Kolosi 4 - Kálara Zyɛ̌m Edwán é mpʉ̌n

¹ Bɨn ojwɨʼa o molʉa ɛɛ! Dɨʼe sa ga molʉa mɨn bɨsyɛɛla ndɨ cɨcyel, byaa lé ejala ɛ. Ajɨha ga ó, bɨn nteme, bé ó e Njwɨʼa é lal mo Zyɛm!

Motɨɨ

² Diʼe ga nkehe, lé esa Zyɛm mɨnjwɨʼla é jɔʼ yiyɛh, le edwe nye ekiba.

³ Saʼ ga mɨnjwɨʼla nteme é l'efu lɨh, ó nye dibɨ bɨh zi ó, bɨh tuna Mbɨambɨa Lɔɔ we, ó bɨh pɛʼla lwib odim lé etiibe e Krɨst ɨ. Me kɛʼa é mbʉʼ ó, ebe lɔɔ me lé ebɛa tuno-tuno e.

⁴ Saʼ ga Zyɛm mɨnjwɨʼla é l'efu lɨh, ó me tuna we, pɛʼle mokan mpʉ yé lé ejala ɛ.

⁵ É jɔʼ bɨn lé ekœʼ ebò e cyen lɨn teme bʉr o ndɨ abe okristen ɨ, dɨʼe sa no e gwɨma ó, bé mɛʼla ó, bɨn bé ó mɨcɨcyoo. Dɨʼe sa ga ó, bɨjɔʼ bin bibyɛh, byé ó bɨn e mpaŋ nyɔm.

⁶ Mokan mɨn, mé ejala le ebe é jɔʼ yiyɛh ó, é mbɨa mbɨa, lwɨŋla e nyɔm. Gʉa bɨha ga e mʉr nyiwɛh mbɨmbɨa.

Moswɨhlɨ

⁷ Bɨsa bibyɛh lé etiibe e me e, Tisikos óka lɛɛ bɨn bya, nyɛɛ mʉr ndɨ mɨɔ kpɛl ga wina, le syɛl mosa mo Da Yesʉs ɨ. Nye ó mʉr ebuʼla, nye nteme mʉr bɨh e nɔɔ ndɨ é l'empomo e syɛɛ egwar ɨ.

⁸ Nye waa ó me a lomo bɨn ɨ, ó nye toʼ, to lɛɛ bɨn mpʉ tiʼ yih lé elaa ɛ, ndwe le egba bɨn nkul é monyʉl.

⁹ Me ebuulo nteme Onezimos, ndɨ mɨɔ kpɛl ga wina le mʉr ebuʼla ɛ. Nye ó mʉr a taare duho bɨn ye, ze kaʼ ɛ. Bé ótaŋle bɨn sa yiyɛh lé esyɛɛlɨ kaʼ ɛ.

¹⁰ Aristarkus, mʉr nwan yam ndɨ é mbʉʼ wâʼ ɛ, nye esoho bɨn. Markus, mɨɔ mo Barnabas, nye esoho bɨn nteme—bɨn mu ó si bɛa bi kalara me a tile, tiibe e nye e. ǃNye si ze gʉʼ bɨn ye nɛʼɛ, bɨn bé à gʉa bɨlan e nye.

¹¹ Yesʉs, waa ndɨ e lʉʉ die ó, Yʉstʉs ɨ, nye nteme ó lé esoho bɨn. É bʉr o nwan yam ndɨ é l'empomo e syɛɛ egwar, baa ndɨ esea é jwɨ̀ʼa mo Zyɛm ɨ, bʉr olɛl baa bé ome ó ndɨ é kul oYʉden. Bé a si bul gba me nkul é nyʉl.

¹² Epafras, mʉr a duho bɨn ye e, nye esoho bɨn. Nye ó kʉ be syɛl mosa mo Yesʉs-Krɨst. Nye esa Zyɛm mɨnjwɨʼla é jɔʼ yiyɛh é l'efu lɨn ó, bɨn kuma é l'ombɨmbɨa é mɨpaʼ mimyɛh, bɨn mu si gʉa bɨsyɛɛla Zyɛm lé egwɨm ɨ.

¹³ Me ekʉ boʼlo é lʉ we ó, nye elaŋle nʉa tuu é l'efu lɨn e bʉr o Laodisea, ndwe e baa o Ierapoli.

¹⁴ Dɔbra ndɨ nteme mɨɔ kpɛl ga wina Lʉkas bé e Demas, bé esoho nteme bɨn.

¹⁵ Soha ga me obuʼla ndɨ Laodisea ɛ, bé e Nʉmfe e bʉr o mbɛr Zyɛm lé eze gwɨhla-gwɨhla e be é mbɛr we e.

¹⁶ Jɔʼ bɨn bé óbe si sil lé eláa kalara nwaʼ ɛ, bɨn bé à cen bʉr o mbɛr Zyɛm ndɨ ɨ Laodisea ɛ. Bé nteme toʼ le eláa. Bɨn bé óka láa waa óduho nkana Laodisea ɛ.

¹⁷ Lɛŋɨ ga nteme e Arkipɔs ó: «Gbaʼ nyʉl é syɛɛ Da Yesʉs a lɛɛ ó, go sea ɛ. Go à loŋla ye.»

¹⁸ Moswɨhlɨ mpʉ mɛm Pol lé ebɛa tile-tile bɨn ó ma: Moswɨhlɨ mo Pol! Ajɨha ga ó, me ó é mbʉʼ. Mocyɛʼ mo mpom mo Zyɛm, mé swɨŋɨ é bɨn.