Lʉkas 15 - Kálara Zyɛ̌m Edwán é mpʉ̌n

Tab, yé a be si pɔhba, ntɔʼ bula nyin ɨ

¹ Onwɨa o tœa bɨbɛh ndwe e bʉr o ndɨ é bul jwɨ̂ʼlɨ e mɨsyem ɨ, bé a be ó lé edihle nko Yesʉs a be e, lé eto joʼlo nye.

² No ó oFarizyɛŋ bé e l'oyeʼle o motie, bé a be ó lé eto le etʉʼra paʼra wɔɔ. Bé ó: «Mbe ga: mʉr nwa, nye ebɨlan e l'osyɛl o mɨsyem! Bé e boo nɔɔ bana de fua gwar!»

³ Yesʉs ntɔʼ sa be kɨkɛna yi. Nye ó:

⁴ «ǃƗ nuu mʉr é sama yin si be e bɨntœme nter, ntœme gwar ntɔʼ pɔhba nɛʼɛ, nye óliʼe bɨntœme mowʉm bu e bu é feha si, ntɔʼ to saa yaa yé a pɔhba ɛ. Nye ósaa ntœme yaa, é saa saa, to pyal é jɔʼ nye óbee ye e. Yé abe no?

⁵ «É jɔʼ nye óbe si bee ye e, nye ósoho é leme we é buobuo. Nye ónkɛɛ ntœme yaa, kɛl ye é mobɛʼ. Nye òbula, to kœb byaa nye a liʼe e.

⁶ Mpula nye óbe, nye mu si bula pyal kwar ɨ, nye óbaŋle ofo be ndwe e bʉʉ bʉr o kwar, lɛɛ e be ó: “Bɨna soha ga, ebe, mɨ bana bee ntœme yam yé a pɔhba ɛ!”

⁷ Me elɛɛ bɨn ó, jwɨʼ gwar yaa nteme ó bé óbul soho é jobo kʉ é jɔʼ syɛl mɨsyem ngwar óbe si gwɨma mobebe me, le edwir leme e. Bé óbul soho é lɔb we, laa mpʉ bé ngbaa soho é lɔb “ocɨcyel o bʉr” mowʉm bu e bu ndɨ amɛʼle ó, bé lé ejala le egwɨma mobebe mɔɔ, le edwir mɨleme e.»

Saŋ mɔn wé a dim, bâʼle nyin ɨ

⁸ Yesʉs ze sa yʉʉ kɨkɛna, lé eyɨm nkpaa. Nye ó: «Yé a ze be ó, mʉma e mɨsaŋ mɨ mɔn ewʉm, saŋ ngwar ze dim. Nye ze tumo elama, gwamle mbɛr. Nye ze taare lé esaa we cɨcyoʼ, cɨcyoʼ, to pyal é jɔʼ nye a bee we e.

⁹ É jɔʼ nye lé ebee we e, nye ebaŋle ofo be ndwe e bʉr o ndɨ mobeŋ mo mbɛr ɨ. Nye e be ó: “Bɨna soha ga, ebe, mɨ bana bee saŋ wam wé a dim ɨ!”

¹⁰ Me elɛɛ bɨn ó, jwɨʼ gwar yaa nteme ó bé lé esoho é mih beengles mo Zyɛm é jɔʼ syɛl mɨsyem ngwar ndɨ si gwɨma mobebe me, le edwir leme e.»

Mwan a dim zi ɨ

¹¹ Yesʉs ze lɛɛ e be ó: «Yé a ze be ó, nuu mʉr e bwa o bʉrʉm oba.

¹² Waa ncyom ze lɛɛ e sɔŋ wɔɔ ó: “Da, ntɛŋɨ me wam nkɔb é bɨsa byo, waa ógumo e me e.” Sɔŋ ntɔʼ bɛʼ mobi me mɨmɛh monkɔb moba, ntɔʼ ntɛŋ be ma.

¹³ «Bwa molu, bé osi laa nɛʼɛ, waa ncyom ze nʉa we nkɔb mobi, ze to é lal wé a be jaabe e. É lal waa, nye a tiʼe-tiʼe ó, sa tiʼ asiŋa, sa tiʼ entwɨʼ, sil lé esam mɔn ye yiyɛh é pe.

¹⁴ É jɔʼ nye a be si sil sam mɔn ye e, za é nyan nyan ntɔʼ nyaŋla é lal waa. Nye ntɔʼ taare lé edi é l'enteʼe.

