Kolosi 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, lʉmlʉ mo Yesʉs-Krɨst é gwɨma mo Zyɛm, bɨh e mɨɔ ga wina Timote ó lé etile bɨn kalara nwa.

² Me etile ó, mɨsaŋ mɨ bʉr o ndɨ Kolosi, bɨɔ bɨh é zyɛŋa ga wina boo Krɨst, myaa ndɨ bʉr be ebuʼlɔ ɛ. Mocyɛʼ mo mpom e motala mo Zyɛm Sɔŋ ga wina, mé swɨŋɨ é bɨn.

Pol lé edwe Zyɛm ekiba

³ Bɨh bé edwe Zyɛm, waa ndɨ Sɔŋ mo Tî ga wina Yesʉs-Krɨst ɨ, ekiba é bɨjɔʼ bibyɛh, é jɔʼ bɨh lé ejwɨʼla e nye é l'efu lɨn ɨ.

⁴ Bɨh bé a si joʼo lɔɔ é lʉ win, é mpʉ bɨn lé ejyɛʼ taa buʼo yin boo Yesʉs-Krɨst ɨ, e mbi bɨn lé ekpɛl mɨsaŋ mɨ bʉr mo Zyɛm mimyɛh ɛ.

⁵ Sa nɨ yiyɛh ó, ebe sa bɨn ndɨ ebɛla, yaa ndɨ koma é lal mo Zyɛm ɨ. Bɨn bé ó e mbɛla waa é mɨleme, duho é jɔʼ bɨn bé a taare joʼo Mbɨambɨa Lɔɔ ndɨ lɔɔ cyecye ndɨ eduho boo Zyɛm ɨ.

⁶ Mbɨambɨa Lɔɔ, wé emyɛma é bɨn tʉŋlʉ, myɛma é si nwaʼ nyiwɛh, lé etɨe bʉr motum modwan, mpʉ wé esa é mbɛr Zyɛm win ɨ. Bɨn bé a be ó si joʼo bʉr lé elab lɔb ncwɨncwɨa mo Zyɛm, bɨn ntɔʼ gʉa jwɨʼ ocyecye ndɨ tɨʼ ɨ.

⁷ Lɔɔ waa, wé ó bɨn bé a joʼo boo Epafras ɨ. Nye ó mɨɔ kpɛl wih, mʉr bɨh e boo nɔɔ ndɨ é l'empomo e syɛɛ egwar ɨ. Nye ó syɛl mosa Krɨst a ntɨh bɨn, waa ndɨ mʉr ebuʼla ɛ.

⁸ Nye ó b'a lɛɛ bɨh kpɛl Mbɨambɨa Sisim a dwe bɨn é l'efu le obɨɔ ga bɨna ɛ.

⁹ Ebe no ó bɨh dina lé ejwɨʼla e Zyɛm é l'efu lɨn, agwaʼ ɛ. Taare é jɔʼ bɨh bé a joʼo be lé elwib, tiibe e bɨn ɨ, ze pyal é muh é dobo lɨ, bɨh bé esa Zyɛm mɨnjwɨʼla, ó nye loŋla bɨn pɨʼ ndɨ ó, bɨn gʉŋa bɨgwɨma bɨ leme we. Nye dweʼ bɨn ocyoo wiwɛh, le esa ó, bɨn gʉŋa mɨlɔb Mbɨambɨa Sisim lé eyeʼle e.

¹⁰ É mbi waa ó bɨn bé ókœʼ ebò e cyen lé ejala e Da Yesʉs ɨ, le esa sa nye lé ebul kpɛl ɨ. Bɨn bé óto dolo lé esa mɨmpaŋ bɨsyɛɛla bin bibyɛh, le egumo mɨmpaŋ mɨ mpumo lé ejala e nye e. Toʼ ga dolo lé egwɨe é pɨʼ, lé egʉa Zyɛm é kpɛhla.

¹¹ Bɨh bé esa nye mɨnjwɨʼla nteme ó, nye gulɨ bɨn é mɨleme, ó bɨn sea bɨsyɛɛ bɨ nkul mɨmbi mimyɛh é zi nkul we bɨna lé egumlo ga ɛ. Bɨn bé esea-sea no ó e bihbe, lé ejaʼra e mɨtuu, bɨn yɛɛ e bɨsʉhʉ.

¹² Bɨh bé edwe Zyɛm Sɔŋ kum, ebe, bɨn bé a si bi dia yin é jwɨ̀ʼa ye jwɨʼ gwar e gwar e mɨsaŋ mɨ bʉr be bɨbɛh, baa bɨn e boo nɔɔ mu si cenɔ é myɛn tʉŋlʉ ɨ.

¹³ Zyɛm, nyi syɛb bɨna ga e boo nɔɔ é mpel mo Satan, ntɛŋ bɨna ga é jwɨ̀ʼa mo Mwan kpɛl we.

¹⁴ Zyɛm a jɛna mobyaʼ, le edwih bɨna ga é mpila mɨsyem ga mina é pololo ó, é zi Mwan we. Mwan waa ó b'a sa ó, Zyɛm pɛʼɛ bɨbaa bɨ ebebe nye a niʼe bɨna ga ɛ.

