Jacques 4 - Kálara Zyɛ̌m Edwán é mpʉ̌n

Atia ga efo e si nwa!

¹ Mogo, mé eduho nko? Bɨduʼo, byé epa kʉ duho nko paʼra win? Byé eduho ó, é bɨbebebebe bɨgwɨma bɨn ndɨ e bye, byaa ndɨ elwimla e bɨn é monyʉl tʉŋlʉ ɨ.

² Bɨn bé egwɨm bɨsɔʼɔ. Sa gwar, bɨn bé abi bye. Ebe no, bɨn bé ejʉ bʉr, le ecen mih é bɨsa byoonkan. Sa gwar, bɨn bé abe e nkul ebi bye. Ebe no ó bɨn ndɨ esa bɨduʼo paʼra win, le esa mogo e. Bɨn bé abi sa bɨn lé egwɨm ɨ, ebe, bɨn bé ajaʼ Zyɛm ya.

³ ǃBɨn si fuuba jaʼ nye ya nɛʼɛ, bɨn bé abi, ebe, mɨpɛhla min, myé é bebe. Sa bɨn lé egwɨm ɨ, bɨn bé ekpɛl to lɨr ye ó, njɨ lé edu bɨgwɨma lé eduho é l'ebebe lɨn ɨ.

⁴ Odul be ozyɛm ofih ba! Zê bɨn bé apa gʉa ó, é jɔʼ bɨn lé etia efo e si nwaʼ ɛ, bɨn mu ó lé elɛʼle Zyɛm ó, bɨn bɨ tumo nye koo ɛ? ǃBɨn si nʉa tiʼa é leme win ó, bɨn bé ótia efo e si nwaʼ nɛʼɛ, yé elɛʼle ó, bɨn bɨ lihba bʉr o dɔm mo Zyɛm.

⁵ Kalara Zyɛm, nye elɛɛ ó: «Sisim Zyɛm a ntɨh bɨna ga ɛ, nye ó é bul mpam e we.» Anyamle toŋlo ga ó, sa Kalara Zyɛm lé elwib ɨ, yé ó mbɛh.

⁶ To kœb ó, Zyɛm, nye esʉ bɨna ga mocyɛʼ mo mpom é buobuo. Yé ó mpʉ yé ndɨ tila é Kalara Zyɛm ɨ. Yé ó tila ó: «Zyɛm, nye esa bʉr o ndɨ enkɛɛ monyʉl ɨ, mongan. Baa lé efil monyʉl si e nye e, bɛɛ, nye esʉ be mocyɛʼ mo mpom.»

⁷ Ebe no, filɨ ga monyʉl si é mih mo Zyɛm. Saʼ ga Njwɨɨ moleme mongan. Nye ókpɛɛ bɨn.

⁸ Dihla ga kunokuno e Zyɛm, nye nteme óze gʉʼ bɨn ye kunokuno. Jwɨ̀ŋɨ ga mobo mɨn, bɨn osyɛl o mɨsyem. Puba ga mɨleme min, bɨn bʉr o ndɨ kʉ kwɨh ɨ.

⁹ Bɨn bé ejala le edi ó e l'empime, jɨŋɔ modwe, myɛɛle é mih é puba-puba. Siila ga bɨdwo bin e modwe. Siila ga bɨsʉhʉ bin e mompime.

¹⁰ Filɨ ga monyʉl si e Da, nye nkʉʼ bɨn bɨn kʉ.

Asa ga movoʼ!

¹¹ Obɨɔ ga bam aa! Mʉr asa ga movoʼ paʼra win. Waa nyiwɛh lé efœʼ mɨɔ we, nkʉ dwe nye mobe e, nye mu ó mpʉ sa lɛɛ, nyi bee etie mo Zyɛm e bɨgwɨh. Mbi mʉr waa, nye aka be lé edu motie me. Nye mu lé ejwɨʼ ó, nye ó mbɨra kʉ, motie mɛɛ lé eliʼ si.

¹² No ó, Zyɛm, nye ome ó ndɨ etiile motie. Nye nteme ó ndɨ etiʼe mɨlɔb. Nye óbɛm dwe mʉr tiʼ molu mo mpoʼ mɨmɛh, nkʉ dimle nye. Gwɔɔ, mʉr lé edwe mɨɔ go mʉr mobe e, go esa nye no, dɔɔ waa yé?

Ankɛɛ ga monyʉl!

¹³ Joʼla ga me, bɨn bʉr o ndɨ elɛɛ ó: «Muh—nkʉ omɛn—, bɨh bé óto nkana fih nkana kɛ̀l, gumo bɨh bé ólɛŋ mbu ɨ. Bɨh nteme bé ósa mompɛma mɨh, lé ebi mpi tɨʼ e bɨsa bɨh bé óbɛma ɛ, lé ebula e mɨlʉ myé óntaa kʉ ɨ.»

¹⁴ Bɨn bé ecab-cab ó caba. Bɨn bé agʉa mpʉ tiʼ yin, yé óbe omɛn ɨ, ebe, bɨn bé ó mpʉ dwine lé enyin é ma peh jɔʼ, ntɔʼ dim é mih ɨ.

¹⁵ Sa bɨn lé ejala le elɛɛ ɛ, yé ó: «ǃƗ Da si mɛʼle ó, bɨh l'adwè nɛʼɛ, bɨh bé ósa sa sî sa kɛ̀l.»

¹⁶ To kœb ó, bɨn mu ó lé enkɛɛ monyʉl, le esa jaale. Gʉŋa ga ó, mbi nkɛa nyʉl waa, wé é bebe.

¹⁷ Ebe no, mʉr waa lé egʉa mpaŋ syɛɛla nye lé ejala le esa ɛ, ntɔʼ bula di, asa ye e, nyi sa syem.