Lʉkas 18 - Kálara Zyɛ̌m Edwán é mpʉ̌n

Kɨkɛna mo kuho mʉma bé e tiʼà mɨlɔb

¹ Yesʉs ze sa be kɨkɛna fih, kɨkɛna yaa lé elɛʼle ompʉn be ó, bé ekʉ jala le ejwɨʼla e Zyɛm é jɔʼ yiyɛh, akar tuu.

² Nye a lɛɛ e be ó: «Yé a ze be ó, nuu tiʼà mɨlɔb é yʉʉ nkana, nyɛɛ adwaabe Zyɛm, abe e buʼ e mʉr.

³ Tɨʼ é nkana yaa nteme, yé a be ó e guu kuho mʉma. Wé a be ó lé eze-ze jɔʼ yiyɛh nye ye, lé elɛɛ ó: “Sam me ɛ! Lwibɨ me lɔb paʼra wih e mʉr dɔm wam!”

⁴ No ó nye a ngbaa taare peere. Sa gwar, nye a ka lɛɛ é leme we ó: “Dam be mpʉ me ndɨ adwaabe Zyɛm nkʉ dwiibɨ ba nuu mʉr ɨ,

⁵ me ófuo tiʼe kuho mʉma wiʼ lɔb we é l'ocɨcyel, ebe, wé ó njɨ lé eze dɨ ntɨʼ me é jɔʼ yiyɛh. Lɔb we, wé mu ó lé ebʉ me lʉ, ebe, nye é buo tire.”»

⁶ No ó Da a lɛɛ ó: «Gʉa pahle ga sa bɨbla tiʼà mɨlɔb lé elɛɛ é leme we e.

⁷ Zê Zyɛm ódeʼ lé etiʼe mɨpɛha mɨ bʉr mye mɨlɔb myɔɔ é l'ocɨcyel ɛ? Tɨtoʼo! Bɛɛ nteme lé esa zyee lé ejwɨʼla e nye moho e pum!

⁸ Me elɛɛ bɨn ó, nye ókpahbe tiʼe mɨlɔb myɔɔ é l'ocɨcyel. Sa gwar, é dobo Mwan mo Mʉr óbula ze é si nwaʼ ɛ, zê nye ópyal, kœb mʉr ngwar dina lé ejyɛʼ taa buʼo ye boo nye e?»

Kɨkɛna Farizyɛŋ bé e nwɨa tœa

⁹ Yesʉs ntɔʼ sa kɨkɛna yi, lé edweʼle bʉʉ bʉr. Bʉr baa, bé a buʼla-buʼla ó, bé ó ndɨ ocɨcyel o bʉr é mih mo Zyɛm, bé nteme lé ecyɛl bʉʉ bʉr.

¹⁰ Nye a lɛɛ ó: «Yé a ze be ó, bʉr oba é jahla bii mo Zyɛm lé esa mɨnjwɨʼla. Nwaʼ mʉr é nkɔm oFarizyɛŋ; nuu, nwɨa tœa.

¹¹ Farizyɛŋ waa ntɔʼ cyɛb, ze taare lé ejwɨʼla é leme we tʉŋlʉ é mbi wi: “Zyoo e Da Zyɛm, ebe, me abe mpʉ bʉʉ bʉr. Baʼ, bé edɛʼ bɨmɔn byoonkan; bʉʉ, bé ekœʼ é l'ozyɛhozyɛh; bʉʉ nteme, osyɛl o bɨmala. Me edwe go ekiba tɨ, ebe, me abe mpʉ nwɨa tœa nwa.

¹² Me eti mode é sono ngwar zɔʼ ba. É mobi mam mɨmɛh me lé ebi ɨ, me edwe go nkɔb ewʉm tɨ.”

¹³ Sa gwar, nwɨa tœa a cyɛb ó pɨnʉ. Nye a baakpɛl bɨn ba mih kʉ. Nye a kɛl ó njɨ mobo é lʉ, lé elɛɛ ó: “Da Zyɛm, saʼ ó, empime lo, lé tala é l'efu lam, ebe, me ó syɛl mɨsyem.”»

