Kolosi 3 - Kálara Zyɛ̌m Edwán é mpʉ̌n

Tiʼ edwan é zyɛŋa ga wina boo Krɨst

¹ Ebe no, é mpʉ bɨn e boo Krɨst mu ó si pɛ̀hɔ é mofoo e, gʉŋa ga ó, bɨn bé ejala le esaa bɨsa ndɨ é jobo kʉ ɨ. Byé ó é gumo Krɨst lé edi é mbo ejʉm mo Zyɛm ɨ.

² Bɨsa lé epebre bɨn é mɨleme e, byé diʼe njɨ byaa bɨ jobo kʉ, abe byaa bɨ si nwa,

³ ebe, bɨn bɨ dwè. Tiʼ yin mu ó é l'efo boo Krɨst. Ebe no ó bɨtiʼ bin mu zyɛŋa boo Zyɛm ɨ.

⁴ Krɨst ó ndɨ edwe bɨna ga tiʼ molu mo mpoʼ mɨmɛh. É jɔʼ nye óbâʼle nyin bʉr é mih é kpɛŋlɛm ɨ, bɨn e boo nɔɔ, bé ódweŋɔ kum sama.

É mpʉ mʉr ndɨ ebi tiʼ molu mo mpoʼ mɨmɛh ɛ

⁵ Bɨfum bɨ nyʉl bin ndɨ eduho é si nwaʼ ɛ, teʼla ga bye. Yé ó ndɨ: elœʼ nyʉl é zi bɨduo, elama fwon lé edu njɨ bɨjyɛʼ, empime, esa bɨgwɨma bɨ ebebe, ecen mih é bɨsa byoonkan. (Ebe, mʉr ndɨ ecen mih é bɨsa byoonkan ɨ, nye ó asiila ba e waa lé edwiibɨ bɨbaŋabaŋa bɨdweʼle e!)

⁶ Bɨsyɛɛla bɨ ebebe bɨnɨ ó lé esa ó, Zyɛm kpaŋa empime e bʉr.

⁷ Molu pihe, é jɔʼ bɨn bé a kœʼ bebebebe ebò e cyen lɨn ɨ, lé a be nteme ó no.

⁸ No ó, banana, yé ejala ó, bɨn birɨ bɨsyɛɛla byaa bibyɛh: ekpaa mompime, ediʼa e leme, ebene bʉr, esa movoʼ, le elwib bɨlwib bɨ fulʉs.

⁹ Asa ga mpʉl paʼra win, ebe, bɨn bɨ bɛa bir mɨnjʉ̌m motum mɨn ndwe e bɨsyɛɛla bɨ tɨ.

¹⁰ Bɨn bɨ bwar mɨkan modwan: nyʉl dwan ndɨ edwanba é ngwɨa ocyecye e. Nyʉl dwan waa, nye edu dweʼle mo Zyɛm Kwihbʉr.

¹¹ É tiʼ edwan yaa, adu ga bwa mɨmbɛʼ ba: Nkʉ mʉr fih mʉr kɛ̀l, nye ó mʉr Grɛs, nkʉ nye ó Yʉden, nkʉ nye a be ó si saŋɔ mpʉn, nkʉ nye a baasaŋɔ mpʉn, nkʉ nye ó mʉr kul bʉr lé ebul cyɛlɔ ɛ, nkʉ nye ó mʉr kul bʉr o ndɨ ebul feha ɛ, nkʉ nye ó elʉa, nkʉ nye ó mʉr ndɨ é dia otî ɨ, ebe, Krɨst ó ndɨ lʉ sa yiyɛh é mɨpaʼ mimyɛh.

¹² Ebe no, é mpʉ bɨn mu mɨsaŋ mɨ bʉr mo Zyɛm, myaa nye a pɛh, myaa nye ndɨ ebul kpɛl ɨ, diʼe ga e njwɨʼa-nkoo paʼra win ndwe e ncwɨncwɨa. Filɨ ga monyʉl si. Diʼe ga bʉr o ndɨ é tala njwɨr ɨ, le bʉr o bihbe.

