Kolosi 2 - Kálara Zyɛ̌m Edwán é mpʉ̌n

¹ Me ekpɛl ó, bɨn gʉŋa bim mɨtuu me lé ejaʼra e mye é l'efu lɨn ɨ. Myé ó é l'efu e bʉr o Laodisea nteme, ka kɛl baa bɨbɛh l'apa bee me mpom ɨ.

² Me ejaʼra e mɨtuu myaa ó, me gbaʼ bɨn nkul é monyʉl, le esa ó, bɨn syɛŋa é leme ncwɨncwɨa. Bɨn nkʉʼ gʉa buʼo ga yina é kpɛhla, sa ndɨ bɨn e buobuo nyɔm ɨ. Bɨn gʉŋa nteme Krɨst, mʉr Zyɛm a fol é lwib odim ɨ.

³ Ocyoo le ngwɨa wiwɛh, bɨn bé ejala le esaa bye ó, é Krɨst tʉŋlʉ, fum byé ndɨ mɨfela ɛ.

⁴ Me elwib e bɨn é mbi wiʼ ó, mʉr beʼ l'akʉa bɨn é zi lwib bɨkʉʉŋʉ bʉr lé emɛʼle e.

⁵ Yé cyecye ó, me ó é ncɛra e bɨn é nko paʼ nyʉl bɨpuno. No ó, é nko paʼ sisim, me yɛɛ ó kunokuno e bɨn. Me ó kʉ be é l'esama lɨn tʉŋlʉ, lé esoho lé ebee mpʉ bɨn dina lé ecyɛb é nkʉʼʉ ɨ. Me esoho nteme lé ebee mpʉ bɨn lé ejyɛʼ taa buʼo yin boo Krɨst ɨ.

Ebò e cyen obuʼla lé ejala le ekœʼ œ

⁶ Bɨn bé a si mɛʼle sikʉlʉ lé etiibe e Yesʉs-Krɨst, ndɨ Tî ga wina ɛ. Ebe no, é zyɛŋa win boo nɔɔ, bɨn bé ejala le ekœʼ ebò e cyen ndɨ ejala ɛ.

⁷ Buʼo bɨn ndɨ e ye e, yé paha mɨkaale. Yé toʼ dolo lé egwɨe le ebwaʼ. Jyɛʼɛ ga taa buʼo yin boo nye, mpʉ bé a dwe bɨn sikʉlʉ tɨʼ ɨ. Toʼ ga dolo lé edwe Zyɛm kum.

⁸ Diʼe ga ncye! Mʉr adil bɨn é l'olʉa é zi bɨkʉʉŋʉ bʉʉ bʉr bé elɛɛ-lɛɛ ó, byé ó «ocyoo o si nwa», byaa ndɨ eduho é mɨnjwɨr bɨmpam ga bina, nkʉ ntɔʼ ó, sikʉlʉ bʉr o si nwaʼ lé ekuhlo e. Mokan mɔɔ, mé aduho boo Yesʉs-Krɨst.

⁹ Kwɨmla mo Zyɛm Sɔŋ ndɨ anwɨɨla e waa mo yʉʉ sɔʼɔ ɛ, wé nteme, wé ó waa mo Krɨst, é nyʉl we tʉŋlʉ.

¹⁰ É mpʉ bɨn ndɨ é zyɛŋa win boo Krɨst ɨ, bɨn bɨ gwɨe é mɨpaʼ mimyɛh. Krɨst ó ndɨ lʉ, waa lé ejwɨʼ mɨsisim mɨ apum mimyɛh ɛ.

¹¹ É zyɛŋa win boo Krɨst, bɨn bé a si saŋɔ mpʉn ndɨ eduho boo Krɨst ɨ. Mpʉn waa ó ndɨ elɛʼle ó, bɨn bɨ dwih nyʉl bɨpuno é jɔʼ gwar. Bɨn bé a baasaŋɔ mpʉn bʉʉ bʉr lé esɛa e mobo e.

¹² É zi ndubo bɨn bé a nʉa ɛ, bɨn bé a si debe, bɨn e boo Krɨst é jɔʼ gwar e gwar yaa, bɨn e boo nɔɔ nteme ntɔʼ pàh, ebe, bɨn bé ebuʼla nkul nɨnɨ mo Zyɛm Sɔŋ, mʉr a pɛ̀h nye é foo e.

¹³ Molu pihe, bɨn bé a be ó mɨmuu é nko paʼ sisim, duho é motie bɨn bé a ntaa ɛ, ndwe e mbi bɨn bé a baateʼle nkul bɨpuno win ɨ. No ó, banana, Zyɛm, nyi sa ó, bɨn e boo Krɨst tiʼa zyɛŋa. Nyi pɛʼ bɨbaa bibyɛh nye a niʼe bɨna é lɔb motie mɨmɛh bɨna bé a ntaa ga ɛ.