¹⁵ Yesʉs-Krɨst ó ndɨ gulo mo Zyɛm Sɔŋ, mʉr ndɨ abe lé ebeɔ ɛ. Zyɛm a si cyel Mwan we é nkʉŋ efoʼ ndɨ é bul bwaʼ ɛ. Nye ó é cye yaa, é mɨcyea bɨsa bibyɛh kʉ,

¹⁶ ebe, Zyɛm a cye sa yiyɛh ó, é zi we: bɨsa ndɨ é jobo e l'ejyoo e, e byaa ndɨ é si nwaʼ ɛ, bɨsa lé enyin ndwe e byaa ndɨ anyin ɨ, mɨsisim mɨ apum ndɨ é dia taʼa ɛ, le myaa ndɨ e monkul monɨnɨ ɨ, le myaa ndɨ e jwɨɨ, nkʉ myaa ndɨ e nkul ɨ. Sa yiyɛh, yé a cyeŋɔ ó, njɨ lé ebœʼ kum we.

¹⁷ Nye a bɛa ó be, sa gwar apa cyeŋɔ. Bɨsa bibyɛh ndɨ tɨʼ ɨ, byé tɨʼ ó njɨ ebe syɛɛ ye.

¹⁸ É Mbɛr-Zyɛm tʉŋlʉ, Krɨst ó ndɨ lʉ. Pàha odwè, wé eduho ó, boo nye. Nye ó mʉr efoʼ a pàh é foo e. É mpʉ nye ndɨ no e, nye ó ndɨ elaa sa yiyɛh é modile.

¹⁹ Nye ecyɛb bye efoʼ ó, ebe, Zyɛm a ka bee embɨa é nko paʼ we ó, nye di ntinɨ e ntinɨ ó, é nye.

²⁰ Nye a nʉa tiʼa ó, mɨlɔb ndɨ paʼra wɔɔ e bʉr bɨbɛh ɛ, nye esa sàa ó, é zi we. Zyɛm a gba motala paʼra wɔɔ e bʉr ó, dumo e nye, é zi motié mo Mwan we a dwè é klos kʉ ɨ, dam be bɨsa ndɨ kaʼ é si nwaʼ ɛ, dam be byaa ndɨ é jobo kʉ ɨ.

²¹ Molu pihe, bɨn bé a be ó é ncɛra e Zyɛm. Taare é mɨleme min, kumo e bɨsyɛɛla bɨ ebebe bɨn bé a sa-sa ɛ, bɨn bé a be ó njɨ bʉr o dɔm mo Zyɛm.

²² No ó, banana, Zyɛm, nyi sa sàa paʼra win boo nɔɔ, ó nye nkʉʼ cyel bɨn é mih me mɨsaŋ mɨ bʉr, abe e mobe, abe e sa ebebe nye a ngbaa nwahle bɨn e tɨ. Nye a sa sàa waa ó, é zi mo Mwan we é jɔʼ Mwan we a bir tiʼ ye, le emɛʼle ó, nyʉl we, nye dwèʼ e.

²³ Yé be ó, bɨn bé eto dolo lé ejyɛʼ taa buʼo yin boo Zyɛm le ecyɛb é nkʉʼʉ nɛʼɛ, lɛɛ ó, mɨleme min, myé ódi é puuu. Mʉr apɨŋla ga é zi buʼo. Mʉr beʼ l'abir ó, bé saʼ ó, bɨn dehba, nkʉ jɨha Mbɨambɨa Lɔɔ wé a gba bɨn mbɛla é mɨleme e. Mbɨambɨa Lɔɔ waa, wé a ntɨhɔ ó, é si nwaʼ nyiwɛh, é nko paʼ sa yiyɛh Zyɛm a cye é si nwaʼ ɛ. Mɛm Pol a cyelɔ é syɛɛ ó, me lɛŋɨ bʉr wa.

Syɛɛ Pol lé esea Kolosi ɨ

²⁴ Banana, me mu ó lé ejoʼo bɨsʉhʉ ebe mɨtuu me lé ejaʼra e mye é l'efu lɨn ɨ. Mɨtuu Yesʉs-Krɨst a bwiʼ ɨ, myé ó me lé efwahle é bɨpuno byam mi. Me ejoʼo mogumba mo tɨʼ ó, é l'efu e nyʉl mo Krɨst, ndɨ Mbɛr-Zyɛm ɨ.

²⁵ Me mu ó syɛl mosa mo Mbɛr-Zyɛm. Zyɛm ó b'a cyel me é dia yaa, lé esa ó, me sea é l'efu lɨn, lé etuno lɔɔ we wiwɛh.

²⁶ Wé a taare be ó é lwib odim, sa Zyɛm a fol e mɨmya mɨ bʉr é buobuo e. Nye ka ze lɛʼle we é kpɛŋlɛm boo mɨsaŋ mɨ bʉr be.

²⁷ Zyɛm a be ó si bà jwɨʼ ndɨ e buobuo nyɔm é l'efu lɨn, bʉr o ndɨ abe oYʉden ɨ. Nye a be ó si gwih lwib odim ye ó, lé elɛʼle bʉr be ya. Nye a be si gwɨm ó, bé gʉŋa ye é kpɛhla. Lwib odim yaa, yé ó yi: Krɨst, nye mu ó é bɨn nteme! Mɨleme min, mi loŋlo e mbɛla ó, bɨn bé óbi kum tɨ.

²⁸ Ebe no ó bɨh lé emyɛm lɔɔ mo Krɨst é bʉr bɨbɛh ɛ. Bɨh bé ebal mʉr nyiwɛh, le eyeʼle bʉr bɨbɛh é l'ocyoo wiwɛh, ó bɨh nkʉʼ cyel be é mih mo Krɨst, bé osi kumo é l'ombɨmbɨa é mɨpaʼ mimyɛh é zi we.

²⁹ Ebe no ó me lé ejaʼra e syɛɛ yiʼ ɨ. Me ebaran e mɨtuu bɨsyɛɛ ó, é nkul ndɨ eduho boo Krɨst ɨ. Nkul we waa ó ndɨ esea é me tʉŋlʉ.