¹³ Dihba ga ebebe paʼra win, alwib. ǃƗ mʉr si fuuba be e lɔb, bé e nuu mbuʼla nɛʼɛ, bé ejala le epɛʼla bɨbaa bɨ ebebe bé a niʼla paʼra wɔɔ ɛ. Dɨʼe pɛʼla ga bɨbaa bɨ ebebe paʼra win mpʉ Da Yesʉs a pɛʼ byaa nye a niʼe bɨn ɨ.

¹⁴ É bɨsyɛɛla byaa bibyɛh, kpɛla ga, ebe, kpɛl ó ndɨ elar bɨn, ó bɨn diʼe mɨlɛra é mɨpaʼ mimyɛh.

¹⁵ Krɨst cyɛba bɨn é mɨleme, ó mɨleme min loŋla e motala. Ebe no ó Zyɛm a jebe bɨn ó, bɨn syɛŋa é nyʉl ngwar ɨ. Dweʼ ga nye kum é jɔʼ yiyɛh é bɨsa nye lé esa bɨn ɨ.

¹⁶ Mɛʼla ga ó, lwib mo Krɨst, yé loŋla mɨleme min. Dɨʼe dweela ga sikʉlʉ paʼra win, yaa ndɨ e l'ocyoo e. Dɨʼe dweela ga motɨɨ paʼra win. Jɛŋɨ ga Zyɛm oSam, e bɨjɛɛ bɨ Mbɛr-Zyɛm ndwe e bɨjɛɛ bɨfih Mbɨambɨa Sisim ódɨ lɛʼle bɨn ɨ. Bɨjɛɛ byaa, byé óduho bɨn é mɨmo si, lé edwe Zyɛm ekiba.

¹⁷ Sa yiyɛh bɨn lé esa, nkʉ yaa bɨn bé ólɛɛ ɛ, yé diʼe njɨ, pere e die mo Da Yesʉs. Dweʼ ga Zyɛm Sɔŋ kum, pere e die le.

Ebò e cyen kristen ndɨ ejala le ekœʼ œ

¹⁸ Bɨn bʉba, saʼ ga ojʉm bɨn mojoʼo. Baa ndɨ é zyɛŋa wɔɔ boo Da Yesʉs ɨ, bé ejala le edi no.

¹⁹ Bɨn ojʉm, kpɛlɨ ga bʉba bɨn. Daʼ bâm ga e be.

²⁰ Bɨn bwan, saʼ ga obyɛl bɨn mojoʼo, ebe, Da Yesʉs, nye ebee syɛɛla yaa mbɨmbɨa.

²¹ Bɨn osɔŋ, daʼ tooro ga bwan bɨn. Monyʉl mɔɔ, mé amu jaa cyɛʼ.

²² Bɨn molʉa, bɨn bé ejala le esa ojwɨʼa bɨn, baa ndɨ bʉr o si nwaʼ ɛ, mojoʼo é nko paʼ wiwɛh. Asa ga be mojoʼo njɨ é jɔʼ bé lé edwɛʼ bɨn ɨ. Mbi syɛɛla nɨ, yé ekʉ lɛʼle ó, bɨn bé ekolo be ó kola. Bɨn bʉr o ndɨ edwaabe Da Yesʉs ɨ, saʼ ga be mojoʼo ndɨ eduho bɨn é mɨmo si ɨ.

²³ Kʉ sea ga syɛɛ yin é dwiii. Sea ga no, é l'efu e Da Yesʉs, abe bʉr.

²⁴ Gʉŋa ga ó, Tî ga wina ókʉ dwe bɨn myɛna tɨ. Bɨn bé óbi tiʼ molu mo mpoʼ mɨmɛh nye lé ekomo bʉr be e. Mpaŋ njwɨʼa bɨn lé esea e nye e, nye ó ndɨ Krɨst.

²⁵ Syɛl ebebe nyɛɛ óbi sa lé ejala e l'ebebe le e, ebe, Zyɛm, nye adwaabe bʉr é lɔb mompom mɔɔ.