Lʉkas 16 - Kálara Zyɛ̌m Edwán é mpʉ̌n

Bɨbla mbɔʼlʉ ekuro

¹ Yesʉs a lɛɛ nteme e l'ompʉn be ó: «Yé a ze be ó, nuu mbil bɨsa bé e mbɔʼlʉ ekuro we. No ó, bʉʉ bʉr, bé a be ó, lé eze-ze, lé eze pur mbɔʼlʉ ekuro, lé elɛɔ-lɛɔ ó, nye a be ó si sam nye bɨsa.

² Nye ntɔʼ jebe nye. Nye e nye ó: “Wáa mbi lɔb me lé ejoʼo-joʼo, tiibe e go wi? Lɛʼla me mpʉ go bi-bi bɨsa byam ɨ, ebe, go abe e nkul eka di mbɔʼlʉ ekuro lam!”

³ No ó mbɔʼlʉ ekuro waa a ze lɛɛ é leme we tʉŋlʉ ó: “Mpʉ njwɨʼa wam lɛɛ ó, nye pɛʼ ó me é dia mbɔʼlʉ ekuro e, me saʼ nyá ɛ? Mɛm apa kʉ be e nkul sea bɨpeme! No nteme ó, yé óbul sa me fwon lé eto le engʉl mode.

⁴ Eee, mɨ gʉa sa me ndɨ e nkul esa ɛ! É jɔʼ me ódimle dia mbɔʼlʉ ekuro yiʼ ɨ, bʉr, bé ódɨ bɨlan e me!”

⁵ Nye ntɔʼ baŋle bʉr bɨbɛh, bé a be e bɨsa bɨ njwɨʼa we e, mʉr ngwar ngwar. Nye e mʉr efoʼ ó: “Go e njwɨʼa wam yáa bim?”

⁶ Nye ó: “Me e bɨntumo bɨ mulo nter.” Mbɔʼlʉ ekuro, nye e nye ó: “Kalara mompɔla mo be! Kpahba di si. Go à tile mowʉm motɛn.”

⁷ Nye e nuu ó: “Gwɔɔ, go e nye yáa bim?” Nyiha, nye ó: “Me e mɨnkura mode mɨnter mɨtɛn.” Mbɔʼlʉ ekuro, nye e nye ó: “Kalara mompɔla mo be. Tila mɨnter mɨnâ.”

⁸ Njwɨʼa waa ze seʼle bɨbla mbɔʼlʉ ekuro waa, ebe, nye a si kuhlo pɨʼ waa no, ebe, mʉr mbi jɔʼ yi, nye ábɛa le entaa bʉr o jyɛɛ ye é pɨʼ, laa bʉr mo Zyɛm.

⁹ Me elɛɛ bɨn ó: dwɛna ga bɨbebebebe bɨ okum e l'ogbaa o si nwa é l'efu ó, bɨn tia efo e bʉr. É jɔʼ okum e l'ogbaa waa, wé ósie e, bé óbɨlan e bɨn é modia mé ódi molu mo mpoʼ mɨmɛh ɛ.

¹⁰ «Mʉr lé egʉa kʉ baʼle bɨsa ndɨ abuo e, nye nteme ókʉ gʉa baʼle ntwiha bɨsa. Ozyɛhozyɛh o bʉr, bé ejeʼe esa lé ebaʼle bɨsa ndɨ abuo e. Bé nteme, bé ójeʼe ebaʼle ntwiha bɨsa.

¹¹ ǃBɨn si kœʼ é l'ozyɛhozyɛh é jɔʼ bɨn lé ebaʼle ozyɛhozyɛh o bɨsa bɨ si nwaʼ nɛʼɛ, ozé, bé óláa ó, bé óbɛm komo-komo mɨmpaŋ bɨsa byɔɔ é mobo mɨn, ó bɨn dɨʼe baʼle be bya?

¹² ǃBɨn si be, agʉa baʼle bɨsa byoonkan nɛʼɛ, zé ómuno dwe bɨn bɨsa bin, byaa byé ógumo e bɨn bʉr o tɨʼ ɨ?

¹³ «Abe e syɛl mosa ngwar ndɨ e nkul esea e l'ojwɨʼa oba é jɔʼ gwar, ebe, nye ónwim nuu, kpɛl nuu; nkʉ ntɔʼ ó, nye ódwaabe nuu; pyeh nuu. No ó, bɨn bé abe e nkul esea e Zyɛm syɛɛ, sea e l'Okum-e-l'ogbaa é jɔʼ gwar.»

Mʉr lé esa mojoʼo e

¹⁴ OFarizyɛŋ, bé a be ó lé ejoʼo mɨlɔb myaa mimyɛh, ntɔʼ taare lé etamɔ nye, ebe, bé a be ó é bul kpɛl mɔn, ntaa njɨ.

¹⁵ Yesʉs ntɔʼ lɛɛ e be ó: «Bɨn bé elɛʼle-lɛʼle bʉr ó, bɨn ó ndɨ ocɨcyel. Sa gwar, Zyɛm, nye egʉa mɨleme min! Ebe, sa bʉr lé ebul seʼle e, Zyɛm, nye ebula bene ye mpene-numo.

