Lʉkas 13 - Kálara Zyɛ̌m Edwán é mpʉ̌n

Dwirɨ ga mɨleme

¹ É til molu yaa ó bʉʉ bʉr, bé a si ze lɛɛ e Yesʉs mpʉ Pilat a jʉ bʉʉ bʉr o Galɨle é jɔʼ bé a be lé edwe Zyɛm motwina mɔɔ ɛ. Nye a si syɛŋ motié mɔɔ e motwina bé a to dwe Zyɛm ɨ.

² Yesʉs ntɔʼ dî e be ó: «Zê bɨn bé lé ejwɨʼ ó, bʉr o Galɨle baa, bé a si jʉŋɔ, ebe, bé ó b'a be é bul jwɨ̂ʼlɨ e mɨsyem, laa bʉʉ bʉr ɛ?

³ Hɨʼɨ, me elɛɛ bɨn ó nɛɛ: ǃbɨn si be, agwɨma mobebe mɨn, nkʉ dwir mɨleme nɛʼɛ, bɨn bɨbɛh, bé ódim é nkɔb bʉr mpʉ be!

⁴ Zê bɨn bé lé ejwɨʼ ó, bʉr ewʉm e mwom toloŋo mbɛr mo Siloe, wé a bila ɛ, ó b'a bul bebe, laa bʉr o Yerʉsalɛm bɨbɛh ɛ?

⁵ Hɨʼɨ, me elɛɛ bɨn ó nɛɛ: ǃbɨn si be, agwɨma mobebe mɨn, nkʉ dwir mɨleme nɛʼɛ, gʉŋa ga ó, bɨn nteme, bé ódim é nkɔb bʉr mpʉ be!»

Kɨkɛna lé etiibe e lɨ ndɨ agumo e

⁶ Yesʉs ntɔʼ sa be kɨkɛna yi: «Yé a ze be ó, nuu mʉr ze bè lɨ figye é peme motin mo orezɛŋ ye. Nye ze naa lɨ yaa, lé esaa mpumo, abee-bee.

⁷ Nye ze lɛɛ e mʉr a baʼle-baʼle nye peme ó: “Paʼ bee: ngbàa me a taare lé enaa-naa lɨ yi, lé eze saa mpumo ofig, mbu lɛl ó ndɨ kʉ wi! Me apa kœb bumo fig gwar tɨ! Me lɛɛ e go ó: twɛ̀lɨ ye. Ebe yé yé lé ede me si, abe e nyɔm ɨ?”

⁸ No ó mbɔʼlʉ peme a ze lɛɛ e nye ó: “Cɨcyoʼ ɔɔ! Da mana, paʼ kʉ bir ba ye, yé paʼ bâʼle di guu mbu ngwar. Me ópu ye é mompàh mɨmɛh, me òsʉ bɨbwah bɨ ekunu tɨ.

⁹ Yʉʉ jɔʼ, yé ó e nkul egumo mpumo é mbu ma ze e. ǃYé óbe, aka gumo nɛʼɛ, me òtwɛ̀l go ya.”»

Yesʉs lé etiʼ zyoo mʉma é moho saba

¹⁰ É guu moho saba, Yesʉs a be ó lé eyeʼle bʉr é nuu mpah mɨnjwɨʼla wɔɔ.

¹¹ Nuu zyoo mʉma a be ó tɨ. Bɨbla sisim, yé a dil nye zyoo é nyʉl. Nye a kʉ ka di-di ó, njɨ kukur, tɔɔ mɨmbu ewʉm e mwom, aswɨʼa-swɨʼa.

¹² É jɔʼ Yesʉs a bee nye no e, nye ntɔʼ jebe nye. Nye e nye ó: «Mʉma! Esyɛb lo, lɨ sie!»

¹³ Nye ntɔʼ kɛl nye mobo é nyʉl. Cye e cye yaa, nyʉl ntɔʼ swɨʼa nye. Nye ntɔʼ ze dwiibɨ Zyɛm.

¹⁴ Njwɨɨ mpah mɨnjwɨʼla ntɔʼ joʼo Yesʉs ebebe é lɔb syɛɛla ye, ebe, nye a si bana tiʼ zyoo é moho saba. Nye e bʉr bɨbɛh ó: «É sono nyiwɛh, yé e moho ngwar ndɨ moho saba ɛ. Mɨmoho tobo, myé ó bɨna ga e nyɔm é l'efu ó, bɨna sea ga. Ntaʼ, ze jʉmba ga é mɨmoho myaa, abe yɛɛ moho saba.»

¹⁵ Da, nye e njwɨɨ mpah mɨnjwɨʼla ó: «Bɨn baanya-bɨkʉʉŋʉ ba! É moho saba, bɨn bɨbɛh bé etii bɨntɛɛ ndwe e bɨtab bin, lé eto e bye é montibe. Zê yé abe no ɛ?

¹⁶ Mʉma nwa, nye ó ma nta mo Abraham. Satan nyɛɛ, nyi bɛa kaʼ nye monkara. Nye mu kɛʼa mbi waa ó, tɔɔ mɨmbu ewʉm e mwom. Bɨntɛɛ pa taare tiɔ é moho saba, a dwɛʼra e mʉr!»

¹⁷ Mpʉ Yesʉs a bɨha e nye no e, bʉr bɨbɛh bé a sa nye mongan ɨ, bé ntɔʼ joʼo fwon. Ntuntuma bʉr yɛɛ, yé a be ó lé ekʉ soho mɨmpaŋ bɨsyɛɛla bibyɛh nye a dɨ sa ɛ.