¹⁴ Yesʉs ntɔʼ lɛɛ e be ó: «Me elɛɛ bɨn ó, nwɨa tœa waa a ka fiʼ, to mbɛr we ó, nye osi bi mokebe é mih mo Zyɛm, abe mpʉ Farizyɛŋ, ebe, mʉr lé enkɛɛ nyʉl ɨ, nye ófilɔ si; waa lé efil nyʉl si ɨ, nye óbɨnɔ kʉ.»

Yesʉs lé esʉ bwɔɔncyom mocyɛʼ mo mpom

¹⁵ Bʉr, bé a si ze pyal boo Yesʉs dam be e bɨcyee, ó nye kɛlɨ bye mobo. É jɔʼ ompʉn be, bé a bee no e, bé ze bâm e be.

¹⁶ No ó Yesʉs a ze jebe be, ze lɛɛ ó: «Birɨ ga bwɔɔncyom, bé ntaʼ boo me. Afu fo ga be, ebe, jwɨ̀ʼa mo Zyɛm, yé cyela ó, é l'efu e bʉr o ndɨ mpʉ be e!

¹⁷ Me elɛɛ bɨn cyecye ó nɛɛ: mʉr nyiwɛh ndɨ afil nyʉl si e jwɨ̀ʼa mo Zyɛm mpʉ mancyom ɨ, nye ákwoʼ ni é jwɨ̀ʼa ye.»

Njwɨɨ oYʉden a be é buo bɨsa ɛ

¹⁸ Nuu tamamʉr é kul oYʉden a be ó si dî e Yesʉs ó: «Mbɨambɨa yeʼle, me saʼ wáa mbi sɔʼɔ é l'efu ó, me biʼe tiʼ molu mo mpoʼ mɨmɛh?»

¹⁹ Yesʉs ze bɨha e nye ó: «Ebe yé go lé ejebe me ó, mbɨambɨa mʉr ɨ? Abe e mʉr ndɨ é mbɨa, njɨ Zyɛm nye ome.

²⁰ Gɨ gʉa motie mo Zyɛm. Me elɛɛ ó: “Asa mɨfyɛba. Ajʉ mʉr. Adíbe. Abuʼo mɨɔ go mʉr lɔb. Dwaaba sɔŋ e nyɔŋ go.”»

²¹ Mʉr nɨ ze lɛɛ e nye ó: «Mɨ du motie monɨ mɨmɛh, taare é l'oncyom wam, ze pyal é muh é dobo lɨ.»

²² É jɔʼ Yesʉs a joʼo no e, nye ze lɛɛ e nye ó: «Yé eka saa go sa gwar. Toʼ, to bɛma bɨsa bibyɛh go ndɨ e bye e. Go à dwe baanteʼenteʼe mɔn tɨ. É jɔʼ yaa ó go óbi okum e l'ogbaa é lal mo Zyɛm ɨ. Pie tɨ, go òze du me.»

²³ Njoʼa mʉr waa a joʼo mpɨha waa ɛ, nyʉl kʉ ze cyɛʼ nye, ebe, nye a be ó é twiha bɨsa.

²⁴ É jɔʼ Yesʉs a bee no e, nye ntɔʼ lɛɛ ó: «A kɔbla lé eni é jwɨ̀ʼa mo Zyɛm é jɔʼ mʉr ndɨ e l'okum e l'ogbaa twiha ɛ!

²⁵ É mpʉ yé ndɨ é kɔbla ó, kamtʉl laŋa é l'egʉa e ndondo e, jwɨʼ gwar e gwar yaa nteme ó ndɨ é bul kɔbla ó, mbil bɨsa niʼe é jwɨ̀ʼa mo Zyɛm ɨ.»

²⁶ No ó bʉr o b'a joʼo-joʼo nye e, bé a ze dîila paʼra wɔɔ ó: «Yé be no nɛʼɛ, zé nyɛɛ ókoʼo lé ebi tiʼ molu mo mpoʼ mɨmɛh ɛ?»