¹⁶ «Motie mo Moyiz ndwe e sikʉlʉ ogwiha o mɨlɔb bé a dwe e, byé a di ó, é di di di, to pyal é Yʉanes. Taare é jɔʼ nye a pyal ɨ, to dolo, bʉr, bé mu ó lé etuno Mbɨambɨa Lɔɔ lé etiibe e jwɨ̀ʼa mo Zyɛm ɨ. Mʉr nyiwɛh, nye mu ó lé eni tɨʼ e nkul.

¹⁷ Kʉ e si, byé e nkul edim kam e kam. Sa gwar, yé é bul lele ó, ma etɔn egwar, nye pʉʼa é motie mo Moyiz.»

Mɨfyɛba

¹⁸ «ǃƗ mʉr si buulo myɛl, ntɔʼ ba fih nɛʼɛ, nyi sa mɨfyɛba. ǃƗ mʉr si ba mʉma nuu mʉr a buulo nɛʼɛ, mʉr waa nteme, nyi sa mɨfyɛba.»

Kɨkɛna mo mbil bɨsa bé e Lazar

¹⁹ «Yé a ze be ó, nuu mʉr e bɨsa twiha. Molu mɨmɛh, nye a bwar-bwar ó, mɨkan mɨ akaa-e-kaa ndwe e myaa é pumo-pumo e. Nye a tiʼe-tiʼe dobo lɨlɛh ó, é mopoʼ.

²⁰ Guu ndwentuʼ, die le Lazar, nyʉl mɨkɔɔ e mɨkɔɔ e mobor, a ja-ja ó, é l'ebe e mbɛr we si.

²¹ Nye a be ó lé ejɨ de bɨtwiʼ mode bʉr bé a fiʼ é teble si é mbɛr mo mbil bɨsa waa ɛ. Ompye bɛɛ ka ze gwɨh-gwɨh nye mopɨɨ.

²² Nye ze dwè. Beengles ze nkɛɛ nye, to dilɔ nye é mbo ejʉm mo Abraham é jobo kʉ. Mbil bɨsa nteme dwè, ntɔʼ debe é foo,

²³ laa laŋa, to é Bɨ-siʼe. «Fum nye a be é kwar odwè e, nye a be ó njɨ lé esia e bɨntɨʼa. Nye dina tɨʼ nɛʼɛ, nye ze dwɛʼ kʉ, bee Abraham ká ká jaabe, bé e Lazar é mbo ejʉm we.

²⁴ Nye ntɔʼ lwib e nye lé eyɨm twii ó: “Da Abraham ɔɔ! Jwɨʼɨ me nkoo ɔɔ! Lomla me Lazar, nye duba odumo o dine ye é modibe, nye ntaʼ, ze dwe jɨm yam motala ɔɔ! Ebe, me é bul sia e siʼe é mɨnjʉl miʼ ɔɔ!”

²⁵ «No ó Abraham a lɛɛ e nye ó: “Mwan wam ɔɔ! Toŋla ó, go a di ó, é dia mopoʼ é jɔʼ go a be e tiʼ yi ɔɔ! Lazar nyɛɛ a kʉ ka di-di ó, njɨ é dia enteʼe ɔɔ! Banana, nye mu ó si poblɔ kaʼ ɔɔ! Gwɔɔ, go esia e mogumba ɔɔ!

²⁶ Yʉʉ sɔʼɔ nteme ó yiʼ ɔɔ! Ntabantaba bɨ ndɨ ká si é kwɛʼlɛ yi ɔɔ! Yé ó paʼra wina ɔɔ! No ó, bʉr o ndɨ ekpɛl mʉa ka, to gʉʼ nko bɨn ndɨ ɨ, bé abe e nkul entaa ɔɔ! Bʉr, bé abe e nkul eduho nteme nko bɨn ndɨ nɨ, ze ka, nko bɨh ndɨ yi ɔɔ!”

²⁷ «No ó mbil bɨsa a lɛɛ e nye ó: “Da ɔɔ! Yé be ó, yé ó no nɛʼɛ, me ejwɨʼla e go ó, go loma Lazar é mbɛr mo sɔŋ wam ɔɔ!

²⁸ Ebe, me e l'obɨɔ otɛn ɔɔ. Loma nye ó, nye toʼ, to bal be, ebe, bé amu ze nteme kaʼ é gumo ndɨ é bul gumba yiʼ ɔɔ!”

²⁹ Abraham ntɔʼ bɨha ó: “Hɨʼɨ ɔɔ! Obɨɔ bo, bé e l'okalara o motie Moyiz a tile e, ndwe e sikʉlʉ ogwiha o mɨlɔb, bé a dwe yi ɔɔ! Bé joʼla be ɔɔ!”

³⁰ Mbil bɨsa, nye ó: “Da Abraham ɔɔ! Bim yaa, yé ajala ɔɔ! Sa gwar, ǃɨ mʉr si duhɔ é l'odwè, to kœb be nɛʼɛ, bé ógwɨma mobebe mɔɔ, le edwir mɨleme ɔɔ!”

³¹ «No Abraham a lɛɛ e nye ó: “ǃBé si bene lé ejoʼo Moyiz bé e l'ogwiha o mɨlɔb nɛʼɛ, lɛɛ ó, bé aŋa mɛʼle lé ejoʼo mʉr ópàh é foo nwa ɔɔ!”»