Jwɨ̀ʼa mo Zyɛm, yé ófuʼla bwaʼ

¹⁸ Yesʉs a dî ó: «Bɨna bé e nkul elɛɛ ga ó, jwɨ̀ʼa mo Zyɛm, yé enwɨɨla e yáa sɔʼɔ ɛ? Zê me e nkul ejwɨʼ ye e guu mbi sɔʼɔ?

¹⁹ Yé enwɨɨla ó e mpœʼ mpœʼ ndɨ bim boho nʉo e. Nye ó mbèl mompœʼ a nʉa, ntɔʼ myɛʼ é modiʼe mo peme me e. Nye ze pah, sa lɨ é ntuuu. Bɨnɔn ze dɨ bebre tɨʼ é mɨlɔɔ.»

²⁰ Yesʉs ntɔʼ bâʼle lɛɛ ó: «Me ólɛɛ bɨn ó, jwɨ̀ʼa mo Zyɛm, yé enwɨɨla e wáa mbi sɔʼɔ ɨɨ?

²¹ Yé enwɨɨla ó, e levure nuu mʉma a syɛŋ e time bler, kwoʼ be okilo mowʉm moba ɛ, to pyal é jɔʼ time waa, wé a vus wiwɛh ɛ.»

Ebe e tiʼ, lé é ban

²² Yesʉs a be ó lé etiʼbe bɨnkana e bɨnkana, le mokwar e mokwar, lé eto le eyeʼle bʉr zi e zi lé eto Yerʉsalɛm.

²³ Nuu mʉr ntɔʼ dî e Yesʉs ó: «Da, zê bʉr bé óbi tiʼ molu mo mpoʼ mɨmɛh ɛ, bé abuo ɛ?» Yesʉs ntɔʼ bɨha e nye ó:

²⁴ «Gbaʼ ga monyʉl lé eni é l'ebe ndɨ é ban ɨ. Me elɛɛ bɨn ó: buobuo bʉr, bé ósaa eni tɨ, bɛɛ abe e nkul.

²⁵ «É jɔʼ mʉr mbɛr ómʉa, ze pɨr ebe e l'engʉŋ ɨ, bɨn bé óliʼ kʉl. Bɨn bé ókwaʼle, é kwaʼle, kwaʼle, le ejebe ó: “Da ɔɔ! Ntaʼ, ze dib bɨh ebe ʉʉ.” Nye óbɨha ó: “Me adweʼe bɨn. Me agʉa nko bɨn duho e.”

²⁶ Bɨn bé ótaare lé elɛɛ e nye ó: “Da, bɨna ga ó b'a be lé ede-de le enyʉl-nyʉl gumo gwar. Ntʉʼ bɨh go a yeʼle-yeʼle é mɨmpaʼa mɨ nkana ga yina ba ɛ?”

²⁷ Nye óbâʼle lɛɛ ó: “Me agʉa nko bɨn duho e! Cyɛba ga ká ká, bɨn ontɔɔ o motie!”

²⁸ Gumo yaa ó bɨn bé ódɨ time le elwaare moje e, é jɔʼ bɨn bé óbee Abraham, Ɨzak, Yakɔb, le ogwiha o mɨlɔb mu e bɨdia é jwɨ̀ʼa mo Zyɛm, bɨn bɛɛ guhɔ kʉl ɨ.

²⁹ Bʉr, bé ófwal, baʼ lé eduho nko dobo lé emʉa ɛ; bʉʉ, duho nko lé lé eja ɛ. Bé óduho nko tin ndwe e nko tie. Bé òni é jwɨ̀ʼa mo Zyɛm, ntɔʼ kœb bɨdia byɔɔ tɨ, gumo bé ódi ondindil lé ede e.

³⁰ Bʉr o ndɨ é bananaʼ “mopihe” e, bé ócyɛb mofoʼ. Baa ndɨ bananaʼ “mofoʼ” e, bé óliʼ pihe.»

Yesʉs lé etooro bʉr o Yerʉsalɛm

³¹ É jɔʼ gwar yaa ó bʉʉ oFarizyɛŋ, bé a pyal gumo Yesʉs a be e. Bé e nye ó: «Pʉʼa wâ. Go toʼ gumo fih, ebe, njwɨɨbʉr Erod Antɨpas, nye ejɨ jʉ go.»

³² Yesʉs ntɔʼ bɨha e be ó: «Toʼ, to lɛɛ ga pɨpɨʼ tir waa ó: “Me dina ó lé edwih moleme le etiʼ mɨsyoblʉ muh le omɛn. Me òfwahle syɛɛ yam é l'elu elɛl.”

³³ Sa gwar, yé ekʉ jala ó, me toʼ e cyen yam dolo muh, le omɛn, le guu mɛn, ebe, yé ajala ó, ngwiha mɨlɔb, nye jʉŋɔ yʉʉ fum fih, njɨ Yerʉsalɛm.

³⁴ «Yerʉsalɛm, Yerʉsalɛm, gwɔɔ mʉr lé ebɛa jʉ ogwiha o mɨlɔb le elumo baa Zyɛm lé elomlo go e, mokoʼ e! Zɔʼ ntɨɛ me a be lé egwɨm syɛŋ bwan bo, mpʉ abyɛɛ-kuo lé esyɛŋ bwan be é mompaba me si ɨ, bɨn bɛɛ kʉ bene-bene bena.

³⁵ Dwɛʼa ga: mbɛr win, wé óliʼ fo! Me elɛɛ bɨn ó nɛɛ: bɨn bé aŋa ka bee me, to pyal é jɔʼ bɨn bé ólɛɛ ó: “Nyaʼ-nɔn, nye ó odumo! Mocyɛʼ mo mpom, mé swɨŋɨ é waa lé eze e die mo Da ɛ!”»