²⁷ Yesʉs ntɔʼ bɨha e be ó: «Bɨsa bʉr ndɨ akoʼo e, Zyɛm ó ndɨ e nkul esa bye.»

²⁸ Pyɛr ntɔʼ lɛɛ ó: «Paʼ bee: bɨh bɨ liʼe bɨsa bih bibyɛh, njɨ lé edu go!»

²⁹ No ó Yesʉs a lɛɛ e be ó: «Me elɛɛ bɨn cyecye ó nɛɛ: yé abe e mʉr lé eliʼe mbɛr we, myɛl we, obɨɔ be, obyɛl be, le bwan be, ebe jwɨ̀ʼa mo Zyɛm,

³⁰ ndɨ abula bi bye zɔʼ é buobuo é jɔʼ yi. Ndwe nteme, pie e l'esie e mbi jɔʼ yi, mʉr waa óbi tiʼ molu mo mpoʼ mɨmɛh.»

Yesʉs lé ebal ompʉn be é lɔb efie le é jɔʼ lɛl

³¹ Yesʉs ze nʉa Esama le ompʉn ewʉm e l'oba é bʉm. Nye e be ó: «Mbe ga: bɨna mu ó lé eto ga Yerʉsalɛm ó yi. Bɨsa bibyɛh ogwiha o mɨlɔb bé a tile é Kalara Zyɛm, tiibe e Mwan mo Mʉr ɨ, byé ódira.

³² Bé òkɛha nteme nye boo bʉr o bɨkul. Bé ókpeʼle nye, saŋɔ nye cere, syɛɔ nye mocyeele é mih,

³³ fuura nye mɨmbihe, jʉ nye. Nye òbula pàh é l'elu elɛl.»

³⁴ No ó, ompʉn be, bé a baajoʼo sa gwar é mɨlɔb myaa. Ekan laa, lé a be be ó, fela. Bé a baajoʼo sɔʼɔ é lɔɔ waa wiwɛh.

Yesʉs lé etiʼ ntim

³⁵ É jɔʼ Yesʉs a be, nye mu kunokuno e nkana Yeriko e, nye ntɔʼ pyal ɨ gumo nuu ntim a be e, nyɛɛ é nkpah mpaʼa, lé epyɛh-pyɛh bʉr mobo.

³⁶ É jɔʼ nye a joʼo mpampaʼ bʉr lé elaa ɛ, no ó nye a dî sa yé a be lé elaa ɛ.

³⁷ No bé a lɛɛ e nye ó: «Yesʉs, mʉr Nazarɛt, ó ma laa nɨ.»

³⁸ Nye ze behe Yesʉs. Nye ó: «Yesʉs, Mwan mo David ɔɔ! Jwɨʼɨ me nkoo ɔɔ!»

³⁹ É mpampaʼ bʉr, baa b'a be zi dolo e, ze bâm e nye, ó nye diʼe titil. Nyɛɛ kʉ ze lwib lé eyɨm twii ó: «Mwan mo David ɔɔ! Paʼ kʉ jwɨʼ me nkoo ɔɔ!»

⁴⁰ Yesʉs ze cyɛb, ntɔʼ lɛɛ ó, bé ntaʼ nye e nya. É jɔʼ bé a ze e nye kunokuno e Yesʉs ɨ, nye ntɔʼ dî e nye ó:

⁴¹ «Go egwɨm ó, me saʼ go yé?» Nye ntɔʼ bɨha ó: «Da, paʼ kʉ sa ó, me bâʼla bee ʉʉ!»

⁴² Yesʉs ntɔʼ lɛɛ e nye ó: «Go à bee! Buʼo yo, yi tiʼ go!»

⁴³ Cye e cye yaa, nye ntɔʼ bana bee, ze du Yesʉs é koo pihe, lé edwe Zyɛm kum. Bʉr baa bɨbɛh, é jɔʼ bé a bee syɛɛla yaa ɛ, bé ntɔʼ dwe nteme nye kum.