¹⁵ Nye ze to ni é syɛɛ boo nuu mʉr lal waa. Mʉr waa a lomo-lomo nye ó, nye toʼ é mompur, to le ebaʼle nye onkʉ.

¹⁶ Nye a be ó lé egwɨm de bɨsa onkʉ bé a de-de e, sa gwar, abe e mʉr dwe nye bya.

¹⁷ «Pie tɨ, ogʉ, wé osi sie nye é lʉ nɛʼɛ, nye ntɔʼ ze bula bi pɨʼ. Nye ó: “Osyɛl o mosa mo sɔŋ wam, bé entuʼba e mode, mɛm lé eze dwè za wâ!

¹⁸ Me mʉa ó wâ, bula, to boo sɔŋ wam, to lɛɛ e nye ó: Da, mɨ sa syem é nko paʼ mo Zyɛm le é paʼ go.

¹⁹ Me ajala le eka di é cye mwan go. Nʉŋa yɛɛ me mpʉ nuu mʉr é sama bʉr o ndɨ esea e go e!”

²⁰ Nye ntɔʼ mʉa si, fiʼ, bula to nko sɔŋ a be e. «Pyala nye a pyal é l'odumo o kwar sɔŋ ɨ, nye dina ká ká nɛʼɛ, sɔŋ, nyi bee nye, ntɔʼ jwɨʼ nye nkoo, ntɔʼ to kam é mpyɛʼ-mpyɛʼ, to beŋle nye, le ecyèble nye é twii.

²¹ Mwan waa, nye e sɔŋ ó: “Da, mɨ sa bwaʼbwaʼ syem é nko paʼ mo Zyɛm le é paʼ go. Me ajala le eka di é cye mwan go...”

²² No ó sɔŋ a ze lɛɛ e l'osyɛl o mosa be ó: “Kpahba ze ga e mɨkan mɨ nyaŋa. Bœrɨ ga nye mya. Fwama ga nye lono é dine. Bœrɨ ga nye nteme osilpah é mokʉ.

²³ Ntaʼ ga e ma ntɛɛ, waa ndɨ myaʼ ɛ. Bɨn bé à tiʼe. Bɨna cyelɨ ga zɔɔ bɨsʉhʉ,

²⁴ ebe, mwan wam nwaʼ a be ó si sil dwè. No ó, nyi bâʼle tiʼe! Nye a bɛa ó dim muh mɨmbu mɨmbu. No ó, mɨ bâʼle bee nye!” Bé ntɔʼ taare lé ebwal zɔɔ.

²⁵ «To kœb ó, tʉl a be ó peme. Mya nye a ka bula ɛ, nye mu é l'odumo o kwar nɛʼɛ, nye ka joʼo ó ntine pɛm pɛmɨ, kúl e nkom daʼ daʼa e deme.

²⁶ Nye ntɔʼ jebe nuu syɛl mosa, ze dî e nye ó: “Yé ndɨ eba syɛɛ kwar ɨ?”

²⁷ Syɛl mosa, nye e nye ó: “Ncyomo, nyi bula. No ó, sɔŋ win be ó si tiʼe ma ntɛɛ, waa be myaʼ ɛ, ebe, ncyomo, nyi bula, nyʉl mbɨmbɨa. Sɔŋ win, nyi bɨlan e nye!”

²⁸ Leme mo tʉl ntɔʼ ze dwie nye é mo, nye ntɔʼ bene lé eni mbɛr. Sɔŋ we ntɔʼ pyal kʉl, to jwɨʼla e nye ó, nye niʼe.

²⁹ No ó nye a ze lɛɛ e sɔŋ we ó: “Paʼ bee: mɨ sea go bɨsyɛɛ bɨ elʉa mɨmbu é buobuo. Me dina ó apa pyeh lɔɔ go. Dam be no, go apa dwe me ma tab ngwar, ó bɨh e l'ofo bam bwala zɔɔ!

³⁰ No ó, é jɔʼ mwan go nwa, nyi to bula ɛ, waa a sam mobi mo mɨmɛh lé ebwam mɨmbambama ɛ, gɨ jʉ nye ma myaʼ ntɛɛ!”

³¹ Sɔŋ, nye e nye ó: “Mwan wam, bɨna e go ó ndɨ é jɔʼ yiyɛh. Sa yiyɛh me ndɨ e ye e, yé egumo ó e go.

³² Sa gwar, yé ejala ó, bɨna cyelɨ ga zɔɔ bɨsʉhʉ muh, ebe, ncyomo a be ndwè e, nyi pàh! Nye a si dim zi. Nye mu ó bɨna é mobo!”»