii jakah ɨ, bʉr o tɨʼ ntɔʼ dî e be ó: «Ebe yé bɨn lé etii jakah yih nɨ ɨ?»

³⁴ Bé ntɔʼ bɨha ó: «Da, nye egwɨm ye.»

³⁵ Bé ntɔʼ bula e ma jakah, ntɔʼ lɛʼle Yesʉs. Bé ze kɛl ye mɨkan myɔɔ é koo, ntɔʼ dilɔ Yesʉs tɨʼ kʉ.

³⁶ Nyɛɛ lé eto, bʉr lé eto le ejan mɨkan myɔɔ mpaʼa e mpaʼa.

³⁷ Mpʉ nye a be, nye mu kunokuno e Yerʉsalɛm, lé efulo Ecwɨʼ le olivye e, no ó sama ompʉn, yé a taare lé esoho é buobuo le edwe Zyɛm kum le ebʉ bɨyaŋa, ebe mosima mɨmɛh bé a bee e.

³⁸ Bé a lɛɛ-lɛɛ ó: «Mocyɛʼ mo mpom, mé swɨŋɨ é waa lé eze e die mo Da nwa ɔɔ! Motala, mé diʼe é lal mo Zyɛm ɔɔ! Kɛɛɛɛɛɛ é lal mo Zyɛm di e kum wi ɔɔ!»

³⁹ Bʉʉ oFarizyɛŋ bé a be tɨʼ é mpampaʼ bʉr yaa ɛ, bé a lɛɛ e nye ó: «Yeʼle, bâma e l'ompʉn bo.»

⁴⁰ No ó Yesʉs a bɨha e be ó: «Me elɛɛ bɨn ó nɛɛ, ǃbé si dible mɨnʉm, aka lwib nɛʼɛ, mokoʼ maʼ, mé ódwe me kum e motwii kʉ, bʉŋɔ bɨyaŋa!»

Yesʉs lé ejɨ é lɔb nkana Yerʉsalɛm

⁴¹ É jɔʼ Yesʉs a pyal kunokuno e nkana Yerʉsalɛm, ntɔʼ dwɛʼ ye e, nye ntɔʼ taare lé ejɨ ndwe le epɛm myɛɛle é lɔb we.

⁴² Nye ó: «Nkʉ go be ó be, gʉa muh sa yé a ngbaa sa ó, mɨlɔb, myé kwɨmlɨ paʼra win boo Zyɛm nɛʼɛ, mpa go mu ó mbɨmbɨa! Banana, yé ó go fela. Go abe e nkul ebee ye!

⁴³ Ebe, molu mo ebebe, mé ópyal bɨn, jɔʼ bʉr o dɔm bɨn, bé óbʉmra bɨn é nka, fumo ekɔʼ é lele lele lé ódible bɨn é mɨpaʼ mimyɛh ɛ.

⁴⁴ Yerʉsalɛm aa! Bé ógbɛɛ go, le egbah bwan bo bɨbɛh ndɨ é bɨpɨpɨm byo tʉŋlʉ ɨ. Bé óliʼe go abe e l'ekoʼ egwar kɛla é lʉʉ kʉ, ebe, go baadweʼe jɔʼ Zyɛm a ze ó, nye jwɨʼ ó bɨn nkoo e.»

Yesʉs lé efo bʉr é jahla bii mo Zyɛm

⁴⁵ Yesʉs ze ni é jahla bii mo Zyɛm. Nye ntɔʼ taare lé efo bʉr o b'a di-di tɨʼ lé ebɛma bɨsɔʼɔ ɛ.

⁴⁶ Nye ó: «Yé ó tila é Kalara Zyɛm ó: “Mbɛr wam, wé óbe ó mbɛr mɨnjwɨʼla.” No ó bɨn bɛɛ, bɨ liŋ we eboʼo e bɨzilngan!»

⁴⁷ É dobo lɨlɛh, Yesʉs a be ó é jahla bii mo Zyɛm tʉŋlʉ lé eyeʼle bʉr. Ojwɨɨ be opara bé e l'oyeʼle o motie ndwe e mɨnjwɨ̂ʼ mɨ bʉr, bɛɛ, bé a be ó lé ebà bɨjwɨʼ ó, bé jʉ ó nye.

⁴⁸ Sa gwar, bé a be ó mɨleme é mo é zaaama, ebe, mɨzɨze mɨ bʉr mimyɛh, myé a be ó lé ekʉ gʉa joʼlo nye.