¹⁴ Mɨtila myé a lɛʼle-lɛʼle mobe ga mɨna ɛ, nyi cyam mye é jɔʼ gwar, lé ebomlo mye é klos. Mɨtila myaa, myé ó b'a lɛʼle mompene bɨna bé a ntaa, maa mé a dɨ nwahle bɨna ga ɛ.

¹⁵ Mokʉa mo dɔm mɨsisim mɨ apum le moleme bé a be e me e, Zyɛm, nyi dɛʼ me. Nye a ntaa be é nkul dɔm ó, é jɔʼ Krɨst a dwè é klos ɨ. Nyi liʼe mɨsisim myaa é gœʼra-gœʼra, fwon wɔɔ lé enyin bʉr bɨbɛh é pono.

Adu ga ocyoo o bʉr

¹⁶ Ebe no, abir ga ó, mʉr láŋa bɨn baa ebebe é lɔb monyɔmlʉ mɨn le monyʉla mɨn. Bé l'ayi dwe bɨn mobe tɨ, nkʉ é lɔb mobʉʼ bɛɛ lé ebwal lé edu sa buʼo yɔɔ ɛ. Bé l'ayi láa bɨn baa ebebe é lɔb ebʉʼ le ebam le alomo bɛɛ lé ebwal ɨ, nkʉ é mbi bɛɛ lé edu motie mo moho saba ɛ.

¹⁷ Mɨlɔb mɨnɨ mimyɛh, myé ekʉ lɛʼle ó, njɨ sa mpa lé eze e. No ó, ocyecye o tɨʼ wɛɛ, wé ó é Krɨst tʉŋlʉ.

¹⁸ É mpʉ bɨn ndɨ afil monyʉl si e beengles, nkʉ dwiibɨ be e, ǃɨ mʉr si dwe bɨn mobe mo mpene tɨʼ nɛʼɛ, anʉa ga lwib ye, gba é nkɔb. ǃBé si bee bɨsa mpʉ bé lé enyin-nyin é lima nɛʼɛ, bɨsa byaa ó bé lé enʉa, gba é nkɔb. Mɨmbi mɨ bʉr myaa, myé ó lwɨŋla e nkɛa nyʉl. Bé enkɛɛ-nkɛɛ monyʉl mɔɔ ó, mbɛh, ebe, mɨpɛhla myɔɔ, myé ekʉ ka duho ó njɨ é nkul ebebe lɔɔ tʉŋlʉ.

¹⁹ Bé aka mɛr Yesʉs-Krɨst é kpɨɨɨ. Nye ó ndɨ lʉ, fum nyʉl lé ekab nkul we é bɨfum bɨ nyʉl bɨfih ɨ. Nye ó ndɨ esyɛŋ bɨfum bɨ nyʉl we, le elɛʼle bye mpʉ byé lé ejala le edira é mobɨl ndwe e mɨsihe e. Nye nteme ó ndɨ esa ó, nyʉl waa toʼ le egwɨe mpʉ Zyɛm lé egwɨm ɨ.

²⁰ Bɨn e boo Krɨst, bé a si dwè efie egwar. É mpʉ bɨn ndɨ no e, gʉŋa ga ó, sikʉlʉ bʉr o si nwaʼ lé ekuhlo e, yé aka be e nkul é bɨn. Ebe no, mʉr beʼ l'aka bâʼle du motie mo sikʉlʉ yaa, nkʉ bâʼle sa mpʉ sa lɛɛ ó, bɨn dina ó é nkɔb bʉr o si nwa.

²¹ Bʉr onɨ ó ndɨ elɛɛ-lɛɛ ó: «Abɨlan e yi. Aboblo yiʼ e nʉm. Akuna e yi.»

²² Bɨti byaa e sikʉlʉ yaa, byé ó sa bʉr bé a cyel. Winɨ mbi bɨti, wé ekʉ ka dwɛʼ ó, njɨ bɨsa lé elaa é jɔʼ bʉr lé ebɨlan e bye e.

²³ Bɨti byaa, byé enyin bʉʉ bʉr é mih ó, byé ó e l'ocyoo tɨʼ tʉŋlʉ, ebe, byé ó ndɨ elɛɛ ó, mʉr mbɨa ó, du-du mbi nyɛɛ lé ekpɛl dwiibɨ Zyɛm ɨ, le efil nyʉl we si, le edwe nyʉl we bɨntɨʼa. To kœb ó, byé abe e mpaŋ nyɔm. Byé ekʉ ka loŋlo ó, njɨ bɨbebebebe bɨgwɨma bɨ nyʉl bɨpuno ga wina.