Jacques 5 - Kálara Zyɛ̌m Edwán é mpʉ̌n

Nye ebal obil o bɨsa

¹ Bɨn obil o bɨsa ɛɛ! Joʼla ga me. Jɨʼe ga. Tima ga ebe mɨtuu e mɨndɛl lé eze gʉʼ bɨn ye e.

² Okum win, wé ó bɨbol. Mɨkan min, mi bil mpumo.

³ Gol ndwe e mɔn yin, yi bil myeŋle. Myeŋle maa, me mʉr tɨ, mé óboʼlo mobebe mɨn. Mé nteme, mé ódiʼ bɨn kono mpʉ siʼe, diʼ-diʼ diʼɨ, ebe, bɨn bɨ komo okum win é komo, komo, dam ka be ó é jɔʼ yi, é dobo le etiʼ e mɨlɔb.

⁴ Bɨn bé a bi bɨmɔn bin byaa ó, twɨɨ-twɨɨ é myɛna mo osyɛl o mosa bɨn bé a lomo lé eto é mɨngol ɨ. Joʼla ga bɨpura byɔɔ! Zyɛm Nkul nyiwɛh, nyi joʼo bɨtim bɨ bʉr baa.

⁵ Bɨn bé a kpɛl é si nwaʼ ó, tiʼ entwɨʼ e nkul bɨtiʼ mɨmbi mimyɛh. To kœb ó, dobo bɨn lé esaa ó, bɨn bul díle e, yé ó dobo mɨmyaʼ lé etiʼɔ ɛ!

⁶ Bɨn bé a si dwe ocɨcyel o bʉr mobe mo twii ceme, le ejʉ be. Bɛɛ nteme, bé a be ó, abe e nkul esa bɨn mongan.

Bihbe

⁷ Ebe no, obɨɔ ga bam aa! Diʼe ga e bihbe, to pyal é dobo Da Yesʉs óbula ze e. Diʼe ga e bihbe mpʉ obèl o mompœʼ, ebe, bé edihbe-dihbe, ó peme bé a li le ebè e, yé guma mɨmpaŋ mɨ mpumo. Bé edihbe lé ebono ompie be efoʼ e baa be epihe.

⁸ Dihba ga. Tʉmɨ ga monyʉl, ebe, dobo Da Yesʉs óbula ze e, lé mu ó kunokuno le epyal.

⁹ Obɨɔ ga bam aa! Asa ga bɨpura paʼra win, ebe, Zyɛm nkʉʼ be, atiʼe bɨn lɔb tɨ. Tiʼà mɨlɔb ga wina mu ó kunokuno le epyal!

¹⁰ Obɨɔ ga bam aa! Toŋla ga bʉr o b'a ze e die mo Zyɛm lé egwih bɨna ga mɨlɔb mo Zyɛm ɨ. Bé ó ndɨ elɛʼle ebò e cyen bʉr lé ejala le ekœʼ œ. Bé a si dihbe mɨtuu e mɨndɛl.

¹¹ Bɨna bé elɛɛ ga ó, mʉr ósʉŋɔ mocyɛʼ mo mpom ɨ, nye óbe ó waa a dihbe mɨtuu ɨ. Bɨn bé a be ó si joʼo mpʉ Job a dihbe mɨtuu ɨ. Bɨn nteme bɨ bee sa Da a sa nye é jɔʼ epihe e, ebe, nye é mpwaʼ ncwɨncwɨa e njwɨʼa-nkoo.

Mɛʼla win, wé beʼ mpaŋ mɛʼla

¹² Obɨɔ ga bam aa! Yé dam be nyá, anyamle de ga mɨnkɛla. Agba ga die e «jobo» é mɨnkɛla, nkʉ die e «si», nkʉ guu mbi sa fih. Lɛŋɨ ga jɔʼ yiyɛh ó: «Eee!» é jɔʼ yé ndɨ «Eee!» e, nkʉ ó: «Hɨʼɨ!» é jɔʼ yé ndɨ «Hɨʼɨ!» ɨ, lé ekpɛɛ ó, bɨn bé amu nʉa mobe é mih mo Zyɛm.

Mɨnjwɨʼla

¹³ ǃƗ nuu mʉr é l'esama lɨn si bee ó, nye é mɨtuu nɛʼɛ, nye jwɨʼla e Zyɛm. Yé be ó, nuu mʉr, nye ó e bɨsʉhʉ nɛʼɛ, nye ejala le ejɛɛ Zyɛm osam.

¹⁴ Waa nyiwɛh lé esyɛb é l'esama lɨn ɨ, nye jeba ocyɛb be efoʼ o Mbɛr-Zyɛm. Bé óze jwɨʼla e Zyɛm é l'efu le, le elœm nye mulo, pere e die mo Da Yesʉs.

¹⁵ Mɨnjwɨʼla myaa, myé esaŋɔ-saŋɔ ó, é zi buʼo. No yé esa ó, Da tiʼɨ mʉr waa, lé egbɛl nye si. Yé be ó, nye a be ó si sa syem nɛʼɛ, Da ópɛʼ nye baa nye a niʼe é lɔb syem waa ɛ.

¹⁶ Ebe no, é jɔʼ bɨn bé ófuuba syɛb ɨ, mʉr nyiwɛh, nye ejala le egwih mɨsyem mye. Bɨn bé ejala le esa mɨnjwɨʼla é l'efu lɨn é l'efu ó, bɨn tiʼa ɛ, ebe, mɨnjwɨʼla mɨ cɨcyel mʉr, myé é kpahbe na.

¹⁷ Élie a be ó mʉr mpʉ bɨna ga. Nye a si jwɨʼla e nkul ó, mpie beʼ l'aka nwɨɨ, to pyal é jɔʼ mpie a bana cyɛb, aka nwɨɨ tɔɔ mɨmbu mɨlɛl e peh e.

¹⁸ Pie tɨ, nye a si bâʼle jwɨʼla e Zyɛm, to pyal é jɔʼ jobo, yé a fil mpie e, si nwaʼ nyiwɛh ntɔʼ bâʼle taare lé epah mode.

¹⁹ Obɨɔ ga bam aa! ǃƗ mʉr é l'esama lɨn si fuuba bɔʼa é l'ocyecye, nuu mʉr ntɔʼ liʼle nye é zi tiʼ nɛʼɛ,

²⁰ gʉŋa ga ó, mʉr lé ebee mɨɔ we lé esa syem, ze dwih mʉr waa é l'ebò e cyen le laa, bana cyel nye é mpaŋ zi ɨ, nyi sa ó, sisim mo mʉr waa bula bi tiʼ molu mo mpoʼ mɨmɛh. Nyi sa nteme ó, Zyɛm pɛʼɛ buobuo bɨbaa nye a niʼe é lɔb mɨsyem ɨ.